Вермасьны!.. Вермасьны!..

by Тимушев Анисим Петрович

Овлывлӧ, кадъясын лолӧн ми усям,
Вынйӧрным лыжалӧ, сыркмунӧ ки.
Дона кад коллялам — жуйвидзам, узям:
„Вӧчас ӧд кодкӧ тон, ог сюйсьӧй ми“...

Мед эськӧ миянлы сьӧкыд эз инмы,
Кодкӧ мед тойтіс, а ми олім жуй,
Ки мед оз гаддьӧссьы, кок мед оз кынмы, —
Кодкӧ тон вӧчас ӧд дась ордым туй.

Быд минут весь кольӧм миянлы мытшӧд;
Быд минут весь кольӧм сьӧктӧдӧ вен.
Корсям ми петан туй зарниа кытшӧд, —
Олӧмыс чуксалӧ: „Отсышт вай мем“...

Быд минут югъялӧ аслыс рӧм биӧн,
Быд минут дон кутӧ ыджыд да ён.
Мед аддзыны синмӧн, малыштны киӧн —
Быд кадлы велӧдчӧй пуктыны дон.

Вермасьны!.. Вермасьны!.. Дугдывтӧг колӧ
Личкертӧг эштӧдны удж бӧрся удж.
Удж вӧчиг, вермасиг ог усьӧй лолӧн, —
Жуй кад ни сыркмунӧм ловлы оз вудж.

Олӧмыс кадалӧ том чужан кадсӧ...
Отсыштны сӧвмӧдны быд мортлӧн мог:
Тӧлӧдны сиктъясын тшыналан чадсӧ,
Весавны йӧз пӧвстысь нужда да шог.

Вермасьны!.. Вермасьны!.. вой тӧв со шувгӧ —
Пармакӧд кыпӧдӧ нэмӧвӧй зык.
Вӧр-пуыс пармаын вой тӧвлы мургӧ:
„Нолтӧ, вай пармасӧ ызгӧмсьыс пык“...

Шутьлялӧ вой тӧв да куснялӧ расъяс:
Копрасьӧ туганнас вӧсньыдик кыдз;
Видзӧны том раскӧс пармаса козъяс,
Тугансӧ вой тӧв мед чегны оз судз.

Вермасьӧм!.. Вермасьӧм!.. чуксалӧ-корӧ:
Лӧнявны, шойччыны абу на кад.
Котырӧ чукӧртчам кадалысь дорӧ, —
Удж пиян, удж вылӧ сувтамӧй рад!..

Олӧмыд абу ӧд рӧмпӧштан вуджӧр:
Петкӧдлӧ быднога киссьӧмлысь сер,
Унатор гугӧн на садялӧ вежӧр,
Садь кежысь вермасьтӧг уна он кер...

Вермасьны!.. Вермасьны!.. Гыалӧ горъяс...
Пеляяс кылӧны — сетӧны шы:
Гӧрӧны плугъясӧн падмӧдысь боръяс —
Путкыльтчӧ, муткыльтчӧ выль ӧддзӧм гы.