Glamat popiko-katekik Volapüka/A. – D. Subsats
| ←IV. Valemiko glamatikos | V. Glamat patik | Pläns (kik)→ |
|
A. Plunumafomam
68. If sagon vödi fat: vöd at fat pesagom in balnum. — Ye plunum en tonom: fàts. — Klu fomon vpo. plunumi liko?
Egelo te me tonab balik s, kel s egelo palenlägom len vödi tefik, nen tanamal. Kludo vöd fat labom in plunum fomi fats vpo. Tonab s at plunuma palenlägom, al fomön plunumi, valikes vödes kanöl padeklinöl, klu subsates, ladyekes, numavödes, pönopes e ladyekabides…
2369. Kikod datikel vpa. elonom tonabi s as mali plunuma?
Bi natapüks lemödik ailaboms in plunum tonabi s len fin vödas, e bi datikel vpa. pladomok dunl(ik)üno su stabi jenöfa natapükas valik. Ibo no evilom bumön bumoti vpa. as lutagledomi, äso bügonels e lep’ans oka. —
Sams: Bib, bibs; bled, blèds; flol, flols; bod, bòds; blod, blòds; buk, bùks, krit, krits; läd, läds; stem, stems; depad, depads. (Samis deutikis… eko alüpo in deutik… glamat pop.-katek.!).
(Noetil): Vöds: el, jièl, elos; un, jiùn, unos no palovepolomsök! Ibo laltig ti aimofalom vo in vp.
B. Vöds jilik
70. Ceinon liko in vp. vödis manik in jilikis?
Pladon vödili nelijik ji (‚she‘) bifü vödi tefik, ye nen tanamal; a. s. pul, jipùl; reg, jireg; fat, jifàt; dog, jidòg; nök, jinök; pösod, jipösod; jeval, jijeval; plan, jiplan; jafel, jijafel; julan, jijulan.
C. Deklinafals
I. Kimifal
71. Deklinafal kiòm paileplägomöz nämikün(o), bi beginels aimekoms pökis gletikün tefü om?
Kimifal (‚áccusatìvus‘)!!
72. Liko fomon kimifali at (deklinafali folid ä veütiküni valikas lul)?
24Lägon baliko len fini vöda tefik tonabi i; s.! lab, labi…
73. Liko desetuvon in set sembal, va vöd tefik stadom in kimifal, ud in kimfal? (Ibo deklinafals bofik aikanoms nefikulo pafecenön kobo in natapüks ti valik).
Säkonoköz, meditöl dös japälo, egelo te baliko!: kim dunom kiomi yegi, tefi, cali, dun(ot)i…? — Abu leno säkonöd!: fa kim padunos kis? Ibo atos kis kanos (deuto…) binön ebo (leigo) denu kimfal e kimifal; a. s. in sets at: kis jenos? (is kis binos kimfàl); e: kis(i) nolons nulik(osi), o. b. in stül balid: nolons kis nulik? (ab is kis(i) binos vo kimifal).
Sams: Labob gesagi; labob kotini; labob bedi (at); l. bili; l. milegi; leli (sembal) labob; miti labob; labob maki (at, et…); l. frani (bal); l. fleni (bal, sembal).
Löfob gäli, löfob topöfi, löfob tikäli, löfob sauni, löfob febi, löfob klödi, löfob Godi, tedi löfob, magi löfob, löfob tugi.
II. Kimafal
74. Kimafal (‚genetìvum‘) leigo leofèn zitöli fomon liko in vp.?
Lägon baliko len tefikis subsati, ladyeki, numavödi, pönopi u ladyekabidi (ud i len subsatabidi) tonabi a, äs ot sibinom velato as kimafal, s.! in rusänapük…! Desetuvon kimafali vätopo sukü säk kima (kimas), köà vo labom nemi oka.
25Sams: Stom apulà (folulà); dèls gustula (jölula); mel tala; Yulopà püd; julana dut(i); flumi Güpäna; pük Flenta; labob fluki bima; labob konsäli flena.
Lut Talopa; glet Melopa; kalod dekula (batula); no labob liegi Nelija; blef talalifa; febula (telula) blef; vom doma; vomül zifa; moni neta; nid golüda.
III. Kimefal
75. Liko fomon kimefal zitöl lu ofen, kel pafecenom leofen ko kimifal, pato lä pönops (a. s. obes, obis; oles, olis; nous, vous…)? ab patuvom nefikulo sukü säk kimè?
Pladon len fini vöda deklinik baliko tonabi e, äsliko tonab at zitom as mal kimefala eb id in deutapük, a. s. in fe’tanot vödas ‚dem Manne‘ (dèm máné).
Sams: Penòbs fatè; penobs gesagi vomüle; penob vome; famüle flena penob; blode penobs; penob jiblode; penobs nemi flena fate; penob nöke mota (jifata); lade jinöka penob; penobs velati flene.
Givobs bledi blode; givob buki vomüle; givob milegi cile; givobs stimi Gode; moni givobs söle; pulile givob miligi; givobs konsäli jiblode; givobs giti pline; givobs köni miligane; givob dani fate.
76. Fomon liko segun jünuikos plunumi kimifala, kimafala e kimefala?
Lägon balik len deklinafalas 26finatonabis i, a ed e plunuma tonabi s; a. s. flolis, bukas, feles…
Sams: Sevob blodasfamülis flenas; danobs givis Gode (Gode givis); sevob nämis cinas fablüdas; danobs litis glügas bienes; sevob möbis nökas; mulis yelas sevob; glätis danobs jinökes; sevob spelis ladas; danobs boadis fotes; sevob bidis planas.
Sevobs timis yela; givobs vatis nimes; sevobs canis Melopa; cemis domas sevobs; no sevobs nolügis netas; pöpis givobs pösodes; sevobs dilis tabas; givobs konsälis popes; sevobs nämis vinas; sevobs delis vigas.
D. Smalam
77. Smalon liko vödis in vp.?
Pladon baliko len vödafini tefik silabi smalama ìl, malöli ötosi, äso finasilabs (posilabs) deutik chen ü lein (qén ü láin), a. s. düpil…
Sams: Mekob bimili (sembal) su pöpi; flolilì (bal, sembal) mekob; mekob bukilis; no mekob franilis; domilis mekob e fömadilis; mekob munilis e lakilis; solilis, stelilis e bödilis mekob; mekob bedilis e bodilis; mekob gälili mote; flenile mekob domili (sembal).
Logob nafili; no logob cäfilis; ab logob planilis; logob no cinilis, ab neifilis; mugilis no logob, ab moafilis; logob e givob kaledilis blodiles; logob boadilis cililas; logob fotilis pagilas; dinilis logob domilas.
| ← IV. Valemiko glamatikos | A. – D. Subsats Glamat popiko-katekik Volapüka |
E. Ladyeks → |