МОЛИ ТРАКТОРСЬ
— Мзярце шись ни
Увнай вармась?
Мзярце шись ни
Пиземсь суводы?
Корхтай
Эсьтеенза Лаврась,
Суронь мянцезь
Шитнень лувонды.
„Аш ков лисемс, —
Арьси Лавра,
Суви пиземсь
Вирьге — паксява...”
Тячи, сякокс,
Сюци Каврась
Мирденц эса
[ 105 ]
Юрхтса — латала.
— Тята водя,
Лавруш, ялгат,
Няйса — повоть,
Аф эсь янозт,
Монга солан, кода панда
Люпштай колхозсь
Лафту лангозт.
Аш месть тиемс.
Йотасть пинкне,
Аф минь прясонок
Тефне арьсемат.
Кельме калмос ни
Вдь киньке,
Лядыкс шитнень
Шкайти максомат.
Фана попське
Йонда маштсь ни,
Сонга грехти
Пильгонц тонгозе.
Ох, ох, ломатть,
Афи машнихть...
— Лоткак, соньге
Колхозсь пондазе! —
Лаврань потмоц
Пяшксе толда.
Аф кирьфтави
Кавра бабати,
Конань векоц
Улендсь ордатф...
Кржа кельги
Осалть шабакска
Лама корхнесь
Лаврась попти:
„Колхозникне
Тядде шавомат!
Мани шиста
[ 106 ]
Якстерь толти
Перестост
Сьоротне максомат”...
Вов мес Лаврась
Учси манить,
Вов мес авац
Сюци эсонза.
. . . . . .
Лядыкс шить ни
Пиземсь шави.
Курок коськихть
Вальмять ливсенза...
Кундась вармась
Туця крайти,
Лофца лангокс
Менельть штафтозе.
. . . . . . . . . .
Моли тракторсь —
„Май” — колхозти.
Шинясь копонц
Валдса архтозе.
Сргозсь Лаврась,
Нльне эводсь —
Тракторть сталмоц
Кудонц шерфтезе.
Мяштенц лангс
Путозе кяденц,
Кяжда ваймонц
Потму таргазе.
|
|
