Ün esch refüd

by Gian Fadri Caderas

[ 51 ]

Ün esch refüd.

Sgür tü non sest, quaunt tieu amih soffriva
Da's vair da te barbaramaing sbütto;
Tieu esch refüd mieu cour bain ferm feriva;
In tel momaint la mort he giavüscho!

Ün tel refüd da mia pü cher' amia,
Da chi eau am sco la pü chera sour,
Am füt terribel, craja'm orma mia,
Sco füss colpieu tres fier arsaint nel cour!

Mieus ögls 's bagnettan d'larmas dolurusas,
La not intera agito vagliet,
In quellas uras greivas, lungurusas,
So be il tschel, que ch'eau d'orrend pruvet!

Sbütto da te! Deserta, s-chüra m'eira
La terra, sainza attracziun per me!
Nel cour ün vöd he sainza te, ma chera;
Scha tü am sbüttast, che saro da me?

8 Schner 1872.