Эрязденть арсезь (2010)/Явовома
| ←Валонь вий | Эрязденть арсезь (2010) by , edited by Разгуляева Т. В. Явовома |
Балягинем-тештинем→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 257 |
[257]
| Явовома |
Экзамент, лекцият, картат-партат, вирьга якамот, гербарийть, кадык чуросто, оймсема чистэ экскурсият, эрьва сёксня колхозсо модамарень таргамот, тундонь самот, телень нусманя вирть... Истя панжадо, келей васонькоморо лангсо ютасть самай-самай мазый, вирь балягань пусмо ёнов молиця вете иень. Лиясто эйсэнь кевкстнить: «Мекс тонь ёвтнеминеть вейкень пес сюлмазь пертьпельксэнть марто?». Ды кода тенень а улемс! Чувттнэ, виртне-паксятне, лейтне-лугатне ульнесть тень удома-эрямо таркакс, чевте седей тонавтыцякс чачома чистэнь саезь. Мезе ансяк аштить Ахунань вете иетне! Сонзэ чипаень ды ковонь валдосо экшелиця вирензэ, цёковонь моронзо, Сурас, теке чавачамос, ваныця тештензэ. Эйкакшпингедень мейле сынь, неть иетне, эрямонь паксясон весемеде седеень эждиця, весемеде кенярксов ёжонь кандыця нармунть.
...Васолдо-васолдо пачколить тень кевкстемат. Кодат ульнинек неенсетнень коряс? Вадрят, берянть? А содан. Содан вейкеде: ульнинек лият. Истя свал эрсесь. Истя карми улемеяк.
1959-це иень тунда Пензань велень хозяйствань институтонь директорось, Григорий Владимирович Гуляев профессорось лепштизе кедем ды венстизе тень чоподасэнь ланго учёной агрономонь дипломонть. «Зярдояк иляк стувтне минек институтонть!» — мерсь тень сестэ...
Стувтовлик — а стувтови.
Эрямосон сеть вете иетне ульнесть ды кавдовсть маней зорякс.
Актовой залсто ютынек столовойс: институтонть прядоманзо стувор экшсэ тешкстамо. Мейсэ се астувтовикс чокшнестэнть каванимизь, мезде симдимизь, мельсэнь а ашти. Содан лиадо: сестэ путовсь прядома тешкс самай мазый, олясо эрямонь шказон — одксчизэнь. Прядовсть партатне-лекциятне. Ушодовсь лия, ялатеке эрьва мезде пешксе од эрямо.