Biblia/Nove Testamento/Marco/Marco 15

Marco

15

Le judicio de Jesus coram le governator roman Pilato

¹Mane, si tosto que illes habeva planate que facer, le summe sacerdotes con le seniores e le expertos del lege - le integre alte consilio - faceva ligar Jesus, le conduceva via e le consignava a Pilato, le governator roman. ²Deinde, Pilato le interrogava e le quereva; “Es tu le rege del judeos?”. Jesus replicava: “Tu lo dice”. ³Alora le summe sacerdotes incipeva accusar le de multe crimines. ⁴E Pilato de novo le quereva: “Ha tu nihil a dicer re tote isto? Vide quante accusationes es portate contra te!”. ⁵Jesus, tamen, non le respondeva plus ultra, e Pilato esseva multo surprendite de isto.

⁶Durante le celebration del Pascha, le governator soleva disincarcerar un prisionero al requesta del populo. ⁷Un del prisioneros in ille tempore esseva Barabbas, un rebello qui habeva committite un homicidio durante un sedition. ⁸Le turba ascendeva e incipeva rogar pro illes le dimission de un prisionero, secundo le costume.

⁹Inde Pilato les quereva: “Vole vos que io vos remitte le rege del judeos?”. ¹⁰Quia ille sapeva que le summe sacerdotes le habeva consignate Jesus propter invidia. ¹¹Le sacerdotes, tamen, instigava le turba a demandar le dimission de Barabbas e non de Jesus. ¹²Alora Pilato les respondeva e diceva: “Quid ergo vole vos que io face con le rege del judeos?”. ¹³Illes clamava: “Crucifige le!”. ¹⁴Pilato les diceva: “Quare? Qual crimine ille committeva?”. Illes, tamen, clamava con ancora plus fortia: “Crucifige le!”. 1¹⁵Alora Pilato, volente satisfacer le populo, les dimitteva Barabbas. Deinde, post haber facite flagellar Jesus, ordinava que ille esseva crucifigite.

Le milites deride Jesus

¹⁶Le milites conduceva Jesus a in le corte del palatio - id es le Pretorio, le residentia del governator - e convocava ibi le integre cohorte. ¹⁷Illes le revestiva con un roba purpuree e, faciente un corona de spinas, lo poneva sur su capite. ¹⁸Pois illes incipeva salutar le dicente: “Ave, rege del judeos!”. ¹⁹Illes percuteva repetitemente su capite con un baston, le conspueva e, geniculante se ante ille, le rendeva homage. ²⁰Quando finalmente illes terminava derider le, illes le levava le tunica purpuree e le revestiva de novo con su proprie vestimentos. Deinde, illes le conduceva via ut esser crucifigite.

Le crucifixion

²¹Le milites fortiava un passante, qui proveniva justo tunc del campania, a portar le cruce de Jesus. Su nomine esseva Simon, de Cyrene, le patre de Alexandro e Rufo. ²²Illes assi duceva Jesus a un loco appellate Golgotha (que significa “Loco del Cranio” o Calvario). ²³Illes le offereva a biber vino miscite con myrrha, ma ille lo refusava. ²⁴Assi, illes le clavava a un cruce. Deinde, illes divideva inter se su vestimentos e jocava al datos pro decider qui haberea prendite le pecias de illos. ²⁵Il esseva novem horas del matino^[1] quando illes le crucifigeva. ²⁶Sur le inscription que registrava le accusation que le esseva facite il esseva scribite: “Le Rege del Judeos”. ²⁷Illes crucifigeva alsi apud ille duo piliatores^[2], un a su dextera e un a su sinistra. [²⁸Assi se compliva le Scriptura que dice: “Ille esseva includite inter malfactores”^[3]]. ²⁹Le passantes le vilificava^[4] e succuteva lor capites dicente: “Ah! Tu qui diceva que haberea destruite le templo e reedificate lo in tres dies, ³⁰salva te ipse e descende del cruce!”. ³¹In le mesme maniera, etiam le summe sacerdotes - insimul al expertos del lege - le irrideva inter se ipse: “Ille salvava alteres, ma non pote salvar se ipse. ³²Que le Christo, le rege de Israel, descende nunc del cruce, ut nos vide e crede!”. Etiam illes qui habeva essite crucifigite apud ille le ludificava.

Le morte de Jesus

³³A mediedie^[5] tenebras cadeva per le tote terra usque a tres horas. ³⁴Pois, a tres horas, Jesus exclamava in alte voce: “Heloi, Heloi, lema sabacthani?”, que significa: “Deo mie, Deo mie, quare tu me derelinqueva?^[6]”. ³⁵Quando alcuno del circumstantes audiva isto, illes diceva: “Ecce, ille voca le propheta Elia!”. ³⁶Alora, alcuno curreva, impleva de aceto un spongia, lo poneva super un canna, e lo dava a Jesus pro facer le biber, dicente: “Attende, vamos vider si Elia veni e le face descender!”. ³⁷Alora Jesus emitteva itero un alte crito e expirava. ³⁸In ille momento le cortina in le sanctuario del Templo se scindeva in duo, de alto a basso. ³⁹Quando le centurion roman, qui le stava avante, videva como Jesus habeva expirate, exclamava: “Vero, iste homine esseva le Filio de Deo!”. ⁴⁰Il habeva alsi alcun feminas qui reguardava a distantia. Inter illas il habeva Maria Magdalena e Maria, le matre de Jacobo le minor e de Jose, e Salome. ⁴¹Quando Jesus esseva in Galilea, illas le habeva sequite e ministrate. Il habeva ibi alsi multe altere feminas qui habeva ascendite con ille a Jerusalem.

Le inhumation de Jesus

⁴²Ora, quando le vespere habeva jam venite, dum illo esseva le die del preparation del festa^[7], illo es, le die avante le Pascha, ⁴³Joseph de Arimathea, un eminente membro del Consilio, le qual expectava con anxietate le advenimento del regno de Deo, vadeva audacemente ad Pilato e le rogava le corpore de Jesus. ⁴⁴Pilato esseva surprendite in audir que Jesus jam habeva morite. Ille assi convocava le centurion e le demandava si Jesus habeva jam morite. ⁴⁵Le officiero le confirmava que Jesus habeva decedite, assi Pilato le concedeva prender le corpore. ⁴⁶Joseph emeva un canevas de lino e, deponente del cruce le corpore de Jesus, lo involveva in le canevas. Deinde ille lo poneva in un tumba excavate in le rocca. Pois ille faceva rolar un lapide al ostio del tumba. ⁴⁷Maria Magdalena e Maria le matre de Jose, habeva vidite ubi le corpore de Jesus esseva deponite.

Notas

1. Litt. “Le tertie hora”.
2. O “robatores”, “brigantes”, “depredatores”, “banditos”, “proscriptos”, “criminales”.
3. Iste verso non compare in le manuscriptos le plus antique. Cfr. Isaia 53:12.
4. O “derideva”, “insultava”, “blasphemiava”.
5. Litt. “le sexte hora”.
6. Un citation de Psalmo 22:1.
7. O “le Parasceve”.