Ванине (2011)/9
[172]
| IX |
Иетне ютыть, теке пек кенерезь инзейть вармань эрьва лекстявсто певерить. Теке исяк, сёксень чопода чокшне, Дораень Миколь васенцеде ильтекшнизе кемгавксово иесэ Кулянь кудонь кузтемпезэст. Аволь ламо шкань ютазь теевкшнесть никс-полакс. Умок те ульнесь, сеске азарсь войнанть прядомадо мейле. Ютасть иеть. Ютасть ламо. Аволь умок, маряви, чиде-кавтодо икеле, сюлмавкшнызе эрямозо, васень мирдедензэ мейле, Каргонь Иван марто. Кадовсть эйстэнзэ пародояк паро, седеень эждиця, он ёнов молиця ледстнемат. Сынь, эзь кавтолдо ней уш [173] аволь од авась, а нардавить, а румовтовить шкантень зярдояк. Пе тенст путы ансяк Тов туемась. Ванинс вана, сонзэ цёразо... Сон, сон, Ванине, прянь ветямосонзо колси валдо, кецневтиця, оймень витиця ледстнематнень.
Тедеде кизна Куля эскельдясь сизьгемень вететнень трокс. Аволь аламо. Аволь пек ламояк. Аваломантне, седе сеедьстэ, шождасто, апак кувсе, мандовтомо пачколить кавксоньгементнень малас. Кияк а соды, кинень зяро казеви Верде ды зярдо сы меельце раужо, чоподас ваямонь чизэ. Сонсь куломась — оймень лисемась, кода кортыть, сэредькст-пштикст а канды. Лип-лип — ды весе, пингеде-пингень кашт. Стакат, келя, самодонзо икеле читне-ветне, лиясто иетне, сонензэ анокстамо шкась. Паро, зярдо ломанесь «сявори» апак учо, апак «анокста», удомстонзо туи сэредьксэнь апак варча. Лиятнень вана уцяскаст эрси лията — кулыть кувака куломасо, тарка лангсо аволь ве иень перть резэмадо мейле. Эрьвань, эрьвань Пазось ванозо истямодо.
Дюниянь тевть, тагояк сави меремс: ломанесь кулы ды... вельми одс эрьва чистэ-вестэ. Каня удомась, видеяк, а ...кулома? Лисни истя: Инешкипазонть пельде максозь иетнестэ комсьветеетнень-колоньгементнень эрясынек... кулозь! Чить эрятано Течисэ, веть — Тоначисэ. Лиясто мик читькак полавтнетяно чоподантень. Кодамояк сэредькске, эли пштикст-налт марят матедевемстэ? Арась. Истя, маряви, ваи эрьвась свал эрямонь эрькентеньгак. Удомась, лиси, — алкуксонь куломантень эсензэкс анокстамо. Уцяскав се, кие сыречисэнзэ матедеви апак учо, сеске ды зярдояк уш а сыргози, а несы валскень валдонть, чинть лисеманзо.
Куля сундерьгадозь потявтызе скалонть, моргасо ловсонть педизе чова педямонь пачка анокстазь колмо литрань колмо банкава. Вейкенть эйстэст путызе вальмалангс, кавтотнень — кельменькайс, дачниктненень-кинень миемс. Тесэ а режни. Нуртясь, эзизе стувто, пильгалонзо эвтиця-чарыця, эсензэ кондямо сыре, раужо-ашо пона, пиже сельме псакантень. Теде мейле печксь ашо кши кочом, эстест кадовт банкастонть нуртясь кружкас ловсо ды ютась икелев, озась ярсамо. Мекс-бути эзь моле. Марявсть лекшат. «Я! Те истя мезе?» — кивчк ютась мелесь. Ловсонтень навсезь, мелень каршо, сэвизе кочомонть, копоризе кадовикс ловсонть. Нардынзе сурсо курго кочкарянзо. Аштесь стуворонть песэ. Учось.
Совась Ванине. Косоль, кува чинь чоп лытась, сонсь соды. «Неяви, ансяк аламнеде токазь...» — варштась лангозонзо, редизе Куля.
— Ды то-он те-те шкане, те шкане э-эзить мадне. Шкат зярс эзь са, — тешкстызе Ванине эстензэ ярсамонь пурнамсто. — Телевизоронть нолдавлик. Те мезе истя мартот?
— Ну, кода меремс, ёжом, дарманом та-кода маштсь, — видькстась авась цёранстэнь шаршавсо пирязь удсема таркастонзо. Снземачннь марязь, кайсесь ды эцесь велькс потс. Мадсь кунст. Кувать удомазо эзь са. Мекс-бути сась мелезэнзэ Карго Иванонь марто свадьбань кондямост, мартонзо ютавтозь никс-полакс васенце вест. «Эринек ансяк ие пулыне марто, эно мекс истят а ютавтовиця, маней ледстнемат кадовсть се шкадонть? Мезень коряс сон истя явовсь Микольде? Чачтовтымнм? Тень кувалма? Мекс сон, се шкась, истямо нурькинель? Эли, видеяк, валдосто-псистэ палыцясь кувать а палы?»
Мельтне-арсематне — сёлмовтомо ливтниця нармунть. А стяко кезэрень ламо Ине содыцятне Идеянть лемдекшнизь Пазокс. Нетнень полавтызь, састь превзэнзэ лиятат. Кирнявтозь кирнявтсть ледстнематне сувсо копачазь шкатнестэ войнань меельце ды прядомадонзо мейлень иетнес. Васняяк вейке чокшнесь.
...Таштамковонь лембе, сэтьме сундерьгадома шка. Кенерсть тия-тува сыргоземе, зярс пелезь кончниця, мельде-валдо ваныця, тешттне. Вейсхозонь контора — вете стенасто чувтонь кудо. Саекшнызь сонзэ вейсэнь хозяйстванть сёвнозь-лайшезь пурнамо шкастонть «кулаконь» кедьстэ. Кинь? Содасть ансяк сыретне, сетнеяк аволь весе. Кузтемпезэнзэ пурнавсть зярыя од цёрат. Веенстнэ шкадо икеле састь фронтсто, лиятне — «ойнанть» прядовомадо мейле. Вейкень, шкадо икеле сыцятнестэ, вить пильгезэ арась, омбоцень — кершесь, колмоцень... Кинь керязь кумажадо алга, кинь — верьга. Вейкесь эйстэст клюка лангсо. Улить ютксост кедтеметькак. Аволь кецневтиця, аволь эрьгела, валдо картинась. Аволь. Ялатеке нолдазь пря аштицят а неявить. Од шка... Кадык нурькине, теке панжиковонь маней ве, ялатеке нусманячить а соды — пеедькшнить, раксить, калякить-кортыть. Прок арасельтькак, прок эзть юта войнань толтнэнь-вертнень пачк. Од шка...
Ушодызь вечкевикс морост:
| [175] | На позицию девушка |
Велень келес, кудотнень-латотнень, икельгаст озавтнезь кальтнень юткова чуди моронть нусманя, лужаня мелодиязо, цёрань, ризксэнь кандый валтнэ-вайгельтне. Кунсолыть, липнемадояк лоткасть, тешттне, чоподасэнь менелесь, атякштне, правлениянть икеле келей лопа тополесь. Нейгак, пельпингень ютазь, марясыть неть вайгельтнень, моронть — седееть калады, эль сельведеть кирдевить. Эйсэнзэ маряви куломань кодамо-бути кельме ёжо. Самай сон, те «позициясь», морыця од цёратнень ютавтынзе лепиявтыця качамонь пачк, кадынзе кедтеме-пильгевтеме.
Прок кинонь экрансто неезь, ютась мадезь аштиця Кулянь прява умоктояк умок неезь те келей, сюмора ёжонь сыремтиця, а стувтовиця картинась тейтерьксэнь эрямостонзо...
Марсизе те моронть цёратнень кургсто седе мейлеяк, а вана се морамозо, эйсэнзэ нусманячись, се чокшнесь кадовсть прясонзо мекс-бути весемеде кирдевицякс.
«Микольгак, Дораень Микольгак, васень седейпельксэм велявтокшнось тосто, самай те «позициястонть». Кедензэ-пильгензэ таркавальть. Шумбрачизэ лиясо саезель. Кемень иень перть эйкакшонь а чачтомась тосто, ков цёранть ильтнесь «девушкась». Умок, вай, умок те весе ульнесь! Аламот уш кадовсть эрицякс сеть томбавозь морыцятнеде. Ламот Тосо, косо ультяно весе. Эрясть, вечксть — арасть. Монгак сынст ладсо: течи тесан, ванды... Ды истя, сы шка, эрьвась. Весе содыть — кемемс кияк а кеми, кияк а арси. Эрямось алкукскак дюния! Мезе мартояк а чарькодеви... Вай, те мекс, видеяк, истя сеске лавшомгадынь? Косто саевсть лекшатне? Седеем лангс зярдояк эзинь пеняцякшно... Вант вана... пштикст. Вай, вай, авакай! Илязо уле...»
Окойники, ютазденть, пеедькшнезь, седе ламо авардезь, эрязь эрямодонть ледстнематне ушодсть вецакадомо ды курок ёмасть, ледстницясь эзизе маряяк, ваясь лембе, виень максыця, эрьгедема ёжонь раштыця удомас. Кияк а мери — кулось, тусь шкань а содыця Тона масторов. Тень таркас мельстуиця, кольнягай валнэть: мадсь, чиремсь оймсеме.
... Теле. Исяк чокшне празь ловдонть ков а варштат — ашо. А вановат, сельметь липнезевить. Ашонь азорось сиясо почодынзе [176] кудотнень икельга чувттнэнь, куракштнень, кудонь-кардонь латотнень, китнень, пирявкстнэнь. Ванькс. Валдо. Паро, седеень истят кецневтицят улевельтькак ломантнень оймест, эрямост, тевест.
Телень ветне, седеяк ацамковсто, — аволь кизэнь: таргавить кувака пиксэнь кувалмосо. Ансяк ашолгады, ванат уш сундерькстнэ невтнить пряст, чарыть вальмат икельга. А редясак, кода пештьсызь кудот. Телень седей. Усковиця, чопода эли коввалдо веть, пукштордыця якшамот. Лиясто каштом почкосо-трубасо урныця, ордашкалиця вармат. Эно кодамокс тензэ лиятакс улемс? Теле...
Ванине сыргозсь, стясь таркастонзо, лепштизе стенасо толонь вельмевтиця повненть ды мекев эцесь тарказонзо. Пазаватнень икелев путозь частнэ-стявтнинькайтне невтсть вейксэ. «Эх, кевпря, удовинь аламнеде!» — тешкстызе эсь пачканзо ды, аламос аштезь, лиссь ватань вельксэнть алдо. Кудосонть валскень экшеденть капшазевсь седе лембестэ карсеме-оршнеме.
— А-авай, шказо уш о-оно зяро! Марят-арась? — серьгедсь якшамодонть сорныця вайгельсэ. — А-авай, мекс чатьмонят?
А куш а каш.
— Авай! — серьгедсь колмоцеде. Каршо — кашт.
Ванине эскельдясь удсема тарканзо малас ды келемтизе шаршавонь чиренть. Авазо аштесь кониксэнзэ кунст мадезь, кедензэ вельксэнть ланга, рунгонзо кувалт. Чамазо ашо, марявсь, мик цитни. Сельмензэ панжадот. Кургозо апак пекста. Сеске Ванине эзь чарькоде, мезе лиссь. Талакадсь.
— Ава-ай! — рангстась граж вайгельсэ, тандадсь, зярдо сась мельс, неезденть аламнеде потазевсь. — Те-те истя мезе? А-авай, авай, варштак лангозон.
А куш а каш, а сырк а сорк. Видьстэ потолокс, ве таркас ваныцясь мезеяк эзь нее, мезеяк, кода иляст пижне, иляст сеере, эзь маря. Вельть уш ламо кежей даволт чаравтсть эйсэнзэ, ламо седеень раздемат, кажот ютасть потмованзо. Эрямонть ламбамо танстензэ аламо варчнизе. Паряк, секс Пазось эзизе стувто: казсь Кулянень сэтьме-паро, ормань-сэредьксэнь апак сода кулома. Эзь майсеве сонсь, эзь майсевте малавиксэнзэ, Ванинень. Аволь кулось — мадсь виень таштамо. Превезэнзэяк эзь сакшно — а сыргози. Кие сыретнеде а арси апак сэреде, пиштемань апак сода куломадо? Куля эзь арсе, эзь учо истямонть. Сонсь сась. Сонсь Пазось кучизе.
Ваниненень яла эзь кемеве. Каня те алкукс? Каня эрси истя?
[177] Таймазкадозь зярс-бути вансь аванзо лангс. Састыне, аламнеде пелезь, эскельдясь коникенть ёжос, комась нучк сонзэ вельксс ды токизе, шождынестэ сорновтызе «оймсеме мадицянть» лавтовдо. Терявтызе путомс чувтомозь кельме кедензэ мештензэ лангс.
— А-авай, авай, стяк! Тон мезе истя? — содась стяко, ялатеке тердсь кельмезь, уш кевензазь рунгонть лавтовс токшемстэ.
Ванине выр-вар каясь лавтовонзо ланга мезе понгсь ды ношкстась пенть песэ эриця шабранстэнь, Бозань Любанень. Сон ней велесэнть весемеде содавикс, весемеде покш ломань — пурны каявкст, страховкат-мезть, яксевти велень тевть, эрьва таргосто ардтни буйкуншкав. Кудосонзо телефон ули, теде башка, зепсэ кандтневицяяк. Секскак соды, кие-кода эри, кода лекси, кинь кеняркс, кинь ризкс. Кузвелесэ Люба-Любине ловови аватнестэ одокс — аволь умок шаштсь ведьгементнень трокс. Каня а од сизьгемень-кавксоньгемень иесэтнень ютксо?
— Лю-Любине, адяка, авам ку-кулось! — талномадонть седеяк кокнозь, ансяк панжизе кенкшенть, пижакадсь совицясь кудонть келес.
— Тон превсэ? Кода кулось, ансяк улкоть мартонзо лисьмалангов лабордынек! Шумбра-пароль, ней-на! Вай, вай, кодамо апаро лиссь! — каштомикельде лисемстэ зярыяксть рукштядинзе кедензэ «эцезь» рунгонзо кувалт Люба-Любине. Эскельдясь ды стясь Ванинень каршо.
— Тон эно ёвтник, мезе лиссь?!
— А-адя седе курок, — эзь карма ёвтнеме берянь кулянь кандыцясь, рестедизе кутьмерьсэнзэ кенкшенть, лиссь потазь. Кудов сеске эзь велявто, чийсь Чичавтненень, эрить авасоло, Палю ялганстэнь аванзо куломадо ёвтамо. Кудосоль.
— Кулось — калмама, — кода свал, кавтолдомань апак сода, макссь чентязь чама тюс Палю превть «кезэрь» ялганстэнь, — рамама, анокстама ярсамопельть, виныне, чарькодеви. Я, тон содат, косо ават кирдсь ярмаконзо? Сынтемест, ялгай, ям а пидят.
— Му-мусынь. Те-те уш монь те-тевесь, — кемевтизе Палюнь, каштлангс чалгамо вакссо аштезь.
— Паро. Азё муить. Лавкась те шкас уш панжадо. Чийнян. Ризксэть эряви мадстемс. Ды лездамскак эряви, — седеймарязь яла тонавтсь аволь аптюкнеде Палю.
— Мон курок, — серьгедсь валскень инжесь ды чожолк лиссь ушов. Превезэнзэ совавтозь меленть топавтомо. Эль а чиезь тусь кудов.
[178] ... Палюнь кедьстэ самозонзо кенерсь само Вазань юртонь кирдицясь — Люба-Любине, алкине, валдо прячерь, эчкела турва, аламодо пизьгатав, ялатеке вечкевикс тюс-чама ава. Куядонть пек а майси.
— Тон уштык, васняяк, голландканть, — кармавтызе Ванинень Люба, — совавтт седе курок пенгть, кандт ды эждть ведь. Чарак седе! Чарак...
Ванине топавтсь кармавтоматнень, сонсензэ превстэ эзь лисне, кирмалавкс кирдевсь мелесь — косот аванзо ярмактне. Совавтсь пенгть, лазнось чевкст, уштызе голландканть. Автордынзе ведратнень ды жой-гай лиссь ведьс. «Маряви, козонь-бути кенденть алов путнесь эйсэст», — бизнэсь, оймамо эзь сода мелесь лисьмалангов молемстэ. Совавтсь ведь, ве ведранть путызе плита лангс эжеме. Зярс Люба-Любине лисекшнесь, ёндолк ютась кониксэ аштиця аванзо ваксс, тодовонть марто кепедизе прянзо, вить кедензэ нерьгстызе алганзо ды нолажтовтызе кенденть алга. Понгсь кедезэнзэ тапаркске. «Сынь!» — ютась икстерькакс пряванзо.
— Куломань оршамопелензэ содасыть косот? — совась, чикорк мерсь кенкшесь, Люба. — Муить, путыть эземпес. Косот?
— Муить! Кудыкеле, маряви, пиже горобиясот, — безардезь, мельде-валдо мерсь Ванине. Сон палманькс аштесь кудо куншкасо.
— Азё, шабра сырькайтнень серьгедить авать экшелямо, — кармавтсь авась ды келес панжизе Кулянь коникензэ пириця шаршавонть.
— То-тонсь мольть. Монь шкам арась, — чапизе апак визде кудованть а мезень теемадо ужодо-ужос злыдардыцясь.
— Ков истя капшат? — чирялт варштась, эль эзь аймельгадо марязденть котьмиця Люба.
— Э-эряви.
— Азё, азё, эвсь нилевлинзить! Тонь яла тевть, яла тевть... Содан кодат! — кеждязь мерсь кудазоронтень ды лиссь: ков молят, эряви тердемс лездыцят.
Лиссь мельганзо Ванинеяк.
Зярыя шкань ютазь сась Чичавнень. Совамо тенст эзь карма, серьгедизе, кенкшс вачкодсь, Палюнь ушов.
— На ки-кирдть, рамак. Эстенек зярс. Ветешка са-айть. На, сатыть ветес, — таргинзе потмо зепстэнзэ ды нерьгстынзе ярмактнень, якшамодонть сорнозь, Палюнь коморс, — мон те-теске [179] кадован, учотан. Ку-кудосо мон а эряван. Тосо Люба чары-вели.
— Кельмат, кудос адя, — ожадо кундазь, Палю ускозь ускизе оянзо кудос. Сонсь ношкстась «тевс».
Аламос аштезь икельць кудосто лиссь Палюнь аволь пек сыре, ялатеке чирькекс мендявозь, Палюнь кондямо чентязь чама тюс авазо. Шка... Мезе сон теи! Аволь, допрок аволь умок якась видьстэ, ней — молемстэ эль пильгесуронзо а палси.
— Тынь таго, иродт, тезэнь пуромтадо? — машнетезь пшкадсь пшти, теке уро, вайгельсэ шержей черь коськана аваломанесь.
— А-ансяк, Олдай патяй, кавонек, ка-кавонек, — оймавтызе, кенгелесь, эзь кончтаяк, Ванине. — Ко-кодаткак ша-шалномат а-а улить.
— У-у-у, вардонь сельметь... А пештевтядо... — музгордезь Олдай сырькаесь ютась аштицянть вакска мекев икеле кудос, прок текень кис лиснеськак.
Ванине учось.
...Омбоце чистэ Кулянь калмамо састь шабранзо-буензэ. Тердизь, кие кенерсь, састь Кулянь сазоронзо, састь Дораень, икелень мирдензэ пельдеяк. Састь, эзизь стувто, икелень шкань, сыречис пачкодиця фермань ялганзо. Састь кой-кить школасто, меельце важодема таркастонзо. Байтяк пурнавсть.
Кандолазтнэ аштесть эземпрясо. Кулянь пряпензэ велькссэ пазаватнень икеле типельдсть пггатолнэть. Марявсь солыця-палыця штань чине. Стенас понгавтозь чавачамось копачазь нардамосо. Вельтизь телевизоронтькак. Ансяк улкоть якиця-пакиця авась аштесь меельцеде кудосонзо прок эрий, мерят оймси-теи ды сти, кунды эрьва чинь апак прядо тевезэнзэ. Кедензэ путозь мештензэ лангсо. Прясонзо уло алга сюлмазь ашо паця. Меште видьга рунгозо копачазь лавкань ашо човине таваткссо. Мазычизэ эзь саеве куломантеньгак. Нурька виде судо, чевте турва, ванькс чама, валдо, мик аламнеде кувтолды. Мекс эзь сюлмаво те мазычись кенярксонь кандтний уцясканть марто? Мекс эзь максо Верепазось чаманзо кондямо валдо эрямо? Ансяк поронь ашочись, конязь сельмтне ды чамаумарьсэнзэ яндавинень аразесь невти — те уш а сон, а икелень Куля. Мекс, мезень кис сакшны ломанесь, эрьвась, те певтеме келей, кувака, мазычиде пешксе моданть лангс? Майсевеме?
Пазаватнень каршо, стядо аштезь, кулозенть пряпесэ моторды, книгас ванозь, ловнось киненьгак ачарькодевикс славянонь ташто кельсэ сёрмадозь та-кодат канонт, кулознень алтазь морот, сэрьс сэрей, эчке вайгель Домай сырькаесь. Сыредсь, сыредсь [180] авась, сонськак арси кандолазтнэде, ялатеке ловомо кой-зярдо яки. Шкань-шкань ловомсто тейни, кувакасто лекстязь, юткот. Те шкастонть теевить марявиксэкс аватнень тошказь нурька кортамост. Паряк, сынь авольть улеяк, чарькодевельтькак валтнэ. Седеяк, ёвтневельтькак «канонтнэ-мезтне» эрзякс. Паряк... Домай оймси-теи, одс ушоды моткодеме некень, киненьгак а содавикс, мерьказь валтнэсэ: «... и живеси нанебеси, дабудет оля твоя... Аминь». Мельганзо зярыя вайгельть: «Ами-и-нь...»
Совась Ванине. Тей-тов чиремкшни. Икелев эзь юта. Аванзо кандолазтнэнь ваксс стямодо эзь арсеяк. Сонзэ эсензэ мелявксонзо. Серьгедизе Люба-Любинень.
— Лю-люба, кал-калмось, мерть, анок. Аламо-о-ошка кадовсь. Э-эряви цё-цератнень андомс. А-ага. А-андомат. Теяк, па-палыцядонтькак зярыя пачтяма.
Эсь превсэ улемстэяк цёранть кортавксозо аволь ванькстнэде, симезь — пупорькшни эрьва валонть ёвтамсто: а эрьвась ды а сеске чарькодеви. Куш седе чуросто, апак эрязкале ёвтневиль сынст!
Домай сырькаень ветердемазо эртевсь, теке ярсамсто сусковксонь паморькскесь а тува тусь. Учось, зярдо прядсызь кортамост. Люба-Любине тень чарькодизе: кончтась Ваниненень, ды капшазь лиссть кудыкелев. «Саты вейкеськак, — кирдсь авась мельсэнзэ ютамсто, — сынь пе а содыть». Панжизе понгавтозь ревень пряшка пекстамкаенть ды юрк совась кавс-утомс. Тесэ ванстовсть Кулянь, вандынь чиденть арсицянть, улинзэ-паронзо: зярыя кескавт почт, сюро, ой, алт, сывель, оршамопельде, нуладо-валадо пешксе пижестэ артозь горобиязо. Ней кирдевсь тесэ рамазь «гуйведеськак».
Ванине, лыким-дыким, пулокс совась аванть мельга. Зярдо икеле молицясь комась ды венстизе кедензэ кияксс путозь ящикентень — саемс бутылка, Ванине лавузлявсь лангозонзо: кувака кедьсэнзэ кутмордызе удалдо нучк ды зяро вийсэнзэ лепштиксэлизе ёжозонзо. Тона вырк витемсь, велявтсь а тов эцицянть каршо. Сельмсэнзэ яксезевсть кежень сяткинеть.
— Тон мезе? Эли ормазкадыть? Куш течи, авать калмамо чистэ, потомдавлик кирьгапаренть, визьксчама! Куш течи прят ветявлить ломанькс! — лаказевсть кежензэ Люба-Любанень. Кедьсэнзэ кирдсь бутылка.
— М-мон истяко, пеедь-пеедькшнемань кис, — аванть икеле менчевезь, начко турвасонзо цямкаезь, идесь пря кутморицясь. — Монь уш умок...
— Ну дай, дай омбоце!
— Арась, иля нерне! Сатадо — зяро меленк.
— Ну монсь са-саян...
— А саят! — Люба тохмадизе эчке, эцезь, теке цёрань, рунгосонзо бурина цёранть ды глянк-глянк пекстызе мельганзо лазонь кенкшкенть.
Лия шкасто, лия таркасо ды лия марто Люба-Любине ансяк кецневель тензэ явозь вадяшамо-палсема мелентень. Зяроце ие уш коськени мирдевтеме, зяроце ие а варчтни цёрань лембе. Ськамонзо. Иетнеяк аволь ланга, ведьгемень. Каня берянь улевель? Ды косто... Велентень, ловт, вейкеяк маштовикс цёра эзь кадово... Эрьвась ломантнестэ эсензэкс тантомо. Мезень, кодамо чумочинь кис сон педси эйзэнзэ? Мезень кис эйстэдензэ пешксе ваканстонть савкшны коршнемс? Люба, Люба... Мазыйне, вал-мукшов, хозяйствань ветиця... а вана ськамонзо.
...Коень коряс, шкастонзо, кандолазтнэнь ливтизь ушов ды путызь кузтемпень каршо анокстазь эземнетнень лангс. Ушосонть аволь виев, аволь пукштордыця якшамо, ялатеке, ве таркасо аштезь, маряви. Кудонть икеле сэрей-рацяня аволь сыре килеесь копачазь лекшсэ. Чипаенть вановтто тарадонзо цитнить сиякс. Теке мерят каясть сюмора чувтонть ланга цивторкай тештинесэ ёролдозь ябунця. Сонгак ильти азораванть, ламо иеде икеле озавтыцянзо.
Якшавтсь аволь умок ловонть прамодо мейле. Секс сон зярс апак шешке, апак мерька, ванькс, мик сэньшть мери. Кулянь конязь сельме чамазо ловонть кондямо ашо. Лангозонзо чуросто прыця ловтештинетне а солыть. Мазычизэ ванстовсь оймензэ лисемадо мейлеяк. Седеяк чоподасто неявсть сельмечирькензэ. Сонензэ ней ялатеке: а мари салава, эсь юткова кортамотнень, а неи ашосо почодозь вечкевикс чувтонзо, а мари якшамонть скирямонзо. Кизэ, теле, пси, якшамо, ашо, раужо... — сонензэ мезеяк а редяви. Прядовсть модалангонь эрямонь кенярксонзо, эрьгелачинзэ, прядовсть ве канстсо акандовикс минень-сюнонь майсеманзо.
Лиссть-састь ильтемензэ каршо ды вакссо шабранзо, састь куринканек, састь малавиксэнзэ. Берянь, арасель пряпесэнзэ сехте пек ёжонь калавтницязо, аволь весть, аволь кавкстькак лайшевтницязо — цёразо.
[182] ...Сыргозсь Ванине кудосонть якшамодонть. Ливтизе прянзо, теке варясто, эчке, лембень кирдий тавадксонть алдо. Варштась потолокс, сельмсэнзэ лыпаезь, велявтызе прянзо лия ёнов — икелензэ аштесь чокшнень апак уряда стуворось. Вы-вы-вы... — лиссь кургстонзо экшеденть. Каня ушось полавтызе кайксэнзэ — истя кежиявтсь? Каня лиядо мезде? Сеске превезэнзэ эзь са: кудонть уштыцянзо, лембень ванстыцянзо исяк ильтизь тов, косо а содасызь, мезе те лембесь эли тарьксэсь, косто кулят а пачколить. Мезе теемс? Прясь, а мезть ледстнемс, а таркасонзо, увны. Кода илязо увно, ялатеке кодаяк стяма. Пстидизе лангстонзо вельксэнть. Тонгинзе пильгензэ коникенть вакссо аштиця кемтнес, эскельдясь, сайсь каштлангсто фуфайка. Каизе ланганзо. Ютась стуворонть икелев. Вановтозо нолажтсь ланганзо. Симизе чокшне кадовозь пельстопкашка винанть. Варштась шаршавнесэ явозь аванзо удома тарканть ёнов. Чаво. А велькс, а кенде, а тодовт. Кодазь уськть. Ансяк. Ливтизь весе ушов. Любань тевесь. Сон весе неть тевтнень яксевтинзе, тейсь кодамо а кодамо уряд. «Сюкпря, теть, шабра!» — мерсь эськанзо урозокс кадовицясь. Ванинень седеензэ сювордызе кельме ёжо. «Весе. Авань нусманядо пешксе сэнь сельмензэ, седеень эждий мизолксонзо зярдояк уш а несынь. Од шкастонзо черензэ валдольть, мейле шержейденть цитнезевсть», — содавтызь цёранть валтнэ-мельтне. Эзть вечкевкшне сёвноманзо, кежей вановтонзо симеманзо кис. Эзть вечкевкшне! Те виде. Ульнесть сёвномат, эрсесть музгордемат, а кудосонть вана свал лембель, свал кирдевсь ваньксчи, ярсак, мезе мелеть. Кода улемс седе тов? Кодамо лув саемс? Уштома, панема-пидема, шляма, муськема, урядама... Весе эстеть, эсеть кедьсэ, эсеть превсэ. Изняви те весе? Ансяк ней, зярдо певтеме ламо мелявкстнэнь, чинь-чоп эвтематнень авазо мартонзо эзинзе сае, чарькодизе, маризе, кикс сон тензэ ульнесь, кодамо покш кажо лиссь. Панжовсь икелензэ ловсо вельтязь чопоньпелень пакся...
Путсь, каштлангсто саизе, шапка, чочнинзе фуфайкань повонзо, тонгсь варьгат ды лиссь кардазс.
Сюракшось, икелекс, порсь мелявксонь апак сода, поревксэнзэ. Сонензэ кодамо тев: кие-бути кулось, кинь-бути лайшизь, калмизь, кие-бути теевсь усксевиця урекс палыведентень... Сонензэ паро, тикшесь икелензэ, порть ды порть. Удсема тарканзо урядасызь. «Вай, а потявтомонзо кие карми?» — пицизе апак учо мелесь Сюракшонь азоронзо. — «Бозань Люба-Любине? А, кадык, кодаяк!» — оймавтызе эсь прянзо ды совась латалов пенге мельга. Ансяк [183] кенерсь голландкас пенгень лазновкстнэнь ладсеме-путнеме ды кирвазстеме, марявсь кузтемпестэ эскельксэнь чожолдома. Панжовсь кенкшесь, ды совась, варма кандызе, Рудик.
— Шумбрат, Ванине! Берянь, ванан, ававтомот. Истя? — човине, ривезень вайгельсэнзэ ушодызе кортамонзо, ансяк кенерсь мельганзо кенкшенть пекстамо валскень сыцясь. Ютась икелев. — Мезть кевкстнемс, мельсэнь. Тонть ладсо, истя улезэ, кадовкшнынь. Теня, исенседенть кадовсь зярыя?
— Му-мутано, мутано, Рудик-рыжик! Васня вана пенгтнень сыремтьсынь, як-якшамонть чиевтьса, — човсесь кедькоморонзо, эждсь гувны толонть икеле. Ялганзо самось кшувавтынзе нусманя мельтнень ды аламнеде вадрялгавтызе кайксэнзэ.
— Ха, якшамо! Кельмить, ванан. Тон мезе? Те кодамо якшамо? Мон кеветее, мик кемгавксово градусонь якшамосо удсинь. Ды мезе? Кода неят, мезеяк. Эзинь, истя улезэ, врадо, — тердемань апак учо, мокнозь, эзизе кая пинень кедень шапканзояк, лоцьк озась стуворонть экшс.
— Ма-марсинь аволь весть, — уштыцясь моргасто ливтсь бутылка ды цяр путызе стуворс, мерсь: — па-панжик! Ко-кода тон арсят, витемат чи-чиремтезь прятнень?
— Виде, виде, цёра! Витемсте васень тев. Сонзэ эйстэ, истя улезэ, ушодовить лиятне, — истя превейстэ кортазь, саизе керш кедезэнзэ суликанть, скирдызе-таргизе пеельпесэ потомксонзо ды сорнозь кедьсэ нуртясь аламонь-аламонь стопкатнес.
Эзть кенере комавтомо стопкаст, ушов ваныця, лекшень балягинесэ ёролдозь вальманть икельга, прок сулейть, ютасть кавто. Совасть вейсэ якшамо коштонть марто Дипломат ды Чичавонь «негрась». Лемдизь Палюнь истя а стяко. Черензэ дюм раужот, а чентязь чама киськезэ тюжа.
Пичепень содавикс «командастонть» та-кода «эзь эртеве» ялгазонзо Солай Мика. Косо? Мекс те шкас арась? Зярдо алятне кенерькшнесть уш а весть нуртямо, а келест — тапсевеме, теке менельстэ прась Солаенсеськак. Мерекшнесть «эзь саво, а сы...» Каня менстясы сон истямо «верде кучовтонть»? Кие кеми?
«Кайсесть», плямсесть калмамодо мейлень кадовкстнэде. Истя «поминасть-ледстнесть» Ванинень аванзо, Куля патяст. Зярыя кирдадо мейле весе ниленест теевсть кортыцякс, ламонь содыцякс, мейле — морыцянь кондямокс.
— Эрде, ялгат, серьгедтяно эрзянь моро! — рангстась Микай иредьстэнь вайгель.
— Кода кодамо? Эрзянь моронть «Ой, мороз, мороз», — яволявтсь Палю ды сонсь серьгедизе ламонень содавикс «морозоыть».
«Эрзянссденть» мейле омбоце морос виест уш эзь сато, пракшность кие козонь. Шкань ютазь кудось сорнозевсь корномадонть.
...Сюракш учось кардсонзо потявтыцянзо чикуншкас. Кияк эзь са. «Бульчом, стувтымим свалшкань потявтыцям, — пеняцясь, мелявтсь ракшась, секе тев прянзо кепсесь кенкшенть ёнов, — мекс арась, мекс а венсти тень салсо почодозь розь кши кочом? Мекс лия кияк а сы? Косот весе? Истят тевть зярдояк арасельть. Эли кодамояк зыян лиссь? Шказо уш, шказо, мекс а лиси потявтыцям-андыцям?»
Стяко учось Сюракш.
Инетнеде вейкесь ютазь пингень куншка иетнестэ истямо мель ёвтакшнось: «А полавтовиця ломанть арасть. Эрьвась полавтови лиясо». Те малавгак а виде. Мекевланг. Пертьпелькссэнть, чинть-ковонть ало, натой менельсэнть педе-пес вейкеть мезтькак а вастневить. Пезеря пиземень, мертяно, кавто петнявкскеть — сыньгак аволь вейкеть. Ломанденть а мезть кортамс. Лангс ванозьгак ве ёнов молицят стака муемс, вейкетьстэ арсицят — иля вешнеяк. Эрьвась эйстэнек — ламо масторсто мастор. Эрьвань сон эсензэ, лиянь ёнов малавгак а молиця. Секскак вейкенть, тень эли тонань, кодаяк омбоцесэ а полавтсак.
Скалонтень потявтыця муеви, кияк ды потявтсы. Кулянь вана, превейстэ арсиця, ванькс ойме ды тевень вечкиця аванть кияк а полавтсы. Лия Куля зярдояк а чачи, а чалги моданть лангс, а касы.
«Му-у-у, — кувакасто, пеняцязь-ризнэзь зяроцеде уш паркстась скалось. — Мекс кияк а сы ловсом мельга? Меленк арась симемс? Косо азоравам? Косотадо, мезе тейтядо, ломанть?» — марявсь энялдома лужаня, ёжонь колавтыця вайгельсэнзэ.
«Ке-ке-ке-ке, — кскердсть, морасть вачочинь морост саразтнэ. — Ке-ке-ре, ке-ке-ре-ке... умок уш андомалинек! — нернесть сынь, эль эзть аварде, сиземань апак сода. Сынь злыдардсть кардазганть ды учость сэнь халатсо мельгаст якиця аванть. Прок весе кулость. Кияк марикскак а теи», — марявсть пеняцямот вайгельсэст.
«Бе-э-э, бе-э-э, — парасть урозокс кадовикс реветне, вешсть [185] скалонть марто вейсэ васняяк симемс. Ангоряк-иля кирьгапареть, мариця арась! Ведь а кинень кандомс. Тикшенеяк а кинень максомс. Стувтымизь, цябай нулакс теевсть. Теке отьмас ваясть. Мезе теемс?»
Сюракш эзь цидярдо. Ютась кардостонзо кардаз куншкас, арсесь-тейсь, эскельдясь ушов лиснема кенкшенть икелев. Учось-учось — панжиця арась. Сюросонзо та-кода токавсь, ды прась нежесь, аволь кувака олога песь. Кенкшесь текень учоськак — чи-ко-о-орк панжовсь келес. Скалось, мельганзо кавто реветне лиссть оляв. Ков ней? Улевельгак панжи эли аштемков, кевкстнемс аволь саво. Ней... Ловонть потмова эль келязь-шешкезь янганть ракшатне кузсть кудотнень икельга ютыця кепедезь кинть лангс. Лиссь мезентень лисемаль. Пароль кизна. Яксевельть ды яксевельть «асфальтонть» кувалт, тикшине порневельть. Кизна... Сонзэ таркас теле, лов, шушмот. Косто-мезе муят? Бути ансяк ловне нолштат, симемат аламнеде явавтсак.
«Ков ней? — сась Сюракшонь превс кевкстемась. — Паряк, варштама Бозанень? Кудонь-кавтонь ютазь тестэ. Паряк, вастсамам Люба-Любине эли тейтерезэ Надя, потявтсамизь?» Истя арсезь, ракшась сайсь ёнкс кавто кудонь ютазь шабратнень пелев. Эскелясь кумажава ловсо вельтязь асфальтонь кинть ланга апак капша. Пельсь илязо нолажто. Те теть аволь кизна! Эзь тонадово. Паро, Бозань кардазонь покш кенкшест панжадоль. Совась, ютась кузтемпес ды паразевсь визьксэнь апак сода весе вийсэнзэ. Лиссь Люба-Любинень тейтерезэ, школасо тонавтниця Надя. Совась мекев ды ёвтнизе мезе-кода аванстэнь. Тона шкань апак таргсе лиссь потявтомо. Ве кедьсэнзэ ведрасо лембе ведне, омбоцесэнть — алкине пильге пелькашка эземне. Эзь стувто саемс кши кочомнеяк. Кода эно, кажос понгицянть кецневтема!
Люба потявтызе «инженть», совавтызе ведранть кудос ды сыргась, эзь карма ловсонть педямояк, ракшатнень эсь эрямо тарказост, Дорайнень, панеме. Пекстынзе кардазс. Мезе мусь, мезе ульнесь, макссь ярсамс. Таргась лисьмасто ведь, симдинзе. Мельс сась, теке басом, варштамс кудос. Совсемскак, сеске янксезевсь, аволь эряво! Неезденть эль эзь укснозеве. Голландкась умок явась, почкось-трубась апак пекста, кудосонть якшамо — пине врады, чинесь кирьгапарьс эци — махоркань, ченьксэнь, ливезень; кува понгсь ёртнезь нулат-валат, апак тенсе киякс, апак шля кедьгетнеде, секень вант, лондады стуворось... Каня, Инешкипаз, истямоль Кулянь эрямо кошозо? Истямо «уряд», истямо «ваньксчи» [186] кирдсь? Совамсто лиясто пелезевилить — мелькть илязат кадо. Ней? Чинеденть куш судот лепштик, седееть човоряты. Ды те, ловт, чис-омбоцес. Мезекс тееви икелень горницясь седе тов?
Неинзе Люба-Любине кува понгсь пракшнозь, корнозь удыцятнень ды эзь кирдеве, сорнозевсть кежтнеде мазый эчке турванзо. Якстерьгадсь аламнеде пизьгатаев ашо киське келей чамазо.
— Аволь ломанень пона, верьгизэнь ойме! — рангстась весе вийсэнзэ, натой цийнезевсть суликатне, ды кундась ноцковтнеме сиведе кургонь автезь удыця Ванинень. — Визьксэть дух арась, идемевсь, весе симик! Скалот-реветь велеванть якить, тон тезэнь притон теить! Аволь ломань — кискань седей! Аватькак шкадо икеле тов ильтик, баяга пря. Панжить каракшот, варштак, кить вакссот, кинь каванят?!
Люба-Любине содась: валонзо, кода стенас кснавт. Ванине, виде, корномадо лоткась, панжинзе сельмензэ. Чатьмонсь. А мезть тензэ ёртнемс валт эсь превсэ улдистэнзэяк, апак симе улезьгак, ней уш кортамскак а мезть. Марямо иля учо. Ялатеке ацирьгадомадонть авась кодаяк эзь лоткаво, вересь эйсэнзэ яказь якась.
— Иля нарьга скалонть лангсо! Сонзэ мезень чумозо? Миик киненьгак! Мелявксот а улить. Мейле глохтяк куломазот. Стяк, ратаж, стяк, андыть азё ракшатнень! — Люба цюх сельгсь кияксс, велявтсь, пилысэнзэ панжинзе кенкшенть ды Барсадизе лисемстэ виень путозь.
Сась телень од валске. Валдось стамбарнэ, апак капша, чатьмонезь вецакавтызе венть чоподачинзэ. Седе неявиксэкс теевсть ушосонть каршо кудотне, икельгаст чувттнэ, пирявкстнэ. Курок ашолгадсь допрок. Мартонзо састь од мелявкст. Эрьванть сынь эсензэ. Сюракшнень таго сась теке седейризксэсь: косто муемс потявтыця. Пекесь, сюкпря, зярс а урны. Люба-Любинень каявт тикшесь эзь прядово. Порть. Симемась вана сась. Одароськак тороземсь. Чамдомаль. Кие? Кие течи тейсы? Учось талай. Арсесь-тейсь, сась мельс снартомс теемс исенцекс. Ёзась-ёзась сюросонзо — нежесь, кецневтизе, кальдерьк-беньк прась. Кенкшесь кы-ырк панжовсь келес. Мольть, ков мелеть. Весе китне икелеть. Икелеть ды... Содавикс яннэванть исекекс ютась асфальтонть лангс. Эзть кадово реветнеяк. Варштась верде витев: тосо кавто кудонь трокс, эрить Бозань, Люба-Любине. «Исяк содавтнинь, лездасть, сюкпря тенст», — тейсь эстензэ тешкс.
[187] Варштась кершев: ловсо ацазь кинть кавто ёнга кудот.
«Ютан эйстэнек керш ёно эрицятнень пелев, паряк, кияк икельгаст ютамсто редясамам-вастсамам», — сась мельс Сюракш, ды сыргась стамбаро, тей-тов варштнезь, куринканть кувалт. Мольсь-мольсь, пачкодсь Сёвонень видьс. Сынст каршо, пештешка мазый кудынесэнзэ, эри Сезьганонь Ольгай. Ломанесь, лангс ванозь, алкине, куянь сталмо, мезде ней ламот майсевить, васняяк, аваломантне, а кандтни. Сизьгемень малава тензэ. Те лангс апак вано, яки-эвти мерят од тейтерь. Дошуз сырькаесь! Лиякс а мерят. Чинек-венек, зярс модась а копачави ашосо, пирестэнзэ а лисни: чупони, кочки, види, путы, валны, леди... Свал тевсэ. Секскак, мезе эрявкшны шабратненень, сонзэ ули. Тень-тонань вешеме ломаннень а яки. Мекевланг, сонсь лиясто кой-мезе, кадык кавтолдозь, кази. Теде башка, эсь «хозяйствазонзо» канды-уски весементь, мезе понги, мезе маштови, лиясто мик а маштовияк. А стяко куринкань эрицятне мерить тензэ Трямка, кой-кить аватнестэ, сельме удалга, — Штерине. Истямо сон ломанесь: эсензэнть, кода кортави, а менстясы.
Вешницясь, ули валмеревкс, аволь свал мукшносы ёмавтозенть. Тесэ лиссь мекевланг. Сезьганонь видьс пачкодезь, Сюракшонь каршо лисьмалангс лиссь телекс оршазь Ольгай сырькаесь. Лангсонзо «кезэрень» фуфайка, прясонзо понань лембе паця, пилысэнзэ «кеверькайть». Путызе ведранзо лисьмалангс. Скалонть марто кортазь, тензэ пшкалезь, сыргась каршонзо.
— Я, тон ков истя сыргить, раужкай? Аволь монень? Марсинь майсевемадот... Ага. Исяк, келя, Люба-Любине одарот чамдызе. Течи, лиси, монь чиполась? Адя, адя, боярава, потявттан... А ёвтасак, пе зярдояк ули-арась гуй ведентень? Сынсь, лытагайтне, а коськенить, майсевить, нарьгить тонь, андыцяст лангсояк. Мезень чумонк, ракшат? Ну, адя, адя, превакш, идетян... Ага.
Ольгай ведень таргамо эзь карма, покш кистэнть яннэванть панизе скалонть эсензэ пирес. Ливтсь-нуртясь плита лангсто ведрас — лембе ведь, нардамо, озамо таркакс путсь прянзо лангс велявтозь чаво ведра. Озась. Ервалдызе одаронть, нардызе ды кундась потетнень ноцковтнеме. Умок, допрок од шкастонзо Ольгаень авазо кирдекшнэсь скал, кирдекшнэсь, кадык аволь кувать, сонськак. Ды зярдо те ульнесь?! Стувтовсь уш... Кедтне аволь, сеске чарькодизь, одонть. Зярс-бути савсь тонавтнемс: кода, кона видьга лепштнемс-таргсемс потетнень, цилькаевтемс ведрас ловсонть? Суртнэ, апак тонадо, сеске сизесть, ловсось [188] аволь свал понгонесь эрявикс таркас. Истя тонавтнезь-тонадозь, аламонь-аламонь чамдызе «велень скалонть» одаронзо. Сюракш мельспародонть, марявсь Ольгайнень, мукстась. Потявтозенть путызе кузтемпес. «Сан, соватса кудос», — мерсь эстензэ авась.
Панизе ракшанть покш ки лангс. Кудос ильтемензэ эзь моле. Таргась лисьмасто ведь ды совавтынзе ведратнень кудос.
Омбоце чистэ Ольгай мольсь, седеезэ эзь кирде, Дорайнень.
Понань кемсэ пильгензэ эзинзе чука. Совась. Ванине, вансы, кудосо. Ськамонзо. Мезе-бути котьми телевизор марто. Неявсь, эзь кемеве тензэ, эсь превсэнзэ. Кудонь урядось теке: кува понгсь ёртнезь оршамопельть, апак шля-тенсе киякс, апак уряда стувор, сод потсо голландка курго... Судоваряс эци качамонь ды мезень-бути лиянь чинесь.
— Скалонть марто арсят-арась мезеяк тееме? — сеске кундась тевде кортамо Ольгай. Кежтнеде вайгельсэнзэ марявсь «кшни».
— А ме-мезе? Мезе? — буволдозевсь казямосто ёвтазь валтнэде Ванине. Кадызе телевизоронзо ды кудокуншкас палманькс стясь сыцянть икелев.
— Кода мезе?! Улкоть Люба-Любине потявтызе, исяк монень Сюракшонк сакшнось, течи, секень вант, Врачихантень пачкоди. Ага. Ванды? Кайсить течи тензэ, андык, симдик? — цянкаесь Ольгаень чова, ванькс вайгелезэ.
— Арась, — вановтонзо Ванине педявтызе сялгоницянть чамас. «Тонь кодамо тев? Кие тей тердинзить? Кинень эряват?» — кортась сон.
— Вант вана... «арась»! Тон каня, цябай пря, а чарькодят мезе теят ракшатнень марто?! — сырькаесь эзь кирдеве, «нолдынзе пинетнень», мик рангозевсь. Сельмсэнзэ киштезь киштсть пиций сяткинеть.
— Ме-мезе теемс? Ёв-ёвтык... — мик тандадомань ёжо ютась Ванинень пачка. Тандадат небось! Кавксть алкине, ахоли кедьсэнзэ, эци эйзэть прок кажварч, анок сезнемс.
— Миема! — сялгозь сялгизе валонть апак терде «инжесь».
— Ко-кода? — сельмсэнзэ кончнезь, кевкстизе Ольгаень.
— Истя! Кода весе!
— Те ко-кода, «кода весе»?
— Истя! Ёвтнек, вельсоветс мольть. Люба-Любанень пшкадть. Сон соды, кие мейсэ лекси велесэнть. Миньгак келенек а сусксынек, ага, — седе сэтьместэ, псинзэ матразь, кедьсэнзэ апак ахоля, превть макссь валске марто яксицясь.
— А содан. Ютак Эрьмезьвелев, базаров, кевкстнек, — мерсь Ольгай ды чинеденть лепштизе судонзо эсензэ кодавт ашо понань варьгасонзо.
— Ви-виде. Миема, — пачкодсь, ве мельс сась Ванине аванть марто.
— А содан мезть шканть таргсят, — прясонзо тей-тов кайсезь, келемтинзе кедензэ Ольгай.
Совамстонзо Сезьган Ольгай рединзе кудыкеле комавтозь алюминиень тазанть ды фляганть. «Хозяйствасо эрявикст кедьгетне, паряк, кодаяк...» — содавтызе мелесь, — кода кортыть, «куй железо, пока горячо».
— Тонь тосо, кудыкеле, сельмень икелев понгсть алюминиень таза ды фляга. Ага. Мезекс ней тонеть? А мисыть монень, а? — маштозь вайгельсэ, мизолдозь пшкадсь Ольгай икелензэ апак сыргсе аштицянтень.
— А мезекс, ме-мерема, — кавтолдозь-арсезь, ёвтызе мелензэ кудо куншкасо аштиця цёрась, — зя-зяро кисэст максат?
— Иля пеле, а манятан, пандса. Сестэ эно кандыть тень чокшнеланга. Тевесь ули теезь. Ага, — кармавтозь мерсь сырькаесь, велявтсь ды эскельдясь кенкшенть ёнов.
— Па-паро, тейса, — каятотсь лисицянть мельга.
Чокшнестэнть Ванине прянзо Ольгайнень эзизе невте. Ков,
кува, кодамо «масторга» ветсизь чеядавксонь танагайтне, кодат тевть яксевтсь, ансяк сонсь содась. Сась кавто чинь ютазь. Валске, чоподава.
— Ольгай патяй, идемак, ку-кулан, кандт куш зярояк, — энялдсь, аноколь кияксонть паламс содавикс ормадонть, симевксмейледенть эсь прянть идемга. Сакалонзо апак нара, валдо черензэ шапканть алдо новолезь-сравтозь куртка сивенть ланга, сельмтне чистэ-чис симемадонть позакадсть, седеяк теиньгадсть, чамась таргозсь. Пилысэнзэ ташто покш котат. Лов потсот. Совамсто чукамодост эзь арсеяк.
— Алтазенть кандык? Стувтык? — «чочизе» валсонзо Ольгай, эль кенерсь тона бот-бот тарчксонть трокс эскельдямо.
— Кандт, энялдан, ку-кулан, куш пет-пе-этнявкске каяк, — менчевсь, цяк эзь нирежде «витнемань» вешницясь.
— Арась. Зярс а топавтсак валот, иля учо, — содась эсензэ, потамодо эзь арсе авась. А стяко, марсевсь куринкасонть, кой-кить «пшти кельтнеде» педявтсть тензэ, Трямкадо башка, колмоце лем
— Ну, ка-а-як куш пенчке, ка-а-як, — вешсь, аноколь прамс кумажа лангс ды паламс икелензэ аштицянть пильгензэ содавикс «ормадонть» майсевицясь.
— Маримек-арась? Чийть кудостон! — сурсонзо кенкшенть ёнов невтемстэ серьгедсь верьга вайгельть ченьксэнь кирдицясь.
Прянь Сэредькс марто энялдыцянтень мезеяк эзь кадово — мурдамс кудов. Ютась пельчас малава. Кудо кенкшесь панжовсь одс. Эрязкалезь, кельме сувонть марто Ванине ютась тарчксонть трокс. Мештензэ каршо, прок ваксар, кирдсь алюминиень, ведрашкань покшолмасо таза. Паро кедьгесь! А стяко Ольгай сельме путокшнось лангозонзо. «Эряви пидемс чукшторовт, умарть-мезть — пидек, эряви чапакс путомс — путт, эряви пенчть-вакант эйсэнзэ шлямс ламо инжень тердемадо мейле — шляк, болдордт, зяро мелеть. А мезть кортамс, вадря кедьгесь», — арсезевсь, кандозенть лангс ванозь, азоравась.
— Ва-вана, — венстизе кудосто кандозенть Ванине.
Ольгай саизе, чаравтызе-ваннызе — почкодькс эйсэнзэ арась, — комась ды ций-бом путызе эзем аксялов. Видемтизе рунгонзо. Стясь Ванинень каршо.
— Косо флягась? — Ольгай сялгизе пшти вановтонзо валске чоподава злыдардицянть сельмс, учось.
— Тон-тон ну-нуртяк васня, седеем витик, — машнетезь мерсь каршо эль а кумажа лангсо аштицясь.
Ольгай суликань литрань банкасто нуртясь пельцяркине палыцядонть, каясь зняронь туро кельме ведь, човоризе сиянь пенчсэ, веркасто печксь кши печть ды венстинзе учицянтень. Кши печтенть сон эзизе нееяк, цопадизе цярканть ды апак лекстя, лип меремс, ильтизе эйсэнзэ уликсэнть кирьгапарьганзо.
— Ну-у, паро, эрян, — мельспародонть якстере покш турванзо токинзе мизолксонь кондямо, вадяшизе мештензэ. — Пештик омбоксть, энялдан.
— Арась.
— Кандт. Кандса флягантькак.
— Кандсак, карматано кортамо. Листь! Саты лёбердемс! — путсь пе пелькстамонтень Ольгай.
— Ну, кандт...
— Арась.
— Ну, ка-кадык, — ацирьгалемань пачк, тандавтнезь ёвтызе [191] Ванине валонть, велявтсь ды эрязасто, эзизе пекста мельганзо кенкшентькак, лиссь кудостонть.
... Сась тундонь васень ковось. Кулянь куломадо мейле ютасть колмо ковдо ламо. Мезть пурнакшнось-таштакшнось эрямо пингензэ перть, цёразо сравтнинзе мелявксонь апак сода ковозонзо. Теке истя эрявськак. Каня аламо-мезе эряви кудо ды кардазъютксо, пиресэ-косо? Кедьёнкст, кедьгеть, нулат-валат, лазт, кирьпецть, пенгть, ярсамопельть... Эрят — эряви. Зярыя ковтнень перть «солась», эзь неявояк, кудонть вальмало вачказь шиферэнь кувтась, теевсть пилыть кавто од флягатненень, лато ало сэдявксокс лазтнэнень, тусть та-ков сянгтне-койметне, пелюматне. ... Натой кавто ведрань покшолмасо содов чугунтнэяк ков-бути ношкстасть!
Кавто флягатне «граммонь» питнеде, содави, пачкодсть Сезьганнэнь. Ольгай лия шкасто самстонзо вешизе-саизе пивтемпарентькак. Скал а кирди. Сеязояк арась. Мезекс саизе, сонсь а соды. «Маштови» — сонзэ вечкевикс меревксэзэ. Паряк, арси, ушоды велеванть якамо, ды кинень эряви, кие кирди скал, карми пивтеме ой? Ды а мезть раксемс! Велесэнть эзть кадово а скалт, а сеят. Ансяк вачо пинеть азгондить ды вачодонть сусконить вейкест-вейкест, ирныть кежтнеде. Теде а арси Ольгай. Пачтявтызе цяркадо, пивтемпарденть башка, Ванинень лавсензэяк. Мезекс? Паряк, сизьгемень иесэнзэ, кода сёрмадови кой-кона «пазонь» книгатнесэ, арси чачтомо?
Ёмавтнесь алясь ули-паронзо эрьва кода: кинень мезеяк пельлитрадо, кинень сядо граммадо, кинень стяко, яла мерить, мазы сельмень кис. Вай, ды мезть ледстнемс кодамо-бути чеменев коймеде эли кольгиця ведрадо, зярдо «палыця ведень» домкадояк домка морянтень вайсить покштояк покш венчть, превейдеяк превей ломанть? Вайсить а лововиця сюпавчить: фабрикат, лавкат, кудот... Вайсить масторт. Кияк а соды, зяро ояксчисэ эриця кудораськеть-семият каладыть «палыцядонть».
...Эйзюрков. Потмура. Менелесь педе-пес ацазь чоподасэнь тюс, алов новолезь «стака» пельсэ. Уить чивалгома ёндо. А капшить. Эсест коест. Содыть мезе теемс. Ацирьгалиця якшамотнеде-бурятнеде мейле, кадык шкань-шкань выжны вармаяк, лембе чись ливтинзе Кузвелень яксевиця, каштлангонь кирьпецтнень а ёзыця эрицянзо ушов. Тей, ванат, кияк юты, тов... Чуросто, ды киньгак неят. Тундось сон истямо, весень мукшносынзе, весень пувтасынзе-стявтсынзе пильге лангс.
[192] Сонзэ самозо рашты-сыремти кемемань ёжот икеле чинтень, эрямонь поладомантень.
Вай, те мезе?
Дырнаень, Норильскойсэ сюпавчинь теицятнень, кшнинь келей стака кенкшс понгавтозь покш буквасо, компьютерсэ печатазь тандавтниця конёв лопа. Эйсэнзэ ёвтави:
«Разыскивается опасный преступник-убийца Дораень Ванине. При себе имеет оружие. По всем вопросам обращаться но телефону...» Алга тешкстазь телефононь номерт. Истямо конёв ашолдсь неть читнестэ велень кавто лавкатнень кенкшесэсткак. «...преступник-убийца...» «Те мезень тюниха?» — вансть ды кепсесть лавтовост ловныцятне, васняяк Пичепенсетне. Кой-кить, конёвонть ловномадонзо мейле, тукшность пейдезь.
Дырнаень кенкшенть икеле аштезь, Рудик нерьгстызе вановтонзо конёвонтень ды кор газевсь марямга: «Те мезе-бути а истя», Седе тов поладынзе валонзо эськанзо: «Те мекс истя тешкстазь? Кавтолдозеват... Ванинень ёвтазь аволь Каргин фамилиязо, кода паспортонь коряс, а кудолемезэ — Дораень. Тень кода чарькодемс? Кодамо жойни прев истя сёрмады? Лемеськак... Паспортонь коряс, улемаль — Иван, тесэ — Ванине! Конёвонть, маряви, цяподизе кенкштнева аволь милиция. Кие-бути, истя улезэ, эсенектнестэ. Кие? Мезекс те весе?..»
Вансь-вансь ютыцясь, сезизе конёвонть, мендизе кавтонь кирда ды путызе потмо зепезэнзэ, безардезь ахолдась кедьсэнзэ ды поладызе кинзэ.
... Шказо чикуншка. Ваниие яла «оймси», яла кеверькшни, полавтни боканзо кониксэ. Апак кайсе. Мезекс те, кайсемась, шка зняро ёмавтнемс! Теяк: кудосонть пси а марят. Каштлангсо, зярдо уштсы каштомонть, эрси седе паро удсемс. Ней вана... Панжовтынзе сельмензэ кузтемпестэ марявикс калдордомась, чалгавкстнэ. «Те кинь истя канды?» — ювк ютась удем менчевксканзо.
Совась Рудик.
Васняяк вановтозо кивчк-кивчк ютась икельць вальманть каршо аравтозь стуворонть ланга. «Кши кочомнеяк а неяви...» — аволь мельстуиця чапине тейсь эськанзо. Эскельдясь коникенть ваксс, Ванинень сельме икелев.
— Стяк, саты корномс. Несак зяро шказо? — Ванинень сакалов чамазонзо ванозь, пеедькшнезь, весть-кавксть плестядизе ялганзо лавтов ланга. — Милиция тонь эйсэ вешни, истя улезэ, [193] пилыть чави, тон кургонь автезь удат! Стяк! Корномасот кулозетненьгак стявтсыть.
Ванине нолдынзе пильгензэ кияксс, озась коникенть чирес. Нузялдозь варштась Рудикень якстере сакало чамас, прок кевкстнесь «косто тон валгить», ды цяк эзь чиреме одс тарказонзо — поладомс сезевезь ононть.
— Тон, ме-мезе, а чарькодян, мезть бол-болдордат милициядо? — кургонь автезь ды валтнэнь синдтрезь, пшкадсь цяр чикуншкас «оймсицясь».
— Мезть, мезть... На, вант! — таргизе Рудик усксевезь курткань потмо зепстэнзэ Дырнаень кенкшстэ лутазь конёвонть, каштордозь келемтизе ды нерьгстызе «опасной преступникенть» судо алов.
— Ва-вай, авакай! Мик «опасный» ды «при себе оружие», — талакадсь ды тандадсь неезденть «преступникесь». Те ёжонть сеске полавтызе лия: «убийцанть» кургозо васня каладсь келей мизолкстонть, турванзо тетькевсть пилес, мейле раказевсь кудонь келес. — Те-те Ди-Дипломатонь тевесь! Сонзэ «кедесь», сонзэ!
— Ракат... Бути алкукс? — коникенть вакссо табуретэнтень озамсто кевкстизе Рудик Ванинень апак пеедькшне. Валонзо прядозь, варштась потолокс.
— Паро, па-паро чаво ва-валт сравтнемс, — кардызе Ванине ды тонгинзе пильгензэ вакссонзо аштиця понань кемезэнзэ, видемтизе рунгонзо. Окойники явовсь коникстэнть. — Чумом улевельгак, умок габордавлимизь. Мезть монь вешнемс? «Разыскивается»... Ха-ха-ха... — Таго стардызе ракамонь ковол.
— Виде. Улевлитькак «преступник» — кекшневлить. Стяконь конёв. Дипломатонь тевесь, кавтолдомс а мезть! Нарьгамонь кис — пельдензэ штраф, истя улезэ, бутылка, — хи-хи-хи! — дильнезевсь Важдаенсенть нильниця вайгелезэ. — Саты нузякст пансемс! Оршнек седе курок, ютатано.
— Адя, — мерсь Ванине ды оршизе эземс каязь тюжа, муськемань а содыця синтетикань куртканзо. «Озавтызе» прязонзо кедень шапканзо. — Эрь тей конёвонть. Монсь тензэ невтьса.
Дунаень эрить Дорайде ветешка кудонь экшка, верев. Шабраст — Солаень. Колмо эскелькст.
...Дипломатонь икеле рестазь модарькань пачалго, зяро-бути кши печтть, режнезь ловсодо пешксе кечине. Ярсы. Авазо мейсэ-бути калдорды-котьми моргасо-кавсо. Маряви, мандонесэ чаравтозь шли саразнэнь пидемс модамарть. Умок кекердить, [194] морыть урозонь морост. Андомат. Тевтнеде кудоютксо-косо — зяро черть прясот. Варчик теемс весень сеске.
— Шумбратадо, Дунайть! — кавонест совицятне ве вайгельсэ, теке кортазь, арсесть азортнэнень кенкшенть панжомсто.
— Шумбратано, сюкпря пазонтень, — каятотсь каштомикельде авань вайгель. — Ютадо.
Ярсыцясь чатьмонсь, глянк путызе пенчензэ пачалгонть чирес ды, сельме понань пачк, чирьстэ варштась шумбрачинь арендатнень лангс. Кадызь аламошкас тевест пейсалазкензэяк.
— Ютадо, — Шурикак мерсь мельде-валдо. — Озадо мартон.
Апак учонь инжетне неть валтнэнь учостькак. Казямосто ёвтазест лангс эзть вано, вырновтнизь курткаст-шапкаст кенкшенть вакссо коник лангс ды лодорк озасть тердицянть ваксс. Вачодонть верьгизэкс урныця пекетне омбоце тердема а вечкить.
— Авай, кандт мезеяк, инжеть састь! — серьгедсь аванстэнь Дипломат.
Ванине стясь, ютась, муизе каязь куртканзо ды зепстэнзэ таргизе раксемань, кода тенст Рудик марто марявсь, конёвонть. Ютась стуворонть ваксс, тарказонзо, ды, стядо аштезь, келемтизе, — кадык ловносы! — Дипломатонь сельмензэ икелев.
— Те-те тонь тевесь, видькстак! — серьгедсь Ванине конёвонть аламос сельме икеле кирдемадо мейле. — Тонь, тонь! Видькстак. Путт бутылка!
— О-о-кр, — киргакстсь цёрась, сеске эзь муе мезе меремс ловнозденть. — Тынь мезекс монь ловтадо? Пильгень путницякс? Берянь. Ялга лангсо истя казямосто а згилякшныть. Бутылка... Тынсь муеде. Тынь монь покордымизь. Тыненк путомаяк.
Окся, Дипломатонь авазо, допрок сормсевезь, истяяк-истяяк «латкинесэ» керсевезь чама сыре ломань, путсь икелест покш кастрюля — «мундирсэ» пидезь модамарть, кандсь сал, рошксень копша, пеель. Весе ули, а вана бутылка — арась.
— Ванине, тон, истя улезэ, ютксонок весемеде одось. Чийнек уш, — превть макссь Рудик, — ды седе курок, милицият ва илидизь каподе! — Хи-хи-хи! Ютак азё.
— Виде, виде, — ярсамсто, кургсонзо чевелязь, кемекстынзе ялганзо валтнэнь Дипломат. — Аволь монь, тонь вешнить. Ютак, ютак, тувталтомо вешнеметь авольть карма.
— Ага! Мо-монь покордымизь — мон путыцясь. Истя а туи, — пря эзь максо, чеченанзо стявтынзе Ванине.
— Истямо стувор ды коськстэ... А лади, а лади, — сялдызе [195] Рудик Ванинень а молемань мелензэ. — Пазось, истя улезэ, а чарькодьсамизь...
Мезе теят, сави молемс.
Цёратне кармасть учомо. Савсь, сюк-сюк, а кувать. Комсешка минутадо аламо. Мезе эрявсь, Ванине муизе. Явизь кандозенть колмов, глынкадизь ды кундасть лазновозь, почаня модамартнес. Рудик какаря кедьсэнзэ саизе весемеде покшонть, ваткизе ды, салс токавтозь, сусксь эйстэнзэ, зяро кельги кургс. Сусксь кши печтьстэнть. Чарькодсь, истямо ярсамось — апак ватксе модамарть — войнадо мейлень, вачо шкань ярсамо. Ды ков молят, сялдомо а кармат, сави чатьмонемс. Каня мерят — котлетат рестадо.
— Умо-о-ок эзинь ярсне эчке салнэсэ почодозь модарде, тантейть! Ансяк вана... Дунаень цёра-парочи, паряк, тонськак, истя улезэ, костояк сокардат зярыя петнявкскеть, а? Седеяк тантейгадовольть, — эзь кирдеве, цихельдезь ёвтынзе потмо валонзо Рудик.
— Паро ялгат, — нилизе кургс саезенть ды мерсь тень каршо стуворонь азорось, — мартост тукшныть неть «петнявкстнэнь».
— Минь, тюк, кандынек. Ней тонь дёпось, — содась текень, лепштясь, ней уш апак пеедькшне, Важдаень Рудик.
— Арась, алят, монь «утомом» чаво... Кие, алкукскак, рисовизе те конёвонть? — ютась Дипломат кортамонь лия лувс.
— Киньгак велесэнть, школадо башка, компьютерэзэ арась. Маряви, те тевенть теизе кияк ошсо эрицятнеде. Тосо ней, шанший ошсонть, малав весе велесь эри. Ламонь компьютерт. Муить азё, кить печатызь ды педявтнизь кенкштнева-кува.
Дипломат ды Рудик ламосо молить ве ёнов. Васенцесь седе од, машты лаужа кельсэнзэ пуло алга ведень валомо. Машты симеме. Толс а эци. Рудик салава, тошказь ды мизолдозь кортыця. Потмозот сови, а редяткак. Чевтинестэ кортазь, сон мукшны кой-кодамо ярсамопельгак. Чопода тевс а эцни. Сон «ванькс ойме». Лиятне «чоподатнень» тейнест, аволь сон. Сонзэ тевезэ — невтемс ёнкс, ёвтамс, ледстямс. Ярсамотнеде... Течи косояк топодемазонзо трески, мейле, ванат, чи-омбоце, мик колмоцеяк, паморькс кургозонзо а каи. Косто каят, а понгиндеряй? «Верьгизэсь — яла мери, — тарго, лиясто омбоце мезеяк а суски — цидярды, эри. Мезе мон?» Вана истя, верьгизэкс: а ярсамот-симемат, а кудот-чить, а шлямот-парямот... Эри ломанесь лемезэ. Секс ведьгемень иень, аволь эрязь, ютавтозь, вить пильгезэ а кунсолы. Эль якави. Умок уш кадызе таргамонзо, [196] ках-ках, ках-ках козы макшов атякс. Кода илязо уле, сиведьсызь мезеньгак тееме — котьми, мерезенть тейсы. Пандомат? Питне? Теде а мезть кортамс, питне а аравтни, — улезэ «стопка» ды мезеяк кургс. Абунгадат, кода а венеми, а врады истямо лувсо эрязь.
...Шалнозь-эльнезь, руцянзо-пацянзо полавтнезь, ютась, морынзе моронзо тундось. Ды вана уш, эзь марявгак, прядовома маласо мелявксто тыц пешксе кизэськак. Умарьковось — сёксентень вальма. Те ковонь маней валдо вейке чистэ Кузвелень петнева ютась апаро куля: вирьсэ, Пичепеде вайгельпешкань тарка, мусть ловажас наксадозь аваломанень кавто уловт, седе виде — камбразт. Ловажат ды прячерть. Беряньстэ-вадрясто ванстовсть оршамопелест, часост, эрьгест-мезест, турвань ваднемкаест. Милициятне кундасть Кузвелень, васняяк, Пичепенсетнень, эрицятнень «сувтнеме». Мучкасть, кевкстнесть, ванность. Эзизь стувто, вакска эзть юта овсе виренть ёжосо эриця дачниктнень вакскаяк. Зярыяксть совсесть Художникентень. Кие тень теизе? Кие эскельдясь паро койтнень трокс?
Те апаро кулясь талай лытась велеванть. Мезе-мезе, истят «начко тевде» кортамот Кузвелесэ эзть марсеве. Сынст сравтнизь ды теке марто виевгавтызь газетатне, «сэнь сельмесь», радиось. Велень эрицятненень тамашакс марявсь: ламот якасть вирень се таркаванть, вирень келей кистэнть комсешка эскельксэнь туро — кие тунда килей ведень «потявтомо», кие пангс, кие коське пештинень вешнеме... Ялатеке пельиеде икеле маштозетнес, модасо эль маразь уловтнес кияк эзь эртеве. Паряк, ульнесть некшницяткак ды чатьмонсть. Эрси истяяк. Ёвтат, кармить милициятне певтеме тердтнеметь, кевкстнеметь, шкат сайнеме. Ломантне а вейкеть, эрьвась эсензэкс арси-теи.
Шкань ютазь ялатеке «пештесь лазовсь». Тундонь ушодовомсто кенкшка-кува педявтнезь «преступникте» яволявтыця конёв лопатне ульнесть аволь эсь юткова згилямкакс. Аволь. Паро, вейкень эйстэст — кода эзизе ёрто голландкас? — Ванине ванстызе ды зярдо састь кевкстнемензэ, истяко, тевень аразде, невтизе милициятненень. Сетнеяк пейдезевсть, зярдо ловнызь менчевезь-пуворязь шукш конёв панкскенть. Вейкесь эйстэст, те лангс апак вано, вадяшизе-витнизе ды путызе, ламонь апак корта, папкас. Мезекс — сонсь содась.
Мейле, ламо шкань ютазь, минень-сюнонь анализтнэ лездасть те конёвонть вельде лисемс, а кемевияк, оймень саицятнень эйс.