Важся коми войтырлӧн кодралӧм
Вокӧй, олін-вылін,
Сёйин, юин, сьылін,
Мырсин, шогсин тан —
Ӧні ойбыртан.
Регыд бара мӧдан,
Кытчӧ, ачыд тӧдан;
Мунігкежад тась
Тэнад быдсӧ дась.
Бура лӧсьӧдчӧм мысь
Он пов эндӧдчӧмысь,
Туй вылад тэд, вок,
Оз торк бур ни лёк.
Эн вӧв нэм тшыг-пасьтӧм,
Льӧм ляз водзад дасьтӧм,
Рысь и выя рок
Эм и ӧні, вок.
Тэнӧ пуксьӧдімӧ,
Выль лаз пасьтӧдімӧ,
Киад шы и ньӧв,
Поспомын тэд вӧв.
Пуклӧс пыдди сепыс;
Сыын быдся шепыс:
Шобді, рудзӧг, зӧр —
Тэ и сэн кӧдз-гӧр.
Кодыр воан сэтсьӧ,
Мӧд олӧм тай сетсьӧ,
Татчӧс кӧйдыс мед
Сэні ловзяс тэд.
Туяд нем м’оз дугӧд,
Тэрмась! Мӧдар югыд
Мича, долыдик,
Таладор кодь дзик.
Та кодь турун, пуяс,
Шонді, чардби, юяс,
Енвевт сідз жӧ лӧз,
Сӧмын бурджык йӧз.
Бурджык чери, пӧтка,
Он сэн тшыгъяв ӧтка,
Дінад воасны,
Сӧмын чукӧстны.
Ачыд лоан лючки,
Кагаӧс он кучкы;
Вӧвтӧ, лёк и нарт,
Весьшӧрӧ он варт.
Сэні вир оз юны,
Кыз удж сэн оз нуны, —
Зэв тай дӧзмыд нэм,
Кор дзик керны нем!
Эм сэн татчӧс колӧм,
Абу татчӧс полӧм,
Оз лок шудтӧм лун,
Шудаыс оз мун!
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1875, so this work is also in the public domain in other countries and areas where the copyright term is the author's life plus 148 years or less (if applicable), or the copyright term is 72 years or less since publication for posthumous works (if applicable). |
|