Čołmiski spěw

nadpis	Čołmiski spěw
awtor	Handrij Zejler
lěto
žórło	http://texty.citanka.cz/pata/sc1-128.html
licenca	public domain

    We pisanej khěžcy na čołmje
    So wjezemy po rěcy,
    Po hładkej, po slěbornej žołmje
    Přez kužoł a hłubiny;
    Kaž rybički spěšne pod nami,
    Sej khwalimy žiwjenje;
    Jědź, lubosć a nadźěja z nami
    A powyšej wjesele.

    Čołm njese nas ćiše a rady,
    Wón z wodu so rozmołwja,
    Hry muškow a žołmičkow błady
    Nam k bokej so towaŕša;
    Kaž žołmička stawa, so lěha
    Tak spłunje lóšt žiwjenja,
    Nam radosć pak mysličku zběha,
    A lubosć ju poswjeća.

    Stój! smějate brjohi k nam praja,
    Stój! kiwaju do wody,
    Wětr přećelny zaduwa z kraja:
    "Tu přistaw je lubozny";
    A kiwaju druhe tam brjohi
    Nam něhdy: "Tu zastawaj" -
    Dha stajimy z nadźěju nohi
    Na wěčnosće rjeńši kraj!