Ванине (2011)/10
| ←IX пелькс | Ванине (2011) by , edited by Разгуляева Т. В. X пелькс |
XI пелькс→ |
| Нуянь Видяз. Ванине: роман. — Саранск, 2011. — с. 197—218 |
[197]
| X |
От Марка, святое благовествование. Глава 16.16. Кто будет веровать и креститься, спасён будет; а кто не будет веровать, осужден будет.
От Павла, послание ремлянам. Глава 1.5. Чрез Которого мы получили благодать и апостольство, чтобы во имя Его покорить вере все народы.
«Новый завет», стр. 60, 188.
Алопень куншка видьсэ кудынесь ваны-кончтни саразонь сельмешка вальминесэнзэ чикуншка ёнов. Видьстэ меремс, мелетькак а сы ловомс сонзэ эрямо пизэкс! Кодамо кудо, зярдо эйзэнзэ совицясь а муи озамо тарка? Керш ёно, ансяк сёлгсак мельгат кенкшенть, — каштомонь таркас, голландка ёнов молиця плита. Ютат колмо эскелькст, таго керш ёно, — лазпестэ «каярдозь» стуворнэ. «Ваньксчизэ» сонзэ корты азордонзо. Совамсто, вить ёно, — нуласо-валасо копачазь кшнинь коникке. Ашо, парсте муськезь-вадяшазь велькст-ацамот эзь некшне сон онстонзояк.
Лазонь, кошошка кудыкельксэзэнзэ эрицясь ёртни кода ды мезть понгсь: кольгиця ведрат, каладозь ящикть, ташто газетат, лазпеть, варяв кемть, котат, чаво бутылкат... Секскак кудос совамсто кенкш неденть сеске а мусак.
Азорозо те кудыненть Лапужкина Надежда Фёдоровна. Эрьва веленть эсензэ, эрзякс ёвтавиця фамилиянзо, эсензэ кудолемензэ. Ванстовсть сынь Кузвелесэяк, православиянтень допрок эзть тапаво. Эрзякс тензэ меремаль Лапужань Федянь Надюка. Нурькалгавтозь — Лапуж Надюка. Одтнэ, чарькодеви, пшкали-вельть «патяй» валонть марто: «Шумбрат, Надюка патяй!»
Эрямо кизэ Лапуж Надюкань аволь валанятнедель. Эзганзо эскелязь, коршнесь кажочиденть аволь кечинестэ, а покш кечестэ. Савкшнось келямс-эскелямс, стакасто лексезь ды эрямонть сюдозь, пингень перть. Аволь весть эртневсь кавтолдомасо ёзмолдыця кирашкос...
Валмеревксэсь — весе ушодови эйкакшпингстэ, педе-пес Лапуж Надюкань уцяскадонзо. Тосто ушодовсь весемеде покш апарось, кона «стызе» мейле уцясканзо. Лиссь сон ютась пингень 30-це иетнень ушодовомсто. Масторонь кирдийтне, тандавтнезь-алтнезь, [198] кундакшность колхозонь, од, пешксе пеке эрямонь чапомо. Васняяк, эрявсь кшувавтнемс велетнестэ, кода мерильть, «кулактнень», чарькодевикс кельсэ — лиятнень коряс седе сюпавтнень. Те, келя, сынь чумот, сынь бутравгавтнить эрямонть. Самай истямокс ловозель Надюкамезень пешксе кудо пувозост-семияст. Истямотне содасть, седеест марясь, паро од азорттнэнь-прявттнэнь пельде иля учо.
Састь «валдо, сюпав эрямонь» стявтыцятне Лапужтненень — кудостост панеме — валске чоподава. Ушосонть сёксенть якстере-ожо шказо. Коське. Паряк, ливтема-панема тевесь ютаволь сельведьсэ начтозь, ансяк апак тюре. Истя эзь лисе. «Чумось» Надюкань тетязо. Цёрась эзизе топавто, эзизе кунсоло пансицятнень прявтост: лисемс кардазс ды ливтемс кардсто лишменть. Арась, эзть лутаво кияксстонть пильгензэ. Ёвтась, теде башка, кодамо-бути «пшти вал». Теньсэ седеяк ацирьгавтызе пинекс эвтиця, рангиця «начальникенть». Кежтнеде кирвазсь толгайгекс. Панжтневтинзе келес вальматнень ды эзгаст кундасть ёртнеме мезе понги кедь малас: пряхат, чугунт, човар, петькельть, каштлангсто карть, нулат...
Кудазоронть «очко нардавкскезэ», Надюка, кепе, ве платиинесэ уцорсо валгсь каштлансто ды, верьга вайгельть лайшезь, чийсь тетянстэнь. Тона кепедизе ды лепштизе мештезэнзэ. Вадяшизе-оймавтызе ды мерсь чиемс аванстэнь. Те шкастонть пансицятнень покшост кундызе кувака кедьсэнзэ тейтерненть ды... вырновтызе, прок кодамояк чувтопе, маласо вальмаванть ушов. Прась эйкакшось вальмаст икеле моргов тумо чочко лангс. Пек томбавсь. Кутьмерьсэнзэ сэредьксэсь кадовсь аютыцякс куломазонзо. Порксавкшность уцянь ды сявдиксэнь ловажатне. Шкань ютазь кассь кутьмерезэнзэ будулма. Горбунгадсь. Теде аламнеде нурькалгадсь камбразозо, алкиньгадсь сэрезэ.
...Лалужт мурдасть-пачкодсть чачома масторозост, Кузвелев, ансяк комсь иень ютазь. Ванстовсть кото эйкакштнестэ ансяк кавто: Надюка ды лелязо Ваня. Лиятнень саинзе эстензэ Кемерова ёнксонь кельме модась. Тов ильтязельть «кулактне». Шкась мольсь, кулось Надюкань тетязо, иень ютазь авазо. Аламонь-аламонь эрямс амаштовицякс теевсь тетянзо путовт кудось. Надюканень савсь ютамс эрямо пелькашка, ве вальмас неень кудынентень. Эрясь эйсэнзэ икеле сынст буень сыредеяк сыре аваломань. Пурнызе-сэрнизе пазось, ды совась тарказонзо Лапуж Надюка. Улевельгак од эрицясь эсь мельганзо яксиця, урядонь кирдиця, паряк, седе келейгадоволь, седе ламо валдочи кирдевель те эрямо таркасонть. Ней вана...
[199] Уцяска. Ковгак эйстэнзэ а кекшат. Кода иляст корта, аволь весе эседеть ашти! Надюка кадовсь тонавтнемань ниле классонзо марто. Чачокшнось ламо содамо, нееме, ловномо бажицякс. Арась, ормадонть, жалямодонть-мезде неть паро ёнкстнэ вий эзть пурна, обуцязонзо эзть сова. Ялатеке кудынень азоравась вечксы сёрмадомань тевенть, кучни эрьва ков пеняцямонь ды энялдомань сёрмат. Истя «тарказост путни» покш ды вишкине «бояртнэнь». Мади пекекиськензэ лангс, путы икелензэ кодамояк лазпе ды ушоды «кренделень» буквасо ваднеме. Мезде «вадни» — весть ловнозь а чарькодьсак. Букватне покшт, теке сёксень куяв карвот, сяворькшнезь. Секс — кодамо мель «пиди» неть «карвотнесэ» — сеске а кундасак.
Мазыйстэ-аволь, превейстэ эли, паряк, аволь свал, кода илязо уле, Кузвелесэ сон тевень яксевтиця. Пеняцямотне ды пшкалематне «верев» ливтнить малав весе Лапуж Надюкань кедь алдо. Секскак ловови Кузвелесэ видечинь кис аштицякс. Кода рузтнэ мерить, правозащитница. Мерема, газетат ловны «тёкш сэрей» дипломонь кандтницятнеде ламо.
1990-це иетнестэ эсь шкастонзо тохмадезь капитализмась, буржуензэ-мезензэ марто озась тарказонзо одс, одс эрямосонть теевсь азоркс ярмаков зепесь. Сась те «измась» аволь ськамонзо. Ускинзе мартонзо, буржуйтнеде башка, чинек-венек ванстыцянзо, урензэ, лавкаст марто микшницянзо.
Вейкесь, кемевикс нежетнестэ, — рузонь церьковась. Спрутто виев. Истя кутмордасы ломаненть — а мени. Секс истя келейстэ, койтнень колсезь ды мездеяк апак пеле, ярмаконь апак ловно кундасть «андомонзо» ды вийсэ совавтомонзо те «спрутонть» эрямонтень. Прок навола пангт чинек-венек молиця пиземетнеде мейле ушодсть лисеме-касомо «бачкань кудот». Ков а варштат, — купол, «чурька пря», ков а эскельдят, — крёст. Эцить Христосонь лемензэ кандыцятне эйдень кужотнес, школатнес, микшнема кудотнес, аптекатнес, шумбрачинь кудотнес, покш ды вишка начальниктнень кабинетс. Школань тонавтыцятнеяк, васняяк аватне, ламот почо видьс штапо мештест мазылгавтнить сырнень крёсткесэ. Кавто-колмо метрань сэрьсэ крёстт, стявтнесть-лангозост ванозь тандадат — покш-келей китнень кувалт. Неень шкасто шождасто лиякс ёвтавить Ленинэнь валонзо: «Капитализм — это власть олигархов, плюс церквинизация всей страны».
Кузвелескак капитализмась ускизе-совавтызе те оймень наксавтыця ды превень чополгавтыця орманть. Кода эно [200] сонтемензэ? Сон юр, васень неже кирдийтненень! Секскак Кузвелень «превейдеяк превей» прявтось ды велень сехте «образованнойтне» аламонь-аламонь кундасть «оймень идиця» пазонь тевентень. Кода истя церьковавтомо? Чей, сон — паз. Сон, церьковась, кресттнэ-поптне, кунсолотадызь, марятадызь, идетядызь, стакачить сыть, — лездыть. Эряви, кода а эряви!
Надюкань превсэ човор эрить чальть-чульть содамочитне Инешкипаздо ды Иисусто. Яки, кодауродя ломань, лемень кундамо, кулыцянь Тоначив ильтеме. Лови эсь прянзо, кадык аволь уш пек, Пазнэнь кемицякс.
Кизэнь вейке маней, валдосо-лембесэ налксиця чистэ Надюка эскелясь юдманзо марто лавкасто. Апак учо вастовсь эсензэ кондямо «ташто» Укшторонь Таня сырькаенть марто. Ве иень сынь, кирдажт. Вейкесь эйстэст эсь шкастонзо кувать фермасо важодсь, омбоцесь поминкава-кува яксесь ды якси. Стясть кичирес. Вал, колмоце, ды, эзизь редяяк, пачкодсть озномань тевтнеде кортамонтень.
— Теня, маряви, эрьва кува церьковат стявтнить, — ушодсь Надюка, мекс-бути модас ванозь. Вайгелезэ калгодо. Валтнэ кургсонзо теке кевнеть кеверькшнить.
— Монгак маринь. Телевизороськак теде эрьва чистэ невтни-лакшторды, — поладызе кортамонть аволь сэрей, лагоря, иензэ коряс одокс неявиця Таня.
— Теня, монень маряви, Кузвелесэяк панжомаль! Минь, чай, крестязтяно, — пеняцясь беряньстэ мариця Надюка Танянь кургс ванозь, — седе марявост-чарькодевест тонань валонзо.
— Содазь эряви, — апак арсе, сеске ёвтызе мелензэ Таня, икелень шкань, ней уш талай пенсиясо скалонь потявтыцясь.
— Кода?
— Теня, монь койсэ, эряви, васняяк, пшкадемс велень бояронтень, — Надюка пешксе юдманзо саизе керш кедьс. Арсезевсь.
— Сёрмадан сёрма епархияв.
— Кемат, лездыть?
— Кеман.
— Пароль.
— Лездыть, — чатьмонезевсь, ды сеске поладынзе валонзо Надюка, — а карминдерятано удомо минсь. Ней мезе? Корсо удотано... Теня, васняяк кундама ярмаконь пурнамо.
— Виде! — мерсь Укшторонь урьваст, лекстясь ды кортазевсь аламнеде лиядо, — поп эряви муемс...
— Адя, — кончтась, ёвтызе мелензэ Укшторонь Таня ды сыргась ков молиль — лавкав. Сынь, лавкатне, школась, икелень эйдень кужось, клубось, велень советэсь ве таркасот, велень куншкасот.
Омбоце чинь валске, вейксэ чассо, кода кортазель, ульнесть, кода лемдезель, советсэ, ней — администрациясо. Вейке ят валонть полавтызь лиясо. Ансяк аволь эрзякс! Азорось таркасонзоль. Вастынзе аватнень паро мельсэ. Валост — панжомс Кузвелесэ церькова — аволь ансяк шнынзе, мик алтась кой-мейсэ лездамс. Кортамось мольсь седе кувать вейкеде.
— Эрявить, чарькодтядо, ават, ярмакт. Коштсто, содатадо, ознома кудо а стявтат, — тешкстызе кабинетэнь прявтось, теке теде эзть сода яксицятне.
— Виде, виде, — совась кортамонь лувонтень гайги вайгель сырькаесь.
— Секскак, Надюка патяй, пурнадо куро ды ушододо велеванть якамо. Кияк сялдомонк а карми, — мерсь сакшныцятнень ильтемстэ предэсь.
Валскень инжетне лиссть эль а моразь. Авольть лепштяя иетне, секень вант, киштезьгак туевельть.
Сырькайтне мусть эсест кондят пазнэнь кемицят, ютавтсть промкскень кондямо, кемекстызь кинень мезе теемс ды ушодсть ярмаконь пурнамо-таштамо. Надюка ды Таня ютызь веленть омбоцеде. Састь Надюканень. Совасть кудынезэнзэ. Чамдызь зепест. Ловизь пуворязь целковойтнень. Кода иля кайсе, цётось малавгак эзь кецневте. Аволь эрьва кудосонть учость эйсэст, аволь эрьвась сюконякшнось Иисуснэнь ды сыненст венстсь вешезь чондатнень.
— Те Ледяйкин учителесь чумо, идемевсь калгавлизе! Сон колы тевенть, — тарка эзь муе, лакштяизе Надюка сыре тонавтыцянть.
— Виде-виде, — кода свал шнынзе ялганзо шержей пря Укшторонь Таня, сонсь лангсек-лангсек, кувтань-кувтань путнесь ярмак лопатнень.
— Сон, антихрист, вардонь сельме, тонавтницянзо вельде весе веленть, теня, стявтызе каршонок, — мотордсь пурныцянь [202] покшось Надюка. — Уроксонзо содась вейке — сялдсь, кода маштсь «пивсэсь» церькованть, поптнень.
— Виде-виде. Монгак истя арсян, — лия мезеяк эзь ёвта неть валтнэнь каршо лездыцязо.
— Паряк, ськамот ютат Ледяймезнень? — кивчкадсь Надюкань превсэ. — Содамс, кода, мезе ёвты?
— Арась-арась, иля арсеяк. Ансяк кавонек. Седеяк ён улевель — колмонек-ниленек! Сестэ сон...
— Паро, варштатано кавонек, — путсь пе пелькстамонтень Надюка. — Ванды.
...Омбоце чистэнть «церьковань кассась», цяк кенерсь чизэ кевереме валгома ёнов, оршнесть седе ванькстэ, ломань юткс лисницякс ды сыргасть исяк арсезенть топавтомо.
Ледяень сэнь конякс кудост сэрей таркине прясо. Вальманзо ваныть Инелей, чикуншка ёнов. Эрьвань сельмс каяты икелензэ умарьксэнь апокш пиресь. Сэньстэ артозь цицинатнень велькска новолезь тарадтнэ састынедеяк састо нурить коштонь лекстявкстнэде ды якстере «чама» кенерезь умартнеде. Покшт, потьмежат, тантейть... Мизолдыть, сынсь эцить кургс.
Азорось, Евгений Васильевич, содынзе, прок учось Алопестэ сыцятнень, аштесь озадо пирявксонтень «педявтозь» эземсэ. Оймсесь. Ваны: аватне ки кирдить, эскелить сонзэ ёнов. Малав пачкодемстэст, стясь.
— Озадо, озадо, — тердинзе атясь, ансяк кенерсть шумбракстнеме.
— Арась-арась, Евгений Васильевич, минь аволь кувать, — мерсь вельть марявиксстэ камажа пиле Надюка.
— Кувать-аволь, стядо аштезь, кода кортыть рузтнэ, видечи арась. Озадо, — невтсь вить кедьсэнзэ сыцятненень вастыцясь эземненть лангс.
Аватне озасть.
— Мезть, ёвтынк, одирьват, якатадо-пакатадо? — пшкадсь «одирьватнень» ваксс озамсто шержей пря икелень тонавтыцясь.
— Покш тев ушодынек, Евгений Васильевич — панжомс Кузвелесэ церькова, — соланя, теке марто кельме ды алкине вайгельсэ панжизе мелест Кузвелень «прявтмонашкась» Надюка.
— Да-а-а, — тетькизе нурька валонть тонавтыцясь. Теевсь кашт. — Мертядо по-о-кш?
— Виде, покш, — кемекстынзе ёвтазь валтнэнь лов ашо черь, [203] иетнеде сормсевезь келей чама Укштор Таня.
— Мезесэ сонзэ покшолмазо? Онкстнинк? — кирнявтсть Евгений Васильевичень сельмечирькензэ аватнень кевкстемстэ.
— Кода эно, кода... — капшазь поладынзе валонзо Таня сырькаесь, — карматано церьковав якамо, озномо.
— Мон аволь теде. Мерян, мейсэ онкстнинк лезэнть? Сантиметрасо, метрасо, безменьсэ...
— Карматано озномо...
— Кинень?
— Кода кинень? Пазонтень!
— Кодамо сон? Кие?
— Кода кие? Иисус! — серьгедсть вейсэ.
— Кие авазо Иисусонь?
— Келя, Богородица Дева Мария.
— Каня аванень начтови Паз?
Чатьмонема.
— Ёвтынк, кодамо раськень Христос?
— Теня, мон а содан, — видькстась, нолдызе прянзо Надюка.
— Монгак, — текень ёвтызе якиця-пурныця ялгазо.
— Еврей, — тейсь Евгений Васильевич аватненень «панжовкс».
— Авазояк еврейка.
— Ну и кадык, — мельга-мельцек прасть пурныцятнень кургсто некеть валтнэ.
— Кадыкекс кадык ды вана ознотадо еврейтненень, евреень пазонтень, эсенк Пазонть — Инешкипазонь — допрок стувтынк. Невак кевкстема: кинь пельде дева Мария муизе Христосонь?
— Святой духонть! — серьгедсь Надюка. — Тетязо...
— Пурныде зярыяк? — сертизе ды полавтызе кортамонь лувонть Евгений Васильевич. Сась мельс: кортамс мартост — шка ёмавтнемс. Превень таркас прясост шукшт.Теке марто, чарькодизе аватнень яксемань ёнамост. — Улить лездыцят?
— Аламо, Евгений Васильевич, — нусманясто мерсь аватнестэ конась-бути. — Аламо.
— Эрзянь келесь кулома лангсо. Содатадо?
— Арась, — панжизе пейде пешксе кургонзо Таня сырькаесь.
— Мейле мезе? Теня, кадык кулы! — эзизе кецневте, седеезэнзэ шоркадсь омбоце «озныцясь», Надюка. Сонзэ кирьксала покш сельмсэнзэ эзь кивчкаде мель пелькскеяк.
— Эхе-хе-э-э, мезес пачкодиде! Келенк идемга куш целковойне кепедевлиде, — нусманячиде пешксе вайгельсэ, мелявтозь [204] ёвтызе мештьсэнзэ кирдевикс «сыре» ризксэнть. Кудазорось стясь. Лангозонзо ванозь, видемтизь рунгост «инжензэяк». Чарькодсть: те кудостонть а понги тенст порнезь ловажаяк.
Тевест сырькайтнень — скирдамс зярыя ярмашкеть сыре тонавтыцянть кедьстэ — эзь лисе. Кадовсть, валмеревксэнть коряс, вачокс. Алопень кудотнень икельга «чииця» киванть эскелясть, пирень-кардазонь мелявкстост кортнезь, кудов. Эзь марявояк, пачкодсть Солай Микамезень видьс. Тосто лиссь ды келей киванть сыргась каршост апак судря прячерь Дораень Ванине. Луньк-луньк-луньк... Истямо молевкс велесэнть ансяк сонзэ.
— Теня, те тон ков истя сыргить? — пельдензэ шумбракстнемань апак учо пшкадсь сакалов цёрантень Лапуж Надюка. Ванине лоткась. Савсь лоткамс аватнененьгак.
— Ко-кода ков? Тов, лавкав! Оно, бутылкас пурнынек, — яволявтсь Ванине кецнезь ды ахолдась Верепе ёнов.
— Вай, чаула! Винас ярмакт ёмсевтят. А визькс? — эзь кирдеве, цюх сельгсь Надюка, кепедизе прянзо ды варштась цёранть сакалов чамас. — Аволь церьковас — винас!
— Виде-виде, церьковас вадряль... — поладынзе ялганзо валтнэнь прясто пильгс раужосо оршазь, псинзэ лангс апак вано, Укштор Таня.
— Церь-церьковас?! — букакстась, тетькинзе каракшонзо аватнень лангс Ванине. Кургозояк автевсь.
— Виде, церьковань путомс! Мейле мезе? — машнетезь кевкстизе, эль эзизе чевеля вановтсонзо Таня сырькаесь.
— Мезе-мезе... Неть чи-чинев одар поптнень Кузвеле маласкак а нолдтнемат. Ва-вана мезе! Кендялт!
— Вай, вай мезть лавги! Потомдык кургот, богохульник! — лаказевсь Надюка, кежтнеде полгарьгадсть истякак покш сельмензэ, сорнозевсть турванзо.
Ванине марсесь аватнень велеванть азгондемадост, чулгизе кинень ды мекс якасть «пазонь уретне».
— Макссь зярыя Евгений Васильевич? — вайгелень полавтозь, сэтьместэ, теке ёвтазьгак арасельть покордамонь валт, теке сёвномаяк эль эзь верьгеде, пшкадсь сыре ломантненень.
— Учок... Паро, школань тонавтыцятне лездасть. А те...
— Мо-молодец, Евгений Васильевич! Истя эрявияк. А-а мезть макснемс монь кондят симагай поптненень!
Надюка кундызе Укштор Танянь ожа педе: адя, адя, келя, а мезть шка ёмавтнемс те алкашонть марто. Марямга вана мерсь:
— Монень, церькованть таркас, Евгений Васильевич зярыя ды нуртяволь. Це-церьковас... О-оронь пирентень, — моткодсь Ванине Верепе ёнов эскелязь, тов, ков весень терди, ды якить, «Меркурий» лавкась.
— Мезе карматано тееме седе тов? — талнозь мерсь церьковань тевтнень кис весемеде палыцясь Лапуж Надюка, ансяк явовсть Каргонь Ванине марто.
— Виде-виде, теема мезеяк. Молема таго прявтонтень. Алтакшнось, — ледстизе вакссонзо эскелицясь.
— Теня, невтьса тензэ газетасо сёрмадозентькак. Мон уш теть ёвтнинь. Ужо, ужо! Сон, теня, мартон. Кунсолок, — истя кортазь, Надюка лоткась, таргизе бока зепстэнзэ газетань панкспенть ды педясь ловномо:
«Иван Сурин, глава администрации Инелейскогорайона: — Я объявлял сбор средств на строительства храма еще год назад. В наступившем годумы должны продолжать богоугодное депо. Буду применять разные рычаги воздействия на промышленные и сельскохозяйственные предприятия, на бизнесменов и всех неравнодушных граждан»
«Инелейские вести» 2007, № 5
— Вай, те истя, видеяк, мезе тейтяно? — вайкстась Таня сырькаесь ансяк прядызе ловноманзо Надюка. — Умок тенек, кавто латякарть, молемаль. Аволь ансяк веленсентень, те самай Суринэнтеньгак.
— Теня, ванды кавксо чассо, арсян, мольтяно эсенекентень. Шканть а мезть таргсемс, — кармавтыця вайгельсэ Надюка лепштинзе ялганзо вайкснематнень. — Марят?
— Марян, кода а марян.
— Истя эно!
...Эзть топоде кавксояк, Иисусонь урензэ уш Кузвелень администрациянь кузтемпесэльть. Учость.
— Тынь мезе, начица, теске удыдеяк? Адядо, — пеедькшнезь пшкадсь, тердинзе совамо учицятнень, раужо «чийниця»сельме ды раужо черь, сэрьс аволь сэрей велень покшось.
Совасть кабинетс. Зярдо-бути азоронть удало стенасонть, [206] прянзо велькссэ, мазый кундосо фотографиястонть сыцятнень лангс мизолдозь вансь Владимир Ильич Ленин. Зярдо-бути... Ней теке кундосонть нусманя, сакалов, кувака черь Иисус Христосонь чачозо. Вальмалангсо лия артовкс — авазо, «святая дева Мария», кедьсэнзэ Иисус цёрынезэ. Кодамо ломанесь пурдтневиця! Мекс истя аламо Моданть лангсо видечи, мекс вельть аламо эсь мельсэ-превсэ эрицятнеде?! Исяк озность вейкенень, течи — лиянень. Кинень ванды? Косто пувазеви вармась!
— Тынь, начица, церькованть кувалма? Эзинь маняво? — кевкстинзе нупалень прявтось креслазонзо озамсто каршонзо аштиця «чоподава» яксицятнень.
— Арась, эзить маняво. Теня, вана газета, — Надюка венстизе газетасто керявкскенть ды озась стувор экшсэ инязорокс аштицянтень каршо. — Натой Инелей буень прявтоськак яви мель церьковань стявтомантень! Лездамскак алтни.
— Содан, ловныя те «алтамонть». Шожда, начица, меремс ды стака, начица, топавтомс, — эзизе сае конёв панкскенть, апаро ёжосо, та-кода машнетезь шаштынзе икелензэ конёвтнень.
— Эно кода улемс? — каясь трокс вал, эзь карма седе тов кунсоломо Надюка.
— Кода? Стявтома, начица, церькованть! Вана кода. А стявтови — учок, начица, кшу-кшуяк, прявт! — видькстась велень боярось. — Вана мезе. Мон кой-ки марто кортнинь, ардтнинь кой-кува. Невак пшкадян. Совадо чинь-кавтонь ютазь. Кеман, тевенек сырги. Ах, да, допрок стувтокшныя! Монень, начица, сёрмадовкске кандодо, кить велестэнть эзть кая, кить пазонь тевенть каршо молить.
— Истя-истя, тень теема, — сась ве мельс «предэнть» марто Укшторонь Таня, таркастонзо стямсто.
— Теинк...
...Тевесь, видеяк, «чоподава» сакшномадонть мейле ушодсь сыремеме. Велень покшось лездась аволь ансяк ярмаксо, превть макссь, кода сынст ванстомс ды косо кирдемс. Киненьгак, келя, илядо кеме, киненьгак илядо максне пандомга. «Сбербанк» — вана, келя, сынст таркаст.
Неть читнестэ невак паро тев лиссь. Кузвелень школань эрзянь келень тонавтыцясь, Мария Григорьевна Латышева, велекс Латышень Маря, уш ие пенсиясо. Оймсеме лисемадо мейле ушодсь якамо, кода Надюкаяк, калмамонь ды лемень кундамонь илатнень ветямо, ловномо Христосто-киде книгат. Косо, зярдо [207] тонадсь неть тевтнень содамо-ветямо? Паряк, пединститутсо, конань зярдо-бути прядокшнызе заочна? Косо, кода илязо уле, истямо таркава якамось, чекамось, превс сась, зыян а канды. Мекевланг. Ярсат-симат — те уш сонсь содави. Теде башка, сыргат кудов — кансткеть эль кандови. Ярмаккетькак зяро а зяро туемстэть коморозот шикадить. Каня те берянь?
Кортазь чистэнть састь «велень мерэнтень» колмонест, Латыш Маря марто. Те уш вий. Кабинетэнь прявтось таркасонзоль. Озасть, тердемань апак учо, каршозонзо. Ансяк ушодсть «тевде» кортамо, келейстэ панжовсь кенкшесь ды совасть, «здрастеяк» эзть мере, раужо, прок раужо варака, поп, мартонзо ошокс оршазь допрок од цёраломань. Васенцекс кепедизе удалксонзо ёзазь кресластонть велень прявтось, мельганзо текень теизь сиякс цивтордыця черь, ашо пацясо сырькайтне. Батюшкась тердемат эзь учо. Озась. Мельганзо лодорсо озасть лиятнеяк.
Эсь прянзо прявтокс ловиця попось од, паро, улиндеряйть тензэ колоньгемень ветешка. Валаня чама киськезэ тюжа, теке чентязь. Ланга нолдазь кувака черензэ, сельмензэ, сакалонзо — дюм раужот. Арсезеват, сась ломанесь косто-бути лембе ёнкстнэстэ. Татар, авар, кумык, лезгин, ингуш... содык азё! Седеяк виевгавты те меленть лангсонзо, псинзэ лангс апак вано, кочкаря видьга раужо рясась. Кирьгаванзо рисьме вельде каязь сырнень покш крёст.
— Я, отец Кирилл, у вас, братья и сёстры, Второй раз, — панжизе промкскенть рясань кандтницясь. Иисусонь портрет ало аштицясь, кинь кедьстэ саизь ветямо ведьметнень, валгак эзь ёвта. «Нилизе». — Судя о селе, о его жнтелях, церковь нам не осилить. Надо, братья и сёстры, приспособить какое-либо помещение.
Арсезевсть. Теевсь кашт.
— Если клуб? — кепедизе прянзо, варштась попонть раужо сельмс велень прявтось.
— Да, мы в тот раз имели уже такой разговор. Но нет. Клуб не подойдет. Слишком велик. Стены кирпичные. Не разогреешь, — эсь ёнкс кирдсь попось.
— Детской садикесь туи, — кепедизе кедензэ, кода эйкакштне школасо, ёвтызе мелензэ эрзянь келень икелень тонавтыцясь Латыш Маря. — Детей, мерема, нет.
— Не понял. Я не знаю вашего языка, — мерсь раужо сакалонь кандтницясь кабинетэнь азоронтень. — Говорите по-русски.
— Да, я помню. Видел. Правда, внешне. По величине, как мне кажется, подойдет, — макссь питне рузокс кортыця ломанесь эйдень кужонь кудонтень. Сельмс эциця кувака черензэ лыйкадинзе удалов, кедькоморсо вадяшинзе кувака, мештень келес сакалонзо.
— Вот только, начится, ремонт немалый потребуется, — тешкстызе велень прявтось ды седе ёнсто озась креслазонзо.
— Да, ремонт потребуется. И деньги тоже. Думак», найдутся. Так, благочестивая Надежда? — пшкадсь лийканя вайгельсэ Кирилл батюшкась каршонзо аштиця Надюканень.
— Так. С божьей помощью. И вашей, — ледстизе, эзь пеле, Надюка.
— Но, как говорят русские, на Бога надейся, а сам не плошай. Надо потрудиться, — превть макссь икелензэ аштицятненень, кода тенст мерить, благоверноесь.
— Постараемся, — мерсть кецнезь кавто вайгельсэ, оймавтызь попонть Укштор Таня ды Латыш Маря.
— Ютама велеванть невак. Надо, говорю, обойти село еще раз. Обход сделать и в других сёлах. Кто заартачица, начица, — мие списочек, я найду общий язык, — кармавтсь ды превть макссь велень азорось аватненень.
— Администрация села, надеюсь, в стороне тоже не останется, — нолажтсь вановтсонзо предэнть ланга мокшнашка крестонь кандтницясь.
— Понятное дело, батюшка, мы и так работаем, — мерсь савтозь неть валтнэнь каршо попонть кондямо раужо сельме «администрациясь».
— Иисус сказал: «Не оскудеет рука дающего», — теде мейле колоньгемень вете иесэ «батюшкась» аволь вейке, аволь кавтояк минутат ёвтнесь Николай Чудотворец святоень кодамо-бути дюниядонзо, ёвтнесь кода оймавтсь давол иневедьсэ, кода вельмевтсь маштозь ломань...
Кунсолость свят-ломаненть — кияк вал эзь правто. Попось витинзе лавтовонзо ланга срадозь черензэ, варштась вакссонзо аштиця, чатьмониця ялганзо лангс.
— Вот что, отец Кирилл, будет польза, как я думаю, если помещать в «Инелейских вестях» список тех, кто пожертвовал и сколько на строительство церки. Будет от этого, кажется, польза немалая!
— Нет, батюшка, деньги у нас хранятся, начица, в Сбербанке. Так, Надежда Фёдоровна?
— Так-так... Теня, до копейки! — камажа пилетнеде, кода весе амарицятне, серьгедсь верьга вайгель «финансонь министрась».
— Так что, батюшка,.. — келемтинзе кедензэ велень «главась», церьковань тевтнеде мелявтыцясь. — В Селе осталось, начица, несколько работящих мужиков. Уверен, возьмутся. Составим, начица, договор, смету, и за дело! Ваша задача, батюшка, указывать-показывать. Где-чего переделывать, куда-чего ставить... Лады?
— Лады, — мизолкстонть келейгавтынзе турванзо ярмаконь вешицясь, ды тень эйсэ кекшизе седей апаронзо. — Да, вот что еще: нам надо подыскать жильё. Для временного, так сказать, проживания. Мы, вероятно, будем служить по выходным... Так что...
Тень эйсэ промкскесь-кортамось прядовсь.
Укшторось сравтнинзе пильгензэ алга валдо-ожо сёксень лопанзо. Лангозонзо ванозь, текень теизе вакссонзо ашо рунго, нуриця кувака черь килеесь. Истя сынь, чоподасто оршазь, анокстасть теленть казямо моронзо кунсоломо. Кувать учомс сонзэ эзь саво. Сась. Сась, ютавтызе ашо палясо яксема шканзо, морынзе моронзо ды тусь тов, косто пачколесь тей, Кузвелев.
...Ансяк солась ловось, колхозонь шкасто эйдень кужосонть ды перьканзо лаказевсть витнемань-петнемань тевть. Якстердсь кирьпецень оровт, ожолдсть эчке ды човине лазт, чочкт, неявсь чувар мар. «Садикенть» потсто кайсететсть узерень ды мушки-рэнь вайгельть. Ток-ток-ток, ток-ток-ток... пелькстнесть вейкест-вейкест марто. Цирнесь шкань-шкань, куш пилеть потомдыть, чарыця электропилась. Ине, кода кой-кить арсить ды кемить, тев теить, церькова вельмевтить.
Шкань ютазь «урядызь» куншка, кудонть кавтов явиця стенанть. Потмозо сеске покшолгадсь. Тейсть алтарень кондямо. Мазылгавтнизь човине, валанясто инзэдезь, лаксо вельтязь лазсо. Алтаренть явизь кудопотмодонть малацек-малацек путнезь пазавасо. «Мендердясть» пазаватнень икельга сэрей таркине — амвон. Лангозонзо стязь попось карми молитвань ловномо, [210] ёвтнеме пшкадема валт озныцятненень, Кузвелень эрицятненень. Полавтызь, наксадокшность, киякс сэдявкстнэнь. Вельтизь «церькованть» одс. Шиферэнь таркас кшнинь черепицасо. Сехте покш прядовксокс лововсь «чурька прясь» ды тёкшкезэнзэ аравтозь мазыйстэ теезь кшнинь крёстось. Сынст пурнызь-вейсэндизь ало, мейле кепедизь — савсь кран сиведемс — латонть пряс. Неявозо васолдо.
Превень васень максницясь — Кирилл батюшкась. Сон ёвтнесь кода теемс алтаренть, пазавань лазонть, папертенть... «Эрьва палинесь, эрьва тешкскесь, лазпесь шназо Идицянок, Иисусонь», — ледстнесь сон, зярс мольсь витнемась. Прорабонь кондямокс ульнесь сонсь предэсь. Эсест тевест тейсть сырькайтне Надюка, Укштор Таня ды Латыш Маря, аволь умок эрзянь келень тонавтыцясь. Лездасть лияткак.
Истя сюронь нуема-урядамо лисема шкантень Кузвелень «пазонь кудось» аноколь ушодомо урендямо-служамо, ломантнень пазонь урекс тееме, эли, кода кортыть сынсь поптне, «паствакс», лиякс ёвтазь, стадакс улеме. Зярдо-бути неть «кудотнень» таркас панжтневсть ловнома кудот, школат, тонавтсть, мик сыретненьгак, ловномо-сёрмадомо, мель путсть, бажасть тееме ломантнень ламонь содыцякс, келейстэ арсицякс, мель марто эрицякс. Вийть путсть се шкань прявттнэ панжомс сельмест Иисуснэнь озныцятнень, невтемс те лементь марто сюлмавозь певтеме кенгелематнень ды верень валоматнень. Ней вана...
... Отец Кириллэнь ды лездыцянзо Ефимень тевест оймсема а соды. Кавто чить, шлямо ды таргочистэ, урендямо. Ломанть пурнавить. Кадык церьковав сакшныцятнеде аламо, сыре ломантне, ялатеке православиянь илатнень ютавтомат. Теде башка, сакшныть седе ламо церьковань покшчитнестэ, кодат Пасха, Иисусонь чачома чизэ, Иисусонь лемдема чизэ, Иисусонь менелев туема чизэ, Троицят-мезть... Сакшныть, алкукс пек чуросто, эйкакшонь лемдеме — чачтыцят эзть кадово. Лезэ максни, ды аволь вишкине, мирденень лисема коень ютавтомась. Ансяк вана...
Берянесь, савкшны марсемс, вадрявтомонть ве чи а эряви. Куломась, ормадо эли сыречиде, — покш апаро, ризкс. Церьковань прявттнэнень ды эйсэнзэ важодицятненень, бачкатненень-кинень — эль а кеняркс! Эно кода? Тоначив ильтеманть, «отпеваниянть» сынь ловить весемеде «стакакс», секскак «судрить» целковойтнеде весемеде ламо. Эрицятнеде велесэнть седе ламо сыреть. Текеде кулыцятнедеяк... Ков эно сыненст туемс лияв? Ансяк [211] тов. Секскак Кирилл бачкась арды ошсто аволь ансяк шлямо-эли таргочистэ. Ливтязь ливти, куш кодамо чистэ. Ансяк гайгстаст. Сыть ветькак. Кода лиякс? Пазонь тев. Ильтеме пазонь уренть. Ков? Те уш Тосо ёвтасызь: кинь райс, а кинь видьстэ тов, косо соргатнесэ лакавтови пичеой.
Тевтнеде — кенерть чарамо. Кузвеледе вете вайгельпень ютко — Кацелай эрзянь велесь. Тосо а церькова, а, содави, поп. Товгак сави ардтнемс. Ков молят? Пазонь тев! Седеяк, пачтиндеряйть калмамодо. Сюкпря кандтневиця телефононтень! Машинань багажникентеньгак. Тозонь, ярмакто башка, аволь вейке эль кандовиця юдма кельги. Истя вана аламонь-аламонь кавто велестэ пурнави эйпаро тантей «паневкс». Ули мезень кисэ ахолямс кадиласот ды певтеме, тёжань кирда тетьксемс кирьгапареть «аллилуйия» сеерезь.
Отец Кирилл ды лездыцязо эрить ошсо. Кузвелев сакшныть шождынькай машинасо. Савкшны ве-омбоце удсемс тескеяк. Секс муевтсть истямо тарка. Те тевесь — аволь крестонь кепедемась. «Велень старостась», кона поптнень икеле сюконякшномадонть теевсь менчевицякс, яксевтизе тень прянь апак яжа. Чаво кудотнеде велесэнть пешксетнеде ламо. Электричества, коникть-кендть, стувор, стулт, пенчть-вакант... чинь-кавтонь ютазь таркасольть. Натой поптнеде мелявтыцясь мусь кельменькай. Кода лиякс неень шкане сонтемензэ? Мацтсо кирдемс ярсамопелеть? Меельцекс Латыш Маря, эли Мария Григорьевна, кода школасо тензэ мерильть, ды кавто икелень тонавтницянзо нардтнизь вальматнень, пор ведьсэ ашолгавтызь-одкстомтызь голландканть, шлизь кудонь ды кудыкельксэнь киякстнэнь. Теде мейле вальматнева понгавтнесть муськезь-вадяшазь ашо шаршавт. Полавтовсь коштоськак, ёмась, а маряви, чеерень чинеськак. Эно кода лиякс? Аволь кияк, попт кармить эрямо, пазонь ломанть! Содама, те теть аволь колхозонь кодамояк лавшо понкс прявт. Те — поп!
...Сёксень васенце ковонть прядовомсто кулось кавксоньгемень ниле иесэ Укшторонь Петя атя, икелень, нардев, калгодо, теке кшни, коммунистэсь. Поптненень зярдояк сон эзь кеме. Эзинзе вечке. Эйсэст сёвнось «паро тевест» кис кода маштсь. Урьвазо, Таня, теде содась. Савкшнось кунсоломс «лекциянзо» а весть. Атявтозо мерекшнесь: «Калмамстон, Таня, попонь, монашкань чинеяк малазон илязо пачколе. Сындест кенгелицят, мейсэяк апештевицят арасть! Сыть — кандолазтнэстэ стян».
Омбоце чинь чикуншкава кавонест «бачкатне», рясасо-мейсэ [212] оршнезь, учость калмицятнень. Весе анокт: палыть штатол-кайсэнть стявтнезь штатолтнэ, кирвазстезь кадилась, ладанонь таркас ченьгить стамбаро палыця семе пангт. Мелявксось теке — качамне улезэ. Семеньцесь весемеде вадря.
Пых-пых-пых лоткась церьковань кенкшенть икелев машинась. Цёратне састыне, теке пельсть Сэредькс теить Петя атянень, валгстызь кузовстонть кандолазтнэнь ды совавтызь, лексезь-пувсезь, икелень эйдень кужинентень. Путызь анокстазь таркас. Кандолазонь ужотнес педявтсть кирвазстезь штатолт. Совасть Петя атянь тоначив ильтицянзояк.
Кирилл батюшкась стясь амвононть лангс, комавтызе прянзо книганть вельксс, кувакасто лекстясь ды ушодсь ловномо. Вайгелезэ эчке, ванькс, чарькодеви эрьва, мик амарявикс гайтесь, валтнэ озазь озыть кунсолыцятнень превс. Малав эрьва вал мельга лисить сакалов кургстонзо «аллилуйтне», «господи памилуй», «присна и во веки-веков», «аминь», «раба твоего», «вечная память» ды седе тов. Ловнось кезэрень, човор рузонь-славянонь кельсэ. Секс аламо-мезе чарькодевсь — ванькс вайгелезэяк эзь лезда — кортавкстонзо. Кодат паро мельть кепедевельть, кодат валдо ёжот раштавольть, ветявольтькак калмамонь, лемень кундамонь ды лия-лия илатне эрзякс! Арась, васов айгизь, айгизь ды шешкизь раужо рясатне валдо вановт, ванькс ойме Инешкипазонть.
Валонзо бачканть прядовсть. Саизе лездыцянзо кедьстэ палыця кадиланть ды колмоксть ютась, сувтнесь, кандолазтнэнь перька. Сонсь, эль марямга, капшазь, прок пансь кияк эйсэнзэ, моткодсь «пазонь» кодат-бути валт-мельть. Мельганзо мекс-бути чарась сэтьместэ аштиця уловонть перька бачканть лездыцязо, дьякононь кондямось. Вансь пазавань кундостонть весе тень лангс нусманя вановтсо Иисус. Аноколь, марявсь, нолдамс сельведть. «Мекс лемем нарьгатадо? Мон истя зярдояк эзинь корта, истят ёвкст-манчемат кургстон эзть лисне. Илядо кенгеле: мон зярдояк Пазокс араселинь, араселинь Сонзэ цёракскак... Содадо, зярдояк, кияк, тетявтомо, цёравтомо, чачозь арасель...»
Ильтемань моравтомась-илась прядовсь. Цёратне чатьмонезь саизь ды ливтизь кандолазтнэнь ушов, кепедизь машинас.
* * *
Юдмась Кириллэнь лездыцянстэнь квартиразост эль кандовсь. Сайсы ве кедьс — стака, сайсы омбоцес — седеяк. Снартнизе ускомскак. «Шефезэ» сась, аволь кувать учозь, мельганзо.
[213] Кудосо, васняяк, каизь лангстост, ёртызь козонь понгсь попонь оршамопельтнень, крестост-мезест. Кадовсть пельсштапо, ансяк трусиксэ. Сеске кундасть канстонть чамдомо, эйсэнзэ тантей чине ули-паронть таркава-кува путнеме. Веенстнэнь — иляст кунда режнеме-бизнямо, иляст коле — кельменькайс, омбонстнэнь стувор лангс.
— Это куда? В холодильник, а может на стол? — пшкадсь Кириллнэнь дьяконось «Кагор» вина бутылканть таргамсто. Мельспародонть «каладсь» кургозояк. — Э-э-э! Дык здесь еще одна!
— Одну в холодильник, другую — на стол, — кармавтсь прянь апак кепсе Кирилл.
— Пироги, конечно же, на стол, — мерсь «дияконось» целофанонь кескавс путозь потмо пряканть таргамсто.
— Половинку на стол, другую... — эль а тошказь ёвтызе меельце валонзо юдмань прявтось.
Кирилл таргась колбаса кирькс, мельганзо омбоце, таргась калт, умарть... Юдмась чамдовсь.
— А главного и не оказалось! Училка, знать, собирала. От нее пользы... Попы, думает, только «Кагором» причащаются. Иди, Ефим, сбегай, — стясь, таргась понкс зепстэнзэ ярмакт. Кучизе ялганзо лавкав.
Тонанень омбоцеде меремс эзь эряво, содась тевензэ. Сайсь пакет ды вармакс ношкстась ков кучизь. Сонсь кармавтыцясь кундась стуворонь анокстамо. Керсесь кши, пряка, панжсь консервань зярыя банкат, керсесь колбаса...
Пакетэнть марто «Меркурийстэ» мурдась Ефим. Бах-бах-бах! — путсь стувор лангс колмо суликат «ашо».
— А почему без воды?
— Ты же не сказал!
— Обязательно говорить? Башки нет?
— Я сейчас!
— Иди. Не забудь черного хлеба!
...Стуворось — царень-государень: човинестэ керсезь якстере калонь палнэть, форель калонь консерва, «бушонь пильгинеть», кавто сортонь колбаса, селёдка... Теде башка, банант, апельсинт, мандаринт... Ули мезе симемскак. «Палыцядонть» башка «Pepsi», «Coca-cola», пия... Пешксе пексэяк венстьсак сянгинеть форель марто банкантень!
— Всё, садимся, — мерсь кармавтозь, прок ушмодей, стуворонть велькссэ муницясь-колдовицясь — Кирилл батюшкась.
[214] Окойники озасть.
Кирилл путсь икелензэ кавто стопкат. Буль-буль-буль нуртясь пелень-пель чаракавтыця ведтенть. Вейкень венстизе, путызе Ефимень икелев.
— Ну, старина, за что? — кепедизе стопканзо ды кевкстизе иень коряс од ялганзо Кирилл.
— Как за что? За упокой раба божия... Как уш его? — низельдезь, покшонзо сельмс ванозь, кевкстизе Ефим.
— Петр...
— Стало быть, за раба божьего Петра, — поладызе арсеманзо кевкстицясь, чиремтизе сурсонзо кутмордазь стопканть ды каизе кирдевиксэнзэ, теке ведрас, автезь кургозонзо.
— Чтоб земля стала пухом коммунисту, борцу за социализм, за колхозное правое дело деду Петру, — арсесь Кирилл, фу мерезь лекстясь, симизе стопкасо уликсэнть, сайсь кши печть ды венстизе сянгинензэ форель марто банкантень.
Теевсь кашт. Марявсь ансяк невелиця пейсалазкетнень ды турватнень чавкаемаст. Шказо чикуншкадо мейлень, байтяк. Пектне каравсть. Секс цёратне альмасть паро мельсэ.
Кирилл чамдызе ушодозь бутылканть. Панжизе омбоценть. Нуртнесь. Кепедизе «цярканзо» улонзо видьс, педявтынзе сельмензэ каршонзо аштицянть чамас ды ёвтызе мелензэ:
— Выпьем, брат Ефим, за сегодняшний день. Удачный был. Вот бы почаще умирали! Вот где деньги!
Меельце валтнэнь попось ёвтынзе вайгелень кепедезь.
Симизь кайсезенть. Куроксто чамдызь колмоце «суликаськак». Кельтне лавшомгадсть. Онкстест кайсизь. Ёртнесть валтнэнь тей-тов. Лангс лиснесть сетне, конатне, превсэ улезь, авольть лисе зярдояк.
— Ско-сколько дали ныне за по-покойника? — сэтьместэ, кадык кундатозь кель, пшкадсь «шефенстэнь» лездыцязо Ефим.
— А тебе какое дело? Ско-сколько дали — все мои, — менгевстэ, казямосто, каршонзо аштицянть сельмс ванозь, ёвтынзе валонзо пупорькшниця кельсэ Кирилл.
— А-а, я? Разве не с то- с тобой? Я тоже службу справляю, — потась икелень пелемазо, вешсь эсь таликанзо Ефим дьяконось.
— Этого не хочешь? — прявтозо седеяк ацирьгадсь, венстизе кедензэ стуворонть трокс овсе Ефимень судо алов, сювордась тензэ «бабань пеште».
Кирвитолокс гувкадсть покордамодонть Ефимень мештьсэ [215] потсо кежтне. Сон вырк, теке уро нерьгстасть пукшозонзо, стясь, автордызе икелензэ «Кагор» пешксе бутылканть ды зяро вийсэнзэ насмодизе пря касмо ланга покордыцянзо.
Кирилл нолдась кургстонзо нурькине, эль марявикс «ийк» ды сяворсь, теке пешксе кескав, стулонть лангсто кунст, кияксс.
— Кудосот азортнэ? Хозяева дома? — панжовсь те шкастонть кудо кенкшесь ды эскельдясь тарчксонть велькска велень «ме-рэсь». Неезденть апторгадсь, стявтынзе сельмензэ, эзь сода мезе меремс.
Пельсштапо бачканть велькссэ аштесь стядо, текекс «оршазь», Ефим. Сон сурсонзо невтнесь икелензэ мадезь аштицянть лангс ды пильге лангсо цяк аштезь, кундсевикс кельсэ бажась пачтямс совицянтенть лисезденть.
— Дык вот, у-упал шеф! Ударился и-и упал.
«Валность прамозост!» — содавтызе мелесь ознома кудонь икелень «прорабонть» чамдозь суликатнень неезь.
— Надо что-то предпринять, — сыцясь пульзясь цёранть ваксс, порксазь таркась, чертне, редизе, верь потсот. — Я сейчас привезу медсестру.
Эзть юта кемень минутаткак, совась «попонь кудонтень» — кенерсть лемдеманзо — допрок од, мазый, мельс туиця ава, Кузвелень «медпатяст» эли «врачихаст», кода мерить велесэнть. Сон комась, чертнень тей-тов явнозь, ваннызе порксавксонть ды пшкадсь вакссонзо палманькс аштиця цёратненень, васняяк эсь велень прявтонтень.
— Эряви тердемс капшинькай! Ды седе курок, — сэтьме вайгельсэ, марявсь талнозь, ёвтась «врачихась».
— Эряви, начица, эряви! Тердть, — кармавтызе предэсь ды теке басом венстизе зепстэнзэ таргазь телефононть.
* * *
Инелей буень шумбрачинь кудосо вельмевтизь, эль а тоначистэ таргизь, Кузвелень батюшкаст. «Каванякшнызе» ялганзо кода маштсь ды виень апак вансто. Ускизь тей пельсштапо. Шкань ютазь, виде, пачтякшнызь оршамопелензэяк. Ансяк кодаткак конёвт, документт, зепсэнзэ арасельть. Кинь лемс сёрмадомс «больничной»? Кинь лемс педявтомс ютавтозь ормаменькстнэнь? Прявт докторось гайневтсь милицияв. Чинь ютазь тосто сась ломань. Ваннызе-теизе кониксэ мадезь аштиця ашо марлясо тапарязь пря, чопода тюс чама цёранть. Кевкстнизе [216] кие, костонь, чачома иензэ-чинзэ, мезекс ды косо важоди. Мезеяк чарькодевикс эзь ёвта. Ёжозо берянель. Ялатеке... Шкань ютазь те службастонть сась лия, седе од ды одёр цёра. Совась прявт врачонтень. Ёвтызе: милициянь прявтось мерсь ваномс ды ваномс те попонть мельга. Секскак, келя, эряван теемс «сэредицякс» ды путомс палатантень, косо ашти Кузвелень раужо сакало бачкаст.
Истя тейстькак. Тапарязь прясь кодаткак «пстылямот», зярдо стявсь пильге лангс, эзь тейне, бажась палатантень путозь «сэредицянть» марто кортамот а ушолемс. Прянзо ветясь аволь беряньстэ. Ялатеке ванстыцянтень савкшнось мельганзо ваномс, салава эли вейсэ якамс венелев. Зярыяксть лететсь удомантькак сезнемс. Кие соды, кодат мельть чарыть-велить каршонзо коникенть лангсо удсицянть превсэ? Вант, курго иля автне!
Ветешка-котошка чинь ютазь Кириллэнь ёжозо вадрялгадсь. Пшкадиксэль шумбралгавтыця, мельганзо ваныця докторонтень нолдамс сонзэ кудов. Тень таркас валске марто, завторкто икеле, совасть палатазонзо колмо милиционерт. Эйстэст покшось, капитанось, невтсь прокуроронь пельде конёв, косо мерезель попонть пекстамс ды кирдемс зярс панжома экшсэ. Эль кенерсь Кирилл батюшкась стямо коникстэнть, кедензэ велявтызь удалов ды пекстызь-вейсэндизь пекстамкайсэ. Пелькстамо, идеме эсь прянзо эзь карма, эзь ёвта каршо валгак. Мезе тейсть, теке истя эрявськак.
Вейкесь лездась оршамс понксонзо, тонгомс котанзо, каясь лавтовонзо ланга панар. Пурнызь-сэрнизь ды ливтизь палатастонть.
...Чинь-кавтонь ютазь Инелеень буень ормаменькс кудосо вастовсть кавто прявтт: шумбрачинь ванстыцянь ды милициянь.
— Шумбрат, доктор! — рангстась сэтьмечинь ванстыцясь, полковникень погононь кандтницясь, прок икелензэ аштесть буень весе милиционертнэ.
— Шумбрат, главмент, — пеедькшнезь мерсь каршо кабинетэнь азорось, эчке, кавто улосо аволь сыре ломанесь, ды невтсь сурсонзо каршонзо стуворонть ёжосо стулонть лангс. — Мезть якат-пакат, полковник ялгай?
— Сынь теть сюконямо!
— Те истя мезень кис? — эзь чарькоде, келейгадсть прявт докторонть сэнь сельмензэ.
— Э-э-э, истямо «фрукт» тенек лездыть кундамс... Секень [217] вант, генералонь лем тень понгавтыть, — цяхазевсь сядодо ламо килонь сталмосо «главментэсь».
— Те истя тон поптонть ледстнят?
— Самай сондензэ, доктор, сондензэ! Тон витник-петник, ней минек кирдась, минь кундатано витнемензэ. Ансяк, чарькодят, допрок лия ормадо, — азоркс марясь эсь прянзо нупальсэнть-кабинетсэнть кортыцянть жой-гай эчке вайгелезэ. — Ды аволь вете-кото чинь пертькак.
— О-оно кода... Кодамо ормадо?
— Аволь ормадо — орматнеде, доктор.
— Ды кодат, зяро?
— Васенцесь — саламонь-коламонь обуця. Ор. Истя мерить эрзякс сындест? Ор — ас! Понгонесь панжома экшс. Мерема, аволь аламос. Шканзо аштизе. Лиссь. Лиссь ды одс, превтеме, кундась текенень—ташто тевезэнзэ. Ве саламсто маштсь ломань. Сеске эзь понгокшно. Вешнинек эйсэнзэ масторонь келес. Тейсь оймень саицясь од паспорт, полавтызе фамилиянзо-лемензэ, чачома тарканзо, чинзэ. Полавтызе, неик, чачонзояк: нолдась кувака черть, муюкт, мештень келес сакалт. Понгавтсь крест. Алкуксонь поп! Чачома масторозо те попонть — чикуншка ёнкс.
— Кода, ёвтык, понгсь минек пелев, Кузвелев?
— Кода... Эно мезекс тензэ эрявсь од паспортось? Сонзэ вельде пачкодсь минек пелев. Тензэ кемезь, кучизь Кузвелев попокс. Вана истя.
— Косо озномань койтнень тонавтнинзе? Семинария, паряк, мезеяк лия прядсь? — прявт докторось сайсь мель содамс те историянть седе келейстэ.
— Тюрьма сонзэ семинариязо, лагерь! Косо-лиясо сондензэ башка, — кучинзе валонзо стуворонть трокс милициянь покшось. — Тосо весе теевить пазнэнь кемицякс! Ловныть, коняст поркснить сюконякшнозь, церьковав чийнить. Истя, арсить, пежетест, седеяк раужо тевест нолдавить. Натой истямо мельс сынек: улиндеряй кабинетэнь прявтонть мештьсэ крест, ловт, икелеть ор. Вана истя!
...Эрямось поладызе кинзэ седе тов. Эзь аште ве таркасо певтеме мелявксонзо марто Кузвелесэяк. Кириллэнь ды Ефим ялганзо таркас, кона се чистэнть ваднекшнынзе кочкарянзо ойсэ, сеске оргодекшнэсь велестэнть, кучсть лия, «якстере кель» бачка. Сон, кода Кириллгак, эри ошсо, эсензэ колмо этажс «кудынесэнзэ». Шлямо — ды таргочистэ эсензэ машинасо сакшны [218] Кузвелев сырькайтнень тонавтомо эрямо, озномо, Иисуснэнь савтомо, пежетень нолдамо. Пачколи школавгак. Тосояк бажи совавтомс эйкакштнень удемень менчевксэзэст «и живеси на небеси» кенгелемань валтнэнь.