Ваҡытым юҡ. Гүзәл Ситдиҡова

* * *

Ваҡытым юҡ, бер ҙә ваҡытым юҡ!
Үтеп кенә бара шулай ғүмер,
Бөгөн инде ял итермен тиһәм -
Мең мәшәҡәт китә йәнә күмеп.
Йәшлек үткән ҡомда ҡыҙынмайса,
Олоғайғас күрҙем диңгеҙен дә,
Тик шунда ла ярҙа яталманым,
Яҙҙым-яҙҙым - түкмәй бер һүҙен дә.
...Миңә етте диңгеҙ, бер күрҙем дә...)
Ҡыҙынһындар кемгә был ҡыҙыҡтыр,
Тик ятырға минең тәҡәтем юҡ.
Ҡартаяһың, тиҙәр.
Ҡартаямдыр...
Һыр һанарға минең ваҡытым юҡ.
Ваҡытым юҡ.

2015

---