Татю (книга)/Татю/1 пелькс/4
| ←1 пелькс, III | Татю (1933) by , edited by Куторкин А. 1 пелькс, IV |
1 пелькс, V→ |
| Т. А. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 19—22 |
IV
Седе мейле, кода Карпа ульнесь анок урьвань саеме, сон кармавтсь кильдеме алаша. Сон меелце читнестэ теевтсь од плетишкат, удалксонзо викшнизе красянь карькссо. Мезе ансяк эрявсь Карпанень сон весе теинзе. Ансяк кадовсь проводямс свахась.
Сваханть лангс тевесь а лотки! Сон кортамодо кол. Валонзо ламо, — ломаненть матедевтсы кунсолозь. Полай чекась покась, тапардыньзе кшинзэ салонзо нардамосо ды лиссь.
Иван а мельсэ кильсь алаша, мейле озась козланть лангс ды напустясь Острагоров.
Татю мезияк а соды. А соды, што эль чиявтсызь. Сонзэ чинек-венек ризны седеезэ. Лиясто сайсэ истямо тошна мик оймезэ а кельге потмозонзо. Яла теке асоды мейсь. А соды Татю, што ванды эли вандыде мейле прядсы тейтерькс чинзэ.
Чи лисемась уш кирвайсь чинть пшти толсонзо. Менелесь прок сырьтянь кшни. Крута пандокс кармась сявореме те толонтень пель. Ве боказо уш понгсь чинть толонь струятненень ды вельмесь ломанькс, куть ков ломань. Ломань ликесь пря чави, мерят нельге прянзо. Мейле аламонь-аламонь кармась соламо, новолеме ды емась допрок. Овсе а содави ульнесь менельсэнть пель эли арасель.
Татю кустим песэ ялганзо оянзо марто. Савольгак [ 20 ]аволь обеднясто, костояк лиясто, евтавлизе бу ялганстэнь потсо валонзо, што бутто неезе онстонзо Микола угодникенть. Те кортамось грех, седеяк грех сестэ, знярдо ульнить обиднясо.
Покшкудатне пачкодсть Егорий пандтнэ пряс ды кармась неявомо чейтне потмова чуросто пезнавтнезь Острагор велесь. Иван покш паро мельсэ ваны кона кудостонть тензэ чиявтыть козяйка. Молимань перть крестной авась толковась Иваннэнь, што сон тейне авадрясто, што эряви улемс веселакс.
— Мон энялдан тонь икеле, прок вере пазонть икеле. Тон кунсоломак ды тейть истя кода мон путтан превс. Тон пек сюпавонь алят. Веленек ваныть мелеть, ловдадызь ломанькс. Тон эсь прястот теят пейдема таркат. Тетят ават арсить ливтимат ломанькс.
Сынь уш сиреть... Штобу илязо емси ули парось арьсить урьвакстомат. Ведь сынь курок кулыть. Азорось улят тон. Эсить сюпав чисэть можешь тееме покш тевть.
Иван нолдызе прянзо ды кармась сюдомо эсь прянзо; мейсь улко совась грехс. Мейсь улко арсесь кадомо кудо юртонтькак ды мик велентькак. Сонензэ теевсь эсинзэ эйстэ виськс мейсь отказась ули пародонть коната кармавты мелензэ вановтомо ды мельдензэ пелевтеме.
Кода пачкодсть велентень крестной авась витизе Иванонь прясто картузонть, ды евтнизе кода эряви аштемс.
— Васняткияк эряви улемс смелкс, якамс витстэ кидеяк апелемс.
Неть „законтнэнь“, конатнень евтнинзе крестной авась сон приминьзе ды максь эстензэ вал, што ютавсыньзе тевс.
Секс, кодак пачкодсть Острагоркав совасть родняст кардайс. Знамо совамс эряволь бу Татюнь кардайс, но пек кол покшкудась. Штобу ломать иляст фатя совасть роднянстэнь прок инжекс. Кодак совасть кардазонтень сон седе курок перьгавтызе алашанть, каясь икелензэ пинеметь, сонсь удалонзо путыньзе кедензэ ды яки кардазганть.
[ 21 ]Аламо шкань ютазь пуромсть од тейтерть. Ансяк неть тейтертне ютксто кияк эзь сода мейсь сась Покш-Толканонь од церась. Содамояк кияк эзь капша: седейс апедиця чама кедезэ эзь тук тейтертнень мельс.
Иван витизе прястонзо картузонть сонсь прок гога видемсь, мик ковгак а чиремкшни. Теи истя, кода приказась крестной авась.
— Те истя мень тандавкс?! — пейдезь пшкадсь Татю.
Иван прок мастор алов чопавсь. Сон конянзо алдо трокс варштась ташто полушалкасо сюлмазь тейтеренть лангс. Ожо полушалкань олазь сурикикснэ вельтизь сельме вановтонзо.
„Нать улить моньденьгак смелт“, — арьсезевсь Иван потмонзо пачк.
— Те роднянок, — пшкадсь кустим пестэ азор авась. Салава тейтерьтненень евтнизе, што те од церанть тетязо пек сюпав. Седе мейле тейтерьтне аламодо абунгадсть.
— Ды мекс истя ашти? — Татю таго кевкстизе аванть. Авась пурдызе прянзо ве пелев ды салава пейдезевсь. Пейдезевсть тейтерьтнеяк. Иван эщо смелстэ ашти. Сон куть умок уш лакамо кармась, но аштесь. Туиксэль. эсь мелензэ каршо. Истямо покордамонть кирьдимазо ульнесь стака. Седеяк пек стака ульнесь секс, што те вана нулав тейтересь мерят прок поленасо коняс лоштизе. Полинань вачкодевть сэредьксэсь пшти колеякс пезнась седей пенчензэ алов, теде мейле эзь кельк оймезэ потмозонзо ды сиянь струйкакс завдясть чудеме сельместэнзэ ордадомань сельведть.
Кардайсэнть эщо аволь умок усковт пиже лопа марто начко тарадтнэ потсто ливтясь озяз полк. Буто кияк лангозост ертсь палкасо. Ливтямстост капшазь чоледсть ды човоргадозь чоледевтесь седеяк пек кежеяввтовтнизе Иванонь.
Маний менельстэнть чись пейдезь варштазевсь чамазонзо, чи валдонть каршо цивтылк мольсть сельведьтне.
Теде мейле больше эзь цидярт аштеме. Пильгесанонзо уш истя соракадсть, што мик памитизэ кармась [ 22 ]маштомо. Истя те виев вачкодимась чавизе, што савсь тензэ ношкстамс.
Сестэ седеяк пек кармасть ракамо. Сон кундызе чаманзо кавто кедьсэ ды прась крандазонтень комадо. Теке марто матедевсь.