Page:Il Cumin della Cadi de 1656 e Mistral Giachen Berchter.djvu/41

This page has not been proofread.

Berchter, che ha prestau biars survetschs alla Claustra, fatg si ina gronda facultad ad ella e ch' ei perfin daventaus commensal de quella 1692.

En quei document legin nus plinavon per l'emprema ga positivamein, che Avat Adalbert III de Funs seigi igl auctur della „Synopsis“ e ch' el hagi concepiu quella 1696. — En nies allegau manuscret ei vegniu purtau en diversas notizias entochen 1736, — igl onn, che P. Justus ei morts — denton havein nus anflau negliu remarcas sur la „Cuorta Memoria“. Ins astga forsa concluder ord quei, che quella seigi vegnida translatada e compilada pér suenter 1736.

Fertont ch' ins enconoscheva entochen dacheu mo paucas scartiras cul num digl auctur, las qualas ein daventadas in' unfrenda dils differents berschaments della Claustra (1387, 1514, cunzun 1799), vegnin nun fatg attents (pag. 11) sin auters novs nums, ils quals havevan schau anavos notizias sur fatgs de nossa patria. Denter quels sesanflan era Mistral Giachen Berchter e siu fegl Podestat Gion Berchter.

La schlateina Berchter ei ina dellas pli veglias ella Cadi. El dequors dil temps ha ella dau biars meriteivels umens pella patria e pella baselgia. — Colonel R. de Hess scriva en siu „Fragmen Genealogicum des Geschlechts Berther“:

„Ils Berthers ein senza dubi ina dellas pli veglias e distinguidas schlateinas dil cumin della Cadi. Gia el 14avel tschentaner vegnan els avon en documents de Tujetsch sut il num „da Cha Berchte“.[1] Dal 15avel tschentaner naven, scret „Berchter“, a Tujetsch, Mustér e Sumvitg. Depi il 19avel tschentaner, scret „Berther“, els medems loghens. Gia el 15avel tschentaner han ils Berchters dau mistrals al cumin della Cadi; ell' emprema mesadat dil 16avel tschentaner alla Ligia Grischa: Landrechters, q. v. Caus della republica della Ligia Grischa; el 16, 17 e 18avel tschentaner al cumin della Cadi in diember de mistrals, bandirels, scarvons; allura comissaris, podestats, scarvons della Ligia, delegai d' honur silla dieta ed a. v. Nus anflein ils Berchters fetg savens en scartiras stampadas de contegn historic, sco era en in grond diember de documents originals.“

  1. A Tujetsch anflein nus la schlateina Berchter per l'emprema ga en ina scartira de 1300, ils 26 de Fenadur. — Mira: Mohr, Regesten Nr. 75.