Айлы

by Лыткин Георгий Степанович

Югыд шондіӧй, айӧй!
Вердысь-удысьӧй, айӧй!
Ӧзъян сисьӧй, айӧй!
Бур нимӧй, зарни керӧсӧй!
Мыйла нӧ тэӧй менӧ, коньӧрӧс,
Керка позсьыд (пӧтка позтырсьыд) янсӧдін?
Мыйла наӧ тэӧй менӧ, коньӧрӧс,
Сьӧлӧм бердсьыд чуктӧдін?
Мыйла нӧ тэӧй йӧз водзын
Юрбитӧмнад юрбитін?
Мый нӧ тэӧй ыджыд вежӧрнад
Мывкыд вылад арталін?
Эз ӧмӧй нӧ вӧв тэнад шогыд,
Мый бара шогтӧ вӧчыштін?
Эз ӧмӧй нӧ сывлы тӧвбыд кокыд,
Мый мем чукӧртӧмтӧ кыскыштін?
Эн тай тэӧй менӧ кужлывлы
Тыр синнад видзӧдлывны;
Эн тай тэӧй кужлывлы
Джын нимнам чукӧстлыны;
Эн тай менӧ кужлывлы
Чорыдджыка чукӧстлыны;
Эн тай тэӧй кужлывлы
Код юртӧ гортад вайлыны.
Эг тай меӧй тӧдлывлы
Бырӧмсӧ, помасьӧмсӧ;
Эг тай меӧй тӧдлывлы
Тэнсьыд лӧглунтӧ.
Кужлін тай менӧ, коньӧрӧс,
Лы кузяым нюжӧдныс;
Кужлін тай менӧ, коньӧрӧс,
Яй кызаым кызӧдныс.
Эн тай менӧ кужлывлы
Ас водз вылас чуксавлыныс;
Эн тай тэӧй кужлывлы
Сьӧкыд удж вылас кесйӧдлыныс.
Пыр тай, вӧлі, тэӧй ачыд
Йӧз водз вылад уськӧдчан;
Пыр тай, вӧлі, тэӧй ачыд
Сьӧкыд уджтӧ эштӧдан.
Кужин тай тэӧй меным, коньӧрлы,
Мича паськӧмсӧ лӧсьӧдны:
Энянӧй кӧ тай, вӧлі, тшӧктас,
Ӧтик кыв кӧ тай, вӧлі, шуас —
Кык мында тай вӧлі ваян,
Моздор тырад вайысьӧй!
Ӧзъян сисьӧй, бур нимӧй!
Тэ понда тай менӧ, коньӧрӧс,
Бур пыдди ныв-зон пуктісны,
Шань пыдди лыддисны.
Кок улӧдзым тэд юрбита
Вердӧмыд-удӧмыд вылӧ,
Кӧмӧдӧмыд-пасьтӧдӧмыд вылӧ,
Бура видзӧмыд, быдтӧмыд вылӧ,
Мича паськӧм лӧсьӧдӧмыд вылӧ.