قید دل سے ہے مری کاکل پیچاں نازاں
قید دل سے ہے مری کاکل پیچاں نازاں
اور مرے قتل سے ہے خنجر مژگاں نازاں
ہے مری چنگل وحشت سے گریباں نازاں
اور مری بارش اشکوں سے ہے داماں نازاں
کافر عشق ہوا جب سے میں اس دہر میں ہوں
ہے مرے کفر سے یہ دین اور ایماں نازاں
زخم کھانے سے مرے فخر کناں ہے یہ دل
خون دل سے ہیں مرے دیدۂ گریاں نازاں
ساکن خانۂ زنجیر ہوا ہوں جب سے
مثل ہر حلقۂ زنجیر ہے زنداں نازاں
ہوں وہ مجنوں کہ مرے آبلہائے پا سے
دشت وحشت میں ہے ہر خار بیاباں نازاں
محو عشق شہ خادم ہوں میں آثمؔ یکسر
حسن پر جس کے ہیں یہ میرے دل و جاں نازاں
This work was published before January 1, 1929 and is anonymous or pseudonymous due to unknown authorship. It is in the public domain in the United States as well as countries and areas where the copyright terms of anonymous or pseudonymous works are 100 years or less since publication.
Public domainPublic domainfalsefalse