Адямилы трос-а музъем кулэ? (Герд)

Адямилы трос-а музъем кулэ? Автор: Кузебай Герд

Поттэмын: 1918. Источник: Куӟебай Герд. Люкам сочинениос : куать томен / Люказ Ф. К. Ермаков. — Ижевск: Удмуртия, 2004. — Т. 3. — Б. 11—12.

Одӥг черкогуртын улэм-вылэм туж тыршись, ужась мурт. Котьмаиз но солэн пачлэс тусьтыын кадь ик вылэм. Только со ваньбурез весь солы ӧжыт потэм.

Кылэм со одӥг пол, башкиръёс туж дунтэм музъемзэс вузало шуса, валзэ кыткыса, мынэм соос доры.

Башкиръёс вераллям солы: «Шунды ӝужанэн шунды пуксёнэн вискын кӧня котыртыны вуод, одӥг сюрс манетлы сомында музъем тыныд сётом. Со верам сямен котыртыса ке ӧд ву, уксёед но ми кие кылёз, музъем но уд басьты».

Адями «яра» шуэм… Ӵукна, шунды ӝужамлэсь азьло, потӥллям башкиръёс со адямиен туж паськыт степь шуон лудэ — вырйылэ султӥллям. Адями музъем вылэ изьызэ понэм. Собере со, изьы вылаз сюрс манет уксё понса, шунды ӝужанэн ӵош аслыз кулэ мындазэ музъем котыртыны кошкем. Мынэм-мынэм, туж тырос музъемез басьтэм.

Котырскыса берен вырйылэ мыныкуз, нунал ӝытмыны куткем ини. Соку гинэ адӟем адями шунды пуксьытозь музъемзэ котыртыса вуонтэмзэ.

Кышкаса, кӧня кужмыз вань, бызьны куткем… шунды пуксе ини. Лулыз шуг луса но, шокчон интыез пытсаськыса но, адями уката зол бызьны куткем. Бызем-бызем адями, шунды пуксёнэн ӵош вырйылэ бызьса вуэм но супрак усем уксёен изьы вылаз.

«Молодец! — шуса кесясько башкиръёс. — Тынад музъемед!..»

Учко адями шоры: адями шокчон интыез пытсаськыса кулэм… Кӧня-о бон адямилы музъем кулэ?