Татю (книга)/Татю/1 пелькс/3
| ←1 пелькс, II | Татю (1933) by , edited by Куторкин А. 1 пелькс, III |
1 пелькс, IV→ |
| Т. А. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 15—19 |
III
Иванонь крестной авазо ансяк ютась кеншк порогонть трокс ды оймень апак тарксе чувтомозь кармась озномо.
Чекась покась ды письмаронь вайгельсэнзэ пшкадсь.
[ 16 ]— Шумбратадо?
— Шумбратан! Ютак икелев — радувазь васты Полаень эйсэ Кулина.
— Аля ансяк прынь тарка лангс, Иванонть прах кандызе. Уш сонсь аварьди... Сельведензэ теке кснавт певерить. Мень тамаша, кума, евтадо, мезе теевсь, мень апаро тарка теевсь? Паряк кардайсэ мезеньгак алад? Илинк ацирть седеем.
— Мезеяк аволь тееведеряй Ивангак аволь авардть бу икелеть, — пейдезь кортась Карпа атя. Полай эщо те шкамс эзь чарькодть тевентень. Сон алкукс таймаскадсь ды пек ризнавт седейсэ ули мезе евтыть тензэ кодамо апаро куля. Кулинань музолдсь кургозо яла теке эщо а капши евтомо, што Иван аварди секс што арсить урьвакстоманзо. Сон стясь, амольдсь кече брага ды венстизе Полайнень.
— Нака варчика брагам... Ды такода эщо эсь кенерть — од. Минек чалгамонть иля кунсоло. Ванат покшкудакс арситяно кучомат. Иванонь эряви урьвакстомс. Сон прок безмень пря аварьди.
— Азе, кума... Мон арсинь алкукс меньгак берянь теевсь...
— Пасиба куть тон мелявтат! — отвечась Кулина.
— Месть кума ванат лангозонзо Ней уш сась шказо. Кемгавксовошка улить иензэ?
— Кемгавксово уш топодить.
— Кадык урны. козяйкась тонавтсы эрямо... Вана саинк эсинк Митянь. Сон истяжо прянек пильгенек чавсь: а урьвакстан ды паро. Но сонзэ тетясь мезе ульнесь... Весть кода мерсь: „Кадомак, тетяй урьвакстан!“ ды сюкунясь пильгезэнзэ, ансяк сестэ кадызе. Седе мейле цела ков таркасо рейсь.
— Асодан уш кода Митянь кувалт кортамска:... — пшкадсь Кулина — пек уш сеедстэ чавнэ Пиядань, минек урьванть ланкс надиямось...
— Митя ведь Киевев якась, Саровской божий матерентень. Присяга келя кирдьсь, больче а карме симеме винадо, лоткась козейканть чавомадо. Кума, кинь чиявтоволиде? [ 17 ]— Полаень чова турватнестэ сэтьминестэ прасть валтнэ Кулинань элес.
— Тынк арась тевенк, мейсь Митя якась Киевев! — Пижакадсь Карпа атя, — кортадо эсинк тевде. Општ молсть авинетне, прок валосткак маштсть. Теде мейке Кулина кармась стамбарнэ, аволь Митядо.
— Кумакай минь атянть марто эрьва кода арьсинек. А урьвакстомс Иванось, друг мезияк лисе, эли вант атянть сельмензэ элькадыть. Месть мейле кармат тейнеме? Тонсь содасак, минек роботыцясь арась. Ломанень ломаненьть мельгаяк эряви ваномс. Те пиньгине... мельде апак пелить. Пандомскак аволь а ламо саве.
— Одов нетне аместь велявтнемс! Меринь урьвакстса, значить урьвакстса!
— Ужока, кум, кияк а мери иляк урьвакст. Те уш паро... Урьвакстомс уш эряви, ансяк кинь нороват кильдиме? — Полаень кортавттонть мейле Карпа атя човорявсь. Прок мерят а муи истямо ломань, коната шачома чистэнзэ пазонть пельде алтазь сонензэ урьвакс.
Сон цямкась нарошной. Васняткеяк секс, што а ен ульнесь евтамс, што сон оронь тейтерь, стольнардавксонь пурныця, мешок уголсто паморькстэ пешкедиця.
Истямо ломанесь гадясы род племанзо, те ломанесь карми улеме покордамокс. Алкукскак род племась эряви ловомс, но эсить интерестнэ, сех пек се доходтнэ, конатнень Карпа тешкстыньзе уш икелей сынь ульнесть седе седейс педицят. Род племась — род плема, но ули парось, коната карми улеме эсить, се а плема. Род плематне ловдадызь ломанькс сестэ, знярдо сюпават, бути ули мезень кисэ теть пшкадемс, ули мезе кедьстэть вешемскак. Бедноень родонзо племанзо арасть. Сонзэ кияк а терьдсэ праздникстэ гостекс, сонзэ ломанькс аловсызь, прок чукш — прясо сор, кие эськельде се кучкортсы.
Бедноень седеезэ теке седе лавшо, седе милостливой ды седе жалиця. Сюпавонь ломанень седеесь куштазь сэвезь пиже чекерьсэ, сон калгодо прок ташто кши, сон певери паморьксонь паморькс. Ули истямо побаска, коть те побаскась ульнесь алкукс, но [ 18 ]евтнеса пабаскакс: „Ульнисть колмонест братиникм кавтотне пек сюпавт, колмоцесь бедной. Пиньгезэнзэ мезезэяк арасель.
Ульнесть сон дряхлой, тоштя. Вейкесь — сюпавось арсесь содамс кие седе седей марязь лезды меньгак раужо чистэ. Сон рамась боцька вина ды нолдызе каськас. Пелевшкасто прок памитстеме чийсь сюпав братонтень.
Браток, корменецкем, адя монень. Совась кудозон вор, мон керия сонзэ прянзо ды нолдыя каськас боцькас. Адя пожалоста ковгак тейсынек.
Братось пейдезь варштась таркастонзо, мик боканзояк эзсе велявт, мадсь одов. Те братось аварьдезь яла энялдсь икелензэ. Зняроксть эзь снартне энялдомо яла теке отказась. Теде мейле мольсь знакомоенстэнь, калмамо кияк эзь моль. Кадовсь васодемс сехте бедной братонтень.
Кода бедной братось маризе истямо апаронть покш мель марто согласясь кекшеме кулозь воронть рунгонзо.
— Адя брат, адя седе курок ашолгадомс кекшсынек...
Туимадо икеле крестась. Сон можок аволь мольгак, но пельсь сюпавонь мельде, кода пазонть мельде. Бутим пазось-анеявиця духось наказатанзат мастор лангсо, живстэ. Алкукскак истя. Кода мольсть ды таргизь боцьканть, симсть иридимазост.
— Сюпавтнэ сех жаднойть, — корты братонстэнь, — сестэ теть сыть знярдо терсыть симеме ярсамо, кодак тееви меньгак апаро, кадык аламодо беднойгадат сынь теть уш а ялгат, лоткить мартот кортнемадояк, лоткить лангозот ваномадояк. Вана брат давай вейсэ маштсынек братонть.
Бедноесь арсезевсь: — мезе те истя? Но тесэ дивась овсе ульнесь апокш. Сон повнясы, кода ульнесь эщо бедной, то сюпав братось эзь макст тензэ кши сускомо. Те тевесь ульнесь бедной братонть мартояк. Секс кавонест согласясть маштомс сюпав братонть. Маштомс ансяк секс, што сон пек сюпав ды жадной“.
[ 19 ]Ведь яла теке, Карпа, сон аволь бедной, што сон арсе бедной марто эрямо ве лувсо. Урьвань вийсэнть арсе нажувамо эщо ули паро.
Кузнець Васянь Глашань уш а чиявса. Пильгало соркс истямось сайдянзат. Саимс истямо, штобу кельварянзо иляссо тетьксе.
— Минь арьсинек, Острагоров молемс, Филянь Иванонь тейтеренть чиявтомо, — эсь койсэнзэ корты Кулина.
Полай чаравтызе прянзо ды пшкадсь:
— Эно паро мезе больче эряви!
Карпань семиясь ды мартост кумасткак кармасть пурнамо сэрьнямо покшкудкакс.