«Роман пу»

by Симаков Иван Николаевич

Дыр нин быдмис Роч му вылын
Уна вожа «Роман пу».
Пыдын вӧлі вужйыс сылӧн,
Ичӧт тӧв эз пӧрӧд-ну.

Куимсё во саяс быдмис,
Вожыс лои уна гоз.
Вожъяс костӧ соді, лыдмис,
Вывті уна кырныш поз.

Кӧть и мича паськӧм новліс,
Эз сет быдӧн сылы чесьт.
Пӧрӧдӧмысь ёна повліс,
Туша тырнас льӧбзис весь.

«Роман пуӧс» видзис уна
Ас гӧгӧрса посни пу:
Мед эз тӧвныр вермы нуны,
Мед эз вольышт сылысь ку.

Уджалысь йӧз важӧн кӧсйис
Пулысь бертны весиг вуж, —
Дыр нин сы вӧсна зэв пессис,
Нуис ӧтув ас кост удж.

Мукӧд кӧсйис «Роман пулысь»
Торкны олӧм, код эз пов.
Коді лёк кыв сылы шуліс,
Сӧмын воштіс ассьыс лов.

Февраль помын тӧвныр кыптіс,
Тур-тар керис «Роман пу»,
Коньӧр пӧри, муӧ клыпкис,
Тір-тармуні став Роч му.

Посни пуяс пӧвстті пӧрис,
Вольыштіс тшӧтш налысь бок.
Подув мусӧ сьӧдӧдз гӧрис,
Ыджыд горшӧн горзіс... Ок!

Став му пасьта кывліс шыыс,
Сынӧд тшына лои, лӧз.
Ваыс пузис, кыптіс гыыс,
Вӧрзис быд пельӧсысь йӧз.

Роч мувывса кырныш пода
Пессис, видзис позсӧ пыр.
Кырныш позлысь торкис мода
Ыджыд Октябрлӧн тӧвныр.

Мукӧдъяслысь нырсӧ чегис,
Ӧткымынлӧн ори бӧж...
Саридз сайӧ ставыс лэбис...
Сэсянь кравзӧ дас во чӧж.

Пу пӧрӧмлы дас во лоӧ,
Эз на сісьмы дзикӧдз мыр.
Век на сійӧс воысь воӧ
Лоӧ весавны на пыр.

Пулӧн кольӧма на мыльӧс,
Век на вашкӧ нырад дук...
Сэтчӧ садитӧма выльӧс:
Быдмӧ мича сад, зэв сук.

Уна лэбач садйын сьылӧ,
Уджалысьлысь пальӧ ун.
Дзольгӧм кылӧ став му вылӧ, —
Кывсьӧ мича гажа лун.

Садъяс пӧвстын ворсӧ дӧдзӧ
Гӧрд флаг, шпоргӧ, быттьӧ би.
Выль олӧмлысь кӧйдыс кӧдзӧ
Уджалысьлӧн вӧльнӧй ки.