Эрязденть арсезь (2010)/Балягинем-тештинем
| ←Явовома | Эрязденть арсезь (2010) by , edited by Разгуляева Т. В. Балягинем-тештинем |
Чачома Масторов велявтома. Арсезевинь...→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 258—261 |
[258]
| Балягинем-тештинем |
Колмоце ие уш топавтан мелем, максозь валон: кепедян, бажан виевгавтомс, кода ламот мондень икеле, совхозокс теезь колхозонть, чоподасто чоподас ускан агрономонь улавом. Поладан тетянь тевензэ. Стака, вельть стака. Весень савкшны кармавтозь кармавтомс теемс тень, лиянь, тонань... Важодицятнестэ чуросто кинь ули мелезэ путомс тевентень ойме. Эрьвась арси, кода седе аламо топавтомс ды седе ламо, карязонь апак вансто, мезе ды косто понги саламс.
Те апаронть марто кутморязь яки «палыця ведень» вечкемась. Тувталтнэдс тенень зярыя. Вейкесь — важодемань кис вишка пандовкстнэ. Трешникть! Омбоцесь — саламонь обуцясь. Косо, содамс, кодамо школасо тонавтыть те тевентень? Зяро класст прядома?
Сюронь урядамо шкасто веньперть кавонек-колмонек ардтнетяно совхозонтень совавтозь вете велетнева, тинге ланготнева. Мартонок ружия. Истя вансттано сюронть, вейсэнь эрьметнень-гагретнень.
Мелезэнь вень киланготне а тукшныть. Ды аволь ансяк сынь. Прядокшнынь аволь милициянь институт, Ахунасо эйсэнь тонавтсть аволь ружия марто ардтницякс. Истямонтень генетнкась, фитопатологиясь ды лия-лия наукатне дух а эрявить. Ламо, вельть ламо аволь агрономонь тевть теян, конатнень топавтомаль лиянень.
Тень лангс апак вано, агрономонь тевесь седеем вити. Вечкеви. Келей-келей паксят, вирь лехат, валдо-сэньсэ гайгиця менель, конань потсто тундонь шкава нурьгить норовжорчтнень чольдердиця морост, ансяк соказь-кавшакавтозь модань чине, коштонь тансть... Каня теде паро мезеяк ули?! Каня те весе а келемтевтн сёлмот?!
... Нуеме лисемат. Паксянь кияванть нуема таркав мельцек-мельцек уезь уить вете, лиясто кото-сисем комбайнат. Кавто ёнга вейкест-вейкест бажить сасамс розень сырнень лымбавкстнэ. Комбайнань кабинастонть ванан перькан. Маряви, уян покш венчсэ та-ков тердиця, ожо моронь морыця иневедьга. А неяви а ушодкс, а пе. Перькан келей ёнкстнэде ды лангаст сравтневезь мазычиденть седеем сеери кочкодыкекс.
«Теветь, кадык кой-мезесь эйсэнзэ мелезэть а тукшныяк, вечксак? Важодть, путт кудо, вечкть, кастт-тряк эйкакшт, ульть куломазот велень эрицякс. Кирдть кардаз потмо реветь, скал, [259] тувот, саразт, мекшть, путнек пире модамарть, озавтнек капстат, чурькат... Мезень берянесь тень эйстэ? Коштось ванькс, шумбра, ярсамопельтне эсеть, базарга-кува микшнемс сельметь а эряви. Эряк, кецнек эрямонтень!
Оно шабрат Кудашкинтнэ, школань тонавтьшятнс, сюракшовдо-мезде башка кирдить мацеень, мереват, ферма — зяро прят эйстэст, сынськак а содыть. Мекс тонетькак а кундамс те тевентень? Телень перть кармат поремс галань сывельде. Тантей, кортыть!.. Стувтсак кинть библиотекав? Мейле мезе? Эка, кажось! Лырнэмс а мезть, а покш ёмавксось. Эрить вана Кудашкинтнэ-тонавтыцятне книгавтомо? Эрить, ды кода эрить! А пеняцить, тунь а пеняцить эрямост лангс. Пекест свал пешксеть.
Чачить-касыть велесэ, вете иеть превть вешнить-таштыть велень институтсо, самай вереть улемс велень ломанекс. Агрономонь тевсэть ботат, пилыть чават чоподасто чоподас. Велсстэнть туемадо мелень штелькскеяк эзь совсе превзэть. Паряк, мокшонь те велесэнть, козонь сыть паро эрямос ветямонзо, пачкодяткак чувозь кельме латконть чирес?..» — тонавтсь эйсэнь, превть макссь кодамо-бути потмовайгель. Арась, сонзэкс эзь лисе, таго эртевинь киулос. Чумось аволь мон, чумось — ве таркасо шешкемань авечкемам, седе покш содамочис, мезескак одс бажамом-эрязкалемам. Аволь монь койсэ мелявтомс ансяк пешксе пекеде. Аволь. Кшиде башка, умок ёвтазь, ламо-мезе лия ули, лия эряви.
...Кизэсь коське. Ожолгадсть пиземень аразденть кичирева-кува тикшетнеяк. Натой Мокша леенть кувалма лейтнесэяк Iкелекс сон эзь кепете. Мезть сестэ кортамс видевкстнэде?! Сельметь летькемить лангозост ванозь. Мик лембень вечкицянтень — кукурузантень — а вечкеви истямо псись. Сонгак верев ваны, пельть учи. Вант, кода лопанзо сювордынзе, теке пиже почкот. Сон истя веденть вансты. «Симемс, симемс, симемс!» — энялдыть неть «почкотне».
Ардан чивалгома шкава Сомазьлейстэ-велестэ кудов, Малавов. Мекс агрономтне онстосткак арсить озамс руль экшс? Мезе редят машинасо ливтязь ливтямсто? Лия тевесь — ялго эли, кода ней мон, лишмесэ. Мезеяк а юты вановтот вакска. Ванан кинть кувалма видезь шужонть, кавто ёнга касыця тикшетнень лангс. Арсезевинь: «Коштось, теке баня кожовтсто лисиця пси, — пилеть а кирдить. Касынькаптнсстэ ламотне нолдызь лопаст, ожолгадсть. Вана ожо шюцянтень-донникентень — псись ули, арась.
[260] Превскак эзь сакшно: Дубинькань школанок прядомадо мейле кемгавтово иень ютазь, 1954-це иень ацамговонь 5-це чистэ, Пензасо, одс вастовтано Малкин Коля, Мучкаева Нина, Ечмаева Зоя ды мон
Сэрезэ монень мештева, тея лопанзо — чопода-пижеть, панжовксонзо — ожот. Вастневить ашо панжовкс марто куракшкетькак. Сон — килькшкайнетнснь-бобовойтнень эйстэ, ундоксонзо вельть кувакат, пачколить алов, маряка, а вейке метрань туро... Секс прянзо пек а нолдтни пиземень аразде, а резы коськечиде. Ёжов, пек ёжов тикшесь, а мезть кортамс».
Ваннан, арсян. Апак учо содавтымим мель: «Мезе, бути те каштан, аламнеде прянь шныця идем тикшенть совавтомс видневикс культуратнень юткс? Туи-арась скалтнэнь-реветнень мельс? Нетьксэнзэ калгодокс тенст а улить?».
Те мелесь лиятнень юткс эзь ёма, удемстэнь эзь нардаво ды шкань ютазь агрономонь кистэнь тейсь мендявкс лия ёнов.
Урядавсть, каявсть утомга-кавга сюротне, модамартне-эмежтне. Сась теле. Агрономось, кода кортыть, — овто. Тундосто сёксес, ловсто ловс, види-уряды, ёмси паксясо чоподасто чоподас. Вийть а вансты, ансяк топавтовольть тевтне. Тельня [261] паксятне оймсить. Оймси мартост коень содыцясткак. «Овтокс уды». Мезе мерян те валмеревксэнть каршо? Удомань вечкицясь теленть самонзо а учни. Муи шка чиремемс-корномс кизнаяк.
Весть чокшне ланга саия кедезэнь Московсо нолдтневиця «Земледелие» журналонть. Курокке, верде алов ютынь статьятнень лемест ланга. Вана ёвтнема цивцядонть! Муия эрявикс ёнкскенть. Ловныя мелень путозь. Прядовсь кулясь-пачтямось яволявтомасо: «Почтава кучневить цивцянь видьметь. Кунцицясь — СнбНИИСХ-сь». Ёвтазь адрес. Мезе, бути варчамс? Шкань апак ёмавтне — кадык лиятне овтокс удыть — тешкстынь сёрма-энялдома.
Сёрмам кучомадо мейле ковонь ютазь кандсть тень пачтямо: совхозонь почтас састь монь лемс кавто кескавнеть. Кенярксом — покш кептерьс а кельги! Чарькодинь, мезе эйсэст. Молинь, саинь. Эрьва кескавнесэнть кемень килот ашо ды ожо цивцянь видьметь.
...Ютась ков. Сась тундонь видема шкась. Моданть онкстнетяно, явнотано пандинень-пандине. Тейтяно терявкс, рузокс — опыт эли эксперимент. Тевесь лаказь лаки. Явномо, пезэмкскень чавномо, селитратнень-мезтнень кайсеме, кучозь видьметнень видеме лездыть тень кавто студентт-практикантт, Галя ды Ваня. Парт од ломантне, чарькодицят. Тевест содасызь.
Истя, цивця тикшестэ, ушодовсь наукань масторс совамонь ким.
Паксясо, видечинь вешнемат лабораториясо, библиотекасо, книгатнень велькссэ аштемат кудосо. Певтеме анализт, эрьва кодат приборт, сынст вельде муезь цифрат модасонть ды касынь-кайтнесэ элементтнэнь ламочидест. Седе мейле статьят, книгат, конференцият, содавикс содыйтнень-учёнойтнень марто вастовомат, диссертациянь идема, студенттнэнь марто важодема, Московсо ды Ленинградсо тонавтнемат...
Молинь те аволь шождыне, аволь валаня ды теке марто мельстуиця, тевде пешксе кияванть колоньгеменде ламо иеть. Ютасть, палсть сынь эйкакшпингстэнь Ташто Од иенть вастомга кирвазтезь олго штеминекс.
Кистэ кадовицятне седе сеедьстэ сайнить ёнкс велькссэст сравтневезь тешттнень лангс ванозь. Монень паксянь азоркс улема шкастон тештекс ульнесь рацяня, ожо прине, медень максыця цивця тикшесь, сонзэ иредстиця тантей чинесь.
Сюконян теть, балягинем-тештинем!