Biblia/Nove Testamento/Galatas/Galatas 2

Galatas

2

Le confirmation del apostolos de Jerusalem

¹Post dece quatro annos, de novo io ascendeva a Jerusalem con Barnaba, accompaniate alsi de Tito. ²Io vadeva ibi a causa de un revelation e presentava les le Evangelio que io predica inter le Gentiles. Io lo faceva, tamen, solmente in un incontro private con le personas prominente^[1] del ecclesia, pro assecurar me que io non curreva - o non habeva currite - in van. ³Tamen, non mesmo Tito, qui esseva con me, esseva obligate esser circumcidite, ben que ille es greco. ⁴Ora iste question^[2] surgeva a causa del false fratres qui, con simulation, se infiltrava in le ecclesia pro inspicer^[3] le libertate que nos ha in Christo Jesus e sclavisar nos. ⁵Nos, tamen, non capitulava non mesmo un momento^[4], a fin que le veritate del Evangelio permaneva intacte pro vos.

⁶Le personas qui esseva prominente (qui illes esseva non face alicun differentia pro me - Deo non monstra alicun favoritismo^[5]) - ille personas prominente me imponeva nihil. ⁷Al contrario, quando illes videva que le Evangelio me esseva confidite a fin que io lo porta al incircumcisos^[6], justo como Petro al circumcisos^[7], ⁸(pois que ille qui operava in Petro pro su apostolato, alsi operava in me pro mi apostolato verso le gentiles), ⁹e quando Jacobo, Cephas, e Johannes, cuje reputation esseva de “columnas^[8]” del ecclesia, recognosceva le gratia que me esseva date, illes dava a Barnaba e a me le mano de communion, essente de accordo con le facto que io haberea vadite al gentiles, e illes al circumcisos. ¹⁰Illes requireva solmente que nos rememora le povres, le cosa ipse que io diligentemente faceva.

Paulo reprimenda Petro

¹¹Quando, tamen, Petro arrivava a Antiochia, io me opponeva a ille facie a facie^[9] proque ille esseva a condemnar. ¹²De facto, ante que alicunos veniva ab Jacobo, Petro regularmente mangiava con le gentiles. Quando, tamen, illes arrivava, ille se retraheva e se separava ab le gentiles proque ille timeva le partito del circumcision. ¹³Etiam le cetero del judeos consentiva a iste hypocrisia, tanto que mesmo Barnaba esseva disviate con illes per iste hypocrisia. ¹⁴Ma quando io videva que illes non ageva consequentemente con le veritate del Evangelio, io diceva a Petro coram omnes: “Si tu qui es judee vive como un gentil e non como un judeo, como pote tu obligar le gentiles a viver como judeos?”.

Judeos e gentiles es justificate per fide

¹⁵Nos es judeos per nascentia^[10] e non peccatores gentil, ¹⁶nonobstante, nos sape que nemo^[11] es justificate per le obras del Lege^[12], ma per le fidelitate de Jesus Christo. Nos perveniva creder in Jesus Christo, de sorta que nos pote esser justificate per le fidelitate de Christo, e non per le obras del Lege, proque per le obras del Lege nemo essera justificate. ¹⁷Si, tamen, essayante esser justificate in Christo, il deveni evidente que nos es de facto peccatores, esque isto significa que Christo incoragia le peccato^[13]? Absolutemente no! ¹⁸Si io reconstrue lo que io previemente destrueva, io demonstra que io es un transgressor del Lege. ¹⁹Pois que per le Lege io es morte al Lege a que io vive pro Deo^[14]. ²⁰Io esseva crucifigite con Christo: il non es plus io qui vive, ma Christo qui vive in me. Assi, le vita que io vive in le corpore^[15], io lo vive per le fidelitate del Filio de Deo, le qual me amava a dava se ipse pro me. ²¹Io non declara invalide^[16] le gratia de Deo, proque si le justitia poteva venir per le observantia del Lege, alora Christo haberea morite in van.

Notas

1. O “influente”.
2. O “iste conflicto”.
3. O “spionar”, i.e. finalisate a denunciar le illegitimitate del libertate que le ecclesia gaude.
4. O “un hora” (expression original idiomatic).
5. Le texto original hic adde “con le homines”.
6. Illo es, le gentiles o paganos.
7. Illo es, le hebreos.
8. Illo es, conductores del ecclesia de Jerusalem.
9. O “io le resisteva in su proprie face”.
10. O “per natura”.
11. O “nulle carne”, “necun mortal”, “nulle esser human”.
12. O “per observar lo que le Lege require”.
13. O “es un agente de peccato?”.
14. Le significato de iste texto es multo debattite. On lo poterea paraphrasar lo assi: “Quando io essayava obedir a tote lo que le Lege commanda pro esser justificate ante a Deo, io me trovava semper condemnate, proque io nunquam poteva facer lo completemente. Assi io moriva al lege - io renunciava a iste mi effortios, como un persona morte que non pote facer alique pro se. Nunc, gratias a Christo, mi Salvator, io vive pro Deo e non pro le lege in se ipse. Nunc io comprende que le function del Lege esseva demonstrar quanto nos es peccatores condemnate e conducer nos a implorar Deo de salvar nos ex iste situation”.
15. O “in le carne”.
16. O “nullifica”.