Карпа, Сидор, Петыр, Онтон, Павол
Огазе ӵош люкаськыса одӥг пол
Пичи кенеш лэсьтӥллям, —
Берло гуртлы вераллям:
—«Ми, эшъёс, пересьёс, пиналъёс,
Вож бадяр кадь будӥсь егитъёс,
Я толон,
Я вадьлан,
Копак удмурт арня нуналэ.
Ньыль кузя мынӥм Павол доре.
Пырим талэн дораз, пуксим,
Котыр сюмык вина юим,
Кылъёсмы берганы ӧдъязы —
Кенешыны ук йӧназы.
Кенешо соос, кенешо,
Прак одӥг мурт кадь кенешо, —
Бусыын вӧсяськон сярысь
Усто, мылысь-кыдысь, сюлмысь.
—«Пересьёсмылэсь сямзэс юн возёно —
Со борды гижысь-пиньысь кырмиськоно:
Котыр выӵкы вина пӧсьтыса,
Култӥ-калтӥ сьӧд ош шӧдтыса,
Инмарлы куриськоно,
Котьмар но, вӧсяськоно. —
Озьы вераз Быдӟым Карпа.
—«Та, Будӟым Карпа,
Котьмар но эшъёс,
Пересьёс, пиналъёс,
Улэм-вылэм адями мурт ини, —
Ултозяз котьмае ик адӟиз дыр ни;
Верам кылызлы санэ поныса,
Котыр манет коньдон октыса,
Базаре мыныса, сьӧд ош басьтоно
Ӝамак ик вӧсяськыны потоно».
Вераз Сидор
Суӟямтэ кор.
Быдӟым Карпалэсь,
Кор кадь Сидорлэсь,
Ваньзылэсь, ньыль муртлэсь
Одӥг, кадь дэмламзэс
Кенеш калык юнматӥз,
Култӥ-калтӥ ош басьтӥз,
Вандӥз,
Бусызэ винаен пылатӥз.
Табере няньзы удалтоз ни,
Прак, сыръяса ик мотоз дыр ни.
Нош кӧс ар ке луоно луиз?..
Соку ваньмыз быриз:
Виналы ю-нянь кисьтэмзэс,
Ошлы коньдон сётъямзэс
Утчаса но уз шедьтэ ни дыр,
Инмар но берен уз берыкты ни дыр.
