Chi Tròpp, chi minga
Chi Tròpp, chi minga
Even staa licenziaa da on cavalier
el dì inanz duu staffer,
et quidem tucc duu a on bott.
El dì adree el camarer
el ghe n'esebì inscambi sett o vott.
«Bon ! - respondè el patron -
Insci, a vista de nas,
fee vegnì innanz quij duu che sien pù al cas
segond la mia intenzion».
De fatt subet entrènn,
sfrísand el soeul coi reverenz che fenn.
Al primm che intrè el ghe diss: «Savii servì ?»
E quell: «Lustrissem, sì».
«Savii fa on compliment ?» «Ch'el se figura !
Savaroo fall sigura» «E per porta imbassad ?»
«Magara anch a parolla per parola !
No me cala espression nè bona tolla,
e foo prest a girà per i contrad ».
« E, se l'occorres mò,
farissev de mangià
in mancanza del coeugh ? » « E perchè no ?
Sien past froll o sfojad,
supp, pastizz e pitanz de tucc i sort,
poss dì che l'è el me fort ».
«E sorbett e gelaa
savarissev fa anch quij ?» «Oh manco maa ».
«Bravo ! E, quand in campagna fudess senza
el barbee, el perrucchee ?»
«Ghe sont mì a l'occorrenza;
e, al besogn, foo anch el sart e el caroccee.
Ai curt, el me pò mett
a less e a rost, nol restarà imperfett;
e, segond el salari,
ghe faroo anch de agent, de secretari ! ... »
«N'hoo a car» - bassand el coo
el repiè el patron - « tucc sti vertù !
Fermev pur in cà mia che i provaroo ! ... »
Voltaa poeu a l'olter, el ghe diss: «E vu ?»
«Quand el voeubbia ess content de la mia servitù
- respondè l'olter - no faroo nient ;
giacchè el me camarada el fa tutt coss,
per mì resta tant manch;
e foo el me cunt, che poss
ess de guardia settaa su on cassabanch!... »