Ляцендезь йорайхть лоткафтомс СССР-ть шири йотнемода.
Западнай Белорусияста Советонь Союзу сьора-видихнень ворьгочнемасна кепоць пяк лама репрессияда сембе пограничнай полосать эса и сембодонга пяк ворьгодихнень семьяснон каршес.
Докшип районца польшань патрульсь прьметась ворьгодиень группа, конат мольсть советонь границать шири. Патрульсь вешсь, штоба ворьгодихне лоткальхть, но синь ашесть лотка и вишкста кармасть йотнема границать вельф. Польшань пограничникне кармасть ляцендема ворьгодихнень ланкс. Пограничнай столбатнень ваксс шавфт колма сьора видихть.
Польшань пограничникне стаки ашесть лоткся ляцендемода мянь советонь территориять ланксонга и тянь вельдя шавф фкя од ава и ранендафт 7 ломатть.
Долгиново районца пограничникне шавозь Павловскай сьора-видить аванц мархта, конат йорасть йотамс границать вельф. Милише районца ворьгодиень группать ланкс ляцендемста стакаста ранендаф Курянович сьора-видись. Кивок ашезя няй кода сон верпотмоса лама сяда метра шашць пекекедь ланкса советонь границяти. И вов кой как сон шашфтовсь пограничнай столбатненди и тоса машць йожода и кулось. Тургуны районца ворьгодихнень ланкс ушоцть ляцендема пулемеца. Тя ляцендемать вельдя 3 ломатть шавфт и 15 ранендафт.
Барселононь революционнай событиятне.
Барселонца забастовкась коль ниньгя аф лоткси. Хотя анархо синдикалистскай профсоюзонь руководительхне азозь власттненди, што забастовкась аделакшневи, но рабочайхне танга сяка вятихть вишкя тюрема. Сембе предприятиятне си ошонь транспорць кода и инголя аф работайхть. Ошса молихть столкновеният рабочай и полициянь отряттнень и жандарматнень йоткса. Лувондови ни 7 шавфта и 30 да лама ранендафта.
Полициясь арестовандась лама сяда ломань.
Лодзиса кепоцть забастовка 16 тьожань чулочникт,
Лодзиса нят шитнень кепоцть вишкя забастовка чулочнай промышленносьца. Забастовкась фатязень сембе чулочнай фабрикатнень. Баставандай 16 тьожань рабочай кочсеф стачечнай комитетнень руководстваснон вельдя. Забастовкась кепотьф сяс, што кирьфтазь рабочайхнень работама питнеснон 20 проценцта сявомок 40 процентти молемс.
Чилиса молихть вишкя бойхть повстанецнень и правительствань войскатнень йоткса.
Кода азонцазь Чилиста (Южнай Америка), правительственнай войскатне Толькахуана портовай ошса ушоцть йоряма бомбат востаниянь кеподи караблятнень ланкс, конат тяфта-жа ляценцть войскатнень каршес. Лама крейсерхт апаляфт, кафта суднат макссть пря (сдались). Илядыкс флоць сувась Каквимбо портти и пякстазь потма ширдя. Марьсевихть кулят, што лама ошова кепсихть восстаният целай гарнизотт.
Вальпорайсоса азф всеобщай забастовка. Правительствась макссь распоряжение арестовандамс сембе коммунисттнень.
Пан европейскай комиссиять антисовецкай тевонза.
Капиталистическай масторонь представительхне, конат пуромсть Лига-нациянь пан европейскай комиссияв, ашесть му кодамовок мерат хозяйственнай кризизть мархта тюремаса. Пяк вишкомкшнихть противоречиятне капиталистическай масторхнень миронь и разоружениянь колга корхнемаснон перьфкя. Но антисовецкай махинациятненди синь аф эряйхть кодамовок противоречиясна и мушондыхть фкя марстонь кяль. Европейскай камиссиясь примась предложения макссемс льготат сембе сьороса торгавакшни Восточно Европейскай масторхненди аньцек СССР да башка.
Тяфта жа аф ваномс сянь ланкс, што Литвинов ялгась пяк кемоста ащесь сянь инькса, штоба улель кочкаф экономическай аф нападандамань колга договорснь совецкай проекць, комиссиясь ашезь карма сонь кочкамонза. Ашезь сат совесьцна йофси атказамс совецкай проектть эзда, комиссиясь путозя вешемс Лига-нациять ширьдя, штоба сон пуроптоль специальнай комитет тя проектть ванондома. Синь фсякай лаца йорайхть атказамс Советонь союзть миролюбивай предложениянц эзда.
ПЕТЬКС „Валда Ян“ журналть 7—8 номерсонза, 24 це лопаширеса ульсь нолдаф рисунка (клише), конань алу сьорматф: „Тя куца ульсь Чапаевонь штабоц (Саранск ош)“. Эряви лувомс: „Тя куца ульсь Пугачевонь штабоц (Саранск ош). Редакциясь. |
| Обллит № 228. Типография „Красный Октябрь“ | Тираж 1661 экз. | Отв. редакторсь Л. Е. Бажанов. |