Руч сизькӧд

by Лыткин Георгий Степанович

Сизь (кыр) тупу вылын поз керис, куим кольк вайис, куим дзоляӧс пукӧдліс. Руч исйӧдчис сы йылысь, котӧрӧн воис, паськыд бӧжнас уль тупуӧ вартіс: «Лэччы, сизьӧй, тупу вывсянь; тупу меным колӧ тув керны». — Ручӧй, ручӧй! Меным тэ эн лэдз ӧти дзоляӧс быдтӧдны».

«Сизь! Чӧвт меным: ме велӧда сійӧс дорны». Сизь чӧвтіс, руч нӧ идз сайсянь идз сайӧ, вӧр сайсянь вӧр сайӧ, сэсся сёйис».

Мӧд лунӧ руч бара котӧртӧ сизь ордӧ, паськыд бӧжнас уль тупу вартӧ: «Лэччы, сизьӧй, тупу вывсянь, тупу меным колӧ тув керны». — «Ручӧй, ручӧй! Меным тэ эн лэдз ӧти дзоляӧс быдтӧдны». « Сизьӧй! Чӧвт сійӧс ме дорӧ, ме велӧда сійӧс кӧмкот вурны». Сизь чӧвтіс, руч нӧ идз сайсянь идз сайӧ, вӧр сайсянь вӧр сайӧ, сэсся сёйис.

Коймӧд лунӧ бара котӧртӧ руч, паськыд бӧжнас уль тупуӧ вартӧ: «Сизь! Лэччы тупу вывсянь, тупу колӧ меным тув керны». — «Кутшӧм тэ, ручӧй! Мый эськӧ сетны ӧти дзоляӧс быдтӧдны». «Сизь! Чӧвт сійӧс ме дорӧ, ме велӧда сійӧс паськӧм вурны». Сизь чӧвтіс, руч нӧ идзас сайсянь идзас сайӧ, вӧр сайсянь вӧр сайӧ, сэсся сёйис.