Ванине (2011)/11
| ←X пелькс | Ванине (2011) by , edited by Разгуляева Т. В. XI пелькс |
XII пелькс→ |
| Нуянь Видяз. Ванине: роман. — Саранск, 2011. — с. 218—242 |
[218]
| XI |
Евгений Васильевич, домка чевте кресласо озадо аштезь, ловнось книга. Сизесть, маризе, ёнкскетнева мекев-васов чийницятне. Оймсема вешить. Путызе ловномапеленть элезэнзэ. Конинзе сельмензэ ды нежедизе прянзо кресланть кутьмерьс. Ледсть мелезэнзэ ютазь шкатне. Сась превзэнзэ, кода ламо-ламо иеде икеле, эйкакшпингстэ ды мельганзо од шкасто, ловнокшнось содсо лексиця типелькай лампань валдосо стувор экшсэ эли каштлангсо кунст мадезь. Седе мейле савкшнось ловномс поездсэ, автобуссо, натой верьга ливтницятнесэ. Ловнось мезе понгсь. Сырнень шкат! Косотадо ней тынь?.. Те сестэ, ней... Ялатеке, зярс ваныцятне ваныть, книганть сайнесы нейгак. Шкань-шкань лопинетнень велявтнемстэ марсеви кашторкске.
Пингензэ перть ловнозь, автортнэнь эйстэ сайсь мель ловномс одс Рабиндранат Тагоронь сёрмадовксонзо. Содавиксэкс те сёрмадеесь теевкшнесь умок. Ютасть зярыя кементь иеть. Секскак ламо-мезе стувтовсь. Соласть ёвтнематнень сюжетэст, откертнень-геройтнень лемест, нардавсть пряудемстэнть ули-читне. Шканть вановтозо пси, пушты-пулты, а ваны мезе лангскак. Ялатеке, кадовсь а олыця ледстнемакс Тагоронь допрок лия, васняяк рузонь сёрмадейтнень коряс, валонь ды валрисьмень теемань ёрокчизэ. Допрок лия! Кие мартояк сонзэ, валсо викшницятнень эйстэ, а човорясак. Те — сон, ансяк сон, Тагор, тунь лиякс, эсензэкс педявтнесь валтнэнь-мельтнень! Секскак сёрмадовксонзо ловномсто марявкшнось тензэ васоло-васоло эриця сёрмадеенть раськензэ лексемазо, седеень чавомазо, бажамонзо, пачколесть пилезэнзэ ломантнень вайгелест ды кортамонь мазычист.
Евгений Васильевич, зярдо седе одоль, зярдо сельмтне седе пштильть, ловнокшнось аволь аламо французонь, англань, Италиянь, Германиянь ды лия кельтнестэ рузонь кельс ютавтозь книгат. Кияк, а Флобер, а Гюго, а Мопассан, а Джек Лондон, а Жорж Санд, а Майн Рид... ёвтнемань эсь ян, маряви ней тензэ, рузонь кельс ютавтыцяст ловномсто, эзть тее. Те, чарькодеви, а [219] истя. Эрьванть, эрьванть ульнесь ды ули эсензэ кизэ. Вейкетинзе сынст, ливтинзе ве кис рузонь келесь, сонзэ сёрмадомань койтне, сынст лангс нежедемась. Рабиндранатонь лияксчизэ, эсь чачонь, оймень ванстомазо лиссть вейкестэ: ютавтыцязо «беряньстэ» ютавтызе рузонь кельс, эзизе рузыявто чачома келензэ — бен-глансенть. Мекевланг, ламо оймевийть путсь келенть ванстомсто, конаньсэ сёрмадсь Тагор, сонзэ кортамонть гайгеманзо, панжовиця ламарь чувтонь чинензэ невтемстэ. Ютавтыцясь превть эзь яжа, эзь путо мельть допрок калавтомс киксалкскенть-подстрочникенть ды штельксэнь пес ютавтомс рузокс. Келень содыйтне тень ютавтомакс а ловить, ды теньсэ, мерема, ули кой-кодамо видечи. Ули, ды аволь пестэ-пес. Ютавтомс ютавтт, теке марто, ванстт ёвтневксэнть эли ёвтнеманть оймензэ, ваньксчинзэ, келенть эрьмезьчинзэ ды мазычинзэ. «Парсте, ды апак арсе теезесь, аволь свал парос ветни», — мерекшнесь зярдо-бути превейтнестэ вейкесь.
Евгений Васильевич «ютась» зярыя ёнкст ды таго путызе книганть кумажанзо лангс, озась седе видестэ, варштась потолокс, арсезевсь: «Умок те ульнесь. Аволь од уш ульнинь, аволь сыреяк. Сёксень эрямосо эрилинь. Вечкевкшнесь тень те сёрмадеесь! Истя, маряви тень, вечкилия васень вечкемам, — чиремсть лия ёнов арсеманзо, — панжиковонь нурька ветнестэ ашо, тантейстэ качадыця ламарьксэнть алов якамом. Куш ве минутас совамс тозонь, куш варштамс ашосо оршазь се чувтонть лангс, лекстямс весть-кавксть иредстиця кошттонзо. Арась...»
Атянть од шкань масторонзо велькска «тантей» ливтнеманзо апак учо сезинзе кудыкельде марявикс калдоркс, кенкшень эль марявикс чикоркс. «Те кие истяня? Кинь мельс лединь?» — чачсь-ютась ловныцянть прява. Путызе апак пекста книганзо вакссонзо стуворонть лангс, пилысэнзэ чошкаезь апак эрязкале лиссь удало кудов.
— Сован? — кенкшенть келес панжомсто пшкадсь ды эрязасто каинзе пильгензэ тарчксонть велькска сэрей, виде рунго асодавикс цёра.
— Кевкстнемскак а мезть, совак! — тердизе мизолдозь Евгений Васильевич совицянть, ниленьгеменьшка иесэ чуморкс ломаненть. Цёрась валдо чама, сэнь сельме. Яла мерить, те тюсось — эрзянь. Олгонь тюс чердензэ «мелявтсь», а беряньстэ «судринзе» шкась. Ушосонть кизэ куншкань пси. Совицясь оршазь сонзэ коряс: лангсонзо нурька ожа, човине ашо коцтсто стазь панар, [220] валдо, макшо тюсонь понкст. «Мазыйстэ, кизэкс...» — редизе, эзь юта вастыцянть вановтонзо вакска.
— Шумбрачи, Евгений Васильевич! Икелеть ашти, теевтяно содавиксэкс, Галаев Петр Дмитриевич. Самай сон. Мон, кецневтян, «Валдо ян» газетасто. Ули, ули истямояк. Марсить-эзить? Кодат ней ансяк арасть! Ловныцятне содасамизь, ёвтаса, лиякс — Гайнинькань Пичайкс. Секскак, кода мелеть, истя мерть. Эстень седе вечкеви эрзянсесь.
«Вайгелезэ, — тешкстызе эсь пачканзо вастыцясь, — гайгиця, верцетнестэ, кода мерить, аволь рокицятнестэ. Чудикерьксэкс чольни. Тенор. Ленскоень тензэ ладяволь морамс эли, тосо, Эскамильонь... А стяко, бешоконь, истямо гайги лем сайсь...»
— Паро, паро... Те мезе, седе товгак карматано кенкшень ванстомо эли аштеме, теке пурныцят? — муст-муст пейдезевсь совицянть каршо вастыцясь ды ахолдась вить кедьсэнзэ, невтсь икеле кудонь кенкшенть ёнов. — Икелев адя. Седеем мари, та-кодат покш тевть яксевтят. Истя?
— Кода меремс... — айгсь кевкстемадонть цёрась котанзо эрязкалезь юксемстэ-каямсто.
Совасть мельцек-мельцек икеле кудос. Азорось апак корта кедьсэнзэ невтсь инжентень озамс стена ёжос аравтозь стуворонть вакссо омбоце креслантень. Новольсь теке басом эсензэ озамо таркантень сонськак.
— Ков ансяк а пачтятадызь журналистэнь китне! Ков эзинь пачколе, а вана Кузвелев — васенцеде. Аволь васолояк — эзь савкшно. Марсинь, содынь эйстэнзэ, понгомс эзинь понгоне. Истя вана... Неень шкань эрямосонть мезть ансяк арасть: урныгайть, самолётт-ливтякайть, поездт... Течи, ванат, ломанесь тесэ, ванды-модамасторонть тона песэ. Ёвкссояк, маряви, истят тюнихат эзть ёвтневе. Каня истя ульнесь аволь умок, сядо-кавто иеде икеле?! Мхы! Ды мезть ледстнемс пингетнеде?! Меельце ведьгемень-кодгемень иетнень перть кодат полавтовкст! Превс а саеви, — ёвтызе, куш кияк эзизе кевксте, Пичай мелензэ эрямосонть меельце шкань полавкстнэде.
«Та-кодамо а чарькодевикс ломанесь. Вельть уш кувакасто, ламо корты, ды, текенень, капшазь, келейстэ...» — путсь питне эсь пачканзо сыцянтень Евгений Васильевич. Марямга, зярдо прядовсь Пичаень монологозо, мерсь:
— Иля кортаяк.
— Мон вана мезть якан-пакан, карть калавтан, — полавтызе [221] кортамонзо Галаев. Тень пингстэ путызе керш кенерепакарензэ вакссонзо стуворнэнть лангс ды поладынзе валонзо: — Саинь мель сёрмадомс паро, кемевтиця, цифрадо-мезде тыц пештязь статья...
— Мезде? — икельдизе, совавтсь вал икелень тонавтыцясь.
— Неень шкань весемеде вастневиця ормадонть — алкоголизмадонть. Мезес, ков сон вети ломаненть? Панжомс, васняяк, тувталтнэнь, невтемс те отьмантень ветиця китнень... — азоркс марясь эсь прянзо Пичаень вайгелезэ.
— Ну-ну, мелесь а берянь... — нулновтызе прянзо, шнызе Евгений Васильевич ды кхы-кхы козкстась коморозонзо.
— ... Ёвтнемс, теке басом, мартонзо сюлмавозь нулгодькс тевтнеде. Вана кодамо тенсть панси эйсэнь. Кеман, карми лиснеме номерстэ-номерс, — прядызе цёрась сезезь мелензэ.
— Кодамо карми ёвтавомо мель?
— Ёвтаса: невтемс мезес пачкодить алкогольденть, наркотиктнеде раськесь ды масторось. Те карми келейстэ саезь, — варштась Пичай стуворонть тона пеле аштиця кевкстицянть лангс.
— Чарькодинь, — мерсь, ды Евгений Васильевичень вановтозо эртевсь ёвтницянть вановтонзо марто. — А чарькодеви лиясь — мезекс мон теть маштован?
— Вана мезекс, Евгений Васильевич, — Пичай таргась понкс зепстэнзэ ашо ванькс пацине, ютавтызе судонзо алга, нардызе чертеме касмонзо. — Ульнинь вельсоветсэ, неень кельсэ — администрациясо. Тосто кучимизь школав. Тонавтыцятне путымизь превс: келя, весемеде вадря ули, бути пшкадят Ледяйкиннэнь, — тонеть. Сон, келя, школасо важодемстэнзэ ве ёно эзь аште те проблеманть эйстэ, путсь вийть те эли тона апаронть кардамсто.
— Паряк, ульнеськак мезеяк... Ды те уш умок ютась... — сыре тонавтыцясь кувакасто таргизе оймензэ ды чатьмонезевсь. Прянзо пурдызе витев, варштась маласонзо аштицянть лангс ды кевкстизе: — Мельсэть алкоголизмань каршо «оёвамось»? Генсекекс кие ульнесь, Горбачёв?
— М-хы! Кода эно... Сон, сон ульнесь, кортакшовось!
— Эзик стувто виноградниктнень марто тюреманть? — кепединзе сельме чирькензэ кудазорось.
— М-хы! Стувтыя... — меельце валонть Пичай ёвтызе ускозь. — Каня стувтовить узеретнень се шкань азаргалемаст?!
— Мезе макссь? — кавто валсо поладызе кевкстнеманзо Евгений Васильевич.
— Виде, седеяк! Ёвтык, видестэ теть пшкалян — Пичай? Паряк, Петр Дмитриевич?
— Арась-арась, ансяк Пичай, — чаманзо икеле кедьсэнзэ сеедьстэ, теке мекшеде, ахолязь, капшазь ёвтызе мелензэ цёрась.
— Пшти пей ятонть марто тюреманть ушодомаль ды ушодома... од ойминенть чачома чистэнзэ саезь, — поладызе ушодозь кортамонть Ледяйкин. — Тень таркас верендясть виноградниктнес...
— М-хы! Мон аламнеде лиякс арсян. Ушодома тень, нолдык чумом, Евгений Василеьвич, седеяк икеле! Чачтыцястонть саезь. Во! Вана косто ушодови уцянь яжиця кись, — каясь трокс вал корреспондентэсь. — Сестэ вана, 80-це иетнестэ, тень таркас, тапасть ченьксэнь панема партнень-чугунтнэнь. М-хы! Те — идемчи! Лиякс кодаяк а лемдеви.
Теевсь аволь кувака каштмолема. Эрьвась те лип шкастонть арсесь ансяк эстензэ содавикс арсема. Евгений Васильевич пекстызе стуворонть лангс путозь книганть ды таго кортазевсь:
— Виде-виде, Пичай! Ушодомаль, тагояк мерян, ды ушодома школасто.
— М-хы! Те кода истя? — эзь пра Пичай ве мельс марязенть марто. — Апарось ташты вийть кудонь пувозсо, семиясо! Секскак...
— Мезе, «секскак»? Кие, ёвтынк, пувозонть теи? Таго школась! Келейстэ чарькодезь, содави, — эсь ёнкс кирдсь, кемевтсь икелень тонавтыцясь. Лепштязь, явозь ёвтынзе «таго школась» валтнэнь. — Весе, весе ушодови школастонть! Учительстэ. Иля стувтне: школась — те альфа ды омега. Сон минек ковгак а маштови. Ковгак! Пакшаненьгак содави: тонавтомань системанть юрозо—педагогикась. Истя? Истя. Эйкакшостонть теемс ломань, аволь компьютер! Кода минек? Мекевланг. Васняяк пештить прев утомонть. Нерьгезь нерьгить! Кевейкее класстнэде мейле од ломантне содаст академикте ламо! Ёвкс, тамашань тевть... Мезе ды мезть ансяк а тонговить колганозост! Математикесь эцезь эци эсензэ, географось, историкесь — эсест, а ютни тень вакска мик физкультурникеськак. Истя сельмень неезь шаштови ве ёнов, визькс улезэ, те самай «ломанень теемань» стакачись. Мезекскак сонзэ а ловить. Секс пачкодинекак Симицянь масторс, — Евгений Васильевич кувакасто кортыцянь авечкицясь, истяня кортазевсь сонськак. Вельть уш темась малавикс. Нежедизе кутьмерензэ креслантень. Оймась.
— Ужо, ужо... Те кода истя — а лован? Ансяк меринь. Сынст питнест, Пичай, а онкставить а целковойсэ, а долларсо! А максовиндеряйть содамочить — те а школа. Мон лиядо. Школась, васняяк, тонавтозо арсеме, сынст, неть «читнень», вешнеме, видестэ, аволь прянь нолдазь, якамо! Содазо тонавтницясь, мезекс сынь максовить, таштавить ды мезекс маштовить. Школась кастозо, тагояк мерян, Ломань. Ней сон нолды роботг. Казямосто ёвтазь, кургс ваныцят. Те ков маштови? — Евгений Васильевич псистэ ёвтызе, мезе сонзэ талновтсь.
Гайнинькань Пичай, цифрань-материалонь вешницясь-пурныцясь, таргась понкс зепстэнзэ блокнот ды сёрмадомань кедьёнкс. Путынзе вакссонзо стуворонть лангс.
— Чарькодитинь, Евгений Васильевич: тонавтомань системанок ковгак а маштови. Куш латкс сявордык! Сон а теи, кода тон мерить, ломаненть ломанькс. Школась а касты тетят-ават — вана косо кажось! «Берянь» тетятне-аватне кастыть «берянь» эйкакшт. Кирькс петне васодевить. Ушодови весе одс. Истя? — кевкстеманть марто вить кедень невтиця сурсонзо невтсь потолокс.
— Петнявкскень пес, корреспондент! — пейдезевсь мекс-бути кудонь азорось. Прок эзь телькемкшнеяк. — Весе тонавтнинек. Тон а умок, мон — о-о! — ёвтамс келем а сыргавтови — васенцеде совинь класс войнань ушодовома иестэнть! Оно зярдо! Чистописаният-правописаният, физикат-химият... Мезть ансяк эзть нерьге прязон! Кить минь? Кодамо Масторонь ломанть? Кодамо келенек? Мезекс сынек те моданть лангс? Кодамо мель марто? Кода ютавтома тенек нолдазь петнень? Мезе мельганок кадтано? Истят кевкстематне школань кудыкельгаяк эзть яка. А совсить, содан, нейгак. Вейксэце-кеменце класстнэсэ эряволь ледстямс сёлмонь келемтницятненень: учи эйсэнк стака ды теке марто кецневтиця канст — пурнамс варманень а салавиця, а калавтовиця пизэ, ливтемс левкст. Косто... Школасо теде пелить кортамодояк!
— Мезть кортамс, Евгений Васильевич, нолдык чумом, а шкастонзо каязь валом кис. М-хы! Кодат школат... Институтсо-косо теде валгак а ёвтави! А тон... — таго ювк кепедизе вить кедензэ, невтсь потолокс. — Тосо уш — во кода эряволь ветямс истямо курс! Арась, а ветяви. Секс лодорсо, кавксоньгемень процентс, [224] юкстневить урьвакстомань-венчамонь сюлмавкстнэяк.
Кудазорось полавтызе вакссонзо книганть тарканзо, стясь чевте озамкастонзо ды ушодсь, удалов кедензэ путозь, мекев-васов якамо тюжасто артозь цитниця кияксканть. Зярс-бути чатьмонсь, теке арасесь, кода ды мезде поладомс кортамонзо. «Кодамо потмо вий, кодамо пси седей эйсэнзэ, те камажа, аволь эчке ловажа ломаньсэнть», — арсезевсь Пичай яксицянть мельга ванозь. Минута-омбоце, ды кудопотмонть пештизе атянть чевтестэ гайгиця вайгелезэ:
— Видеть валот. Весе эйкакштне инженерэкс-мезекс а кармить. Ды кинень эрявить зняротне? А вана тетякс-авакс теевить малав весе. Весе! А тенень... косояк, кияк а тонавты. А школасо, а косо-лиясо. Те кода истя?! Мик нармунтне, сетнеяк ламос-мезес тонавтыть левксэст. А ломантне? Дюниянь тевть! — сюморасто, седей ризксэнь марязь, кой-кува машнетезьгак, ёвтынзе валонзо сыре тонавтыцясь кияксканть яказь.
— Монгак истямо мель кирдян. Ансяк, теня... вельть уш, Евгений Васильевич, ламо мурнят превень максыця кудонть. Вана таго чумо муить — а аноксты школась тетят-ават! — совавтынзе Пичай валонзо кортамонь лувонтень. Ёвтамстост керш пильгензэ путызе витенть лангс.
— Ну кода а чумондомс, ёвтык?! Сон конязь сельмть неяви. Содасынь те «кудонть» асатыксэнзэ. Педе-пес! Ниленьгемень иеть эйсэнзэ лакинь-пиинь. Содасынь...
— Ниленьгемень! — лиссь Пичаень тетькевезь кургсто.
— Армиясо ульнить? — допрок лиядо, апак учо пшкадсь тонавтыцясь.
— Ульнинь, — кемекстамга чиремтизе прянзо Пичай.
— Гарнизононь службань уставонть садасак? Ули школань уставгак. Оймест-юрост сынст вейкеть: илязо сова армиянь казармантень кодамояк «лазутчик»; школань — кодамояк од, седе «пшти» мель, вановт. Программа... Пельсантиметраяк а мереви шаштомс эйстэнзэ: а витев, а кершев. Истя вана. Казарма... Гарнизононь служба...
— Кода седе чарькодевикстэ?.. — якицянть мельга ванозь, пшкадсь, мель путсь содамс Пичай.
— Седе чарькодевикстэ а ков. Пирявкст. Кодат ансяк а стявтнить! Кодамояк каршо вал эрямодонть, седе домка арсевкс илязо ливтя класстнэс. Невтемс сонзэ истямокс, кодамокс неяви кирдийтненень. Содаст од ломантне ансяк Пифагоронь, [225] медэнь ды сынсест... кирдийтнень. Секскак Кузвелень школас вестькак ве ёндонь ломанть эзть тердтне. Вестькак! А сёрмадей, а журналист, а... Ков а варштат — Маннергеймень кондят пирявкст. Толдо пек пелить эсест превсэ арсицятнеде!
— Паряк, те весе арсезь тееви? — вайгелень тертязь, арсезь пшкадсь Пичай, зярдо мекев-васов якицясь арась каршонзо. — Кодаткак раужо вийть?
— Кавтолдат? Допрок истя! Кой-кинень, кой-кодамо мастортнэнень удемтеметне — сырне. Ков мелеть, тов ветяк, панть, мезе эряви теемс — теевть. Каня берянь? Урень, лишмень вий, — ёвтызе мелензэ, кемекстынзе Пичаень валонзо Евгений Васильевич креслазонзо озамсто.
— М-хы! Тевтне аволь цитницятнестэ. Моданок эйсэ, видеяк, васоло ёнксонь алятне цопаить — весе чатьмонить, эсь модаст лангсо эриця раськетнень кшувавтнить — чатьмонить, эрзянь велетнес озыть лиякс кортыцят — чатьмонить. Теке кельтеметь! — лаказевсь, мик стясь таркастонзо ды сеске мекев озась корреспондентэсь.
— Иля пиксе. Оймак. Теде мезеяк а полавтови. Адяка цёра, ютатано умарь пирев! Пси кудосонть. Саты ливезькалемс ниле стенатнень ютксо, — мерсь Евгений Васильевич ды, теке басом, ливчанясто, теке аволь сыре ломаньгак, явовсь кресластонзо, васенцекс ширк-ширк эскельдясь кудо кенкшенть ёнов.
Кортницятне лиссть ушов, валгсть кузтемаванть ды совасть сэнь конякс кудонть икеле аволь покшке, валдосэньстэ артозь, лазпинесэ пирязь умарь пирентень. Чувттнэ сыреть, рацянят, алксост апак чувно, тикшинесэ вельтязь моданть копачизь сулейсэ. Вадря, алкукскак, тесэ!
— Эмежть-мезть — кудонть удало. Модарнетькак зяро-бути путнетяно. Зяро атяломаннень эряви... Сыредсть умарькстнэ. Малав эсень туро тенст. Озавтнинь — од ульнинь. Колоньгемень-шкаяктень арасельть. Сыредсть... Весе сыредтяно, — ледстнесь, ёвтнесь, чувтотнень юткова янганть апак капша эскелямсто, пирень прявтось. — Прят теде ковгак а кекшсат. Адя оно тозонь, эземнес озатано. Несак?
Сэрей, виде рунго Пичай ды алкине, теине лавтов, иетнеде лов ашо чуро черь сыре тонавтыцясь ютасть латошка «штрейфлинг» сортонь умарьксэнть алов. Чизэ пси, тесэ, пиже «латонть» ало, истямокс а маряви. Текенень, кой-зярдо пачколить цяк пувсиця-лексиця, дёлиця вармань зэхельнеть. Коштось ванькс, [226] вечкевикс, лексеви шождасто. Мекс тензэ, кизэнтень, истямокс ды седе кувакакс а улемс?
— Тесэ вана поладсынекак форумонок. Кода? Моли? Аштетяно, превтеметь, стена ютксо! Телень, озязонь нернешка читнестэяк тосо аштеват. Ней вана... валдо, лембе! Кецнек ды кецнек... — эсензэ марто кортазь, пирень азорось стамбарнэ озась эземнентень.
— Мезе, Евгений Васильевич, панжсынек, кода тон мерить, форумонок? Кода тень лангс ванат? — пеедькшнезь, гайги вайгельсэ мерсь атянть ваксс озамсто Пичай. — Кортамонь кувтанок теке: мекс велетнева злыдардить симагайть, мекс кулыть велетне, мекс эйдень кудотне войнавтомо пешксеть уроздо.
— «Форумдонть»... Эно мезень кис тей кирякстынек? Ней «мекстэнть». Колмоксть ёвтык, — мизолдозь ледстизе кудатясь. — Секень вант, пуворькс таргози кельпрязот неть «мекстнэде»! Чамсть велетне... Аватне лоткасть чачтнемеде! Кие теде а соды? Нолдындеряй вейке, те уш ламо...
— Э-э-э, Евгений Васильевич, те — айсбергенть тёкшозо! А тосо, седе ало мезе? М-хы! Лоткасть чачтнемеде... Мекс лоткасть? Кие чумось? Таго школась? — пелезь, илязо покордаво вастыцязо, пшкадсь Пичай, судонзо икелев невтема суронзо кивчк кепедезь.
— Эно кие? Школась! Зяроцеде уш марян. Сон, сон, Пичай!
— Те уш, Евгений Васильевич, та-ков лияв туевить. Школась ды школась... Те кода истя? — эзь арсе потамо инжесь.
— Самай истя, цёра! Кияк, ёвтак, совавтни тетятнень-аватнень превс, зяро эйкакшт улест пувозсонть-семиясонть? Зяро иеть улезст ютксост, кода трямс-кастомс... Тонавты школась? Сынсь тонавтыцятнеяк кадызь «авань тевест». Вейке! Ламот эйстэст эзть марсеяк вейкенть кастомсто стакачитнеде. Ма-лав-гак! А содасызь педагогикань юртнэньгак. Школань, тонавтомань системась-масторонть икелечизэ. Кодамо сон — истямо масторось, государствась. Оно ков школась вети! — Евгений Васильевич чамдсь мештестэнзэ ламо иень перть таштазь арсематнень.
— Тонь зяро? — апак учо, ансяк прядынзе валонзо кортыцясь, пшкадсь Пичай, каизе вить пильгензэ кершенть лангс ды комась конёвонзо вельксс.
Евгений Васильевич чарькодизе кевкстницянть.
— Колмо. Кавто цёрат ды тейтерь.
— Ды кода? Нолдык чумом кевкстемам кис.
— Монь кавто, — видькстась Пичай кевкстемань апак учо. — Койсэнь, седе вадряль, колмо. Ды, седеяк, мельцек-мельцек! Сестэ эсь прянь вечкицят авольть уле. Ней вана... Теде башка, лия ильведькс теинь: эйкакшон, кавто тейтерень, эрзякс а кортыть. Те сардось сыявтомо карми седеем куломазон. Пежеть, покш пежеть теинь! Оймем, виень, превень ды содамочинь максынь лия раськень туртов. Аваст татарава, чачсть ошсо. Ялатеке теньсэ чумом а нолдави. Шкань ютазь, Евгений Васильевич, ламо мезе чарькодеви ды аламо-мезе витеви. Урьвакстомскак тень эряволь эрзянь тейтерь лангс... Од шка! Арсемат сон а вечки...
— Нолажтыть... Каня тон ськамот? Истятнэде ней... — поладызе ёвтазь меленть Евгений Васильевич. — Тонь куш нить татарава, ламотне кавонест эрзят, «левксэст» — рузт. Вана косо кажось! Паро теяк: тон ильведьксэть чарькодик — марян, янксят, ризнат, мелявтат. Лиятне вана... Ды мезе лиятне? Малав весе эрзятне. Сынст те дух а поксари! Сынст морост вейке — ялатеке. Човор семиятне, корты статистикась, лавшот, ламот каладыть, эйкакштнеяк, маряка, лисить-касыть, сеедьстэ, пиштяка ратажокс.
— Коршинь, содаса човортнэнь растест, — кувакасто лекстясь ды мерсь Пичай. — Мольтяно нинть, татаронь велев, — мон тосо курго автнян — валт аздан. Кодаяк а учови туема шкась. А кармить, содави, монь кис педе-пес ды весе кортамо рузокс! Мольтяно аванень, эрзянь велев, татаркам салавине ушоды скирямон, тердеме кудов. Налкстави тензэ. Кода лиякс? Вал эрзянь а соды. Мон татаркс а чарькодян, нись — ... Истя минь тапинек-куловтынек кавто кельть. Эйкакшон — рузт. Теньсэ весе ёвтави... Евгений Васильевич, тонсь мерить: вейкеде ламо ней а нолдтнить. Зярыя валт «вейкинетнень» обуцядост а ёвтат?
Икелень тонавтыцясь путызе вить кенерепакарензэ стуворонть чирес ды нежедизе кедькоморсо улонзо, «зярыя валтнэнь» каземе эзь эрязкале.
— Содат, Пичай?.. — колызе каштмолеманть. — Ули валмеревкс: «Вейке эйкакш — а эйкакш, кавтотне — пельэйкакш, ансяк колмотне — эйкакш». Пингеть валакавтнесть неть валтнэнь! Кода а кемемс? Марсинь тедеяк: «Авась чачтыця — тейтернезэ кастыця». Видеть валтнэ! Ансяк чачи эйдинесь, тензэ кортыця [228] ялгине улезэ, тонавтыця.
— М-хы! А авазо! — эзь кирдеве, совавтсь вал Пичай.
— Капшат, цёра. Авась — ава, сон зярдояк а кортазеви эйкакшонь кельсэ. Кода илязо бажа. Те — кавто масторт. Секень вант, кавто галактикат. Истя-аволь?
— Истя, сави меремс, Евгений Васильевич, — потась эрицясь.
— Поладса «лекциям». Каршо а молят? — пирень прявтось нолажт кепедизе вановтонзо Пичай лангс. — Эйкакштне эсь ютковаст вейкест-вейкест пельде тонавтнить. Те — школадо ламо. Те — аксиома. Секскак вейкинетне, кирдажост коряс, аволь чуросто, кортазевить седе мейле. А уш бути тетяст-аваст эсь ютковаст лабордыть чачома кельсэст, а «умарнест» марто рузокс — паро иля учо, кадови пакшась.
Минек школасо, те уш умок ульнесь, тонавтнесть ветеце классто саезь татаронь эйкакшт. Эсест велесэ школаст ульнесть ниле классонь. Сакшность Кузвелев. Ды мезе арсят? Ютко шкане школань коридортнэ, ушось тонавтызь татартнэнь эрзякс кортамо! Школаст прялизь колмо кельсэ кортазь: эрзянь, рузонь ды татаронь.
— Ней... эрзянь кель, кортыть, ветяви рузонь школатнесэяк, — кецнемань таркас нусманя вайгельсэ яволявтсь Пичай.
— Сельведть те! Аволь тонавтома — келень куловтома, — сеске путсь питне Евгений Васильевич те «ветямонтень», аравтызе таркас ялганзо «яволявтоманзо».
— М-хы! Ды минь таго а тов туевинек...
— Те кода — а тов? — абунгадсь сыре тонавтыцясь. — Каня келень нельгемась а рашты лытагайть, симицят? Каня эзь лезда — чамсь Кузвелесь.
— Чарькодинь. Ды, теня, ледстяса мелем: зярыя валт вейкине эйкакштнень обуцядост...
— Да-да, ледсь мелезэнь! Мерят, кодат вейкинетнень обуцяст?.. Васняяк, тешкстак, сынь эсь прянь вечкицят. Весе улезэ сынст коряс. Чульть а истя — ордадыть, кежиявтыть. Ламотне бажить озамс киньгак сявдикс лангс. Кудосо тетятнень-аватнень лангсо норовить ардтнемс.
— Нузяксчи... — совавтсь вал Пичай.
— Виде, виде! Теде а мезть кортамскак. Гончаров тень оно зярдо редизе! А минек алюхась Лавгинов? Содави, ков вети тевде орголемась! Сонзэ эйстэ «чачи» «инегуень ведентень» [229] правтомаськак. А уш сонзэ мельга... Кувакасто кортан? Безардевить? Мезе теят, школась тонавтымим. Лавтовлангонь чакшоськак сыречис пешкели. Мелем — чамдомс. Истят минь, сыре кренчтне! Ламот эйстэнек ярсамодосткак стувтнить, ансяк понжавтнемс валтнэсэ, — Евгений Васильевич козкстась, таргась кудоютконь понкс зепстэнзэ пацине ды конястонзо нардызе ливезенть. Вармань эль марявикс чевте ялткетне мельспаросо судрясть-вадяшасть шержей, зярдо-бути кумбрякс менчевезь тусто черензэ.
— Монгак, мерема, истятнэнь марто вастневинь, ялатеке норовост содасынь беряньстэ. Секс кевкстнянгак, — ёвтызе мелензэ Пичай.
— Монь койсэ, саты ансяк ёвтазеськак, Гончаров марто Коломасов те кажонть ливтизь лангс ... микрононь пес, — кемекстынзе икеле ёвтазь валонзо Ледяйкин.
— «Вейке эйкакш — а эйкакш»... — апак капша, арсезевезь, прок эсь пачканзо, прасть Пичаень кургсто Евгений Васильевичень пельде марязь валтнэ. Сынст поладынзе седе марямга кевкстемасо: — Кода сестэ, мертяно, Китай эри ды карми эрямо? Тосо лозунг: вейке семия — вейке эйкакш! Варчик, иляк топавто сонзэ! Натой омбоценть а тешкстасызьгак — ули сон, арась...
Евгений Васильевич арсезевезь мерсь:
— Видькстан, а содан.
— Мезес, алкукскак, пачтизе ды пачтьсы те масторонть истямо казямо коесь? — макссь эстензэ кевкстема Пичай. — Эряви тень поксарямс библиотекасо...
— Аламнеде, эль-эль, поладса икелень кортамом. Вейкинетне эрьва кодат эрсить. Ули-арась «вейкиненть» тетязо? Ламотнень арась. Три авазо. Натой валсюлмавкс чачсь: «вейкинькай ава». Эйстэст зяро, арсить? Зяро , теде башка, тетявтомо-ававтомо вейкинькайть, урозт касыть эйдень кудотнесэ?
— М-хы! Теде седе паро а ледстнемскак... — талнозь тешкстызе инжесь.
— Мезес те пачти? — поладызе азорось.
— Иля кортаяк... — нолдызе прянзо Пичай.
«Лекторось», кода мерсь эседензэ Евгений Васильевич,
сурсемень таркас вете сурсо «судринзе» удалов лов ашо чуро черензэ ды кортазевсь одс:
— Эйкакшось, трявиндеряй тетявтомо, касы цёрань ёнкстомо.
А совить эйзэнзэ «цёрань видьметь». Сон коронь коряс тееви авань кондямокс. Стака тензэ карми муемс ни, пурнамс семия. [230] Полавтови, кода кортыльть гректне, психиказо.
— Аламолгадыть оймеёжонь сюпавчинзэ, — капшазь поладынзе икелень тонавтыцянть валонзо Пичай.
— А содан зяронь туро, ансяк те — истя. Содат мезе, инже?
— лип меремга полавтынзе валонзо Евгений Васильевич. — Эрьга... тонь марто минь, журналист ялгай, яволявтано ютко шка — копордатано кофеде. Кода тон? Туи?
— М-хы! Кополсо, — пеедькшнезь мерсь «журналист ялгась», мештезэнзэ совась эрьгела ёжо. Комась ды путсь эстензэ содавикс тешкске блокнотозонзо.
Евгений Васильевич, сыречинь иензэ лангс апак вано, эрязасто стясь таркастонзо, ноцковтызе алов ланга нолдазь триконь сэнь панаронзо ды эскельдясь тикшесэ вельтязь теине яннэванть кудов. Учомс савсь а кувать. Куроксто велявтсь мекев. Кандсь кедьёнкссо-кандтнемкайсэ электрочайник, кружкат-мезть ды суликань банка «СОЬО» кофе. Сынст мельцек-мельцек путынзе икелест лаз пестэ «сювордазь» стуворнэнть лангс.
— Умарьпиресэ, экше таркинесэ савкшнось теть копорямс тантей чине кофеде? А? То-то, — каваницясь, стядо аштезь, паро ёжонь марязь, кайсесь бальцянонь кружкатнес сахар, кофе, нуртясь «TeFal»-стэ ансяк лаказь ведь. Човоринзе. Тантейстэ качадыця недь марто вейке кружканть айгизе инженть икелев, омбоценть путызе эсензэ ёнов. Озась, стуворонть пес нежедезь, тарказонзо.
— Видьстэ меремс, эзь савкшно, Евгений Васильевич, — мельспаронь кирдезь, мерсь Пичай ды састыне, пувсезь — а пицевемс — копордась кедьгестэнть чопода-тюжа тюс ламбамо симемапельденть. — Тантей! Чинезэ мезе ашти!
— Кодамо эрямос пачкодинек, видеяк, а! Кофе... Валонтькак ансяк книгасто некшнинек. Ней на — копоряк, витнек седееть! Кода, вантая, полавтовсь весе. Ёвкссояк истят тюнихатнеде эзь ёвтневе. Ды истямо нурька шкас, — прясонзо чирьказь абунгалесь кофесэ анелицясь, — натой Бразилиясто ускить.
— А кемевияк... — мерсь буволдозь кунсолыцязо ды таго токавтынзе човине турванзо кедьгенть чирес.
— Моненьгак... Кодат-бути сядо иеть, ды вана мезес пачкодсь ломанесь. Прянзо лангс велявтызе эрямонть! — кодаяк эзь оймаво, яла абунгалесь Евгений Васильевич. — Мезе ашти ансяк зепень телефонось! А интернеттнэ-сайттнэ?
— Арсезеват — пелят, преветь лаказевить. Мезес пачкодить [231] седе тов? Нефтатне-газтнэ прядовома лангсот. Коштоськак аволь певтеме. Мезе тееме кармить? Ней ардтнетяно, мезе мейле — ливтнеме ушодыть? Эли якамо ...ниле пильге лангсо? А содан... — мерсь мелявтозь Пичай. — Евгений Васильевич, минь эзинек прядо кортамонок Китай мастордо. Кодамокс неевлить сонзэ тевензэ?
— Китай... Арась, мон аламо-мезде содан сынст тевдест, секскак... — пупордясь, эзинзе прядо валонзо Евгений Васильевич.
— Поладсынек сестэ эно те кортамонть сы самстон, — ёвтызе мелензэ Пичай.
Евгений Васильевич копордась весть-кавксть кружкастонзо, путызе тарказонзо ды поладызе кортамонь кирьксэнзэ:
— Минек эсенек стакачитне эцить кенкш алгаяк! Кодат тесэ Китайть?.. Миненек эряви тонавтомс тонавтыцятнень, тетятнень-аватнень. Толтомояк неяви: кодат тетят-ават, истят эйкакшт. Секскак...
— М-хы! Мезе ней, течи теема? — кивчк варштась Пичай икелензэ аштицянть сельмс.
— Анокстамс од ломантнень школасо-косо кудораськень, пувозонь пурнамо. Вана мезе. Явомс мель аволь ансяк школасо-косо тонавтницятненень, эйкакш мартотнененьгак. «Ликбез» эряви. Вана истя. Лия ки арась. Ютавтнема экзаменткак! Пурнат урьвакстомо — кирдть экзамен! Тееви теть пизэ? Кастови-арась превей ломань? Монь, Пичай, истямо теориям.
— М-хы! Каня те берянь — озавтнемс парта экшс сыретненьгак? — пейдезевсь ды ёвтызе, кода арсесь, Пичай. Копордась весть-кавксть татейстэ качадыця начкодонть, путызе кедьгенть тарказонзо.
— Те, цёра, аволь пеедькшнема! Покштятне-сырькайтне эйкакштнень марто аволь аламо налксить-котьмить. Мезе содыть? Секскак — вант ды вант! Сындест ламо-мезе ашти.
— Теде ламот содыть, Евгений Васильевич, ансяк авань «сокор вечкемась» ялатеке сайни верькс. Кольневтнить пакшатнень! — Пичай витизе кутьмерензэ, озась седе ёнсто, кепедизе вановтонзо велькссэст келей лопа тарадтнэнь лангс. Ютковаст нурьгезь нурьгсть зярс пиже, гулькань алдо покш умарть.
— Сукст а педсить? — колызе нурька чатьмонеманть, кортазевсь допрок лиядо инжесь, прясонзо сорк теезь, невтсь маласо тарадонть ёнов. — Зярс, ванан, мезеяк а неяви, ванькст.
— Эрьва мезть эрсить. Кенерема ёнов седе кайсевить, — [232] та-кода мельтеме, сэтьме вайгельсэ пачтясь Евгений Васильевич ды корштась, кенерсь, кельме кофедензэ.
— Пургсят мейсэяк? — таго текеде, чувттнэнь-куракштнень ланга ваннозь, пшкадсь Пичай.
— Арась.
— Мекс? Прыть. Вейкень пес наксадыть!
— Мейле мезе... Зяро монень, ве прязон, эряви?.. Сатыть сукстнэ неньгак, эстеньгак. Сыть лиясто эйкакштне, пурныть-теить ды весе. Эсесткак неть паротне улить. Седе ламо чувто аш’а наксалить. Несыть пирявксонть ёжова чукшторовтнень? Тедеде а истя, мелят куракштне вельтязь вельтязельть раужосо. Ловт, весе кадовсть. Зяро монень эряви? Ськамон...
— Кодат сюпавчить ёмить... — мелявтозь-янксезь мерсь газетасто сыцясь. — Истя икеле арасель.
— Косто... Икеле ульнесть эрицят. Кудонтень цяк кельгильть!.. Од шкастон, виде, чувтотне вишкинельть, пургсекшнынь шкань-шкань. Мейлеяк. Ней... Мезекс?
— Седеем тарди чачома келенек кис, — пшкадсь, мурдась Пичай икелень кортамонь чудильмантень ды анокстась сёрмадомо. — Школатнесэ ветяви истяк, невтемань кис. Те — ней. Кода тевтне аштесть тонь вишка пингстэ?
— Кода? Ёвтаса, — таго сыремсь Евгений Васильевич. — Ниле классон прядынь войнань прядовома иестэнть. Весе эрзякс. Рузонсесь максневсь, кода ней мерить, предметэкс. Тонавтсь рузокс кортамо-сёрмадомо Анна Яковлевна, васень тонавтыцям. Сон эрзяваль. Секскак рузонь уроктиссэяк, ламо кортавсь эрзякс. Ветеце-сисемсце класстнэсэ эрзянь келентень ды литературантень максневсть недлязонзо зяро-бути часст. Кавксоце-кеменце класстнэсэ тонавтнинь «мордовской» классо. Эрзянь келесь эйзэнзэ-тюнгольгадат! — ...инжекскак эзь совсе. Дух! Ней тонсь арсек. Явовсь тензэ мель сеть умонь шкатнестэ?
Ды мезе? Ветеце классо мон уш содылия рузонь келенть. Ловнылинь эйсэнзэ сёрмадозь книгат. Войнань шкаль. Книгатнеяк воевасть. Весе сынст фронтов пурнакшнызь. Секскак, понгиль тень костояк, сеске сельме икелев. Муян лиясто — сеньгак. Ветеце классо, пря шнан, нилезь нилекшныя Ершовонь «Конёк-горбуноконзо», а уш сисемецесэ — Лев Николаевичень... «Война и мир» романонзо.
Тешкстык? Натой сестэ, зярдо арасельть радиот-мезть, зярдо рузонь келесь максневсь недлязонзо ансяк весть-кавксть, карминь [233] содамонзо. Эйкакш... Мезе сонензэ содамс кавто кельть! Секс превс а саеви, мекс калмос пачтизь эрзянь келенть. Пелить рузонсесь а изняви? Лавгамот! Ней рузонь кельсэ уроктомояк пакшась карми жойсэ чоледеме! Ды чоледить. Телевидениясь, мультиктне, школавтомояк тонавтсызь. А компьютерэсь? Ушось?
Класстнэде ютынь аволь аламо. Ды эрьва кодат. Куш вейкесэ, куш вейке нулав, берякшке тонавтыця правтоволь валнэ эрзянь Раськенть кисэ! Кияк, вейкеяк! Пельвалнэяк кургстост эзинь маря Эрзянь Мастордонть, сонзэ историядонзо. Арасель истямо! Школась чатьмонсь. Текень теи нейгак. Секс эрзякс кортыцятне аламолгадыть сельмсэ неезь. Секс иестэ иес, прок покш войнань шкасто, ламолгадыть уроз эйкакшонь кудотне, эйкакшонь ёртницятне, симагай тетятне-аватне, милициятне... Мастортомо, сонзэ апак вечке — ломанесь паро ломанекс а тееви.
Гайнинькай Пичай стакасто лекстясь ды мерсь:
— Эзимик кецневте, Евгений Васильевич, ёвтнемасот. Эйкакшпингстэтькак, лиси, текель. Ангорясть, кода маштсть. Ну, а течи ков келенек ускить — содан. Мон лиядо кевкстевлитинь. Кодамокс тееви ломанесь чачома кельстэнзэ перьгедезь? Мезе тензэ канды лия кельс ютамось? Видьстэ мерезь, рузыямось?
Евгений Васильевич арсезевсь.
— Каня эзить маря валон уроз эйкакшонь кудотнеде? Те улияк келень кадомась. Васня тейтерьаватне кадныть келест, мейле эйдесэст пештить урозонь кудотнень. Ламоксть марсинь: «Мезе берянесь — кадстамс эйденть чачома кельдензэ! Ломанесь паро улезэ». Истят валт пачколить — кемат-арась — мик «превей» тонавтыцятнень пельдеяк.
— Натой?
— Самай истя, Пичай. Визькс... Те корты вейкеде: «превейтнень» удемсормсевксстэ таргазь арсиця таркатне. Секскак ламот арсить аволь превсэ — пекесэ ды сельмсэ. Машинакс теевсть. Ёжовтомокс. Седеень таркас мештьсэст кшни, превень таркас прясост сюват каштордыть. Ракша ваксскак... а стака аравтомс. Мельтне вейкеть: пештемс пекенть, удомс-аштемс, ну и...
Келенть каладомсто калады, макшии оймесь. Тапавить, васняяк, прянь ветямонь лувтне-кирдатне. Истя вана. Рузыязь эрзясь — те уш а эрзя. Аволь рузгак. А тей, а тов... Ёнкстомо эриця. Каня те а ки «палыцянтень»? Тешкстык, тешкстык те меленть!
Кодат од ёнкст, кевкстнят, раштавить обуцясост неть самай «мутантгнэнь»? Сёрмадт, журналист: виздема эсь нациядонзо, [234] лиясто натой кежень самга — вейке; весе виензэ путы савтомс «од» нациянтень, сюкони сенень, кие вешксты, — те омбоце; куродсы «нумолонь ормась», мари кашторкс — седеезэ беньк кочкаряс пры — те, лиси, колмоце. Истятнэ рузтнэде пек аштить рузонсенть кис, рузтнэде пек наксавтыть эрзянсенть.
— Ужока, Евгений Васильевич! Кода сестэ чарькодемс — эрзятне колмоце эли нилеце таркасот Модамасторонь омбоце войнань геройтнень ютксо? Те кода истя?
— Истя чарькодемаяк: «нумолонседенть»... — сэтьместэ, сельмень конязь мерсь икелень педагогось.
— М-хы! Ломанесь толс эци, тон — пелема. Те кода истя? Кодамояк логика а неян, — келемтинзе кедензэ.
— Эци... Начальниктензэ пели. Бажи савтомс тензэ. Мерсть «За Сталина!» — икелев, мерить «За Мао!» — тень кискак анок прянзо путомс. Мезе мерить... Секс самай сюпавдояк сюпавтано откерьсэ... Ды генералсо...
...Частнэ ве таркасо эзть аште. Дискуссиянь кондямось мольсь. Шкань-шкань мольсь «манейстэ», кой-зярдо кепсевсь «вармакскак». Корреспондентэсь сокардась истямо пизэ, конань эрицянзо кодаяк а лововить.
— Монгак, Евгений Васильевич, ёвтазденть башка, редия эрзятнень пелемань-савтомань обуцяст. Васняяк, содави, прявттнэнень. Келень кадыцятнень эйстэ ламот — иляст уле весе — анокт колмонь кирда мендявомс икелест! «Начальникесь» сильгеде алкине, ялатеке анокт прамс икелензэ. Ансяк савтомс! М-хы! Визькс! — апаро мелень кирдезь, кежиявтнезь прядынзе валонзо ды айгизе икельдензэ чаво кедьгенть содамочинь пурныцясь. Меельцесь Евгений Васильевич вакска эзь юта. Сон путызе кедькоморонзо «TeFal» лакавткаенть ёжос ды сеске саизе мекев.
— Кельмесь... — теке басом, атясь стясь, саизе лакавткаенть ды, кудонь котасонзо чошкаезь, апак капша ютась теине яннэванть кудов. Пичай кундась «ваднеме» блокнотонь лопинензэ, кадовикс, седе домка мельтнень сёрмалеме. Аволь кувать учозь, мурдась азорось. Путызе «TeFal»-нть ды, стядо аштезь, омбонь кирда тейсь «симнема»: каясь кедьгетнес пенчкень пенч кофе, сахар, тол пси ведь, човоринзе ды путынзе сувнесэ лексиця кружкатнень эрьвань икелев. — Ну-у, ней куш чокшнес сувтнек валтнэсэ.
— М-хы! Тантейстэ кода качады! Косто истямонть рамик? — мерсь Пичай ды састо-састо, пелезь, токавтынзе турванзо псисэ [235] тандавтниця бальцянонь кружкань чирентень. — Тол, зярыяк учома.
— Кевкстнят... Лавкатнеде ней ... Ансяк минек велесэ ниле! Ансяк рамак! Цёрам ускизе. Паро, мерят? То-то... Лексетяно-пувсетяно мартот мерят косояк моря чиресэ, пси Бразилиясо! А маряви ансяк ведькеверькстнэнь чавомаст, — эрьгела ёжосо, пеедькшнезь, Евгений Васильевич шнась рамазь «СоИ» кофенть. — Кода, поладсынек дискуссиянок? Мейсэ уш прядынек? А-а, ледсь мелезэнь — савтомачисэнть. Истя? Мон сонзэ умок, Пичай, редия. Умок. Мерть прявтокс кочкамс идемевсенть — кочкасызь! Кончт а теить. Серьгедсызь лия масторов «бандитэнь» маштнеме — теке тосо ульнестькак. Ансяк савтомс, куш кодамо тарканть паласызь! Визькс...
— А уречись, Евгений Васильевич?! Каня сон а савтома?
— Савтомась улияк уречи! Зяро кельть лепиясть рузонсентень совамсто? Э-э... Зяро уреть-савтыцят састь! Секс «инесь-виевесь» теевськак уцявтомо раськекс. Эйстэнзэ, те самай уречинть, аволь пенчсэ, куш парьсэ амоляк.
— Поэтэсь видестэ ёвтынзе валтнэнь: «...страна рабов, страна господ», — невтемань кис меельце валтнэнь Гайнинькань Пичай ёвтынзе вайгелень седе нолдазь, кедьсэнзэ икелензэ коштонть керсезь. — Седеяк сюконицят, прянь нолдазь якицят — эрзятне. Секскак пельдест парт учнемс а сави...
— Виде-виде, Пичай... Шумбра раськень ломантне лездыть вейкест-вейкест туртов. Эрзятнеяк лездыть: ваявтомс ваицянть. Аравтнивлиникак вейкенек-вейкенек туртов лавтов, ченькс эрькентень зняро ваицят Кузвелесэ авольть уле, — прядынзе валонзо Ледяйкин.
— Тень кис шалтадемс шабранть лангс «верев» анок эрьвась. Колт, мезеяк а мерят, — ёвтызе, мезе ёвтыксэль, Пичай ды «сыргась» седе тов. — Евгений Васильевич, маряви, таго шаштовинек кистэнек. «Глобальнойтнес» мекс-бути пурдавтано. Монь мелем седе ламо содамс тынк велень апак шля-нара якицятнеде.
— Мезе, минек велень... Мейсэяк, ловт, лиятнеде а явовтано. Теке «цунамись» ютась ланганок. Чамсь велесь. Веенст Московов кочкаряст ваднизь, омбонст ношкстасть лияв-ков. Мезе учат? Эль лыки Кузвелесь. Кадовсть монь кондят сыре пангт ды апак нара якицят. Мондень парсте содат: ёми велесь — ёми эрзянь келесь. Рузось, ялгай, ков илязо туе, кадови рузокс, эрзясь, седе сеедьстэ — потмаксс ваныцякс.
— Кевкстнят, кода улемс?
— Эно!
— Содат, Рылеев, Герцен, Ленин ды лиятнеяк ушолесть газетасто.
— Содан.
— Эно мезе?
— М-хы! Сынст ярмакост ульнесть! — сятадсь псистэ Галаев.
— Ярмакто башка, Пичай, сынст мелест-идеяст ульнесь. Ули сон минекак. Тень парсте чарькодизь «Минек Масторонок» газетанть нолдыцянзо. Ловнат сонзэ? — кепедизе вановтонзо, кирнявтсть сельмечирькензэ, Евгений Васильевич. Автордась вакссонзо табуретэнть лангсто газета ды венстизе стуворонть трокс Пичайнень.
— Аволь свал, — видькстась кевкстницясь.
— Берянь. Мон ве номер а нолдан. Эйсэнзэ чарькодевиксстэ, видьстэ ёвтави «кода улемс». Тевть теемс, аволь кель човсемс! Вана мезе. Ламо кортатано. Тевтнень теезэ кисэнек Юртава! Истя?
— Истя, Евгений Васильевич, истя, — та-кода рипакадозь ёвтынзе валонзо Пичай, нолдызе прянзо.
— Школаськак текеде чамсь. Кияк мезеяк а теи, а ловны. Киньгак мезеяк а талновты. Ули-арась «Минек Масторонок», ков мольтяно — киньгак а токши. — Кузвелень тонавтыцянть вайгельсэнзэ марявсть сюмордомань-мелявтомань гайтькеть. — Оно мезес пачкодинек! Эйкакшт арасть. А кинь тонавтомс. Арась школа — арась веле. Ловить чумокс немецтнень, Германиянть. Маштсть-куловтсть, келя, ламо миллионт. Сестэ неень войнасонть кие чумось? Кие чумось, эрзятне солазь солыть? Сталин, Гитлер, Муссолини, Франко, Пиночет?..
— М-хы! Картинась аволь мазыйтнеде, — автордызе лувонть Пичай. — Нардавить велень школатне. Эйсэст вадрясто-беряньстэ эрясь эрзянь келесь. Эйкакштнень «ёртнить» рузонь велетнева. [237] Во! Илештязь кедть «нарвить» рузт. Евгений Васильевич, зяро тынк велесэ кирьгапарьс кайсицятнеде?
— Пелян, Пичай, теньсэ теть а лездан. Ковгак, пиреде башка, ды лавкав кой-зярдо, а якан. Секскак... Школасо кодаткак чинев цифрынеть а муевить? Снартник? Мон мезе, мон каладозь пенсионер...
— М-хы! Школасо... Тонсь ёвтник, кить тосо... Монгак совсинь. Мезеяк эзть ёвта, — машнетезь-пижнезь, теке икелензэ сядот кунсолыцят, лиссть Пичаень кургсто валтнэ.
— Мезе виде — виде. Умок седеем кельмесь. Эно истя тейсынек: ловсынек, зяро кирьгапарьс кайсицятнеде, кода тон мерить, минек песэ. Туи? Ёвтаса нурькинестэ, теке басом, мекс истямокс велявтсть. Паро? — кудонь азорось мелень путозь, валтнэнь чуросто аравтнезь, ёвтызе мелензэ «Валдо ян» газетань валдо киське чама, сэнь сельме корреспондентэнтень.
— Койсэнь, берянь а ули. Кодамо газетань статья, а улиндеряйть эйсэнзэ тешкстазь шкась, таркась, ломаненть эли ломантнень лемест. Арасть сынь — статья иля учо.
— Вант, те уш тонь тевесь. Сёрмадт, цёра! — кончтась ды кармавтозь мерсь Евгений Васильевич. Теде мейле козкстась ды ушодсь ёвтнеме: — Васенцесь «минек шкань геройтнестэ»
— Важдаень Юра. Эрьва кода тензэ мерить: веенст якстере черензэ-сакалонзо кис — Чентяй, лиятат — Рыжой Юрик, седе ламот нурькинестэ — Рудик. Косто саевсь те тюнихань лемесь, кие педявтызе, а содан. Путт чапине: зярыя тейтерь ютксо вейке цёрыне.
Омбоцесь — Солаень Мика. Те цёранть «потмаксс ваномазо» сюлмавозь нузяксчинть марто. Якамстояк уды. Ламо а корты, нузялды. Паряк, а мезде: валт эзть кадово удементень. Седе виде карми, эзть совсеяк. Уцясказо теке — симицянь вейкине пакша. Авазо, Шура, кулоськак текеде. Марсевсь: «эрясть» вейсэ ды, келя, весть аванзо марто «лишминесэ налксемстэ» стардынзе тетязо. Мезть лиятат учнемс!
Колмоце «откересь» — цыган ёнов молиця Чичавонь Палю...
— Евгений Васильевич педе-пес, кода содасы, ёвтнизе цёранть эрямонь кичкерь-мичкерь кинзэ, кить ульнесть чачтыцянзо-тиринзэ, панжизе эрьва ёндо, мекс кассь-теевсь истямокс. Эзизе стувто тешкстамс теньгак: Палю — Дораень Ванинень вадрядояк вадря ялгазо.
Ёвтницясь пачкодсь Дунаень Шурикс. Дипломатс. Пецек-[238]пецек аравтнинзе тувталтнэнь, конатне теизь оякс «гуйведенть» марто. Вакска эзь юта кудонь малавиксэнзэ лангаяк.
Шурикте мейле аволь аламо «понгсь» Дораень Ваниненень, Каргиннэнь. Бай тяк ёвтнесь сонзэ аволь шождыне уцяскадонзо, обуцядонзо, паро ды берянь ёнкстонзо. Ламо чевте валт ёвтась авадонзо, Кулядо; майсемадонзо войнань иетнестэ ды мейле, свал; башка тешкстызе те аванть тевень вечкемачинзэ, урядонь кирдеманзо... Цёразояк, Ваня, аволь мазя превтнестэ. Винась ансяк вана...
Пичай, стуворнэнть велькссэ комадо аштезь, эль кенерсь сёрмадомо. Кува-кува, капшамодонть, киртнесь валтнэнь, каднось эйстэст ушодкс ды пе, кува-кува путнесь ансяк ушодкс букватнень. Эряви кенеремс. Ильведькс ансяк илязо лисе. Кудосо, шкань апак таргсе, марязь «лекциянть» сёрмадома одс, ваньксстэ. Теема текстэнть ловновицякс.
Ванинеде мейле Евгений Васильевич ледстизе Дроба Вовань. Симсь, ёвтызе, ськамонзо, эрясь сод потсо, чопода кудосо ськамонзо. Ёвтнизе телень куншкат лов потс — иредьстэль пек, мезеяк эзь нее — кельмеманзо.
Мейле...
— Кото, — пелезь, а коламс ёвтнемань зэменть, сонзэ ёнксонзо, совавтсь Пичай трокс вал.
— Маряви, весе. Ужо-ужо! Сыре превтне допрок вариясть, стувтыя Пайчань Валерань. Алюхатнеде алюхан! Пулот алга жойневти ведь — а марясак. Салы, колы, Инелейсэ калт кундси, «Якстере книгас» совавтозь ведьпачат — а понги. Каня вардась вансты эйсэнзэ, каня лия кодамояк чопаза! Зяро таштавсть?
— Валера сисемеце, — эрязкалезь ёвтызе Пичай.
— Содак, те ансяк Алопесэ. Зяро велесэнть, вете песэнзэ, — а содан. Зяро азгондить, тонсь арсек, ошонь шукшпрятнева-кува? Ды те уш лия кортамось..
— Каня лововить... — нусманясто мерсь газетань пельде сыцясь, керш кедьсэнзэ човонензэ ёзазь.
— Зяро кудотнеде песэнек? — чик варштась верев, арсезевсь Евгений Васильевич. — Индялонь, Чичавонь, Дунаень, Важдаень, Пупоронь, Дораень, Шорянь, Дробань, Солаень... Ведьгеменьшка... Пелест чавот. Лиси, колмо-ниле кудос — алкаш.
— М-хы! Вантака, Китаекс теевинек! Ансяк лия ёндо. Сынст вейке пувоз-семия — вейке эйкакш, минек тесэ: вейке семия — вейке копориця. Киштезь эрятано! Седе а ков, — мерсь лиякс [239] ёвтазь, вайгелень кепедезь, теке марто, пеняцязь, сонськак а соды кие лангс, Пичай.
— Проценттнэ лангсот: вете-кото малава. Видьстэ меремс, тевтне, кода мокшотне кортыть, кальдявт, калмамонь... — Пичайкс потмурасто, ризнэзь ёвтынзе валонзо велень сыре эрицясь. — Минь тонь марто, Пичай, ламодо-мезде кортнинек. Вакска ютынек «раскулачиваниянть», войнатнень ды Модамасторонь Омбоце войнанть вакска. Сыньгак «лездасть» ламотненень теевемс «алканть» мельга чийницякс. Пек «лездасть»!
— Седе а ков, — ёвтызе мелензэ корреспондентэсь, сонсь яла «ардтнесь» сёрмадомапелькссэнзэ блокнотонь ёнкскетнень ланга. Мель путсь седе ламо сёрмадомс марязденть. Сёрмадсь, тешкстнесь ды седейсэнзэ сардокс кирдевсь нолдазь ильведьксэсь: мекс эзь сае мартонзо вайгелень сёрмадыця. Кода ней сон маштоволь! Тень лемезэ — молемс пенгс узертеме. Шожда теемс ильведьксэнть, ды стака витемс.
— Минек алкоголиктне пря трить калмамосо: андсызь, кирьгапарест пештьсызь, лиятне кудовгак мартост максыть кой-мезе, — Евгений Васильевич модердизе керш кедезэнзэ цийнезь валгиця сеськенть, пувизе ды поладынзе валонзо, — калмонь чувицят а кадовить велентень. Вана кажось. Ёмить прянь ёмавтыцятне — чувицят а муят...
— Иля мелявто, Евгений Васильевич. Иля. Нетне врадыть, тарказост лият арыть. Секскак... А содан кода Кузвелесэ, лия таркатнесэ мельгаст молицятнеде сатыть. Вадряль, авольть улеяк...
— Мезе виде — виде, — сась ве мельс Пичай марто кудазорось, кепедизе керш кедензэ, шаштызе ожапенть ды варштась, комавтызе прянзо, часонзо лангс. — Байтяк калякинек, эзь марявояк шкась.
— М-хы! Те мон чумось, — чарькодинзе эсензэкс меельцекс ёвтазь валтнэнь Пичай ды тарск стясь таркастонзо, прязо цяк эзь кокадеве велькссэст «штрейфлингень» рашконтень.
— Арась-арась, истя иля корта! — капшазь ёвтынзе валтнэнь инжень вастыцясь. — Мекевланг, сюкпря сакшномат кисэ. Седеем витевсь кортнемадонок. Ськамон... Тонавтынь ламо, кортамс а кие марто. Секень вант, кельтеме кадоват...
— Ну уш, Евгений Васильевич, — виздезь мерсь Пичай, аволь сэрей рунго азоронть лангс верде ванозь, ды тонгизе понкс зепезэнзэ «гинигинензэ», — арсян а берянь статья лиси. Проблема [240] марто. Вадряль, печатамодонзо икеле ловновликак.
— Пароль... — текень ёвтызе умарьпирень, юртонь кирдицясь Ледяйкин, кузтемпе ёнов ветиця, пиже тикшинесэ копачазь яннэванть эскелязь, — вана мезе, Пичай, пачкодть кодаяк тень, печатамодонзо икеле эли мейле, вант. Седеяк паро нить марто. Кенерить чукшторовтне, инзейтне... Кочкатадо, зяро меленк. Кецневтьсамак, теке марто, эрьва кодамо кулясо.
— Монськак теде арсян. Диктофонтомо, вантака, веляза реве, сынь! Те мезе истя? Сан. Вастовомс ули мелем «потмакссо эрицятнень» мартояк, — Евгений Васильевич мельга нурькинестэ эскелязь, Пичай янксесь кедьёнкстомо самодонзо.
— Я! Ды те мезекс? — велявтсь мельганзо молицянть каршо. Лоткасть.
— Сёрмадомат, Евгений Васильевич, келькш лангс валонь «сюпавчист», валксост, вановтост эсь уцяскаст ды эрямонть лангс. Кодамокс тенст, алкукс, неяви валскень чист? Истят содамочитне лездыть седе домкасто чарькодемс те кажонть. — Пичай, кода свал кедьсэнзэ мештензэ икеле ахолязь, панжизе мелензэ, мезекс эряви те вастовомась.
— Те тонь, ванан, мезе-бути статьядо верьга чары.
— Статья, Евгений Васильевич, статья! Седейс педиця, цифра марто. Сави, маряви, кавто сёрмадомс: газетас, седе вишинька, ды журналс, седе покш.
— Кунсолока, Пичай, тон аспирантурадо а арсят?
— Арсян.
Кортнезь-каляказь, пачкодсть кузтемпе икелев.
— Паро. Сёрмадома, лиси, реферат. Кузвелестэ ды косто-лиясто таргазь содамочитне сатыть, кеман, кавтос.
— Мезе виде, Евгений Васильевич, — виде! Эрзянь велетне истямо чеядавксос пачкодсть, сёрмадт теде куш кемень диссертацият, — мерсь Пичай седеймарязь ды ёндолк варштась часонзо лангс, — м-хы, монень чиема! Автобусом пулонзо илязо невте.
— Ве пельминута. Содыдейтне ловизь: ломаненть пряудемень виензэ тевс ютавтневить вете-кото процентт. Марят? Кеман, — кемень проценттнэнь изнясыть, — эрязкалиця инжентень Евгений Васильевич арсесь паро ки валдо згилямосо.
— Сюкпря, Евгений Васильевич, вадрясто вастомат, ёвтнемат, вадря арсемат кис. Вастомазонок! — Тень ёвтазь, венстизе кедензэ, сювордызе азоронть аволь маралянь, теине калгодо кедькоморонзо ды эрязкалезь эскельдясь кузтеманть икельде.
[241] ...Автобусонь лотксема таркантень, покш кинтень, молема комсешка минутат. Веревпандт. Пичайнень савсь эскелямс псилгадомазонзо. Эль чиезь эзь чие. Ялатеке превстэнзэ эзь лисне, чарасть-велясть прясонзо ледстнематне превей, ламонь содый, келейстэ-домкасто арсиця ломаненть марто, ансяконь вастомадонть. Шкань-шкань кайсететсь пилесэнзэ, марявсь, вайгелезэ, валонзо-мелензэ.
«Мекс истя а чарькодевиксстэ эскелить, видеяк, тевтне эрямосонть? Диплом мартотнеде — вирь, куш сёлтт эйстэст сёлтак! Кинь якстере, кинь раужо, покш, вишкине... кой-кинь аволь вейкеяк. А вана кортамс, седе «алга соказь», а кие марто. Тамашань тевть! Ушодат калякамо теде-тонадо, лиси текеде: пандят-пиреть, чупонемат-чувномат, скалт-реветь; куш меснек, ледстявить базаронь-лавкань питнетне. Ушодат лиядо — општ, чатьмонема. Аволь университет, теке, мерят, школаяк эзть прядо! Те кода истя? Мекс? Мезень кис сестэ максовить келень, историянь, культурологиянь, этикань, эстетикань, философиянь уроктне? Мезень лезэ эйстэст? Мекс аламо Евгений Васильевичень кондятнэде? Вастовинь мартонзо, мерят, псидеяк пси чистэ кельме ведь марто ведра чирес турван токавтнинь. Чевте, мариця седей, аволь кода ламотнень — кев. Ломанесь ризны-мелявты ломантнень ды, уш илязо уле верьга ёвтавксокс, Масторонзо кис. Маряви, аволь аламо вийть путсь — иляст киряксто лавшотне терний чеядавксонтень. Самай истятнэ, Евгений Васильевичень кондятнэ, мазылгавтыть модалангонть, эрямонть, максыть тензэ зэме ды вий. М-хы! Улевельтькак истятнэде седе ламо... Косто? Сынь свал... пансевицят. Теде, пансематнеде, секень вант, ламолгадытькак масторсонть нулгодькс тевтне, ламолгадыть «чиремкшнезь якицятне».
Сеть ломантне ды се раськесь масторлангсонть эрить парсте, конатнень седе ламо превей, кол, тевень содыця ды ванькс ойме ветицяст. Аволь Дораень Ванинень, Важдаень Рудикень ды лиятнень кондятнэде. Минек, вантака, — «Горе от ума»! А! ...Горе от ума. Эряволь пря шнамс, кецнемс те самай «умонтень», якамс прянь кепедезь, каштансто. Тень таркас сави сонзэ кекшнемс. Максындеряй теть Инешкипазось сондензэ седе ламо, лиятнень коряс, вант, илядызь ильтя Раужо Масторов эли зярдояк а солсиця модатнень ёнов. Кирьпецентеньгак, зярдо эряви, а стака прамс. Каня колоньгеменце иетне а кортыть теде? Пштиль пелюмась. Келейстэ эйсэнзэ ахолясть. Весень вейкетизь. Сэрьс касыцятнеде [242] аламот ванстовсть. Те колоньгеменцетне! А мельгаст ниленьге-менцетне? Эзть кочксе, эзть вано: кис сэрей, кие алкине, кие од, сыре, эйкакш... Правтсть кие понги ды зяро правтовить. Войнань кивень пиземетнень ды вачочинь пелюманть алов понгонесть, содави, васняяк одтнэ, шумбратне, превейтне. Эйкакштне сакшность модамасторонть лангс сеедьстэ лавшотнень пельде. Неть раужо тевтнеде ледстнезь, сат мельс: каня те а тувтал, мекс Дораень Банине, Чичавонь Палю, Дунаень Дипломат, Солан Мика ды ламо-ламо тёжат, миллионт сынст кондятнэ понгонить палый ведень эрькс ды кодаяк эйстэнзэ а лисевить...»
Вастовомадонть арсезь, Гайнинькань Пичай, «Валдо ян» газетань корреспондентэсь, пачкодсь, капшамодонть сеедьстэ лексезь, автобусонь лотксема таркантень. Учомс дух эзь саво. Сон ды «сонзэ» автобусозо пачкодсть ве шкане.