Виччысьӧй сиктъясӧ выль отсасьысьясӧс!
Уналаын миян вӧлӧсьтъясын норасьӧны, абу пӧ тӧдысь прамӧй уджалысь войтыр волисполкомын, кооперативын, лыддьысян керкаын да мукӧдлаын. Ас костысь сэтшӧм йӧзыс омӧля сюралӧ, карысь сьӧкыда ыстӧны. Кысь босьтны?
Миян Коми обласьтӧ регыд (сентябрын, октябрын) пондасны воавны Гӧрд армияысь коми том войтыр (1902 во). Найӧс армияын велӧдісны эз сӧмын оружйӧӧн СССР-нымӧс видзны капиталистъясысь, озыр йӧзысь, но тшӧтш бура велӧдісны найӧс грамотаӧ, велӧдісны, кыдзи колӧ выль ногӧн видз-му уджавны, кыдзи бура овмӧс кыпӧдны, петкӧдлісны налы мукӧд войтырлысь бурджык олӧм, петкӧдлісны налы паськыд местаысь Сӧвет власьтлысь уджсӧ, велӧдісны найӧс уджавны йӧзӧс югдӧдӧм вылын, овмӧс кыпӧдӧм вылын.
Гӧрд армияысь локтысь войтыр — миян сиктъяслы ыджыд отсӧг.
Сӧмын колӧ кужны найӧс примитны, колӧ кужны налы индыны уджсӧ.
Колӧ вӧчны сідз, медым эськӧ найӧ ассьыныс тӧдӧмсӧ, сямсӧ сетісны став деревняыслы, не сӧмын асланыс овмӧслы, аслыныс.
Мед эськӧ кутасны уджавны видз-му уджалӧм бурмӧдӧм вылын, кооператив удж кыпӧдӧм вылын, лыддьысян керкаын да мукӧдлаын партиякӧд, комсомолкӧд да волисполкомкӧд ӧтув, найӧ индалӧм серти. Торйӧн уджалӧмысь нинӧм оз артмы.
Колӧ вӧлӧсьтса удж нуӧдысьяслы (партия, комсомол) армияысь воысьясӧс регыдӧн жӧ чукӧртлыны собранньӧ вылӧ. Сэні налы колӧ лючки висьтавны: кутшӧма олӧ вӧлӧсьт, кутшӧма овмӧс кыпӧдан да йӧзӧс велӧдан-югдӧдан удж мунӧ, кутшӧм омӧльторъяс эм вӧлӧсьтын, мый колӧ бурмӧдны, мый колӧ водзӧ кежлӧ вӧчны. Юасьны налысь, тӧдмавны, коді кутшӧм удж вермӧ вӧчны, сэсся корны найӧс уджавны отсасьны вӧлӧсьтса учрежденньӧяслы. Медводз позьӧ найӧс индыны уджавны волисполкомса комиссияясӧ. Сэтӧн найӧ медрегыд асьнысӧ петкӧдласны. Сэсся позьӧ сетавны аслыныс нин торъя уджъяс кооперативын, лыддьысян керкаын, отсасян комитетын, сідз водзӧ.
Колӧ бура примитны Гӧрд армияысь воысьясӧс да кужны наысь пӧльза босьтны. Мед весьшӧрӧ оз вош налӧн Гӧрд армияын быдмӧм-велӧдчӧм, уна паськыд местаті ветлӧм. Гӧрд армияысь воысьяс отсаласны миян пемыд сиктъяслы водзӧ тувччыны, отсаласны войтырӧс югдӧдны да овмӧс кыпӧдны.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication. |
|