2014 йыл - күк ағас ат йылы тип һанала.
Аҡбуҙ елә, аҡбуҙ елә,
Беҙгә лә етеп килә,
Быйыл Күк ат - Аҡбуҙ йылы,
Быны бар донъя белә.
Ир ҡанаты - ат, тигән бит
Хан замандан ҡанбаба,
"Мин күлдән сыҡтым, башҡорт!"- тип
Оранлап Аҡбуҙ саба
Башҡорт иленә табан:
Мине менер батыр бармы,
Бармы көмөш йүгәне,
Урал батыр затынанмын,
Илемәмен, тигәне?!
Әҙер торһон, был - беҙҙең йыл,
Беҙ ҡотайыр мәл етә,
Оло маҡсаттар ҡуйырға,
Үтәргә лә хәл етә!
Башҡорт аты - Аҡбуҙ толпар!
Биреп тормабыҙ ятҡа,
Табылыр батырҙары ла,
Атланмаҫ ағас атҡа.
Кемдер мал тип йәнен һата,
Батыр ил өсөн үлә....
...Аҡбуҙ елә, аҡбуҙ елә,
Беҙгә лә етеп килә.
