Ванжак

Атюлов Анатолий Александрович

Ванжак
Шыпшылт вазын анзылнем ванжак,
Кычалалаш уке пылдырат.
Ял лӹвакы пишок лӱдыш анжаш –
Вӹдшӹ йога пӹсӹн пӹтырналт.

Ӹдӹр ганьы мӹньӹм шыпшеш вес сир.
Мыры виквлӓ тӹштӹ шактат пиш.
Мӹлӓм чучеш, тӹдӹ вуйта вес мир,
Пӹлгом ганьы кымда, соты, виш.
  
Тӹдӹ лӹмӹм сек когом намалеш,
Сир – поэзий маныт циланат.
Ванжым годым пусть мӹнь шӹртнӓлт валем,
Но тӹш миэм шардыла инат.