Водзӧ

by Тимушев Анисим Петрович

Кад лолӧ, олӧмнас пӧтам да мудзам:
Мича ни, мисьтӧм ни, долыд оз ков.
Удж бердӧ кутчысям — дзик выльӧс судзам,
Бара сэк вӧзйысьӧ олыштны лов.

Видзӧдам, олӧмыс нюмъялӧ гӧгӧр,
Мичалысь, мисьтӧмлысь янсӧдам сер.
Мӧвпсямӧд сявкнитас тӧдлытӧм югӧр:
„Мыйла ме та дыра нинӧм эг кер?“.

Казялам, олӧмнас вӧвсьӧма тшыгӧсь:
Вежӧрын, сьӧлӧмын пӧтлунным — нур;
Тэрмасям лун пыдди олыштны кыкӧс,
Но ӧтиа лунсьыс тай кыкыс оз сюр.

Лӧгалам ас вылӧ, мый вынысь пессям,
Вӧтӧдны кӧсъямкодь весь кольӧм кад.
Кватитчан, медбӧрын кольӧмыд, кыссян —
Саяліс, оз тыдав медводдза рад.

Сьӧлӧмыд пузьылас, вежӧрыд вошлӧ,
Сӧн везйыд личавлӧ, зэлавлӧ — шог.
Свинеча гираӧн шошаад ӧшлӧ,
Тіралӧ-личыштлӧ тувччалан кок.

Вомысь сэк мисьтӧма ёркывъяс петӧ.
Ас вылӧ он пукты лача ни дон.
Ывлаыс мичлуннас сэні жӧ эльтӧ,
Нолтӧ пӧ выныштчы, эн кольччы, зон!

Лӧг петӧ. Шог петӧ. Ыштӧдӧ ывла...
Выныштчам, воськовтам — окма тай сёр...
Муртса нин водзиса шыяссӧ кывлам —
Кватитчам — бӧрыннад суӧдӧ дзор.

Шеныштчам — котӧртам водзӧ да водзӧ:
Кашкӧм шы, лашкӧм шы сынӧдын тыр,
Пӧсь киссьӧ чужӧмысь — курав кӧть соддзӧн,
Бувгӧ пель шыч ни рач, нинӧм оз пыр.

Дульсмӧма синъясным, кушмӧма плешным,
Кӧрсьӧма чужӧмбан, шашкыштӧ вом.
Олӧм сям кывтӧмас оз нин пет вежным,
Радлӧмлы, долыдлы воӧма пом.

Бӧр саяс суӧны долыд да серам;
Ӧзйӧны чужӧмъяс, колӧмъяс тыр:
„Важсӧ дзик путкыльтам, выль олӧм дорам,
Медым пӧ вир синва мирӧн оз кыр!..“

Шеныштчӧй олӧмпӧт олӧмысь кыйны,
Сійӧ ӧд пӧттӧдзыс некор оз шед;
Дугдывтӧг тэрмасьӧй, кыйӧдӧй лыйны —
Вермасьӧй, чунь костті медым эз пет.

Долыдлун йитчӧма вермасьӧм уджын,
Вермасьтӧг он аддзыв, кыдз ассьыд пель.
Войдӧр кӧ удж керны сос дортӧ пуджин,
Эз сатшкысь лов пытшкӧ мудзӧмлӧн жель.

Вежӧр-садь нинӧмла гудыртны томӧн:
„Пӧті да мудзи пӧ олӧмысь“, — сёр!..
Воськовтам повтӧга быд сьӧкыд вомӧн:
Водзӧ!.. Став вир важыс кытчӧдз оз пӧр!..

Водзӧ вай ставӧн, код эз на усь лолӧн!..
Водзӧ, код сьӧлӧмын ӧзъялӧ би!..
Водзӧ, код сёйлывліс синваа солӧн!..
Став „пӧтлун“-„тшыглунсӧ“ пӧрӧдам ми!.