Виччысь менӧ
Виччысь менӧ, муса нылӧ,
Ог на нэм кежлӧ ме мун.
Вакӧд локта, лым кор сылӧ...
Воас сэки долыд лун.
Эн бӧрд, зарни! Бать мем шуис:
«Нинӧм шӧйтны тэныд, зон!
Гӧтрась! Мамтӧ пӧрысь суис,
Ичмонь корсь, мед зіль да ён!»
Нажӧвитны муна арын,
Тэныд ньӧба козин бур.
Корся удж ме ылын, карын,
Локта — пуам свадьба сур.
Тӧвбыд уджала ме ёна,
Черкӧд ӧтув чинта вой.
Регыд гозйӧдчам ми, дона,
Шойччас сэки сывъяд сой!
Муніс зон, а ныв зэв шогсьӧ,
Сёйны оз ков, войяс кузь,
Лунтыр эськӧ мырсьӧ, ноксьӧ,
Да оз вунӧд, он на узь!
Локтіс тулыс, лым зэв сылӧ,
Воссис ва нин, кывтӧ пыж.
Лун-вой ныв видзӧдӧ ылӧ, —
Зон век абу, оз и гиж.
Сьӧлӧм нывлӧн уси, полӧ,
Гашкӧ кулі ылын зон,
Гашкӧ мукӧд нывкӧд олӧ...
Кувтӧг овны верман он?
Со и Петыр видз нин сувтіс,
Ӧдва руыс ветлӧ ныв...
Ӧтчыд войын пон друг увтӧ,
Кодкӧ чуксасьӧ: «Он кыв?»
Петіс, видзӧдӧ: зон сэні.
Кутіс сьыліӧд, оз лэдз...
«Ог нин торйӧдчӧй ми ӧні,
Батьлы шуам: свадьба вӧч!»
|
This work was published before January 1, 1929, and is in the public domain worldwide because the author died at least 100 years ago. |