Эрязденть арсезь (2010)/"Прощай, Баку..."
| ←Чачома келень симфония | Эрязденть арсезь (2010) by , edited by Разгуляева Т. В. «Прощай, Баку...» |
Орданьбуесь — монь лавсем. Вастома→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 195—199 |
[195]
| «Прощай, Баку...» |
МОЛИ репетиция. Сцена лангсо тонавтнить совсемат-лиснемат, яксемат, театрань кельсэ — мизансценат. Ролень налксицятне валакавтнить «Репка» пьесастонть кедте кедьс кундазь чарамо-велямо пельксэнть. «Эрязасто, эрязасто! Даволкс!» — марсеви залстонть Варшавский режиссёронть вайгелезэ. Минь, декоратортнэ, тевень аразде човсетяно кельть кулисатнень маласо эсенек «зепсэ». Кие-бути артисттнэде истя лемдизе минек комнатанть. Минденек башка тезэнь пурнавкшныть антрактсто ды рольс совамодо икеле ды мейле актёртнэяк. Сынь вечкить раксеме вейкест-вейкест лангсо. Михайловонь, «Рейкасто» кувака пуло псакань налксицянть, куш кшидеяк иляк андо, ансяк макст тензэ келензэ човсемс.
Кенкшенек панжадо. Мезе моли сценанть лангсо, неемс седе парсте а нетяно, марямс — марятано. Апак учо каятотсь тандадомань шалт.
Выр-выр лисинек «зепестэнек». «Мезе лиссь, мезе?» — каятотсть талныця граж вайгельть.
Кить репетировасть, пурнавсть, аштить сценанть чиресэ, [196] оркестрань латконть велькссэ. Веенстнэ талнозь явшить превть — мезе теемс, — омбонстнэ прянь нолдазь ваныть алов, латконтень. Колмо-ниле од цёрат ношкстасть алов, оркестровкав.
Лиссь вана мезе.
Вармакс чарамсто ролень налксицятнестэ кие-бути менстизе кедензэ, ды, кие ульнесь сценанть чиресэ, стардовсь тезэнь, сэрьсэнзэ прась оркестрань ямантень. Понгсь тозонь Любаня. Од тейтерне, кона аволь умок сась тенек «самодеятельностьстэ». Кода а весть тешкстакшнызе Варшавский режиссёрось, налкси талант марто. Любанянень допрок а порксавомс лездась контрабасистэсь, од, крежа цёрась. Тейтересь прась прянзо, лавтовонзо лангс, тосто авол-увол нолажтсь кияксс. Тандадомадонть ды сэредькстэнть цёрась сеске эзь ёвтаво валгак, нолдызе кедьстэнзэ седямопелензэяк.
Куроксто сась «капшакай», ды апарос понгицянть саизь мартост ашосо оршазь кавто ават. Ильтемензэ якицятне ризксэнь марязь, куроксто ёвтызь: тейтеренть томбавсь прязо ды сивсь кенерепакарде алга кедезэ.
.. .Любаня арась ютксонок омбоце тарго. Раминь печеният-жомкат, покш якстере умарть, виноградт ды сыргинь. Любанянь варштамо. Тейтересь мондень иеде-кавтодо седе покш. Мелезэнь тукшны мартонзо кортнемс, ёвтнемс тензэ эсь мелявкстон, арсемадон, кунсоломс сонзэ. Ванан мелензэ, салавине, эсь пачкан, вечкса сэтьме вечкемасо.
Палатась покш. Кеменьшка ломаньс. Совить-лисить, лиятне мадезь, кой-конат аштить озадо. Любанянь коникензэ редия сеске. Вальманть вить чиресэ. Виздезь ютынь малазонзо. Тейтересь аштесь кунст мадезь. Прялксозо сэрей. Чамазо, марявсь тень, аламнеде кувалгадсь ды ловташкадсь. «Сельмензэ, — арсезевинь, — седеяк сэньшкадсть». Велькссэ копачазь мештензэ лангсо — марлясо тапарязь кедезэ.
— Вай, те кие?! — эзинь кенере ёвтамо вал, мизолдозь лангозон ванозь, пшкадсь, икельдимим сэредицясь.
Аламнеде кепедизе прянзо ды шумбра кедьсэнзэ пштидинзе валдо черензэ човонензэ алов.
— А содаван? — муст-муст пейдезевинь каршонзо.
Любаня шаштсь стенанть ёжос. Чамдсь тень тарка.
— Озак!
— Сюкпря, — меринь эль марявиксстэ ды озынь коникенть [197] чирес. — Ну, кодат тевенек, мезть яла кортыть доктортнэ, Любаня ялгинем?
— Вадрят, — маринь кемевикс вайгель, — пеняцямс а мезе лангс.
— «Вадрят» — вадря марямс. Вана теть кандынь кой-мезть, седеяк вадрялгавтыцят. Виноградт-мезть... Козонь путомс?
— Вай, ды тон мезе? Монень мезеяк а эряви... Монь улить, — чирькатевтизе прянзо.
«Монологонзо» учомо эзинь карма. Панжия пряпесэнзэ тумбочканть, ландинь ды казнень путынь тозонь.
— Ванан, кеднесь тонь яла ашосо мазылгавтозь, — сурсон невтинь синдезь кедензэ лангс.
— Вай, ды те мезеяк арась! Гипссэ. Тонсь содат, сави кандтнемс. Юты, — оймавтымим Люба, сонсь ёжонь марязь вадяшась томбавозь кедензэ.
— Кода прясь, мон маринь...
— Ней истя а лоскаети. Аволь кода васень читнестэ.
— Кода те апарось лиссь, прамось? — кевкстия тейтеренть ды янксезевинь: мезекс те?
— Вай! Теде а мезть ледстнемс. Мезе лиссь — лиссь. Паро куш истя, — лавшо вайгельсэ, тошказь ды мекс-бути потолокс ванозь, ёвтызе мелензэ. — Кодат тевтне театрасо? Се пьесанть эзизь кадо?
— Эзизь. Репетировави, нолдамонзо, кортыть, кармить, — оймавтыя Любанянь. — Тонь таркасо, тонь роленть налкси Виноградова.
— Вана мезе... Тон ёвтыка, мезе арсят тонавтнемадот? Театральнойс? А? — полавтызе кортамонь чудильманть пичксицясь.
Мон чатавтыя прям.
— А содан, — ве валсо, кавтолдозь-арсезь, ёвтыя мелем.
— Вай, те кода? А чарькодян. Тон истя бажить понгомс театрас, снартнить максомс экзамент институтс, улемс натой... сонсензэ Станиславскоень кондямокс, — псистэ, мик аламнеде ацирьгадозь, ёвтынзе валонзо Любаня.
— Вана истя, — прянь нолдазь, теке теинь кодамояк визькс, апаро тев, видькстынь вакссон мадезь аштицянтень.
— Мезе, актёртнэ, уцяскавтне-аволь уцяскавтне, кардыдизь? Сынь яла, марсинь, теть моро моравтыть: кадык театрадо арсематкак, стувтык те валонтькак, тевтнеде-профессиятнеде ламо, вешнек, кочкак. Истя? — поладынзе валонзо Любаня ды варштась лангозон, учось, мезе мерян каршо.
— А-а, оно мейсэ тевесь, — арсезевсь ды сюмордозь ёвтынзе валонзо «тонавтыцям»: — Эх, тон! Мон арсинь — цёрат! Тей-тов нурявомо а кармат. Тон вана...
— Мон а чуман — истямокс чачинь. Алкукс. А содан, монськак а содан, мекс театрантень кельмеме карминь. Косто, кона ёндо лекстясь экше вармась? Ульнесь бажамом, нилезь нилинь перькан кувтолдыця одонть, вечкевсь ды нейгак вечкса сцена лангсо эрямонть, ансяк те весе та-кода а монь. Монь свал истя: асодавикс тевс, кодамояк лия масторс совамсто кенярксось потмозон а кельги; зярдо тевесь, конас капшинь, топавтови, вечкемам ёми. Шахматсо налксеме, Любаня, маштат?
— Вай, а содан, мезе меремскак. Маштан, ансяк аволь пек, — видькстась кунсолыцям ды эль-эль лыкавтызе прянзо.
— Монгак. Ансяк налксинь тонадомазон. Седе мейле пешкатнень-ферзятнень кедезэньгак эзинь сайне. Весе, прядовсть шахматон! Текекс ёмась мелем футболонтень, Левитанокс-кикс улемантень. Монь мельс тукшны тевентень совамось, содамозо. Теде мейле... Ней вана ки рашко икелень. Монськак а содан, мезес седеем бажи. Сельмень сявалить ве ёнксонь кирдицятнень лангс ванозь. Алкукс. Тонь лангскак, Любаня. Ялатеке эсень эйстэ ковгак а туеван... Театрась тень теевсь ве ёно аштицякс, эйстэнь башка эрицякс.
Превспутыцям ней уш аштесь сельмень конязь. Вал эзь ёвта, кунсолось вармакрандазокс эрямодон потмонь чамдомам, видькстамом. Нежедсь керш кенерепакарензэ лангс ды виень путозь шаштызе рунгонзо седе верев, тодовонть пелев.
— Кунсолыя монологот пестэ-пес. Прынь вана кодамо мельс: тон — содамочис правтыцят. Те — уцяскат. Бажат содамс, кадык аволь домкасто, содамс седе ламо, келейстэ. Ков ветятанзат истямо коесь — превс тень а саеви. Ризнэвтят монь — кельмить театрантень. Ды ков молят. Кинень мезе. Монень сценась — эрямо. Сонтемензэ ёми эрямонь нежем. Пужить, румить эрямонть тюсонзо. Арсекшнынь тонь марто... А-а, теде а мезть!.. Чачома масторов, мерят? Аватень? Арсян теть вейке: кутьмерьс пувиця варма, келей ки!
[199] ...Кизэнь куншка. Маней. Пиземетнеде Бакусь соды аламо. Ловось невтнизе прянзо иень перть весть, вейке чи. Истят тесэнь телетне. Аволь кода Эрзянь Масторсо: иень эрьва пельксэнть эсензэ тюсонзо — телень, тундонь, кизэнь, сёксень... Тесэ вана покш полавтнемат а эрсить. Пси. Судоварятнес эцить чевтемгадозь асфальтстонть ды юв-яв ардтниця машинатнестэ лисиця чинетне. Паро, варматне Бакусо оймсема а содыть. А стяко азербайджанонь кельсэ «бакусь» — «вармань ош, тарка».
Вагононть каршо аштезь, учотано поездэнть сыргамонзо. Вакссон сырепатянь цёранзо, Витя лелям ды Коля ялаксом, каршон сёрмав платиясонзо, аволь сэрейне, стёжна, дёкушине рунго Люба-Любаня, театрань ялгам — апак прядо мором. Кортнетяно. Печттяно састо чудиця шканть. Меельце минутатне свал марявкшныть кувакакс.
Кондукторось, аваломань, невтсь, ахолдась кедьсэнзэ, панжадо кенкшенть пелев. Совадо, келя. Лелят-ялакст меельцеде сювордынек кеденек, кутмордынек, чатьмонезь варштынек вейкенек-вейкенек лангс. Сави-арась вастовомс одс?
— Арсек шумбрачи аватень, весеменень, — лангозон ванозь, мерсь Витя, — сюконяк масторонтень, косо чачсть тетям-авам, косо мон вестькак араселинь.
— Мон теть туемга, — теке виздезь, мик чамаумарензэ Якстерть токинзе, яволявтсь Любаня, — ильтема валонь таркас аламошка ловнан кардавикс Есенинэнь. Варштась верев, икелев, прок кевкстизе пельтеме сэнь менеленть — ловномс-арась, кепедизе мештензэ каршо вить кедензэ, ды гайгезевсь перрононть келес вадрясто путозь, ванькс, седейс пачкодиця вайгелезэ:
Прощай, Баку! Тебя я не увижу. |
От Любаня! Истя ловномс, а? Актриса, кода кортыть, Пазонть пельде. Човине, дёкушине... Косто ансяк вайгелесь саеви! Эзинек кирдеве — казинек цяпамонь шалтсо. Шкась, минутатне мольсть. Весе, совадо! — ледстизе вагононь прявтось. Лепштия Любанянь чевте кеднензэ ды капшазь кузинь тамбурс. Поездэсь аламонь-аламонь сыргась таркастонзо. Аштинь панжадо кенкшенть вакссо ды ахолинь перрононть лангсо колмонест аштицятненень.
«Прощай, Баку! Тебя я не увижу...»