ძვალიშ მატახალ მარგალი
სო დიგურე, სი ნავარი
თე კუდელიშ ქვათალაფა,
ჩხორო გვალას გეგნირულექ
ქიგეგონე ტყვიაშ ლაფა…
ითამ კოჩანას ლაჸაფე
გილარრაჸნა გირინცალო,
ჭირაკილი გურ მილარძუ
ნანაკვერა თხირიცალო…
მუშო გოკო ჩილ დო სქუა,
ვარა ოზე დო ოხორე
ვაგარჩქილე ჩქინობურა
კოჩანა დო ხი დო ორე…
კუჩხმოდვალიშ გოსირქუას
ირკოჩის სი უწორუა,
უნჩაშალაშ გინნაჸათემ
გიჸორს ძვალიშ ხუტორუა…
ათე ძვალიშ მატახალი,
ქართის ჭკორო მუს მითორე,
ხორხოტაშა შურ გეგკალენ
ოკო დაცე, ქაშაფორე!..