Эрязденть арсезь (2010)/Кулянь явшиця
| ←Истямоль велеськак | Эрязденть арсезь (2010) by , edited by Разгуляева Т. В. Кулянь явшиця |
Тонавтыця→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 138—139 |
[138]
| Кулянь явшиця |
Сисем классон изнявсть. Сави истя меремс, геометриясь алгебранть марто, усксть эйсэнь удалов. Эзия максо прям тенст. Эзинь усково. Лепштямодост мейле кавтошка ковт эсенек велева кандтнинь почта. Юдмам — эсенынка. Дубинькасо пештьса сёрмадогазстадо ды—мекев, Орданьбуев. Эрьва чистэ тов вете малава вайгельпеть, зняро, содави, — мекев. Чарькодемс а стака — ялго. Кизэ. Мезе неть «петне»?! Юдмасон, газетатнеде-кулятнеде башка, кандтнян кемнилее иень. Кодат сиземат!
Седе чокшне ёнов — эрицятне улезт кудосо — юта сынь веленть ниле пензэ, пачтясынь кулятнень учицяст туртов. Кудотнеде велесэнек ветесядт малава—фамилиятнень, кудолемтнень содасынь вейкень пес.
Тевем моли. Вечкеви. Читне пшти сёлмо цянавкс ливтить. Ды «ливтясть» истя а кувать. Сась пенсиянь, кой-кодат лия ярмаконь кандтнема-явшема ковол. «Саты, цёра, — мерсь тень почтань прявтось, — неть теть таштама, а сатыть. Школавгак курок туят. Каимизь. Сынь Дубинькасто юдмавтомо, чавонь кедть. Почтальононь «карьерам» прядовсь.
* * *
Аволь весть ды аволь вейкень пельде марсинь: «Чачома келеть зярдояк а стувтсак!». Эх, кортыцят-кортыцят, чаво валонь ёртнпцят! Стувтови, ды кода стувтови. Виде, ниле-вете валт кадовить превзэть кандолазс мадема шкас. Ансяк ниле-вететне — а кель! Келесь прок анксемас ваи. Сонзэ эряви свал, кода рунгосонок сантнэнь-тулготнень, кирдемс, кода кортыть, стансонзо. [139] эряви свал ливчакавтнемс, мельганзо яксемс, кастомс, видьстэ меремс, эйсэнзэ кортамс. Тень апак тее, сон каназкады, кода апак яка-лыка каназкадыть пильгеть-кедеть. Секс бажан, косо илязан уле, пшкадемс, арсемс шумбрачи эрзякс. «Тон лисят?» — кевкстьса автобуссто лисемстэ икелень аштицянть. Веенстнэ тень кувалма лангсон салава пеедькшнить, лиятне — лавтовт кепсить: шумбра-аволь ломанесь?
Кие чарькодьсамам, кие марясы лажныця седеем?! Кинь токши — келем эль лекси?
Содылинь, «велень почтальон», аволь вейке сядо кудолемть. Ледстить, азё, сынст ней! Калдоронь, Аржаень, Кажань, Онаень, Черькаень, Пайчань, Сеськень, Солаень, Пупоронь... Косот лиятне? Косот кельсэнек тикшень ды нармунень лемтне? Ансяк Васенцетнеде перьканок тёжадо ламо! Зяро содатано, кирмалавдо ды пиципалаксто башка? Мезть кортамс, эрзятне панготнененьгак кармасть мереме рузокс — «маслятат», «сыроежкат», «подосинвикть», «грибат»...
Вана истя, оинем-дугинем, кельсэнть апак корта, венеми келесь.