Ваче син (Миронов)
| Ваче син Автор: Александр Сергеевич Миронов |
| Источник: Кенеш : журнал. — 1930. — № 13-14. — 41-53-тӥ бамъёс. |
Корепанов, ужзэ быдэстэм бераз, ог куинь час заседаниын пукыса, жадьыса, кунокуалаз бертӥз. Аслаз висъетаз пырыса, дӥськутсэ кылиз мараз но, лыз конверт вылын бадӟымесь букваосын солэн нимаз гожтэм адрес книгаос пӧлысь син азяз мыриськиз. Туж дыртыса, оло шумпотса, оло куалектыса, Корепанов лыз конвертэз бадӟымесь чурыт чиньыосыныз кесяз. Кык лист бумага вылын туж ӵемен кык палаз ик гожъямын. Пукон басьтыса, пуксиз со интыяз. Нырысь ик гожтэтэзлэсь пумзэ учкиз.
— О-о, Маруся, вуж тодмо мурт, ышем мурт гожъя, — пумен тамак кыскыса, ӧдъяз лыдӟыны гожтэтсэ.
— Ӟеч бур, гажано эш! — кутске гожтэт.
Кӧня тол, кӧня гужем асьмеос ӧм ни адӟиське! Мынам улэме-вылэме сярысь оло тон вунэтӥд но ни? Ну, номыр ӧвӧл. Вунэтӥд ке, та гожтэтэн мон асме ачим тыныд тодад вайыто.
Нырысь ик, мон шоры тынэсьтыд умой-умой учкымтэдэ чакласько ке, туж мӧзмыт луэ. Веть асьмеос эшъёс: зэм ӧвӧл-а? Нош эшъёслы одӥг-огзэс вунэтыны нокыӵе право ӧвӧл. Соос одӥг-огзэс вунэтыны уг быгато. Мар понна мон тонэ матысь эшеным лыдъясько? Марлы та гожтэтэз, мукет муртлы гожтытэк, тыныд гожтӥсько? (Нош акыльтӥсько ке, меӵак вера, большевик сямен со луоз). Тон мыным улыны, нюръяськыны, пуриськыны кужым пельтӥд. Соин, нырысь ик тон мыным матысь эш луиськод, соин мон тонэ нырысь ик яратӥсько, ява. Мыдлань верасько, яратӥсько шуыны уг тупа, гажасько шуыса шонергес луоз дыр. Тонэ тодытозь, вань пиос шоры мукет синмын учкылӥ. Нылкышноосыз пӧясьёс гинэ луо шуыса, малпаськылӥ. Табере оски: тӥ пӧлын но усто пиос вань. Асьсэлэн огшорыесь гинэ кылъёсынызы улон шоры мукет синмын, вань шуг-секытъёсыз вормыны вылысь учкыны соос быгато.
Тодӥськод мынам кужмы куд мында вылэм! Огнам улыны уг быгаты шуыса веть чакласько вал! Нылпиосы, монэн гинэ кыльыса, бырозы шуисько вал. Огнам кыльыса, оло ачим но шонер сюрес вылысь кожо кожалляй. Соиз но, таиз но ӧвӧл. Ог кылын вераса, мон быдэсак адями! Ачим ужасько, общественной ужез но нуисько. Нош кызьы мон та дырозь асме ачим тодытэк улӥськем!
Корепанов тамак ӵынзэ бугыр-бугыр поттыса, папирос пумзэ пепельницае курткиз но, гожтэтлэсь ог интызэ синмыныз чаляк ортчыса, мукет азьзэ каллен лыдӟыны кутскиз:
— …Одӥг марке гинэ мыным уг тырмы али. Мон татын чылкак огнам. Театрын, кинойын, паркын, кар сьӧрын пыжен — ваньмаз огнад. Тон сое син азяд но пуктыны уд быгатӥськы — кыӵе со мӧзмыт! Кыӵе секыт! Пыжын музэн, инкуазен матэ кариськиськод ке, уката но со кыӵе на?!! Пыжен ветлыны мынам сезонной билетэ но вань.
Шутэтсконо нуналам ӵукна ик пыже пуксьыса, кар сьӧры потӥсько. Отын ӝытозь. Вож потэ шурлы но. Пияла кадь, чылкыт ву. Куд дыр каллен гинэ тулкымъяське. Нош тон лапак огнад… Мыл потытэк полысъёсын полысъяськод. Тон но мынам вӧзам ӧвӧл. Азьвыл мон одӥг эшеным коть кытчы ветлылӥ. Со мыным малпаськыны люкетыны кутскиз, али огнам ини.
Кинэн ке тодматскыны — кышкыт. Тон татын ке луысал, кыӵе умой луысал, одӥг минутэз но юнме ӧй быдтысалмы, мар сярысь но ӧй вераськысалмы! Веть тонэн коть мар сярысь вераськыны луэ. Тонэн вань ултозь-вылтозь ветлыны луоно.
Табере, одӥг сярысь вераськомы на: мон тыныд гинэ коть мае гожъясько, эн серекъя монэ. Тон кадь, умой эш ӧй шедьтылы, азьланяз но тон озьы ик умоен кылёд шуыса оскисько.
Мынам тодэм потэ: политика ласянь кызьы улэ тӥляд кар, завод — тон но, дышетскиськод-а? Строительство кыӵе мар, мынэ? Бадӟымесь юртъёс лэсьтыны кутскемын вал — соос кыӵе мар? Вакчияк вераса, коть мае но тодэм потэ. Тодӥсько, тынад ужед трос. Озьы ке но, ог час мыным висъяны курисько.
Тон оло кыӵе ке чебер нылэз яратӥськод но, мон тӥляд куспады пырыны уг туртскиськы. Тон мыным музъем вылын улӥсь адямилэсь бадӟымгес, тон мыным — сюрес возьматӥсь кизили. Гожты.
Маруся.
Корепанов, гожтэтсэ лыдӟыса пумаз вуттӥз но, сое умой-умой бинялтыса, азьло интыяз, конвертэ ик понӥз. Собере, выдӥз чурыт валес вылаз шутэтскыны.
Туннэ ортчем ужъёсыз чакланы лыдъяны, чотаны туртскыса, йырысьтыз нокызьы но уг быгаты палэнтыны Марусялэсь гожтэтсэ. Тулэн кадь, тулъясько солэн йыраз Марусялэн гожтэтъёсыз. Соин ӵош ортчытэм дыр, кенешем син азяз туннэ кадь пуксе. «Тик, так, тик, так!» — шуыса мынӥсь борд бордын ошиськыса улӥсь часлэн бадӟым маятникез ог кадь солань-талань ветлэ. Стрелкаос вить час но дас минут возьмато ини. Укноостӥ уйлэн пеймытэз кышкаса кадь пырыны шӧта.
Корепанов, аслэсьтыз малпаськонзэ вормыны быгатытэк, кутскиз малпаськыны Марусяен ӵош ортчытэм дырез, соин кенешемез сярысь.
Котырак сьӧд нюлэс борд кадь сылэ. Ӟыгыр тыре ӟыгыртыны быгатонтэм, зӧкесь пужымъёс данъяськыса кадь сыло кызъёс пушкын. Ичиен-ичиен гинэ адскыло ньылпуос. Бадӟымесь пужымъёслэн йылъёсазы тӧлъёс шудыса ветло. Кужмо лыктӥсь тӧл нюръяське пужымъёслэн, мукет нюлэсъёс сярысь, вылэ ӝутскись йылъёсынызы. Чиктыны сое туртске тӧл: азьлань мыныны вольыт мед луоз сюрес, юмшаны нокин люкетӥсь медаз луы. Сю аръёсын пужымлэн люкам кужымез уг сётскы сильтӧллы. Ж-жи и-у-у! вольтчыса кошке тӧл. Шимес нюлэсын калык ӧвӧл дыръя, кужмо сильтӧл дыръя.
Отын пичильтык гинэ чылкыт инты. Со интыысен, укно кадь, нюлэс корамын тымет вылэ. Чылкыт пиялаен кисьтаське тыметысь ву тӧлтэм дыръя, вырӟылытэк пукыкуз. Кык этажъемесь вылесь кык коркаос данъяськыса кадь сыло чылкыт интыын. Отын нош ик кӧня ке пичиесь юртъеръёс вань на. Юртъеръёс зор-кот улын гужаса вуымтэ на: ӵужалэсэсь. Люкен-люкен ветло коркаос котырын калыкъёс. Каллен, мылыз потытэк ваське салкым. Шунды бур пала чукинскыса, гордэктыса ваське нюлэс сьӧры.
Ӵаш карыса, одӥг-огенызы шудыса, васько калыкъёс тымет дуре. Вань кужмыныз бызьыса Маруся яр уллань васькиз но, выль пыже пырыса, кужмысь донгиськиз яр дурысь. Со пыже пуксьыны медӥсь куинь мурт пӧлысь огез егит пи пыжез кутыны туртскыса, пыдесыныз ӵоже вуэ пыриз.
— Э э-э, с нос-с ом! — пыжын сылыса, солань-талань шонаське Маруся. Бур киызлэсь пӧлызэ ныр йылаз поныса, солы «нос» возьматӥз.
— Пиосмурт! Нылкышно тонэ вормиз ук!
— Нюлымтэ кунян!
— Пӧрмымтэ!.. — кылӥсько куараос яр дурын серекъяса сылӥсь калык пӧлысь.
Умойтэм лась, «ӵукынаськем» пилы. Оло мар ас понназ нукыртӥз но, йырзэ ошыса, вуж пыже, мылыз потытэк, пыриз.
— Калык вужысь выле потэ, нош тон, Иванов, выльысь вуже иське! — нош ик сое серекъязы на.
Маруся, пыжаз пуксиз но, полысъёссэ интыяз тырыса, пыдъёсыныз пыжлэн букояз пыкъяськиз. Кужмо киосыныз кыске полысъёсыз. Гыаса котырак кульчоен-кульчоен вӧлме чус пукись ву. Нош ик Маруся ӵӧлтӥське полысъёс вылэ: кыдёке чыжтӥськыса кошке пыж. Озьы шудыса, Маруся кӧня ке азьлань мынӥз но, шибыса ик берыктӥськиз.
— Ӵош кошкомы! — солэн пумитаз пыж шедьыса, Ивановез бышкалтӥз Маруся.
Яр дурын возьмась куинь эшъёссэ Маруся пыжаз пуктӥз но, дыртытэк полсаса потӥзы тымет шоры.
Гордектыса пумен улэ но улэ ваське гужем шунды… Солэн берло югытъёсыз ышо тымет вылысь. Пияла кадь, вольыт сылэ тымет ву. Ӝыт салкым каллен ваське. Ву вылысь салкым ӝутскыса, лумбыт пӧсям мугорез умой каре. Пичи чорыгъёс ву вылын тэтчаса, дырын-дырын азвесен кисьтасько. Тыметлэн ог пал дурысьтыз шашы, бадьпу арама дораз ӧтьыса кадь учко тымет вылтӥ дыртытэк мынӥсь пыжъёс шоры…
Ву вылысен шуккиськыса, чузъяськыса кошке азьпалан мынӥсь пыжысь гитаралэн куараез. Гитаралэн шулдыр гурез вӧлме ву вылтӥ. Корепанов, пыж дуре пуксьыса, кутскиз соин шудыны. Шудэмъяз пумен кырӟа:
«Пионеръёс жуго но
Барабанэз жуго.
Пересьёс ӝушто но
Гур вылын ӝушто».
Чылкыт куара гитаралэн куараеныз пужыятӥськыса, ву вылтӥ котырак вӧлмыса кошке. Гитаралэн но Корепановлэн куараез пӧлы арган, ӵажак кеськыса, аслэсьтыз куаразэ будэтӥз на. Корепанов струнаосыз чиньыосыныз бичаса, арган куаралэн юрттэмезлы шумпотыса кадь, уката капчи мылкын кутскиз:
«Туннэ шутэтскомы,
Ӵукна ужаломы.
Планэз быдэстомы,
Тушмонэз чигтомы…»
Гитаралэсь вань струнаоссэ шуккыса, йылсас аслэсьтыз поттэм такмаксэ. Арганчи но соин ӵош ик арганзэ кесьыса будэтӥз на гитаралэсь куаразэ. Собере, йырыныз Корепанов шонтӥз но:
«Туннэ шутэтскомы,
Ӵукна ужаломы.
Планэз быдэстомы,
Тушмонэз чигтомы…»
Ваньмыз пыжын пукисьёс кырӟазы. Пӧртэм куараос арганлэн но гитаралэн куараеныз сураськыса, вӧлдӥськизы чус омыртӥ. Шур со палась бадьпу арама но шашы шулдыр кырӟам куараез кылскыны уката но шыпыт кариськизы кадь. Полсамысь дугдыса, пыж эрказ кӧня ке мынӥз на. Пыжлэн бер палаз вулэн гыамез паськытаса но паськытаса вӧлме. Пукись вуэз вырӟытыны быгатытэк азьланяз ыше.
— Ваня, туж мастак тон такмакъёс кылдытъяны, — кырӟамысь дугдэм бере вазиз Коробов, интыысьтыз султыса.
— Со ке мастак ӧвӧл, парсь но горд ныл ӧвӧл, — огез пыжын пукись итӥськиз.
— Тон нош вуэ коланы мастак-а, Коробов? — Корепанов пыкиз Коробовез.
Коробов улӥ ымдурзэ педпала карыса, золтӥз но, мар шуыны тодытэк, йырыныз шоназ.
— Мон чиньыеным ӧй возьматы, фамиллядэ гинэ верай, фамиляез вераны луэ, чиньыен возьматыны уг, — Коробовлэсь шудэмез валатэк, вожзэ поттыны кутскемез шӧдыса, кутскиз шонерскыны Корепанов.
— Басьтэ тӥ пӧлы милемыз, — Маруся пиослэн пыж дуразы кутскыса, аслэсьтыз пыжзэ дугдытӥз.
Ӝуась чагыр синъёсыныз Корепановлэн гитара шораз учкыса, Корепановлэн ымныр шораз воштӥз. Корепановлэсь, эгыр кадь, сьӧдэсь синъёсысьтыз шӧртчизэ, тыр улон шокамзэ соку ик лыдӟиз Маруся. «Синъёсыныз ик кыске бордаз», — малпаськиз. Мугорзэ учкыса, солэсь ёзви кужым ласянь зол луэмзэ но лыдэ басьтӥз на. Ваче син учкыса, синъёссы кужмо нюръяськизы соослэн. Нокудзы но сётскытэк, пыжлэн ог пала шонтӥськемез соослэсь ваче син учконзэс висъяз.
— Тӥ но по социалистически пуксиллямды, ваньмыз нылкышноос гинэ, — Марусяез исаз Корепанов.
— Нош тӥ кожаськоды нылкышноостэк социализме вуоды?! Митэк тӥ кулоды! — соослэн пыжзы борды нош ик кырмиськыса, Маруся шуиз.
— Вае воштӥськомы! — Корепановлэн таза куараез шуккиськыса кошкиз ву вылтӥ.
Маруся бур синмыныз Корепановлы кырмыштӥз но, гитаразэ эшезлы сётыса, Корепанов пуксиз нылкышноос доры. Пумен мукетсэ пыжез донгиз киыныз. Пыжъёс висъяськыса, отын пукисьёс одӥг-огзэс серекъяса, кошкизы мыд-мыд пала.
Корепанов пыж бере пуксьыса, руль интые кутӥз кияз полыс. Полсан куспытӥз Маруся учке солэн синмаз ӝуась синъёсыныз. Чылкыт тӧдьы кофта улаз золтӥськемын гадьёс. Соос, шокамезъя, вылэ ӝутско, я лэзько. Вакчи ӵышкем сьӧд йырси пушкысьтыз йырсыныз пичильтык гинэ тӧдьыяк адӟиське.
Корепанов пыж пыдсысь вуэ колӥськонтэм понна, пыд пыкет учкыны мыкырскиз но, синъёсыз Марусялэн, вӧлэм кадь, муспотонэсь пыдъёс шораз ог вадеслы дугдӥзы. Тӧдьы чулкаос тач-тач золтӥськемын пыд кӧтъёс вылын. Умойтэм потӥз Корепановлы пыдъёс шоры кема учкыны. Ӧжыт ӵыжектыса, синъёссэ Марусялэн гадь вылтӥз нош ик ортчытыса, ымныр шораз выжтӥз.
— Мынӥськомы! — умойтэмысь поттон понна, Корепанов вань кужыменыз полыс вылэ чӧлтӥськиз но, пыжез, шудон чачаез музэн, ваменак берыктӥз.
— Э-э, товарищ, милям но кужым вань, — Маруся Корепановлы ӧч карыны туртске. Полысэныз кутскиз пыжез ог пала берыктыны. Корепанов кутскиз возьматыны аслэсьтыз кужымзэ. Кужмогес чӧлтӥське полыс вылаз — пыж ог пала берыктӥське, вулэн гыамез пӧртэмесь кульчоосын котыр вӧлдӥське. Мукетыз тулкым азьлон мынӥсь тулкымез уйыса, кульчоез тӥя, мукетыз кульчо азьвыл мынӥсез сьӧры уйиське…
— … Иське, тон сямен озьы луэ, — Марусялэн интыяз пукыса, огшоры полса Корепанов. Озьы ке но, азьлань кужмо ӵыжиське пыж. Векчиесь полысъёс ӟукырто, куасасько.
Уйлэн сьӧд шобретэз васькемын тымет вылэ. Вылтырез умой карись салкым ӝутӥське ву вылын. Уг вырӟылы омыр. Кытысь ке нюлэскысь уй тылобурдолэн кесяськемез гинэ чус омырез вандыса кошке. Гуын кадь, пеймыт адӟиське сьӧд нюлэскын.
— Ясно озьы. Котькудӥз пиосмурт нылкышно шоры пиос синмын гинэ учке, — яр дуре вуон азьын пыжез ог пол урдсыныз берыктыса, шуиз Корепановлы пумит Маруся — Калленгес полса, яр дуре зол шуккиськомы, — каллен гинэ будэтӥз на со.
— Ӧвӧл, со мыдлань, — яр улысь тубыку, Корепанов Марусяез бур киыныз кунултӥз. — Тани ук, учкы, — солэсь паллян кизэ кияз кутыса, — чиньыосыд но огкадесь ӧвӧл.
Умойтэм потӥз вал Корепановлэн соку ик кунултэмез Марусялы. Нош солэн дӥсьтонлыкез номыр солы пумит вераны ӧз ни сёт эрик, аслэсьтыз каллен гинэ ӵыжектыны кутскемзэ шӧдӥз Маруся.
«Ярано куазь пеймыт, ӵыжектэмме уз адӟе», — ас понназ малпаськиз.
— Конешно озьы, — бер палан тубись нылкышноос пӧлысь векчи куара кылӥськиз.
Корепановлэн мугорыныз матэ кариськыса, Марусялэн мугорыз юзыр-кезьыр ваиз.
— Кезьыт ке шат тыныд? — ымныр шораз учкыса, Корепанов юаз.
— Ӧвӧл, оло марлы… — малпаськымтэ шорысь Марусялэн кылъёсыз потӥзы.
— Марлы бен?
— Тымет вылын кынмиськем лэся, — аслэсьтыз умойтэм луэмзэ шӧдыса, кутскиз шонерскыны Маруся.
— Мон тӥледлы верасько вал кынмоды, ву вылын кема улыны уг яра шуыса, — Марусялэсь сураськемзэ шонертыны юртскыны Корепанов кутскиз.
Озьы ке но, тодӥзы кыксы но: мугор нокыӵе кезьытэн юзыр-кезьыр ӧз вайы, кезьыт ӧй вал кырын. Корепановлэн таза мугорыз, пиос мугорыз юзыр-кезьыр вайытӥз Марусяез. Сое Маруся тужгес но умой валаз.
Юртъёс палан гырлыен кык пол шуккизы. Со куара котырак сьӧд нюлэскы пырыса, ышиз.
— Ойдо, пиос но нылкышно кусып сярысь вераськон, кусыпез выль сямен кутон сярысь, со бадӟым вераськон вераськомы, — Корепанов вераськонзэ нош ик вужезлы берыктӥз.
— Вераськомы но, туннэ кӧлыны кулэ ни, тӥни ук, кылӥд, шутэтскисьёсыз изьыны косо, — кӧс гинэ вераз Маруся.
Соос киоссэс кутылыса, «ӵукнаозь!» шуыса висъяськизы.
«Умой пи, визьмо вераське. Удмуртъёсыз мон таӵеен уг тодӥськы вал. Оло кыӵе сапресэсен соосыз возьматъяллязы. Собере .. ӧвӧл, коть нош кызьы ке но, со удмурт», — Маруся ас понназ малпаськыса, висъетэ эшъёсыз пӧлы пыриз.
Соослэсь висъяськемзэс, висъяськыкузы ог минут кенешыса сылэмзэс учкиз Ворончихин. Пеймыт азьын киоссэ посыса, вакчи ӵышкем мыйыксэ паллян киыныз маялтӥз но, кылыныз шлач! кариз.
— Постой! лэсьто али мон ужез, соку дыръя тодоз кызьы… — ас понназ вераськыса, со пыриз Корепановен артысь висъетэ.
***
Пеймыт уйин тылпу потэм кадь, гордэктыса потэ сьӧд нюлэс сьӧрысь шунды. Салкым, мугорез ӧжыт кынтӥсь салкым кыстӥське, ӵук омырен ӵош тымет вылысь. Салкым но васькись шуныт куспазы нюръясько. Турын куаръёс вылын шапыкен-шапыкен ошиськыса улэ лысву. Чик вырӟылытэк уло бадӟым пужымлэн улвайёсыз. Шулдыр ӵуклы шумпотыса, пӧртэм крезьёсын нюлэскын кырӟало тылобурдоос.
Паськыт тыбыро, гордалэс мыйыко мурт ладь-ладь вамышъяса, огысьтыз коркась потыса, мынэ ошиськыса улӥсь пичильтык гырлы доры. Гадь тыраз со шока чылкыт ӵукна омырен. Нюлэскысь ньылпу, пужым зын ческытэн кыстӥське. Гырлы доры вуыса, гырлы кыл борды ог куинь висьем думем гозыез кутӥз но сое кыскыса, гырлы кык пол сётӥз куаразэ. Гырлы куара бордэн сылӥсь сьӧд нюлэс борды шуккиськиз но, со бордысь берлань пезьдыса музэн пичи укноен учкись буш интыетӥ тымет вылэ кошкиз чузъяськыса.
— Султэ! Дыр вуэмын! — куинь кылъёс кужмо мынӥзы на гырлылэн куараез сьӧры уйиськыса.
Мылзы потытэк вырӟизы валесъёссы вылын гань-гань кыллись шутэтскисьёс.
Корепанов уйбыт вырӟылытэк кыллем мугорзэ, нязьылскыса, ӧжыт посӥз. Собере, укное пичиен гинэ пырись шундылэсь югытсэ адӟыса, четрак султӥз. Солы уйин вӧтамез тодаз лыктыса, сое нокызьы умой-умой радъяны ӧз быгаты. Вӧтлэн одӥг люкетэзлэн пичильтык сэргыз суредэн син азяз пуксе. Корепанов сое быдэсак пуктыны туртске. Быдэсак суред пуксем интые, солэн син азяз мукет суред адӟиське. Созэ нош ик мукетыз воштэ…
Завод… Маруся… ожмаськон… — ортчо Корепановлэн син азяз.
— А-а, шедьтӥ мон но… — уйвӧтсэ син азяз быдэсак пуктыны быгатытэк, со киыныз шонтыса, вылаз дэремзэ дыртыса дӥсяны кутскиз.
Кырын радэн-радэн султэмын шутэтскисьёс. Соос азьын шача кузьда мурт, физкультурник валэкъяса сылэ. Ӵукна зарядка лэсьто шутэтскисьёс. Дышымтэ валысь, соос мылзы потытэк посо уйбыт вырӟылытэк кӧлэм мугоръёссэс. Каллен гинэ соослэн йыръёссы паллян пала кариськыса шонерске, собере бур пала кариське. Собере, нош ик озьы… Тазэ «номерез» мукетыз «номер» воштэ…
— Татын азьлон кузёос кӧйзэс кулэстыса улӥзы, асьме ужась калыклы шедён сярысь малпаськонэз ик ӧй вал, — тэк сылон дыръя шуиз Корепанов Марусялы.
Маруся, Корепановлэн азьпалаз сылыса, солы пумит марке вераны турттэ вал но, физкультурниклэн «смирно!» командаез малпанзэ вераны эрик ӧз ни сёты.
Соослы матынгес сылӥсь Ворончихин кунэрак учкыса, ас понназ оло мар малпаськиз.
… — Ну, козяин, туннэ нош ик-а кытчы ке мынод? Кинэн? — Корепановлэн сюлмаз пуртэн бышкалтӥз Ворончихин, ӵукназэ сиськыса столовойысь потыку.
Корепанов ачиз но ӧз шӧды кызьы солэн ымнырыз, вуэм умо кадь, гордэктыны кутскиз. Пумен бур киызлэн мыжыкез зол-зол кырмиськиз. Со куспын Маруся, ӧс вискытӥ потыса, шудыса гинэ, кыксэсты ик кунултӥз. Трос вераськыны медэ вал Корепанов Ворончихинэн «козяин» шуэмез сярысь, мукет ужъёс сярысь но.
— Мыномы юмшаны, дыр асьмелэн, — небыт куараен вазьыса, Корепановлэсь веранзэ ӝыныё кариз Маруся.
— Мар ай тон туннэ ӵукнаысен ик, ноку вылымтэ кадь, ӵыжектэмын? Шат та вить нунал куспын со мында вир люканы быгатӥд? — Маруся, Корепановлэн ымныр шораз учкыса, юаз.
Тымет вылысь каллен гинэ тӧл кыстӥськыны кутскиз. Азьтэмъяськыса кадь, шонаськыны кутскизы бадӟымесь пужымъёслэн улвайёссы. Турын-куар вылысь лысву шундылэн шунытэныз, каллен лыктӥсь толэн «юиське». Инмын одӥг пилем но уг адӟиськы. Вылэ ӝутскись шунды гинэ лыз инэз пӧртэмъя. Турын-куаръёс шундылэн васькись шунытэзлы, чебер нуналлы шумпотыса, йырзэс вылэгес ӝутӥзы кадь.
— Тодӥськод-а тон мар но уг верасько асьме сярысь? — Корепановлэн сьӧдэсь синъёсаз учкыса, нюлэсэз, лентаен кадь, вандыса кошкись сюрес кузя мыныку шуиз Маруся Корепановлы. — Оло мар но кулэтэмъёс, кутысь слон пӧрмытыса верасько.
Корепанов Марусялэсь кунултэм суйзэ бордаз ӝик-ӝик карыса, йырзэ улэгес мыкыртыса, кисьтаськись синъёсыныз учкиз Марусялэн синмаз. Ог минут котыр озьы ваче учкыса мынӥзы, одӥг-огзылы номыр но ӧз вералэ.
— Сьӧрамы эскериськыса ветлӥсьёс, пе, вань.
— Ха-ха-ха! — Корепановлэн серекъямез шуккиськиз сюреслэн кык палаз сылӥсь нюлэстӥ. — Ужзы ке ӧвӧл, мед ветлозы. Ну, шуом, пукеммес адӟозы. Собере, мар соин? Шат табере пукыны но уг луы ни?! Кин, кинэн но уг пукы.
— Уг оско ук кызьы озьы, шуо, нуналлы быдэ лумбыт-лумбыт ӵош дырез ортчытыса, номыртэк…
— Медаз оске, — Корепанов паллян киыныз шонтӥз. — Мед вераськозы, кыр паськыт — тӧл нуоз ойдо.
— Со ик вань угось, тӧл нуоз, оло мар но ӧвӧлтэм ужъёс вераськыса, калык пӧлы вӧлмыто.
— Ӧвӧл, мыдлань верай: юымтэ муртлы нокыӵе макмыр уз йӧты шуыны кулэ вал…
Вераськыса мынон сямен соос ӧз но шӧдэ нюлэсэз ваменак вандыса кошкись чылкыт интые вуэмзэс.
— Васькомы татӥ, — паллянэ кожыса, шуиз Корепанов. — Отын, яр дурын пукомы, нюлэс, ву, чылкыт омыр, шулдыр отын.
Маруся солы ӧз пумитъяськы. Чылкыт интыын будӥсь турынэз лёгаса, соос васькизы уллань.
Каллен гинэ гыа тыметысь ву, солэн гыамез жальт-жальт! каллен гинэ шуккиське яр дуре. Шутэтскисьёс пыжен мыно тымет вылын.
— Правит целой страной наш народ трудовой
И не гнёт ни пред кем свою спину
Лишь как память былой старины отжитой
Запевает теперь он дубину!
Пиос бозгес куара кырӟа арганлэн шудэмезъя. Кыдёке вӧлдӥське солэн куараез.
— Эх, дубинушка, ухнем!
Эх, залёная, сама пойдёт,
Подёрнем, подёрнем, да ухнем!
нылкышноослэн но пиосъёслэн куараоссы сураськыса, тымет вылтӥ ялтраса гур вӧлске.
Кенешыса сямен, Корепановен Маруся пуксизы вӧл-вӧл будӥсь кызлэн саяз. Отын будӥсь вож турын соослэн мугоръёссылэн секытлык улазы мылзы потытэк посӥськизы. Ӝотрак чигем турын-куаръёс куараен бӧрдӥзы кадь.
— Так, давай кенешомы, — шуиз Корепанов, тамак кыскон куспаз, — со сярысь. Трос калыклэн али нылкышно шоры мыдлань учкон сямзы вань, — Корепанов Марусялэсь небыт бур кизэ аслаз кияз кутыса, каллен посыны кутскиз.
«Нылкышноосыз жалясь! — ас понназ малпаськиз Маруся. — Тон но оло кытчы кыдёке кошкымтэ дыр. Адӟомы али кызьы жалялод».
— Мар бен отын умойтэмез? Ну, шуом, асьмеос дырмес ӵош ортчытӥськомы, юмшаськом, вераськиськом. Веть со сяна номыр но ӧвӧл. Мар умойтэмзэ отысь шедьто медам?
— Умойтэмзэ шедьтэмез уг тодӥськы но, «кӧс мувыртӥ пиос калык уг ветлы» шуо ук.
— Ха-ха-ха! Кӧс мувыртӥ уг ветло! Кыӵе со вуж! Кыӵе пыкмемын!
Корепанов нош ик китыр-китыр серектӥз на. Солэн серектэм куараез котыр нюлэскытӥ, тымет вылтӥ вӧлдӥськыса кошкиз.
— Тодӥськод-а ваньмыз со мар бордысь потэ? — Марусялэн синмаз учкыса, Корепанов солэсь кизэ лэзьыса юаз.
— Мар бордысь? — Маруся оло марлы туж пыдлось лулскыса, юанлы юан пуктӥз.
— Ваньмыз со нылкышно но пиосъёс кусып шоры мыдлань учкем бордысь потэ, — Корепанов кутскиз валэктыны кызьы ӵем дыръя нылкышно но пиос кусыпез сӧрыса, со шоры пудо синмын гинэ учкыса лябесь пиналъёс вордӥськемез вераськыны. Тае вераку Марусялэн синъёсыз ӝуазы, со ачиз но шӧдытэк, Корепановлэсь паллян кизэ посӥз. Маруся малпаз: таӵе адями — выль адями. Улон шоры выль сямен учке. Нокыӵе умойтэм малпаськонъёстэк.
— Марлы ваньмыз калык та шоры тон сямен уг учкы, марлы? — Корепановлэсь кизэ кужмо кырмыса шуиз Маруся.
Корепанов солы номыр но пумит вератэк, йырыныз шонтӥз. Пыд азьысьтыз векчи ньӧрез шедьтыса, каллен гыась тыметэ сое куштӥз. Пичи ньӧр вуэз гыатыны ӧз ик быгаты. «Тӥни со мактал ик, вуж сямъёсыз, вуж мылкыдэз тӥяны секыт», — вуэз пичи ньӧрлэсь каллен гыатыны кутскемез шоры возьматыса Корепанов Марусялы.
— Да-а! — нош ик секыт лулскиз Маруся.
Трос малпаськонъёс пыризы Марусялэн йыраз. Огез малпаськон мукетыныз воштӥське. Быдэсак азьвыл улон сюресэз солэн син азяз. Тамак кыскись муртлэн кема тамак кыскытэк улэм бераз тамак кыскыса йырыз поромем музэн, солэн йырыз поромыны кутскиз. Быдэсак мугортӥз пӧсьву кисьтӥськиз кадь. Али со интыысьтыз султысал ке, сылыны ӧй быгатсал кадь потӥз Марусялы. Тамактэм мурт ымдурзэ сутыса но папироссэ кыскыны турттэм музэн, туртске со вань кылъёссэ сюлмаз пыртыны.
— Кызьы бен со озьы али, веть удмуртэн Маруся ветлэ, умоезгес пи но солы шедьымтэ ни, — Ворончихин ньыль эшъёсыныз, нюлэскытӥ мынон сямен, вераське.
— Удмуртлэн дуныз будӥз шуод ни, — огез шор арлыдо мурт Ворончихинлэн кыл куспаз туйнаськиз.
— Ӧвӧл, тон соиз сярысь мыдлань вераськиськод, мыдлань, — Соловьёв шонертыны кутскиз Ворончихинэз но Павловез. — Мар пӧртэмез удмурт, я ӟуч, я бигер? Номыр но ӧвӧл. Тушмон кыл, вужлэн бервылыз со.
Ӧз яра Соловьёвлэн вераськемез Ворончихинлы но Павловлы. Соослэн сюлмазы лэчыт пуртэн бышкалтэм кадь со йӧтӥз.
Собере, Соловьёв вань ужез пичиен-пичиен сэрттыны-пертчыны кутскиз. Заводысь ужез, гуртысь ужез басьтыса, соослы тупен-тупен валэкъя. Соловьёвлы мукетъёсыз кык кузя мынӥсьёс юртто на. Солэн вераськемез шонер кадь но потэ Ворончихинлы, мукет ласянь нокызьы но соин одӥг кылысь кариськыны уг быгаты со.
— Я, бен вера ни табере, маин тон пӧртэм Корепанов сярысь? Тон но заводын ужаськод, со но. Тынэсьтыд ӧжыт ваньбур уг потты Корепанов. Кык кыл тодэменыз ке шат со пӧртэм? — чутрак пуктӥз Соловьёв.
— Соиз бен озьы кадь но…
— Мар «но», тон шонерак вера!
Номыр шуыны ӧз тоды ни Ворончихин. Соловьёвлэн син шораз меӵак учкыны но ӧз быгаты. Ял вылын пукыса, турынэн чылкыт луэм ботинка шораз учкыса со улӥз.
— Коть кыӵе выжы калык пӧлысь классъёсыз адӟыны быгатоно, классовой тушмонэз адӟоно. Ужаса улӥсь векчи выжы калык культура но ваньбурлык ласянь бере кылемын. Солы юрттыны кулэ, — тамак кыскыса, ньыль муртъёс шорын сылыса, киосыныз дырын-дырын шоналляса, валэктэ Соловьёв. Собере со туж чурыт кылын шуиз: — валад-а, Ворончихин эш!
Со дырысен трос вераськон потӥз Маруся но Корепанов сярысь. «Берлань чигнаны, кышканы уг яра, вераськозы но дугдозы, — соос сярысь вераськонэз тодыса, шуизы Марусяен Корепанов. — Веть асьмелэн кусып чылкыт, асьмеос — эшъёс гинэ».
Паймемын кудӥз шутэтскисьёс но. Куд мында гинэ уг верасько, Корепановен Маруся лумбыт-лумбыт ӵош. Пӧртэм вераськонъёс вӧлмо шутэтскисьёс пӧлын: кудъёсыз янгыше уськыто Корепановез но Марусяез: «со удмуртъёс нылкышноос сьӧрын гинэ бызьылыны быгато», шуо, кудъёсыз «отын но номыр но умойтэмез ӧвӧл» шуо.
***
Уйлэн пеймыт шобретэз чик шӧдылытэк кадь васькиз. Каллен гинэ ваське салкым, каллен гинэ кыстӥське тымет вылысь ву зын. Шутэтскисьёс кин маин быгатэ шудо, кин мае быгатэ — кырӟало, юмшало. Кыкен-куинен, ньылен .. дасэн люкаськыса ветло соос. Корепановен Маруся ӝыт сиськон ортчем бере кошкизы юмшаны тымет дуре. Сьӧд нюлэс мыкыртӥськыса улэ яр дурын. Гуын кадь, пеймыт адӟиське тымет вылысь. Кытын ке кыдёкын тымет вылысь тыл адӟиське. Каллен гинэ со азьлань мыныса, кыске бордаз синэз. Отын — чорыгасьёс уйин изись чорыгез пӧяло.
Корепановен Маруся яр дурын пукыса, кунулскыса пуко, ву вылтӥ погылясь тыл шоры синъёссэс вошъятэк ог минут котыр учко ни. Одӥг-огзылэн шунытсы соослэсь егит мылкыдзэс вырӟытэ. Корепанов, Марусялэсь суйзэ ас бордаз зол-зол пачкатыса, учке погылясь тыл шоры.
— Учкы, тӥни, отын мукет пыжын но чорыгасьёс лыкто, — умойтэмысь потон понна, Корепанов возьматӥз паллян палась адӟиськись тыл шоры.
— Ваня, мон тыныд марке но вераны турттӥсько, — паллян палась лыктӥсь тыл шоры учкемысь дугдыса, одӥг-огзылэн синмазы учкыса шуиз Маруся.
— Мар? — паймыса юаз Корепанов. Оло кыӵе, оло мар бадӟым, выль ужез Маруся вералоз потӥз солы.
— Анекдот мон тыныд верало.
— Ха-ха-ха! Мон марке мукет сярысь вералод кожасько вал.
— Только тон юн эн серекъя, — Корепановез алӥз Маруся. — Нош ик оло мар но вераськыны кутскозы.
Собере Маруся кутскиз вераськыны анекдот поп сярысь. Сураськыса, могаса, могаса сое вера.
«Марке но тон мукет вераны малпаськод вал лэся.» — малпаса, йырзэ Марусялэн йыр дораз матэ карыса, кылске Корепанов. — Лябгес верад тон сое, — берло шуиз Корепанов.
Йырзэ уката но матэ карыса, Корепанов ӝуась сьӧдэсь синъёсыныз Марусялэн сыӵе ик ӝуась синъёсаз учке. Уг адӟиськы пеймыт азьын кызьы соослэн синъёссы ӝуало: кыксы ик шӧдо — кисьтаськись, туж кисьтаськись луэмын соослэн синъёссы.
— Мынам мукет веранэ вань, Маруся.
— Вера!
Кӧня ке малпаськыса улӥз Корепанов. Кызьы вераны сярысь со малпаськиз. Берло:
— Мон тонэ чупаны медӥсько, — каллен гинэ вераз, пумен Марусялэсь суйзэ бордаз кужмогес кыскиз.
Номыр ӧз вера солы пумит Маруся. Корепанов солэн син шораз кӧня ке учкыса улӥз на но, ымдурзэ каллен гинэ лякиз Марусялэн пӧсь ымдуръёсыз борды. Собере кыксы ик одӥг огзэс ӟыгыртыса кема чупаськизы. Куинь пол соос озьы чупаськизы.
— Азьланяз? — юаз Корепанов.
Куараезлэн воштӥськемезлы ачиз паймиз. «Марлы мон сое? Веть уг, уг луы», — соку ик малпаськиз. Маруся номыр ӧз вера.
— Азьланяз уг луы, гожез тодыны кулэ, — аслэсьтыз янгыше усемзэ шӧдыса, кутскиз сое шонертыны Корепанов.
Пичи гырлы кык пол шуккем бере, соос интыысьтызы султыса кошкизы. Посӥськем турын шумпотыса кадь шонерскиз.
Корепанов соку, туннэ сямен, жадемын ӧй вал. Лумбыт-лумбыт чылкыт омырын со шоказ, шутэтскиз.
— Да-а, умой соку шутэтскиськиз. Умой дыр ортчиз. Вал, конешно ултӥяны туртскисез но…
— Нюръяськыны, валэктыны кулэ ук. Ваньмыз со вужлэн бервылыз, вужлэн кузьымез, тушмонлэн ужез, — ас понназ вераськыса, чурыт валес вылаз со выдӥз. — Али азьло мында ӧвӧл ни. Ужамлэн бервылыз шӧдске. Нош озьы ке но, ужано али, туж трос ужано шовинизм но, национализм но али трос на, — малпаськыса, Корепанов гадь вылаз понӥз пиньжаксэ, кияз кутӥз «Правда».