Миләүшә гөлләмәһеләй
Аэропорттың уттары.
Сәләмләп беҙҙе ҡаршылай -
Баш ҡала ҡунаҡтарын.
Төрлө тел... Залдағы халыҡ
Осраша - айырылыша,
Кемделер Өфө оҙата,
Кем менәндер таныша.
Бында юлдар сеймәлешкән,
Яҙмыштар киҫелешкән:
Бер күргәнең - таныш булһа,
Икенселә - белештәр.
Таныш булыу, белеш булыу -
Беҙҙең бөтмөштән инде,
Еребеҙҙе миллиард табан
Тапап үтмештән инде.
Әйҙә килһендәр ҡунаҡҡа,
Осошлай ҙа тейһендәр,
Башҡорт - алсаҡ, башҡорт - ипле,
Ышаныслы, тиһендәр.
Килмәһендәр ҡорал тотоп,
Мәкер тейәп күңелгә,
Ерен һаҡлап, халҡҡынамдың
Күпме ҡаны түгелгән!
Аэропорт - Өфө киҫәге,
Аэропорт - Өфө ҡото,
Ҡанатһыҙға ҡанат ҡуйып
Оҙата торған йорт ул.
