Ванине (2011)/4
| ←III пелькс | Ванине (2011) by , edited by Разгуляева Т. В. IV пелькс |
V пелькс→ |
| Нуянь Видяз. Ванине: роман. — Саранск, 2011. — с. 74—84 |
[74]
| IV |
Мелявкс потсо пивтезь, кенярдозь, лиясто нусмакалезь, эзь марявояк кода ютасть телесь, мельганзо раужо, ашо ды пиже палянь оршниця тундось. Сась седе сэтьме, прянь ветямо маштыця кизэсь, састь мартонзо — певтеме тевтнеяк: кочкомат, тикшень ледемат-анокстамот, модамарень-мезень вальсемат... А кенерят «изнямост», ванат од, седеяк ламо тевень ковол сы — ожосо копачавить сюротне. Яволявтыть нуема шкадонть кочкодыктне. Эряволь сееремс «Нуеде!», сынь — «Коч-кодык! Коч-кодык!», моросост-тердемасост ледстнить ютазь шкадонть. Мезеяк а теят, а кардасак паксянь саразкенть, сонзэ эсензэ коензэ.
Иван чоподасто чоподас яксевти фермань тевть, кой-зярдо чикуншкава а понгони кудов ярсамояк. Покш тев — покш мелявкст. Куля апак капша чары-вели кудоютксо. Уш кавто ковдо ламо потявтомо а яки, олякстомтызь чачтомо. Кадовсть ловозь чить. Тень лангс апак вано, кудонь тевензэ топавты икелень лувсо: ушты, пиди-пани, скал потявты, муськи-лопавтни, шли-нарды... Пешксесэ, превть макссь авазо, ве таркасо а аштема. Якама, котьмама. Клавдянь кортамосо-«лыкама». Келя, икелень шкатнестэ, зярдо нусть тарвазсо, аватне сеедьстэ чачтнесть нуема таркасо, ладсезь-аравтнезь пулттнэнь лангсо. Сы авась паксясто — кедьсэнзэ тапаркске канды. Тарвазонзо-мезензэ сайсынзе кияк лия эли сонсь каясынзе лавтовонзо трокс. Секскак Куля чарась-велясь покш пекензэ лангс апак вано. Авазо ветексть истя чачтнесь. Соды. Кода а кунсоломс? Куля вейкеде пельсь — кодаяк а прамс, а томбавомс. Секс ванстсь эсь прянзо, тороземезь пекенть, эйсэнзэ зярс чоподасо эрицянть.
Чачтомо Куля стардовсь-куродовсь ашолгадома ёнов.
Иван голдорк стясь коникстэнть, капшазь оршнесь ды прянь-полдань синдезь ношкстась колхозонь сехте покшонтень кудос машинань кевкстеме. Мейле савсь тензэ чиемс удыця велеванть шофёронтень. Уш ашолгадозь сэредькстэнть салава кувсиця Кулянь ускизь шумбрачинь витема кудов. Иван лездась нинстэнь мейсэ маштсь. Совавтызе кудонтень. Максызе тензэ, палатав саемадо икеле, кансткензэ... «Ёнсто путовсь, паро, — кецнесь Иван чачтомкудонь кузтемаванть валгомсто. — Вастымизьгак парсте.» Тосто самодо мейле сон, кудов апак совсе, теке машинасонть ардсь фермав. «Кувать кирдевеме а карман, паряк, [75] часошка», — кирдсь превсэнзэ. Ансяк аволь свал лисни истя, кода арсят. Часонь таркас фермасо ульнесь чикуншкас: тень теема, тонань, те а истя, тона... Нинзэ варштамо пачкодсь шабра велень шумбрачинь кудос, зярдо чипаесь ушодсь нузякссто, прок мезде-бути арсезь, аловпандт кевереме. Чачтома кудось чувтонь, вейке этажсо, латозо жестень, артозь якстерьстэ. Вальманзо сэрейть-келейть, суликаст чипаенть пси вановттонзо цитнезь цитнить. Кундост артозь ашосто.
Иван панжизе кенкшенть. Алкине пирявкс экшсэ озадо аштесь, теке учось сыцят, ванстыцясь.
— Тон кинень? — кевкстизе Иванонь, ансяк панжизе кенкшенть, каштансто прянь ветиця, голландкань эчкесэ, уш аволь од, келей ловтаня чама ава. Лангсонзо пуворязь ашо халат. Прясонзо, коень коряс, сэрей ашо колпак.
— Нинь варштамо, — мерсь сыцясь цяр вайгельсэ, сеедьстэ лексезь.
— Кода фамилиязо? — эль эзизе правто Иванонь пильге лангсто эчке зэрниця вайгельсэнзэ сэтьмечинь покшось.
Цёрась талакадсь. Мериксэль Каргина, ды шкастонзо тертизе келензэ: Куля марто сынь вельсоветсэ апак тешкста, эрьвань фамилиязо эсензэ.
— Ы-ы-ы, Вачаева. Акулина Семёновна. Алкукс... Кода ёжозо? — эрязкалезь кортась «кородовксонть» икеле аштицясь.
— Чачтась. Байтяк шкадонть ютась. Цёрыне. Ёжозо вадря, — теке ушман прявтонстэнь яволявтсь кенкшень ванстыцясь. Эзь учне Иван те, васня казямокс неявиця ломаненть пельде, истямо паро вастома.
— Цёра? Цёрыне? — яла эзь кеме марязентень «од тетясь», комавтызе прянзо аванть чама малас ды сорныця вайгельсэ пшкадсь омбоцеде.
— Цёрыне! Оймак! — эчкензэ кондямо эчке вайгельсэ, цёранть лангс ванозь, мерсь мизолдозь каштан авась. Кеняркстонть Иван аноколь, теке эйкакш, цяпамо.
— Ы-ы-ы, ютан? Мон ансяк варштан. Алкукс...
— Мон теть невтян «ютан»! На, кирдть, — авась венстясь тензэ халат. — Каик лангат ды чийть. Колмоце палатасо.
Иван автордызе ашо халат нуланть «кшнинь», ней уш, марявсь, чевтедеяк чевте вайгель аванть кедьстэ, каизе лыйк-выр-вар лавтовонзо ланга ды, келейстэ эскелязь, эль а чиезь, тусь коридоронть кувалт, тей-тов ваннось, пельсь илязо менстя кенкшес [76] педявтозь ёвтазь номерэнть. Вана сон, колмоце палатась. Сон? Сон, сон... Ёжомарязь, сурэзнесэ зярыяксть вачкодсь ашосо артозь кенкшентень ды, меремань апак учо, чикорк панжизе сонзэ.
Ниле ломаньс нупальсэнть карадо-каршо кониксэ мадезь аштесть кавто ават. Кенкшенть эйстэ вить ёно, вить боканзо лангс мадезь, меште видьга човине вельтявкс ало мадезель Куля.Чамазо ловтаня. Ёжосонзо, рунгонзо кувалт венстезь вить кедьсэнзэ тапаркске — эйдине. Пакшанть сельминензэ вансть та-кода ингельёндт, лип-лип кончтасть верев, потолокс. «Вай, те мезе мартонзо? Аволь кольстязь сельме?» — кивчкадсь тандадомань мель Иванонь превсэ нинзэ ваксс пильге сурлангсо, салава ютамсто.
— Кода, кода марят прят? Ёжот кодамо? — тошкстась кенярксто пешксе вайгельсэ од тетясь коникенть видьс пачкодезь.
— Коданеят... — эзь кирдеве Кулянь мизолксозо, сельмсэнзэ невтсь удыця эйденть лангс. — Весемесь паро. Несак? Ниле килот...
— Ы-ы-ы, ды те алкуксонь Илья Муромец! Алкукс... — нильксэнзэ вельксс прянзо комавтозь, лангозонзо ванозь, мерсь Иван. — Маряви, монькс тусь. Алкукс.
— Тонькс, Тонькс,.. — пейдезевсь марязденть Куля.
— Мезе теть кандомс? Мезде ярсавлить? Ы-ы-ы, зярдо кудов?
— Мезеяк а эряви. Весемем ули. Кавто-колмо чинь ютазь, мерсть, нолдасамизь, — кеняркстонть аванть чевте, гулдордыця вайгелезэ чольдердсь чудикерькскекс.
— Содыя, карми цёрыне? То-та, — ледстизе цёрась талай шкань кортамост.
— Содан, валскень чис ваныцят, содан, — пеедькшнезь шнызе мирдензэ чачтыцясь, сонсь керш кедьсэ витнесь-вадяшась ёжосонзо лембе тапаркскенть ды мизолдсь. Кода а кецнемс, кода а экшелямс келей-кувака, эрьва ёндо пиже чувтосо-куракшсо пирязь кенярксонь эрькесэнть, зярдо учовсь ламо иень перть учомазо, зярдо маризе, окойники маризе эсь прянзо алкуксонь авакс, варчизе сэредьксэнть, мезесь теи сонзэ истямокс. Ней сон аволь чуказь пулт! Ава, товонь-умарень рангтыця-кастыця ава! Марямс эсь бельгинеть васень рангстамонзо те моданть лангс самстонзо — те каня а казне, а чансть?! Каня ули сэньсэ артозь-тапардазь модамасторонть лангсо теде виев, паро, менельс кузтиця ёжо?!
— Ы-ы-ы, мезе теть ускомс, мезе анокстамс? — омбоцеде кевкстизе Кулянь велькссэ аштиця ды сэнь сельмезэнзэ ваныця мирдезэ.
— Кода лемдесынек алянть? А? — апак учо полавтызе кортамонь лувонть коникенть вакссо аштемстэ Иван. — Тон иля пейде. Алкукс.
— Ну, тон уш нейке... — мизолксонь апак «мадсте», меельцекс мик пейдезевсь Куля. — Монь койсэ... Арась, арась, вана пурнавтано вейс ды арсесынек. Истя?
— Кода мерят, — потась, эзь карма пелькстамо Иван.
— Кашт...Сыргози, сыргози, некак, цёранок. Пекезэ вачсь, поте вешеме карми... .Ну, тон, теня, сыргак эно. Минь кавтошка чинь ютазь учомот карматано, — прядынзе валонзо Куля, мирдензэ лангс важовсто ванозь.
— Сырган... — мерсь Иван ды вадяштызе вельксэнть ланга каязь лавтовс Кулянь штапо кедензэ, меельцеде ютавтызе вановтонзо цёранзо ды нинзэ ланга ды састо, пильгесур лангсо потась, кутьмерьсэнзэ панжизе кенкшенть, ахолдась кедьсэнзэ ды лиссь нупальстэнть.
...Комсте ламо иеть ваясть шкань отьмантень Каргин Иванонь васень эйкакшонзо, тейтерензэ чачомадо мейле. Ней таго пештизе седеензэ одс, теке од шкастонзо, ютасть седейганзо сеть умонь-умонь «ливтниця» ёжотне, одс варчинзе танстест сеть талновтыця мелявкстнэнь. Кодамо чансть марямс «морыця» ёжонть — мон тетя! Кой-кинень сонзэ Пазось, эли уцяскась, а максни. Сеть педе-пес а содасызь эрямонть салонзо-растензэ... Иди истятнэнь вейкесь: а содыть эсь пайстомочидест.
Иван сась мекев фермав талай чикуншкадо мейле. Тосо тевтне мольсть свалшкань лувсо. Варштынзе конёвтнень — зяро чизэнзэ потявтозь ловсодонть. «Паро, паро, цёра, — прасть турвастонзо валтнэ, эзть кирдеве, зярдо неизе: мелень коряс потявтови седе ламо, течи валскеяк аватне эзть пота. — Каня те а изнявкс? — эсь пачканзо путсь питне малав иень перть теезентень. — Ужока, ужока, лавсь, лавсь теть муема... Монь эсень кудосо косо-бути усксеви, маряви, потмарсо... Алкукс. Мезть превть яжамс! Течике молема. Нурсекшнинь эйсэнзэ Иринань. Умок, вай, умок те ульнесь! Ы-ы-ы, сэтьмель пакшась, стяко а рангиль. Алкукс...
[78] Весть-кавксть люкштядьсак лавськензэ, ванат конясынзе сэнь сельминензэ, ушоды чуросто, удыцянь лексемасо лексеме. Ы-ы-ы, зяро седе мейле ютась, зяроксть чипаесь лиснесь? Зяро ризкст ульнесть авадонзо ды аванзо марто! Каня лововить... Тевень прядсынь ды сырган. Эряволь тень сеске ютамс, Кулянь варчамодо мейле. Сави омбоцеде пилыть чавомс. Кудов молема? А мезть. Видьстэ фермасто Эрьмезьвелев...»
.. .Чачома кудозо вастызе Иванонь, мерят, сельме понань пачк ванозь. Вальманзо потсто пекстазь вейс васодезь ашо шаршавнесэ, суликаст шанжавкоцттнэде ды челькеденть неявсть тусто сувсо вельтязекс. «Кода эряви весементь мельга яксемс! Вант ды вант. Апак вано, секень вант, кевеськак солы-калады», — ютасть юв-яв, теке вармавтомо прыця шожда ловбельгинеть, мельтне. Азорось кузсь кузтемпес, панжизе кенкшентень понгавтозь пекстамонть ды совась потс. Чаво, вайгелень а мариця стенатне вастызь чатьмонезь ды теке пеняцязь, мекс кадынзе. Сыненст ней сеедьстэ савкшны кунсоломс цирькунонь ды чеерень морот, вачо пеке карвотнень бизнэмаст. Нусманясто ваны, мезде-бути арси кельме, тия-тува лазновозь каштомось. Зяро эйкакшпингедензэ ледстнемат мартонзо сюлмавозь! Покштянзо кедьсэ теезь стуворонть, кияксонть, эземтнень, вальмаланготнень вельтинзе ашназа чельке. «Вана петя, вана мезе лиси, а карминдерят кудонть мельга якамо. Ды аволь ансяк сонзэ», — таго текеде арсезевсь цёрась. Маряви, тунь а умок гайнесть неть стенатнень ютксо эйкакшонь вайгельть — Каргонь эйстэст байтякольть. Те кудостонть сон туекшнесь армияв, те кудонтень, тосто велявтомадонзо мейле, совавтокшнось аванстэнь урьва — мазый, тевень вечкиця-теиця, седеймариця тейтерь. Кие содась, ваи иредстиця чеядавксонтень! Потязь потясы. .. Шкань ютазь тестэ, вана те эземпрястонть, ильтекшнинзе свалшкань эрямос тетянзо, мельганзо, зярыя иень ютазь, аванзо. Иеть стенатне ульнесть чачома пизэкс тейтерензэ туртов. Ютасть петне. Мадсь, оймась эрямонь морось. Сонзэ таркас кадовсть чатьмониця, ёвтнеме а маштыця каштомось, кияксось, вальматне, потолокось... Косат тон, Юртава?.. Эрямо лей... Сон келей, эрязкалиця, сон лотксемань а содыця.
Иван, лавсенть вешнезь, васняяк совась латалов. Вай, мезе тесэ ансяк арась! Лазпеть, тарабайкань чувтонь чарот, ташто, пельснаксадозь човар, зяро-бути лазнозь пенгть, ологат, эрьва кодат лия курмот-кармот. Кузнесь лангаст, кундсесь, шаштнесь кой-мезть таркасто-таркас, мучкась. Ап-чих, ап-чих! — зярыяксть [79] кешнесь судос эциця челькеденть. Стяко. Мезе вешнесь, прянзо эзизе невте.
«Секень вант, кудопотмарсо понгонесь сельмень икелев!» — путсь пе эсь мучкамотненень пельс чопода, челькев латалкссонть. Лиссь. Одс совась кудыкелев ды уцор-пацор ужос чавнозь трокскестэ кузтемаванть кузсь потмарс. Тесэ седеяк чопода. Муизе капазь-капазь «боровонть». Истя Эрьмезьвелесэ мерить почконь-трубань пельксэнтень, кона метрадо кувакасто вачкави потолоконть ланга-велькска мадезь, ды уш мейле нолдави латонть пачк верев. Лембесь, келя, седе кирдевезэ. Менель а уштомс. Истя, бешоконь, улияк.
Сельмтне аламонь-аламонь тонадсть сундерькс шкань чевте чоподантень. Кой-мезе кармась неявомо. Оно ташто, кандтнезь-каладозь карсемапельть, оно лато паймес понгавтозь пекшень зярыя тенстть, оно... Косо эно лавсесь? Иван састо ютась кудо-коняксонть пелев ды, окойники, эртевсь вешневксэнтень. Сон нежедезель конякс лазтнэс, аштесь «стядо». Теке учось мельганзо сыцянть. «Муевсь...» — шождынестэ таргизе оймензэ цёрась.
...Кузвелестэ Эрьмезьвелев ниле вайгельпеть. Зяро, чарькодеви, мекевгак. Машинасо ардозь — те мезеяк арась, а кенерят вал-омбоце ёвтамо — кудосат. Ялго — малав час сави пилыть чавомс. А уш канст марто неть вайгельпетне седеяк кувалгадыть.
Кевсэ ацазь кияванть Иван мольсь келейстэ эскелязь. Полавтнесть вейкест-вейкест Кулядо ды цёрадонзо ледстнематне. Лавсенть понгавтызе прязонзо, вельтявсь эйсэнзэ кутьмеренек. Ды кода лиякс кандомс? А мезть превть яжамс. Ён истя. Молемскак, кандомскак. Улевельгак лавсенть потмаксозо ведень а нолдыця коцтонь, истямо «латось» ванстовлинзить, улевельгак, куш кодамо — пезеря эли эчке канзёркс — пиземеде.
Каргонь Ванянь седеезэ моры. Кавто-колмо чинь ютазь сайсынзе чачтома кудосто нинзэ ды эйдензэ. Курок-курок кудост мазылгавтсы эйкакшонь кольнягай чова вайгель!
Кись келей, терди икелев. Оланясэнь сэрей менелесь, маряви, эль зуйни. Чизэ курок валги. Тандавтни полгаря вановтсонзо ды гувныця якстеречисэнзэ. Кортыть, вармас. Кадык вармас. Мезень берянесь! Ёжозо келейстэ эскелицянть паро. Мари, яки рунгованзо цёрань вий. Мейле мезе ниленьгементнень трокс эскельдясь? Каня те ламо? Эрьва чись, эрьва иесь — Верепазонть пельде казне! Виде, тевесь аволь ансяк эрязь шкатнесэ. Седе виде, кода сынь эрязь, кода ды кона видьга пештязь паросо эрямо паргось — вана мезде эряви арсемс.
[80] Каятотсь моторонь урнома. Чаво кияванть молицясь лоткась, велявтсь, варштась удалов. Ардсь сталмонь усксема покш машина. Ардсь вельть эрязасто. Ливтязь ливтясь. Мельганзо чадозь чадсь, даволкс чарась ашназа тюс челькень пуло. «Токазь илязо уле...» — мерсь эсь пачканзо Иван ды шаштсь кинть чирес. Увтось малавгадсь. Ветицянтень, кавтолдомс эзь савкшно, кись марявсь теинекс. Машинась эзь кунсоло, видьстэ эзь ветяво, ве чирестэ, ванат, «нолажты», омбоцес... «Мезеяк а неи, идемевсень видьме!» — мурнизе марямга сокорсто ардыцянть ды валгсь ки-лангстонть, куш эзь вечкевеяк келямс челькесэ вельтязь тикшенть потмова. Машинась, зэрнезь-урнозь, прок кудошка азаргадозь пача, ардсь кежензэ пандомо. Кинень? Кие ацирьгавтницязо? Лавсень кандыцясь лоткась ды лавсенть алдо вансь малавгадыця машинанть лангс, учось ютамонзо. Зярдо кадовкшнось эйзэнзэ тунь аламо, машинась апак учо пурдась сонзэ пелев ды кшнинь весе сталмосонзо, вийсэнзэ лангозонзо... Иван кенерсь ансяк рангстамо. Кивчк нурька пшти сэредькстэнть мейле сон уш мезеяк эзь маря... ваясь отьмань тусто чоподас.
Весе. Пе. Мезеяк уш Ванянень, Каргонь Иваннэнь, эзь эряво: а лавсь, а фермань тевть, а нинзэ сэнь сельметне, эзь эряво мик теке чистэнть чачозь, весть неезь цёрынезэяк... Матедевсь, мадстизь цёранть анамазонь раужо вийтне а сыргоземань удомасо. Весе, мезензэ ульнесть — кудонзо-чинзэ, превензэ, бажамонзо, мезе эрязь иензэ перть таштакшнось-пурнакшнось — кадовсть. Мартонзо мезеяк эзь сае. Мезеяк, мезеяк уш тензэ эзь эряво. Мекс, ёвтык Инешкипаз, седе сеедьстэ сайнят Тов паро, тевень вечкиця, ванькс ойме ломанть? Арсезь Тон тень теят? Эли улить Тонь таркас лия арсицяткак? Сынь чапить-вачкить раужо тевтнень?
* * *
Кузвелесь покш. Эйстэнзэ, тустосто касыця куракштнень ды сыре чувтотнень алга видьстэ-видьстэ молезь, вайгельпешкань ютко, Инелеесь. Сон ламодояк ламо пингень перть шаштсь чудильманзо чикуншка ёнов. Секскак пелеве ёнга кадовозь сэрей, венежа пандокс таргавиця кезэрень чирензэ ланга сравтовозь куринканть лемезэ Верепе. Седе алга, седе леенть ёнов таргавозь кувака куринкадонть мерить, кода ламо велетнева, Алопе. Сон явови кавтов. Пенть, кона чилисема ёно ды нежеди пиче вирентень, лемдизь Пичепекс.
[81] Инелеесь тесэнь таркатнесэ весемеде пек келей, домка, тей-тов пурдтневиця, свал ков-бути чииця. Ламодояк ламо пингень перть кадсь, чудильманзо аламонь-аламонь полавтнемстэ, шаштомсто, ламо чувар ды чуваров сюпав, коське шкастояк летьке, модат. Секскак тия куш кодамо пиземе илязо моле, сёксня эли ловонь соламодо мейле, велень петнень юткова ютават шожда карсемкасояк. Резинань кемтне эрявкшныть аволь свал. Эзть яжаво тракгортнэненьгак кудотнень икельга китне.
Покш велесь, сыре. Зярыя пингень перть эрьва мезть несь, эрьва мезде марсесь. Аволь аламо даволт-вармат ливтнесть вельксканзо. Аволь аламо кажот лиснесть тесэ: толгайкть, куломат, войнав ильтемстэ лайшемат, ведьс вайсемат, повсемат, саламот-коламот. .. А вана истямо апаро, кодамо лиссь умарьковонь чистэ Эрьмезьвелестэ Кузвелев кинть лангсо, эзь марсеве...
Дораень кудос ве чистэ мельцек-мельцек совавтсть лавсь ды якстере коцтсо вельтязь кандолазт. Эряволь кецнемс — совась од ойме, од вайгель, — морамс морот! Тень таркас — седеень ангориця-раздиця ризкс, сельведть, лажамот... Вастовсть куломась ды чачомась. Эрямонь кавто иетне, Истяяк эрси. Мезеяк а теят. Кеняркст ды сельведть... Конатнеде седе ламо? Кие онкстнинзе? Мейсэ? Секень вант, омбонстнэде. Кода иля онкстне, увти се ёнксось, козонь путневить-вачкавить пайстомочитне.
Иванонь калмамо састь аволь ансяк Кузвелень эрицят. Ламот пачкодсть чачома велестэнзэяк. Эрьмезьвелестэ састь сазоронзо, ялганзо, содавиксэнзэ. Ломантнеде пурнавсть ламо. Аватнестэ вейкесь прядсынзе кулозенть пряпесэ лажамо валонзо, ушоды омбоцесь, колмоцесь... Коесь эрзянь. Ванстовсь сон шабрацек аштиця кавто велетнесэ. Косояк лиясо истя пек а сювордави, истя а лепштяви седееть сынст марязь, кода тесэ...
Куля саизе лавсьстэнть сырнедеяк питней тапаркскенть, лепштизе мештезэнзэ ды лиссь кудостонть. Шалт, кадык сэтьмеяк, штатолонь качамо, штань чине, пачк ютыця кошт... Каня ён пакшантень? Кие-бути цёратнестэ мельганзо менстизе потолоксто лавсенть ды лиссь Куля мельга. Шабратнень потолоксояк ванстовсь чоблась. Понгавтызь эйзэнзэ совавтозь лавсенть. Азоравась, умок аволь од ломань, витнизе-сэвтнизе кендиненть, чевтемгавтызе тодовненть.
— Анок. Путык покольнеть, — ёвтась лездыцясь ды шаштсь, потась лавсенть эйстэ.
— Сюконян, Элюва патяй, — мерсь Куля ды путызе анокстазь [82] таркантень цёрынензэ. Тона, бешоконь, содызе аванзо, эли, паряк, мездеяк лиядо, — турвинензэ токинзе мизолкскень кондямо. «Маряви, нилькскем, пекинеть вачсь», — сась Кулянь мельс, сонсь юкстизе паля сивензэ ды макссь поте. Пакшинесь, видеяк, педязь педясь эйзэнзэ. Аламошкань ютазь нолдызе кургстонзо потепрянть, пешкедсь пекинезэ. Конявсть сельмензэ.
— Элюва патяй, зярс мадсь, вант, энялдан, аламошкас, кудов ютан, — пшкадсь Куля азоравантень.
— Чийть, чийть, дугинем! Кода а ваномс... — оймавтызе Элюва сырькаесь од аванть.
Куля тусь кудов. Совась ды ютась стядо аштиця, каштмолиця ломантнень юткова икелев. Стясь эземпрянть каршо. Вансь Иванонь ашо чаманзо лангс ды лажамо пацяпесэнзэ сайнесь эрьгекс лисиця сельведень байгинетнень. Керш кедензэ кирдсь кандолазтнэнь чиресэ, прок пельсь — иляст лавшомо пильгензэ, илязо пра.
«Сонсь пазось кучокшнызе тень ломаненть! — эвтсть прясонзо, айгизь ашо мельтнень нусманятне. Мекс истя курок саизь? Кие саицязо, кодамо танагай? Мекс истя эрявсь... Ие эринек. Трокс вал вейкенек-вейкенек туртов эзинек ёвта. Свал вейсэ, свал вейсэ, мелень ванозь. Мекс а поладомаль эрямонь те кинть? Чачтовлинь омбоце. Паряк, колмоцеяк нолдавлинь. Кортневельть вейкест-вейкест марто, налксевельть, превпявольть. Ней вана эйдинем ськамонзо, а сазорнэзэ ули, а ялакскезэ. Ськамонзо. Монгак ськамон. Мезе ськамон тееме мартонзо карман? Эх, Ваня, Ваня! Мекс, мекс истя шкадо икеле кадымик?.,»
Кудосонть марявить тошказь ладсо ёвтазь валт, стакасто оймень таргсемат, стенас понгавтозь частнэнь шкань онкстнема эскельксэст. Стувтызь, бульчом, лоткавтомс. Киртыжс понгавтозь чавачамось, коень коряс, копачазь келей ашо нардамосо. Азорокс маряви «упокоень» ловныцянть човине, сутявома канды ця-вельмевтиця вайгелезэ. Пазаватнень икеле стувор лангсо кандоньпайтнень велькссэ пикстердить-липнить штатолнэть. Эйстэст лисиця штань чинесь маряви кудонть келес. Лексеви стакасто. Пси. Кенкшесь панжадо.
«Чамас пек эзь мерькаво. Ансяк пиле вакссонзо неяви сэнь томбавкс, — арсесь Куля, — теке, мерят, уды. Вана сти ды путсы, кода свал, кедензэ лавтовом лангс. Ваня, Иван, мекс, мекс кадымик таго ськамон? Кие карми трямо-кастомо пакшанок? Мекс истя шкадо икеле туить?»
Култык-култык, вить, томбавозь пильгензэ аламнеде ускозь, [83] совась Григорий Павлович Паксеваткин, буесэнть вейсхозонь прявттнэстэ весемеде кувать ве таркасо важодицясь, мельганзо — вельсоветэнь прявтось ды парторгось. Ютасть ломантнень юткова ды чатьмонезь стясть кандолазтнэнь малас, Кулянь ваксс.
— Аламос, э-э-э, лоткадояк ловомодо, — саизе Григорий Павлович вановтонзо уловонть эйстэ, велявтсь ловицянть ёнов ды пшкадсь тензэ. Тона општась.
— Э-э-э, мон а содан, секень вант, тоначисэяк эрявить вадрятне, дёровсто ды парсте тевень теицятне, Иван Васильевич Каргинэнь кондятнэ. Э-э-э... кодамо тев тензэ, товарищти, эзь саво теемс, кодамо эзинек максне, тейсь шкастонзо, вадрясто, мелень путозь. Фермасонок э-э-э ламо скалт, вазт. Те покш хозяйства. Иезэнзэ сонзэ, э-э-э, теизе районсонть вадрятнеде вадрякс. Маштсь, товарищти, Иван Васильевич ве мельс само-савтомо. Лангозонзо пеняцицят арасельть! Куш Кузвелесэ истятнэде аволь аламо. Маштсь сон, товарищти, ломантнень седейс кинь муеме. А сёвномат, а ацирьгалемат коллективсэнзэ арасельть. Ды вана... истямо ризкс. Э-э-э, цёрынезэ чачсь. Те кецневти. Кемтяно, касы, э-э-э, тетянзо кондямокс.
Меельцекс ёвтазь валтнэде Куля эзь кирдеве, увсо лайшезевсь.
— Улезэ теть, Иван Васильевич, модась чевте алксокс, э-э-э, чевте прялксокс, лембе, э-э-э, «вельксэкс», — прядынзе Кулянь ильсеманзо пачк ризксэв валонзо Чудожовонь Дрига, «начальникень» кельсэ-валсо — Григорий Павлович. Прянь нолдазь, сон зярсыя аштесь — сырк эзь тее — кандолазтнэнь вакссо, теке удыця, кемевикс ялгаст икеле. Григорий Павлович кувакасто таргизе оймензэ ды, чишк-чишк эскелязь, лиссь кудостонть. Лия прявттнэ — мельганзо.
Сюкпря вейсхозонь прявтонтень. Кандолазт, крест, калмонь чувицят... — весе теевтинзе сон. Лездась ярсамопельсэяк. Мелявкстнэ аволь аламо. Лездыцявтомо Кулянень тюк саволь. Пидемань-андомань тевтнесэ превень максыцякс ульнесь авазо, пидицякс-паницякс — Кулянь сазоронзо. Ульнесть лездыцят Иванонь малавиксэнзэ пельдеяк. Андомс зняро ломанть — тевесь аволь шождынетнеде.
Ильтеме сыцятнень ютксо неявсть Куля марто вейсэ важодиця ялганзояк: Укшторонь Таня, Шорянь Агай, Пупоронь Люба, Цянтаронь Лида, чова рунгине, однэ, мекс-бути сеедьстэ нусманя Валя. Кукорьгадозь аштесь допрок шержей пря, раужосто [84] оршазь Клавдя авазо.
Вальмало, стамбарнэ урнозь, учи машина. Кемгавтово часто мейле, илань коряс, мазылгавтозь, якстере коцтсо вельтязь кандолазсо Иванонь ливтизь кудосто, пильге ёндо икелев. Апак капша, мельга-мельцек валгсть кузтемаванть ильтеме сыцятнеяк. Мартост Куляяк. Уловонть кандыця цёратне састо нолдызь-путызь кандолазтнэнь машинанть удало кавто эземнетнень лангс. Куля стясь кандолазтнэнь чирес. Стясь вакссозонзо мендявозь рунго сыре авазояк. Ризкстэнть, сельведтнеде тейтерензэ сельмензэ якстерьгадсть. Шкань-шкань нардтни кедьсэнзэ кирдевикс ашо пацинесэнть. Ваны, ваны истямо содавикс, истямо малавикс, ней ожола-ашо чамазонзо ды яла тензэ а кемеви — весе, пе. Ризксэнть матравтсть цёрынедензэ ледстнематне. «Кода ней сон тосо? Эзь сыргозе? Пекинезэ эзь вачо? Кендинезэ эзь начко?» Куля меельцеде комась мирдензэ вельксэс ды палызе лов ашо кельме коняс. «Весе, прядовсь валдо покшчим...» — зярыяксть содавтнизе, сакшнось превзэнзэ виень саиця мелесь. Кие соды, кинень мезе аноксты сыця шкась? Буря, кандылов, цярахман, маней лембе чить... Эзь сода теде поланзо уловонзо вакссо аштиця Куляяк.
Цёратне стамбарнэ кепедизь кандолазтнэнь ды путызь удалкс ёндо панжадо кузовантень, мельганзо — крестонь таркас кшнистэ теезь вете ужо марто пирамиданть, кандолаз вельксэнть. Путсть керьме-омбоце пичень пиже тарадт. Кулянь мелезэль куземс кузовс, Ваня ваксс, ильтемс калмазырьс. Арась, истя эзь лисе. Эрявсь молемс эйдензэ варштамо.
Машинась эль марямга «паркстась» ды састо-састо сыргась таркастонзо...
Куля, начко пацинесэнть сельмень нардтнезь, кувать вансь «раужо» машинанть, мельганзо састо эскелиця-молиця ломантнень мельга. «Инешки, Верепаз, кавто иетькак эзть топоде, кода калмия Миколень, ней — таго кандолазт... Мекс, кодамо чумонь кис кучить тень зняро пиштемат-паломат?» — арсесь авась. Тусь, кадызе ней аволь малавиксэзэ, аволь мирдезэ — кадызе чанстезэ, кемемазо. Уцяска... сон алкукскак, — аволь нармунь, аволь кал, а кундави, а пиряви...
...Калмизь Иванонь чачома велень калмазырьс, тозонь, косо певтеме удомасо удыть покштязо, покштянь покштянзо, иньавазо, авазо, буень ламо малавиксэнзэ. Истя мерсть Иванонь сазоронзо. Истя тейстькак.