—Diri harumamay an imo papaghinulat! — siniring han alperes.
—Apit ko na diri tumambong,— Binmaton hi P. Salvi hin hamubo nga tingog, waray pag-asa han magpait nga mga pulong ha iya; —suruksurukon ako.
—Kay waray man may na-kanhi, tungod ada kay maghintipot an tagsatagsa, inisip ko nga an imo paghitambong. .. Maaram ka man nga niyan nga kulop ilalakat.
—An batan’on nga Ibarra ug an tenyente mayor.. .?
An alperes tinmudlok ngadto ha bilangguan.
—Wawalo iton aadto,— nganiya; —an hi Bruno namatay kagab-i han magkatutnga, kundi aada na sinurat an iya mga asoy.
An padi sinmaludo kan Da. Consolacion nga binma ton la hin huyam ngan hin usa nga “aah”, ngan lumingkod ha lingkuran nga nahatutungod han retrato ni S. M.
—Makakahimo na kita pagtikang!—nagsiring.—Kuhaa iton duduha nga pinandugan.—Nagsugo an alperes, tinuyo niya nga an iya tingog magmakaharadlok kaupay, ngan atubangon an padi, binalhin an tingog;
—Tigduha nga buho an binibirahan nira ha pandugan!
Adton diri maaram kun ano ini nga mga garamiton ha pagpahamaan pagsusumatan namon nga inin pandugan asya in usa han mga gimagagaani. An mga kaluhuan nga surulutan han mga tiil han mga binilanggo tig-usa la kadangaw an pagkaarantaw; laktawan ngani in duha nga luho, an pinandugan magkukuri an kabutang, mabati hin masakit ha lukunlukon ngan mabibira hin labaw hin dupa: diri man gud nakakamatay hin tigda.
Pinalos han parabantay an patlong ngan buksan an purtahan han bilangguan, upod niya in uupat nga sundalo. Namarag dayon in maanut-ot nga baho ngan in hangin tikang didto han kasisidman ha sakob, dungan in paghibatii hin mga nguyngoy ug mga panharoy. An usa nga sundalo nagbag-id hin puspuro, kundi naparong la dayon an laga didto hadto nga lungib an kahimtang, salit naghulat hira nga sumulod anay an hangin.
Tungod han maarupaop nga siga hin usa nga suga hinkikit’an in pipira katawo: kalalakin’an, nanunungko ha ira mga tuhod nanngungulob, nangangatubang ha kuta ug iba pa. Hinbabatian in linagatak ngan hin inagutiot, dinudunganan hin pangisog: nag-uukab han pandugan.
