Поладкстомо (2016)/Улевельтькак Иерэнь кондят...
| ←Тувор | Улевельтькак Иерэнь кондят... (2016) by , edited by Ломшина Л. А., Маризь Кемаль, Малахова Е. П. |
Улемс вадрякс а шождыне→ |
| Нуянь Видяз. Поладкстомо. Без продолжения. — Саранск, 2016. — с. 194—201 |
[194]
| УЛЕВЕЛЬТЬКАК ИЕРЭНЬ КОНДЯТ... |
Сыргинек Петровкань вирев. Пенгс. Букасо. Сон латошка, сюронзо кувалмост, конянзо келезэ — метра малава. Тюжала пона. Эсь прянзо лови весемеде превеекс, кидеяк а пелицякс, виевекс.
Чипаесь анеявиксстэ, састо кевери аловпандт. Чокшнес, а мезть варштнемскак сырнень чаманть лангс, велявттано. Аштемковонть чинзэ аволь тошначинь явшиця рудазов сундерьковонть кондят — кувакат, ламо мезе кенерят тееме, ансяк иля нузялдо.
[195] Челькев кияванть буканок эскели букакс — апак капша, чатьмонезь. А эрязкавттанояк. Моли ды паро. Митя лелям, эзналянок, патянь мирдезэ, ды мон, крандазсонть ёнсто озадо аштезь, калякатано кудонь, велень ды колхозонь тевтнеде. Содамонок кувать урендясь-служась Васол Чилисема ёно. Ламо несь, ламо марясь. Кирдсь, кода кармавтсть, илязо каяво Япониясь СССР-нть, морясто моряс масторонть лангс. Самодо мейле урьвакстсь ды уш иешка эри велесэ. Сеедьстэ ёвтни тень тосонь эрямодонзо. Кунсолан. Черькстнян келем монгак — кевкстнян, мезе тень а чарькодеви.
Кизэнть мазый, вийс совамо шказо. Кинть кувалт куронь-куро якстердить, мизолдозь ваныть лангозонок чавкань прят, ожолдыть теке пизёлонь цюцёвт, сезялтикшенть панжовксонзо; типель-типель ливтнить велькскаст, пря трить, ашо сёлмине нимилявт. Мекс а ливтнемс? Менелесь сэтьме, лык а теи, ванькс. Чамастонзо а неят пель панкскеяк. Кекшнесть, та-кува важдамонь а содыйтне. Оймсить. Вийть пурныть.
Вадяшить-палсить пилем вакссом аштицянть соланя-валаня валонзо. Ломанесь сон од. Кортакшов. Вайгелезэ ванькс, верьга «ливтниця». Вечкеви кортамонь лувозо, Чилисема ёнксонь таркатнеде, тосонь койтнеде-илатнеде ёвтнеманзо.
Колмо-ниле вайгельпетне кадовсть удалов — эзть редявояк. Совинек вирьс. Тесэ, чувттнэнь пиже латост ало, седе чопода, летьке ды, мезесь сехте пек вечкеви, экше. Муинек «верде» саезь конёвтнесэ тешкстазь керямо тарканть ды шкань апак таргсе кундынек тевентень.
Сявордынек зярыя пекшеть. Цёк-цёк петнинек, пильсинек крандазонь кувалмосо ды кандтнинек ки чирес. Кепсинек чочкотнень крандазс. Пурнавсь эйбаро улав. Митя лелям вановтсо онкстызе покшолманзо.
— Ну кода, саевить? — гайгезевсь аламнеде цийниця вайгелезэ.
— Кортамскак а мезть, — апак кавтолдо ёвтыя мелем.
Букась, видеяк, шождынестэ, виень апак путо сыргавтызе улавонть. «Мезе те сонензэ?..» — меринь эськам.
[196] Вирьстэ лисезь, кись тусь аламнеде аловпандт. Сюракшонок апак лоткавтне, ливчанясто, теке псакат, кузинек вачказь чочктнень лангс. Буканок уски, прок трактор. Ансяк а урны.
Одтано. Ёжонок налксезь налкси. А маряви «вирень» сиземаськак. Эзинек редяяк, кортазевинек моротнеде: армиянь, олячинь, тундонь, сёксень, вечкемань...
— Армиясо монь сехте вечкевикс мором ульнесь «Легендарнаясь». Эх и морсинек сонзэ! Кода зэрневтьсынек, кода зэрневтьсынек — вайгеленек Китаень чиренть тона ёнояк марявить! — ледстнемадонть кенярдозь, капшазь ёвтни Митя лелям. Ды апак учо верьга вайгельть серьгедизе «вечкевиксэнзэ»:
Над тобою шумят, как знамёна, |
Морыцянть вайгелезэ човине — «васенце», сон ливтнезь ливтни мадеме пурныця паксятнень, кинть чирева тия-тува вастневиця кальтнень велькска. «Лемешевентень» мезекскак а маряви саемс сехте верце нотанть. Мороютконть серьгедемстэ монгак нолдтнян од атякшонь вайгелем. Улавонок тёкшкесэ озадо аштезь, жойсэ моратано. Кунсолодо, товзюронь-розень паксят, кунсолодо, нувсиця балягат, кунсолодо, Петровкань рузонь тейтерть. Меленек паро, тевенек а ашти, буканок уски — а паркстнияк.
«Наш паровоз вперёд летит, в коммуне остановка...» — морась седеем.
[197] Кода-бути пачкодинек — ледсь мелезэнек умонь-умонь, илязо уле «Волочаевские дни» фильмастонть, «По долинам и по взгорьям» морось. Стройсэ яксицятнень мельс, Митя лелянь валонзо коряс, сон пек эзь тукшно, оймеёжо эзь кепсе. Нусманячинь сув, келя, ланганзо каязь. Кадык! Мелень витезь «цитневтинек» сонзэяк.
И на Тихом океане |
«Концертэнек» кунсолость аволь ансяк кавто ёнга сравтовозь келей паксятне ды балягатне-тикшетне, кунсолось покш васоньпеелькс стявтозь пилесэнзэ Иер буканокак.
«Иер... Мекс истя лемдизь? Мезде корты те валось?» — моронть прядозь, апак учо содавтымим, валгсь превзэнь кевкстемась. Иер ды Иер... Минек велесэ те валось а марсеви. Пошань Аркай — уш оно кодамо «книгань пориця», оно кодамо содакай! — сеяк эзизе марсе. Кодамо смустезэ, алкукскак? Кие истя буканть тешкстызе? Паряк, колхозонь прявтось? Сон тень кувалма кол, сон лишмень ды букань попось.
Аловпандт кинь юткось прядовсь. Прядовсь «фестиваленекак». Уцор-уцор валгинек «сценастонок». Эно кода, Иернэнь яла седе шождыне ули.
Улавонть вакссо ялго молезь ютынек Ашо лейненть трокс каязь чувтонь сэдненть, удалов кадовсь Петровка веленть пезэяк. Ушодовсь вандора пандочамась. Видьстэ меремс, кодамо пандо — верев молиця кинь ютко. Ансяк... Мольтяно улавонть вакссо, вейкенек-вейкенек туртов валонь чуросто кайсезь. Пиксэнь ведьметне Митя лелянь кедьсэть: сон ветицясь, сон покшось.
Аламонь-аламонь ютавсь «кузиця» кинть пелезэ.
Апак учо Иер кувакасто лекстясь ды тоцк лоткась. Оймсеме? Венелев молемазо сась? Учотано — арась, учотано — арась. А арсияк. «Мезе-бути лия, аволь венельдема», — ютась прявам.
— Но-о-о, Иер, но-о-о, — чевтестэ, пеедькшнезь мерсь ветицясь ды весть-кавксть ноцковтынзе ведьметнень.
[198] Букась марикскак эзь тее. Мерят, лемензэяк стувтызе. Аламос аштезь таго — но-о-о! Каршонзо теке — а сырк а сорк.
— Вантака, теке арастянояк, — лангозом ванозь, пеняцязь пшкадсь Митя лелям. — Но-о! Но-о! — эзь кирдеве, ацирьгадозь серьгедсь «прявтом» ведьметнесэ каряз ланга а кунсолыцянть варсодемстэ.
Лезэвтеме. Чалгавксонзояк эзизе полавто. Аштесь таркасонзо, мерят, пильгензэ каназкадсть.
— Варчик тень, — венстинь кинть чиресэ касыця эрьба куракшстонть суронь эчксэ керязь илёв.
— Эрьга, — Митя лелям саизе кедьстэнь «кармавтомканть» ды аволь пек виевстэ, ёжомарязь, зярыяксть аваждызе ракшанть пильге ланга ды лия таркава. Таго теке — эзь киртято ве санозояк. «Каня овсе а марят сэредькс?» — токимим седейризкс пайстомо буканть лангс ванозь. Арась, эзь маря. Монь эзь маря, монь мелявксом.
Стинь икелензэ. Юксия ажия пес сюлмазь панстведьменть ды таргия чирькентень пезнавтозь чобластонть. Вадяшия ускицянок пондакш келей конянзо ды, дёлязь, кольневтезь «нонтъ» ёвтнезь, карминь икелев ускомонзо. Эзимим чарькоде. Эзь варштаяк лангозом. Прок кулось. Стядо.
Мезе ней теемс?
Ушодынек «вельмевтемензэ» кавто ёндо: мон ноцкаян панстновтасонть, Митя лелям «каванякшны» Иерэнь удалдо — ведьметнесэ ды илёвсонть. Стяконь мелявкст! Чавт куш куломазонзо. Аволь вий путомс, нежедемс, ноцковтомс — сыркак эзь тее.
Чарынек «тракторонок» перька час малава. Аволь ансяк «кайсинек» тензэ — кортынек-энялдынек, тердинек мельганок, андынек кшикочомонокак. Ялатеке тевенек эзь лисе. Иер аштесь ажиятнень ютксо — теке кежть пандсь.
Мезе теемс? Кода улемс?
— Сави шождалгавтомс, — стакасто лекстясь Митя лелям ды ёртынзе ведьметнень буканть лангс, — лиякс, ванан, мезеяк а лиси.
Чочктнеде верде алов бухаинек зярыя. Кадынек пельулав. Кеминек: тень уш Иер изнясы. Мезе те сонензэ?
[199] Саинь лангстонзо ведьметнень.
— Но-о-о, Иер! Но-о-о, нузяй!
Бабань пеште! Майсевтицянок текень содась — а сырк а сорк. Аштесь, мерят, почо видьга модантень ваясь.
— Сави таго зярыя валгстомс, — меринь кежтнень кирдезь ды ёжонь каладозь.
— Сестэ уш чаво крандаз кадови. Сон мезе, ормазкадсь?! — машнетезь серьгедсь Митя лелям ды вырк кузсь крандазонтень. Мон мельганзо.
Кадынек ниле-вете чочкот, седе эчкетнеде.
Ней уш...
Виде, сюракшонок, прок лангсонок пейдезь — изнясь! — тарск тейсь, ды улавось чи-и-корк сыргась таркастонзо, буканок састо эскелязь поладызе кинзэ.
Ну и тевть...
Вана пандопряськак.
«Мезе, ниле-вете чочко марто кудов? Лиятнень кадсынек? — кашкасть прясон кевкстематне. — Эли кандтнемат сявдикс лангсо? Васоло. Пельвайгельпешка. Вельть уш псить кармить улеме пенгетне. Ды буканок ськамонзо кудов илязо туе».
— Туи-арась, карматано кандтнеме, — теке маринзе арсемам, путсь пе кавтолдоматненень эзналям, ды сыргинек мерезенть топавтомо.
Састь сундерькст. Тия-тува пувавсть-вельместь оланя тештинеть. Маряви, цитнить-кончтнить ды паронь арсезь тошкить тенек: «Капшадо, цёрат, капшадо! Кизэнь весь аволь раужо сёксень. Пачкодеде кудов куш ашолгадомадо икеле».
Псилгадынек. Оно зярс карязт яжинек. Чинь псинть матрамозо дух а маряви.
Кепедьсынек, петнес кундазь, кандонть, путсынек лавтов лангс ды, сеедьстэ-стакасто лексезь, лунтик-пентик икелев — пандыненть тёкшкес, косо учи, кемтяно, буканок. Зяро истят «рейст» теинек? Эзинек лово. Корты эйстэст лангсом майкась — хоть пурдык, лоподсь сурень пес. Васня машнетинек, рангомас пачколинек, мекс [200] ракшанок кевензась, таркастонзо а сыргави, ней, мекевланг, кецнинек аштемазонзо. Окойники, носкозь-пувсезь, пачтинек меельце чочконть. Модас апак нолдтне кепединек ды кода эряви аравтынек улавонтень.
«Таго илязо ордадо...» — токимим ведьметнень саемстэ навола кельме мель. Сюк Инешкинтень — истя эзь лисе. Иер нежедсь пилысэнзэ модантень, венстизе, ускозь, сивексстэнть прянзо, ды крандазось чикор-чикор сыргась таркастонзо.
Ва-ай! Прась, марявсь, лангстонок а онкставиця сталмо.
Вана Иерэнь эскельксэнзэ келейгадсть, тусь седе эрязасто. Минь мельга-мельцек дубор-габор кузинек чочктнень лангс.
«И на Тихом океане свой закончили поход!..» — кеняркстонть, сиземанть лангс апак вано, верьга вайгельть серьгедсь Митя лелям — колызе моросонзо удыця вень каштмолеманть.
...Ёгань ды Микеень кудосо вензэ перть палсь тол. Эзть удо. Учость цёраст, вирев пенгс туицяст: сыненст мурдамаль-самаль чинзэ валгома шкасто. Мадсь чипаесь. Сундерьгадсь. Сась ве, кармась ашолгадомо. Цёратне яла арасельть, арасельть...
* * *
«Иердема» ды эйстэнзэ лисиця «иердемс» валтнэде карминь содамо допрок шержейгадома, сормсевезь умарекс теевема шкастом. Секс, чарькодеви, а содылинь Иер буканть лемдензэяк. Валкстнэва азгондемстэ-шатамсто эртевинь эйзэст ды эль эзинь пра кецямодонть: «иердемс» — теемс мезеяк киньгак апак кунсоло, мезе лангскак апак вано, эсеть ладсо-мельсэ. Рузокс — «упрямство», «упрямиться». Теде соды эрьва-эрьва пакшась. Те рузокс. Эрзякс вана... Секскак ёнкставинь мельденть: кодамо сюпаволь эрзянь келесь валсо-гайтьсэ!
Виде, валонть зэмензэ а содылия. Сень кис автобус-со-косо, мик кудосояк, седе сеедьстэ рузтнэнь кургсто, [201] ламоксть савкшнось марсемс: «мордовское упрямство», «упрямый, как мордвин». Койсэнь, те малавгак а виде. Васняяк, кие те «мордвинэсь»? Эрзятне? А кемеви. Улевельтькак икеле, умок-умок эриця эрзятне, покштянок покштяст, Иер буканть кондят иерат-иердицят, Модадост, Чачома Мастордост авольть пота, келест ды кортамост-морост ёмамо аволизь кадо.