Адями правоосты но инъет луись эрикъёсты утён понна Европаысь конвенция

Адями правоосты но инъет луись эрикъёсты утён понна Европаысь конвенция Автор: Европалэн Кенешез 1950 ар

Та Конвенцие гожтӥськем правительствоос, Европалэн Кенешезлэн ёзчиосыз луыса,

1948-тӥ арын 10-тӥ толсуре Огазеяськем Нациослэн Организацизылэн Генеральной Ассамблеяеныз ялэм Адями правоос сярысь огъя декларациез санэ поныса,

та Декларацилэн ужпумез — со пушкын ялэм правоосты ваньмыныз эффективной признать каронэз но зэматонэз быдэстон шуыса, лыдэ басьтыса,

Европалэн Кенешезлэн ужпумез луэ ёзчиосызлэсь огкылысь улонзэс юнматон шуыса но та ужпумозь вуыны одӥгез амал луэ адями правоосты но инъет луись эрикъёсты утён но азинтон шуыса, кожаса,

шонерен лыдъяса асьсэлэсь туж юн осконо луонзэс инъет луись эрикъёслы, кудъёсыз луо зэмлыклэн но дуннеын тупаса улонлэн инъетсы но кудъёссэ возёнлы тужгес но умой юртто, огласянь, зэмос демократи луись политической режим но, мукет ласянь, ваньмызлэн адями правоосты валамзы но чакламзы,

Европаысь кунъёслэн правительствооссы луыса, кудъёсыз одӥг мылкыдо луо но кудъёсызлэн политической йылолъёслэсь, идеалъёслэсь, эриклэсь но катлэн кузёяськемезлэсь огъя мерассы вань, Огъя декларациын гожтэм правоос пӧлысь куд-огзэ валче быдэстон понна нырысь вамышъёс лэсьтыны дӥсьтӥсь луэмъёс

куспазы вераськизы улӥяз сётэмез сярысь:

1-тӥ статьяез – Адями правоосты гажаны кылсётон

Куспазы Вераськись Бадӟым Сторонаос соослэн юрисдикциысьтызы котькудӥзлы сёто та Конвенцилэн I-тӥ люкетаз тупатэм правоосты но эрикъёсты.

I ЛЮКЕТЭЗ – ПРАВООС НО ЭРИКЪЁС

2-тӥ статьяез – Улонлы право

1. Котькуд адямилэсь улыны правозэ кат уте. Нокинэ юри виыны уг яра судлэсь кулонэ вуттӥсь приговорзэ быдэстон понна сяна, со ялэмын ке таӵе кылкутытонозь катъя вуттӥсь йыруж понна.
2. Виён уг лыдъяськы та статьяез тӥянэн, со пӧрмыкуз абсолютно кулэезлэсь кужымез кутонлэсь:
   • котькыӵе адямиез катэз тӥясь кужмысь каронлэсь утён понна;
   • катъя ӝегатон понна яке катъя пытсэт сьӧры пуктэм адямилэсь пегӟонзэ дугдытон понна;
   • бугыръяськонэз яке ӝутсконэз катъя зӥбон понна.

3-тӥ статьяез – Курадӟытонъёсты алон

Нокинэ курадӟытыны но, сьӧсь сямен яке сантэмалляса возьыны яке кылкутытыны но уг яра.

4-тӥ статьяез – Рабствоез но кужмын ужатонэз алон

1. Нокинэ рабствоын яке эриктэм калын возьыны уг яра.
2. Нокинэ кужмын ужатыны яке одно ик лэсьтоно уж борды кыскыны уг яра.
3. Та статьялэн ужпумез понна "кужмын ужатон" но "одно ик лэсьтоно уж" терминъёсы уг пыртӥсько:
   • котькуд уж, кудзэ огшоры быдэсъяно луэ та Конвенцилэн 5-тӥ статьяысьтыз валатонъёсъя пытсэт сьӧрын пукисьлы яке пытсэтын таӵе пуконлэсь условно мозмытскем адямилы;
   • котькуд ожгар характеро варан, нош со кунъёсын, кытын улонваланэн сэрен ожгар варанлэсь куштӥськон лэземын, армиын одно ик варан интые пуктэм варан;
   • нимысьтыз тупатэм югдур дыръя яке калыклэн улонэзлы яке шуд-дэлетэзлы кышкытлык кылдытӥсь шуг-лек учыр дыръя котькуд одно ик варан;
   • огшоры граждан обязанностьёслэн люкетсы луись котькуд уж яке варан.

5-тӥ статьяез – Эрико но йӧтылонтэмлыко луыны право

1. Котькинлэн правоез вань эрико но йӧтылонтэмлыко луыны. Нокинэ но эрикезлэсь мозмытыны уг луы, таӵе учыръёсы но катэн тупатэм радэн сяна:
   • компетентной судэн судить карем адямиез пытсэт улын катъя возён;
   • адямиез катъя ӝегатон яке пытсэт улэ пуктон (арест) судлэсь катъя кутэм решенизэ быдэстымтэ понна яке катэн косэм котькыӵе быдэстоно ужез быдэстонэз радъян вылысь;
   • адямиез катъя ӝегатон яке пытсэт улэ пуктон, кудӥз лэсьтэмын, со мед султоз йыртэмаськисен оскымон лыдъянъя компетентной орган азе шуыса, яке куке оскымонэн лыдъяське кулэлык йыртэмаськемзэ дырыз дыръя палэнтыны яке йыртэмаськем бере пегӟыны солы люкетыны;
   • катэн юнматэм ордеръя быдэ вуымтэ адямиез пытсэт улэ пуктон сое дышетыса син улын возён вылысь яке сое катъя пытсэт улэ пуктон сое компетентной орган азе султытон вылысь;
   • паласькись висёнъёслэсь вӧлскемзэс быдтон вылысь адямиосты катъя пытсэт улэ пуктон, озьы ик визьтэммемъёсты, алкоголикъёсты, наркоманъёсты яке калгыса ветлӥсьёсты катъя пытсэт улэ пуктон;
   • адямиез катъя ӝегатон яке пытсэт улэ пуктон солэсь кун пушкы законтэк пыронзэ дугдытон вылысь яке адямиез, кудӥзлы пумит кутӥсько депортациен яке экстрадициен герӟаськем ужрадъёс.
2. Котькудӥзлы, кин арестовать каремын, ӝегатскытэк ивортӥське кылын, кудзэ со вала, арестэзлэн мугъёсыз но котькыӵеез сое виноватэ уськытон сярысь.
3. Котькудӥз та статьялэн 1.с параграфысьтыз валатонъёсъя ӝегатэм яке пытсэт улэ пуктэм мурт ӝегатскытэк нуиське судья азе яке катъя суд властез быдэсъясь мукет должностной адями азе но, со муртлы сётӥське право кулэезъя басьтэм дыр ӵоже судын ужез эскеронлы яке судлэсь азьло мозмытонлы. Мозмытонлы пуктэмын луыны быгато куронъёс судэ вуонлы оскытыны.
4. Котькудӥзлэн, кин эрикезлэсь мозмытэмын арестэн яке пытсэт улэ пуктэмен сэрен, правоез вань сое пытсэт улэ пуктэмлэсь катлы тупамзэ чик ӝегатскытэк судын эскеронлы но мозмытонлы, сое пытсэт улэ пуктэм уг ке тупа катлы.
5. Котькудӥзлэн, кин арест улэ яке пытсэт сьӧры шедиз та статьялэсь валатонъёссэ тӥямен сэрен, правоез вань компенсация басьтыны.

6-тӥ статьяез – Судын ужез зэмлыко эскеронлы право

1. Граждан правоосыз но обязанностьёсыз сярысь споръяськон ке кылдӥз яке сое котькыӵе йыружен янгыше уськытон ке кылдӥз, котькудӥзлэн правоез вань кулэезъя басьтэм дыр ӵоже катъя кылдытэм независимой но беспристрастной судын ужез зэмлыко но шара эскеронлы. Судлэн решениез калык азьын ялӥське, нош прессаез но публикаез быгато палэнтыны ваньмызлэсь суд процесслэсь яке люкетэзлэсь моралез, мер радлыкез яке национальной кышкыттэмлыкез демократи обществоын утён вылысь, озьы ик куке сое кулэ каро быдэ вуымтэослэн интересъёссы яке сторонаослэсь личной улонзэс утён понна, яке – сокем, макем со, судлэн малпамезъя, одно кулэ – нимаз ужъюгдуръёсын, кытын калыклы тодымон карон тӥясалыз правосудилэсь интересъёссэ.
2. Котькудӥз, кудзэ йыруж лэсьтон пумысен янгыше уськыто, янгыштэм лыдъяське со дырозь, куке янгыш луэмез катъя возьматэмын луоз.
3. Котькудӥзлэн, кудзэ йыруж лэсьтон пумысен янгыше уськыто, тужгес но ӧжытсэ таӵе правоосыз вань:
   • кылын, кудзэ со вала, рос-прос тодытэмын ӝегатскытэк луыны сое янгыше уськытонлэн пуштросэз но мугез сярысь;
   • ас утиськонзэ дасяны тырмымон дырез но луонлыкъёсты басьтыны;
   • ассэ утьыны ас кожаз яке соин асэныз быръем дурбасьтӥсен яке, дурбасьтӥсьлэн ужамез понна тырыны солэн уг тырмы ке коньдонэз, солы сётэм дурбасьтӥсез дунтэк басьтыны, куке тае кулэ каро правосудилэн интересъёсыз;
   • солы пумит верась адӟисьёслэсь юалляськыны яке курыны, соослэсь мед юалляськозы шуыса, но басьтыны правоез соя верась адӟисьёсты ӧтьыны но соослэсь юалляськыны таӵе ик условиосъя, солы пумит верась адӟисьёс понна кыӵеос;
   • кылысь кылэ берыктӥсьлэсь юрттэтсэ дунтэк басьтыны, со уг вала ке судын кутӥськись кылэз яке уг вераськы та кылын.

7-тӥ статьяез – Каттэк кылкутытон ӧвӧл

1. Нокинэ но судить карыны уг быгато йыруж лэсьтэм понна, кыӵе ке уж лэсьтэм яке лэсьтымтэ вылэ пыкъяськыса, кудъёсыз соосты лэсьтон вакытэ кунлэн катъёсызъя яке калыккуспо правоя йыруж уг кылдыто вал. Озьы ик кылкутытон секытгес луыны уг быгаты, соин ӵошатыса, кудӥз уже кутэмын луыны быгатэ вал, йыруж лэсьтыку.
2. Та статья уг люкеты котькыӵе адямиез судить каронлы но кылкутытонлы кыӵе ке уж лэсьтэм понна яке лэсьтымтэ понна, кудӥз сое лэсьтон вакытэ цивилизованной кунъёсын кутэм праволэн огъя принципъёсызъя йыружен лыдъяське вал.

8-тӥ статьяез – Личной но семейной улонэз гажанлы право

1. Котькинлэн правоез вань солэсь личной но семейной улонзэ, улон корказэ но корреспонденцизэ гажанлы.
2. Уг лэзиськы публичной властьёслэн та правоез улонын быдэсъянэ мерсконзы, таӵе учыръёс сяна, куке со катэн чакламын но демократи обществоын кулэ луэ национальной кышкыттэмлыкез, мер радлыкез яке кунлэсь экономика ласянь дэлетсэ утён вылысь, бугыръяськонэз яке йыружъёсты дырыз дыръя палэнтон понна, тазалыкез яке нравственностез утён понна яке мукет адямиослэсь правооссэс но эрикъёссэс утён понна.

9-тӥ статьяез – Малпанъёслы, религилы но совесть ласянь эрик

1. Котькинлэн эрико малпанъёслы, совестьлы но инмарлы осконлы правоез вань; со правое пыро оскондэ яке убеждениостэ воштыны эрик, религиедлы яке осконэдлы кызьы ке огнад, озьы ик мукет муртъёсын ӵош оскыны эрик – шара яке нимаз радъяса – инмарлы вӧсяськон, дышетон, религиозной но мукет сэбедъёс ортчытъян.
2. Религиедлы яке осконэдлы оскыны эрикез сомында гинэ сюбегатыны луэ, мамында катъя тупатэмын но демократи обществоын кулэ мер кышкыттэмлыкез утён вылысь, мер радлыкез, тазалыкез яке нравственностез утён понна яке мукет адямиослэсь правооссэс но эрикъёссэс утён понна.

10-тӥ статьяез – Ас малпанъёстэ шара вераны эрик

1. Котькинлэн ас малпанъёссэ шара вераны правоез вань. Со правое пыро: малпанъёсыдлы оскыны эрик, кунгожъёс шоры учкытэк но публичной властьёслэн кыӵе ке мерсконзытэк информациез но идеяосты басьтыны но вӧлмытыны эрик. Та статья уг люкеты кунъёслы радио, телевидение пыр верась яке кино поттӥсь предприятиосыз лицензировать карыны.
2. Та эрикъёсты улонын быдэсъян, со обязанностьёсыз но кылкутонэз понэ бере, герӟаськемын луыны быгатэ таӵе формальностьёсын, условиосын, сюбегатонъёсын яке санкциосын, кудъёсыз катэн чакламын но демократи обществоын кулэесь национальной кышкыттэмлыкез, территорилэсь быдэс луонзэ яке мер радлыкез утён вылысь, бугыръяськонэз яке йыружъёсты дырыз дыръя палэнтон понна, тазалыкез но нравственностез утён понна, мукет адямиослэсь репутацизэс яке правооссэс утён понна, лушкем басьтэм информациез шарае поттонэз дырыз дыръя палэнтон понна яке правосудилэсь авторитетсэ но беспристрастной луонзэ возён понна.

11-тӥ статьяез – Люкаськонъёслы но огазеяськонъёслы эрик

1. Котькинлэн бугыръяськытэк люкаськонъёс ортчытъяны эриклы но мукетъёсын огазеяськыны эриклы правоез вань, профсоюзъёс кылдытъяны но ас интересъёссэ утён понна соос пушкы пыраны правоез татчы ик пыртыса.
2. Та правоосты улонын быдэсъянэз нокызьы но сюбегатыны уг луы, озьы сяна, кызьы катэн чакламын но демократи обществоын кулэ луэ национальной кышкыттэмлыкез но мер радлыкез утён вылысь, бугыръяськонэз яке йыружъёсты дырыз дыръя палэнтон понна, тазалыкез яке нравственностез утён понна яке мукет адямиослэсь правооссэс но эрикъёссэс утён понна. Та статья уг люкеты вооружённой кужымъёсысь, полициысь яке кунэн кивалтӥсь органъёсысь адямиослэсь та правоосты улонын быдэсъянзэс катъя сюбегатыны.

12-тӥ статьяез – Кузпалъяськыны право

Кузпалъяськымон арлыдозь вуэм воргоронлэн но кышномуртлэн правозы вань кузпалъяськыны но семья кылдытыны кунлэн катъёсызъя, кудъёсыз та правоез улонын быдэсъянэз радъяло.

13-тӥ статьяез – Правоостэ утьыны эффективной амаллы право

Котькудӥзлэн, кинлэн та Конвенциын пусъем правоосыз но эрикъёсыз тӥямын, правооссэ кун органын утьыны эффективной амаллы правоез вань, та тӥям лэсьтэмын вал официальной кинке луись адямиосын ке но.

14-тӥ статьяез – Дискриминациез алон

Та Конвенциын пусъем правоосты но эрикъёсты уже кутон кылдытэмын луыны кулэ нокыӵе но дискриминацитэк полъя, расая, ку буёлъя, кылъя, осконъя, политической яке мукет малпанъёсъя, калык выжыя яке кыӵе мерысь потэмъя, национальной меньшинствоосы пыремъя, ваньбуръя, вордӥськемъя яке мукет тодметъёсъя.

15-тӥ статьяез – Йӧспӧртэм учыръёс дыръя сётэм кылъёсты быдэсъянлэсь куштӥськон

1. Ож вакытэ яке нацилэн улонэзлы кышкытлык кылдытӥсь мукет шимучыр дыръя Куспазы Вераськись Бадӟым Сторонаос пӧлысь котькыӵеез быгатэ ужрадъёс кутыны, солэн та Конвенци улсын сётэм кылъёсызлэсь сокем гинэ куштӥськыса, макем шимес луэ югдур, таӵе ужрадъёс ке калыккуспо правоя мукет сётэм кылъёсызлы пумит уг луо.
2. Та валатон уг быгаты ньӧм луыны нокыӵе но куштӥськонлы 2-тӥ статьялэсь, катлы пумиттэм луись ожгар действиосын сэрен адямиослэн кулэмъёссы сяна, яке 3-тӥ статьялэсь, 4-тӥ статьялэн 1-тӥ пунктэзлэсь но 7-тӥ статьялэсь.
3. Куспазы Вераськись Бадӟым Сторонаос пӧлысь котькыӵеез, кудӥз та куштӥськон правоез уже кутэ, рос-прос ивортэ Европалэн Кенешезлэн Генеральной секретарезлы кутэм ужрадъёсыз сярысь но соосты кутон мугъёс сярысь. Со озьы ик ивортэ Европалэн Кенешезлэн Генеральной секретарезлы таӵе ужрадъёсты ку дугдытон сярысь но Конвенциысь валатонъёсты выльысь быдэсак быдэсъяны ку кутскон сярысь.

16-тӥ статьяез – Кунсьӧрмуртъёслэсь политикаын ужанзэс сюбегатон

10-тӥ, 11-тӥ но 14-тӥ статьяосысь номыриз но медаз лу валамын, Куспазы Вераськись Бадӟым Сторонаослы кунгож сьӧрысь муртъёслэсь политика удысын ужанзэс сюбегатыны люкетон шуыса.

17-тӥ статьяез – Правоосын умойтэм ужаны алон

Та Конвенциысь номыриз но медаз лу валамын озьы, кыӵе ке но кунлы, адямиослэн группазылы яке нимаз адямиослы луонлык сётӥське шуыса, – кыӵе ке ужен вырыны яке кыӵе ке уж лэсьтыны, кудъёсыз та Конвенциын гожтэм правоосты но эрикъёсты быдтон калэ вуттозы яке соосты сюбегатозы золгем, Конвенциын гожтэмъя сярысь.

18-тӥ статьяез – Правоосты сюбегатонъёсыз макем уже кутон

Верам правоосты но эрикъёсты та Конвенци улсын лэзиськись сюбегатонъёс кутӥськыны кулэ ӧвӧл нокыӵе но мукет цельёс понна, соосыз понна сяна, кудъёсыз понна соос чакламын вал.

II ЛЮКЕТЭЗ – АДЯМИ ПРАВООСЪЯ ЕВРОПАЫСЬ СУД

19-тӥ статьяез – Судэз кылдытон

Куспазы Вераськись Бадӟым Сторонаослэсь та Конвенцияя но Протоколъёсызъя ас вылазы басьтэм сётэм кылъёссэс возёнэз чаклан понна кылдытӥське Адями правоосъя Европаысь суд, отӥяз со "Суд" шуыса нимаське. Со ужа ялан.

20-тӥ статьяез – Судьяослэн лыдзы

Судлэн составаз пырись судьяослэн лыдзы луэ Куспазы Вераськись Бадӟым Сторонаослэн лыдзы.

21-тӥ статьяез – Судья луон критерийёс

1. Судьяослэн луыны кулэ самой вылӥ моральной ӟечлыкъёссы, судьяос вылӥ суд должностьёсы пырон понна быдэсъяно куронъёслы тупаны кулэ яке вылӥ дунъям тодон-валанэн юрист луыны кулэ.
2. Судьяос Судлэн ужаназ асьсэос пырисько.
3. Соослэн ужын луон вакытсы ӵоже судьяослы нокыӵе но ужен выроно ӧвӧл, кудӥз независимостенызы, беспристрастностенызы яке быдэс нунал ужаны куронъёсын валче каронтэм. Та параграфез уже кутонлэсь вань кылдӥсь ужпумъёсты решать каре Суд.

22-тӥ статьяез – Судьяосты быръён

1. Куспазы Вераськись Бадӟым Сторонаос пӧлысь котькудӥзлэсь судья бырйиське Парламентской ассамблеяен со понна сётэм куараос пӧлысь ӝынылэсь ятыреныз списокысь, кудаз та Сторонаен дэмлам куинь кандидат пыртэмын.
2. Сыӵе ик процедура уже кутӥське Судлэн составаз ватсаса быръён понна, куке бордаз огазеясько выль Куспазы Вераськись Бадӟым Сторонаос, озьы ик куке усьтӥськись вакансиосты тырмытоно.

23-тӥ статьяез – Ужан дыр

1. Судьяос куать арлы бырйисько. Соос быгато выльысь быръемын луыны. Нош нырысетӥ быръёнын быръем судьяос пӧлысь ӝыныезлэн ас полномочиоссэс быдэсъян вакытэз быре куинь ар пумын.
2. Судьяос, кинъёслэн ас полномочиоссэс быдэсъян вакытсы быре нырысь куинь ар пумын, бырйисько Европалэн Кенешезлэн Генеральной секретареныз, пус чӧлтыса, соосты быръем бере соку ик.
3. Судлэн ӝыны составезлэсь куинь арлы быдэ выльдаськемзэ радъян вылысь, макем луоно со, Парламентской ассамблея быгатэ котькыӵе вуоно быръёнэз ортчытонлэсь азьвыл решение кутыны, одӥг яке уно быръёно судьяослэн ужан дырзы яке ужан дыръёссы, куать ар сярысь, мукет луозы шуыса, нош котькызьы ке но укмыс арлэсь трос ӧвӧл но куиньлэсь ӧжыт ӧвӧл.
4. Таӵе учыръёсы, куке вераськон мынэ одӥглэсь ятыр срокъёс сярысь но Парламентской ассамблея уже кутэ азьло сылӥсьсэ параграфез, полномочиос быдэсъян вакытъёслэсь кема кыстӥськемзэс шедьтэ, пус чӧлтыса, Европалэн Кенешезлэн Генеральной секретарез, быръем бере соку ик.
5. Мукет судья интые, кинлэн ужан дырыз бырымтэ на, пуксьыны быръем судья та постын ужалоз таӵе дыр ӵоже, кудӥз предшественникезлэн ас полномочиоссэ быдэсъян вакытэзлэсь кылемын.
6. Судьяослэн ас полномочиоссэс быдэсъян вакытсы быре, куке соос 70 аресозь вуо.
7. Судьяос ас постъёссэс возё, воштэмын луытозь. Соос, озьы ке но, азьланьтозы таӵе ужъёсын ужанэз, кудъёссэ соос кутскизы ни эскерыны.

24-тӥ статьяез – Ужысь куштон

Судья ужысьтыз куштэмын луыны быгатэ соку гинэ, куке мукет судьяос ятыреныз ичизэ кык куиньмосэныз куараосын пукто, со быдэсъяно куронъёслы тупамысь дугдэм шуыса.

25-тӥ статьяез – Секретариат но правоя референтъёс

Судлэн Секретариатэз вань, кудӥзлэн функциосыз но радъяськемез юнматӥсько Судлэн Регламентаз. Судлы юртто правоя референтъёс.

26-тӥ статьяез – Судлэн пленарной кенешонъёсыз

Пленарной кенешонъёсаз Суд:

• куинь арлы быръе солэсь Тӧрозэ но Тӧролэсь одӥг яке кык воштӥсьёссэ; соос быгато выльысь быръемын луыны;
• тупатэм дыр ӵоже ужась Палатаос кылдытъя;
• быръе Судлэн Палатаосызлэсь Тӧрооссэс; соос быгато выльысь быръемын луыны;
• Судлэсь Регламентсэ кутэ; но
• быръе Судлэсь Подъясь Канцлерзэ но солэсь одӥг яке уно воштӥсьёссэ.

27-тӥ статьяез – Комитетъёс, Палатаос но Бадӟым Палата

1. Солы сётэм ужъёс эскерон понна Суд кылдытъя куинь судьялэсь комитетъёсты, сизьым судьялэсь Палатаосты но дас сизьым судьялэсь Бадӟым Палатаез. Судлэн Палатаосыз тупатэм дыр ӵоже ужась комитетъёсты кылдытъяло.
2. Ужын сторона луись кунлэсь быръем судья Палаталэн но Бадӟым Палаталэн ex-officio ёзчизы луэ; таӵе судья ӧвӧл дыръя яке со уг быгаты ке кенешонэ пыриськыны, соку та кун быръе адямиез, кудӥз судья луыса ужалоз.
3. Бадӟым Палаталэн составаз озьы ик пыро Судлэн Тӧроез, Судлэн Тӧроезлэн воштӥсьёсыз, Палатаослэн Тӧрооссы но Судлэн мукет ёзчиосыз, кудъёсыз Судлэн Регламентэзъя быръемын. Куке уж сётӥське Бадӟым Палаталы 43-тӥ статьяя, Бадӟым Палаталэн кенешонъёсаз уз пыриськы пуктэм кутэм Палатаысь судьяос пӧлысь одӥгез но, та Палаталэсь Тӧрозэ но ужын сторона луись кунлэсь быръем судьяез гинэ вератэк.

28-тӥ статьяез – Урттылӥськемлэн ярантэм луэмез сярысь комитетъёслэн ялонъёссы

Комитет, огмылкыдын куара сётыса, быгатэ 34-тӥ статьяя сётэм нимаз урттылӥськемез ярантэм шуыса ялыны яке эскероно ужъёслэн списокысьтызы сое куштыны, таӵе решение кутэмын луыны быгатэ ке, урттылӥськемез выльысь эскерытэк. Та решение берпуметӥез луэ.

29-тӥ статьяез – Урттылӥськемлэн ярась луэмез сярысь но ужлэн пуштросэзъя Палатаослэн решениоссы

1. 28-тӥ статьяя кутэм нокыӵе решение ӧвӧл ке, Палата решение кутэ 34-тӥ статьяя сётэм нимаз урттылӥськемлэн ярась луэмез сярысь но ужлэн пуштросэзъя.
2. Палата решение кутэ кунлэн 33-тӥ статьяя сётэм урттылӥськемезлэн ярась луэмез сярысь но ужлэн пуштросэзъя.
3. Урттылӥськемлэн ярась луэмез сярысь решение кутӥське нимаз, Суд, исключение карыса, мукет сямен решить ӧз ке кары.

30-тӥ статьяез – Бадӟым Палаталы юрисдикция сётон

Палатаын эскериськись уж ӝутэ ке серьёзной ужпумез, кудӥз йӧтскылэ Конвенциез яке Протоколъёссэ валэктон борды, яке ужпумез сэрттон быгатэ ке Судлэн азьло кутэм пуктэмезлы пумит луыны, Палата быгатэ, солэсь пуктэмзэ кутытозь, Бадӟым Палаталы юрисдикция сётыны, сторонаос пӧлысь одӥгез но талы пумит уг ке вера.

31-тӥ статьяез – Бадӟым Палаталэн быгатонлыкъёсыз

Бадӟым Палата:

• 33-тӥ статьяя яке 34-тӥ статьяя сётэм урттылӥськемъёс ласянь решениос кутылэ, куке кыӵе ке Палата 30-тӥ статьяя солы юрисдикция сётӥз яке куке уж солы 43-тӥ статьяя келямын; но
• эскерылэ консультативной йылпумъянъёс вераны куронъёсты, кудъёсыз 47-тӥ статьяя лэсьтэмын.

32-тӥ статьяез – Судлэн юрисдикциез

1. Судлэн юрисдикциез вӧлме Конвенциез но Протоколъёссэ валэктон но уже кутон сярысь мынӥсь вань ужпумъёс вылэ, кудъёсыз 33-тӥ, 34-тӥ но 47-тӥ статьяосын чаклам учыръёсы быгато солы сётэмын луыны.
2. Вань-а Судлэн юрисдикциез сярысь споръяськон учыре ужпумез сэрттэ ачиз Суд.

33-тӥ статьяез – Кунъёс куспысь ужъёс

Куспазы Вераськись Бадӟым Сторонаос пӧлысь котькудӥз быгатэ Судлы вазиськыны, мукет Стороналэн Конвенциысь но Протоколъёсысьтыз валатонъёсты котькыӵе малпам тӥямез сярысь ивортыса.

34-тӥ статьяез – Индивидуальной урттылӥськемъёс

Суд быгатэ урттылӥськемъёс басьтыны котькыӵе адямилэсь, правительствоен герӟаськымтэ организацилэсь яке нимаз муртъёслэн группазылэсь, кудъёсыз верало, Конвенциын яке Протоколъёсаз ялэм правооссэс тӥяз Куспазы Вераськись Бадӟым Сторонаос пӧлысь одӥгез шуыса. Та правоез улонын эффективно быдэсъяны нокызьы но уз люкетэ шуыса, Куспазы Вераськись Бадӟым Сторонаос кыл сёто.

35-тӥ статьяез – Ярась луон критерийёс

1. Суд быгатэ ужез эскерыны кутскыны ваньмызлэн правоос утьыны пуш амалъёслэн быремзы бере гинэ, калыккуспо праволэн ваньмыныз признать карем нормаосызъя но, национальной органъёслэн берпуметӥ решениез кутэмзы дырысен куать толэзь ӵоже.
2. Суд уг кутскы эскерыны 34-тӥ статьяя сётэм нокыӵе урттылӥськемез, кудӥз:
   • анонимной луэ; яке
   • пуштросэзъя сыӵе ик луэ, кудӥз Судэн эскеремын ни вал, яке сётэмын ни калыккуспо сэрттон-пертчонлэн яке тупатон-радъянлэн мукет процедураезлы но, со пушкын ӧвӧл ке ярамон выль информация.
3. Суд ялэ ярантэм шуыса 34-тӥ статьяя сётэм котькыӵе индивидуальной урттылӥськемез, кудзэ со лыдъяз та Конвенциысь яке Протоколъёсысьтыз валатонъёсын ӵош каронтэм шуыса, чылкак обосновать карымтэ шуыса яке урттылӥськон правоен умойтэм ужан шуыса.
4. Суд палэнтэ котькыӵе урттылӥськемез, кудзэ со лыдъя та статьяя ярантэм шуыса. Со тазьы лэсьтыны быгатэ ужез эскеронлэн котькуд стадияз.

36-тӥ статьяез – Куинетӥ стороналэн пыриськемез

1. Палатаын яке Бадӟым Палатаын эскериськись котькыӵе уж ласянь, Куспазы Вераськись Бадӟым Сторонаос пӧлысь котькудӥз, кудӥзлэн гражданинэз урттылӥськись луэ, быгатэ гожтэм комментарийёс сётъяны но кылзонъёсы пыриськыны.
2. Правосудиез рос-прос быдэсъян понна Судлэн Тӧроез быгатэ ӧтьыны Куспазы Вераськись Бадӟым Сторонаос пӧлысь котькыӵезэ, кудӥз ужын сторона уг луы, яке котькыӵе йӧтэм адямиез, кин урттылӥськись уг луы, гожтэм комментарийёс сётыны яке кылзонъёсы пыриськыны.

37-тӥ статьяез – Уж эскеремысь дугдон

1. Суд ужез эскеронлэн котькыӵе стадияз пуктыны быгатэ эскероно ужъёс пӧлысь урттылӥськемез куштыны, ужъюгдур лэзе ке йылпумъян лэсьтыны:
   • урттылӥськись уг меды ни курыны солэсь урттылӥськемзэ эскерыны шуыса; яке
   • споръяськон сэрттэмын-пертчемын вал шуыса; яке
   • Судэн шедьтэм котькыӵе мукет муген, урттылӥськемез отӥяз эскерон кулэтэм луэ ке.

Озьы ке но, Суд азьланьтэ урттылӥськемез эскеронэз, тае кулэ каре ке Конвенциын но Протоколъёсаз ялэм адями правоосты чаклан.

2. Суд быгатэ пуктыны урттылӥськемез эскероно ужъёс пӧлы берыктыны, таӵе пуктэмзэ шонере поттэ югдур шуыса, со лыдъялоз ке.

38-тӥ статьяез – Уж эскерон процедура но миръяськон тупанкыллэн процедураез

1. Суд урттылӥськемез ярасен ялӥз ке, со:
   • уж эскеронэз азьланьтэ сторонаослэн представительёсынызы ӵош ик но, со кулэлыко ке, быдэстэ ужъюгдур эскеронэз, кудзэ азинэс ортчытон понна йӧтэм кунъёс кылдыто вань кулэ условиосты,
   • интыя ассэ йӧтэм сторонаослэн кивалтэм улсазы уж ласянь миръяськон тупанкылэз тупатон вылысь, та Конвенциын но Протоколъёсаз гожъям адями правоосты чаклан вылэ пыкиськыса.
2. 1-тӥ пунктлэн "b" подпунктаз чаклам процедура конфиденциальной луэ.

39-тӥ статьяез – Миръяськон тупанкылэз тупатон

Миръяськон тупанкыл тупатэмын ке, Суд ас списокысьтыз ужез куштэ, пуктэмез поттыса, кудаз вакчияк гинэ гожтэмын фактъёс но кутэм решение.

40-тӥ статьяез – Судлэн шара кенешонъёсыз но документъёс борды сузьтӥськон

1. Аспӧртэмлыко югдурен сэрен Суд ӧз ке пукты мукетсэ, солэн кенешонъёсыз шара луо.
2. Секретариатэ возиськыны сётэм документъёс борды лэзиське калык, Судлэн Тӧроез мукетсэ ӧз пукты ке.

41-тӥ статьяез – Шонер компенсация

Конвенция яке солэн Протоколъёсыз тӥямын вылэм шуыса, Суд ялӥз ке, но Бадӟым Стороналэн пушпал правоез луонлык сётэ ӧжытак гинэ утялтыны со тӥямлэсь бервылзэ, Суд, кулэ луон дыръя, шуг-секытэ шедем стороналы шонер компенсация сётэ.

42-тӥ статьяез – Палатаослэн пуктэмъёссы

Палатаослэн пуктэмъёссы луозы берпуметӥосыз 44-тӥ статьялэн 2-тӥ пунктысьтыз валатонъёсъя.

43-тӥ статьяез – Бадӟым Палатае уж выжтон

1. Палаталэн пуктэмзэ поттэм нуналысеныз куинь толэзь ӵоже котькудӥзлэн уже пыриськись стороналэн йӧспӧртэм учыръёсы куремез луэ ужез Бадӟым Палатае эскерыны выжтон сярысь.
2. Бадӟым Палатаысь вить судьялэсь луись коллегия кутэ куремез, уж ӝутэ ке серьёзной ужпумез, кудӥз Конвенциез яке Протоколъёссэ валэктон яке уже кутон сярысь мынэ, яке оглом характеро мукет серьёзной ужпумез ӝутэ ке.
3. Коллегия куремез кутӥз ке, соку Бадӟым Палата ужъя ас пуктэмзэ поттоз.

44-тӥ статьяез – Берпуметӥ пуктэмъёс

1. Бадӟым Палаталэн пуктэмез луэ берпуметӥез.
2. Котькыӵе Палаталэн пуктэмез луоз берпуметӥез:
   • сторонаос ӧз ивортэ ке, соос ужез Бадӟым Палатае выжтыны курозы шуыса; яке
   • пуктэмез поттон нуналысен куинь толэзь ортчем бере Бадӟым Палатае уж выжтон куремын ӧй вал ке; яке
   • Бадӟым Палаталэн коллегиез уж выжтон сярысь куронлы 43-тӥ статьяя пумит луэм бере.
3. Берпуметӥ пуктэмез печатласа калыке поттыны кулэ.

45-тӥ статьяез – Пуктэмъёсыз но решениосыз валэктон

1. Пуктэмъёс, озьы ик урттылӥськемъёсыз ярась яке ярантэм ялӥсь решениос валэктэмын луыны кулэ.
2. Быдэс пуктэм яке солэн люкетэз судьяослэсь огкылысь малпанзэс ӧз ке возьматы, соку котькыӵе судьялэн правоез вань ас нимаз малпанзэ вераны.

Wikidata item