Ётнесть недлятне,
Ётнесть ковнятне.
Аннаняти састь
Стака шинятне.
Кода од авань
Кассь сонь пеконяц.
Вай, лямбе лофцса
Пяшкодсь мяштеняц.
Увнай сёксень весь
Шобда вайгяльса,
Вирьхнень, паксятнень
Эшляй пиземса.
Удыхть велетне,
Шумнайхть варматне,
Куфцихть сярядикс
Ляень волнатне.
Косонга аяш
Ваймонь кандыня,
Косонга аяш,
Вай, тол-валдоня.
Аньцек Салаюф
Баярть кухняса
Стирня сяряди
Авань урмаса.
Шачфтома лангса
Сонне пеконяц,
Кода акша лов
Олаф шаманяц,
Бта маштыксти
Палы ронгоняц,
Тотнай урмати
[ 37 ]
Эвотьф сединяц.
Акша пейняса
Кяленц сускозе,
Куфцезь одс шачить
Сюдуфсь учсезе.
Мутнайгодсть сюдуфть
Начка сельмонза,
Пандозне-пандовсть
Сонне пиленза.
„Кулан, тядяняй“... —
И маштсь ёженяц.
Мзярда ёжец сась,
Ульсь ни шабаняц.
Кувать изь думсе —
Шабать фатязе,
Эрязста акша
Мяштенц лихтезе.
Шабать кургонянц
Мяштьса пандозе,
Шкай уголняти
Тарназь кандозе.
„Шкайняй, ваномак,
Кядьсон идезе...
А кие, азка,
Монне мирдезе?
Салаюфсь, шкайняй,
Аф эсь волясон...
Сон сембе стирьхнень
Тяфта нолясынь“.
Ня валхнень кулезь
Сёксень варматне,
Тага кухняса
Шобда вальмятне.
Эх, шобда, шобда
Начка сёксень весь...
Пелезь Аннанясь
Баярть кудста лиссь.
Кельме кядьсонза
Шабанц кирдезе,
Авардезь-кольгозь
Шаманц палсезе.
Кода нарошна
Вармась рангозевсь.
Вай, шобда садса
Шуфттне увназевсть,
Резняй кяжиста
Кельме пиземнясь.
И... Аннать кядьста
[ 38 ]
Юмась шабанясь.
Ласькозне куду
Сон меки сувась,
Кода ловажа,
Вастозонза прась.
Шинясь шобдава
Нолдазе славать;
Музе сад ванысь
Эендаф шабать.
Ардсть урядникне,
Кяжи стражникне, —
Оцю азоронь
Борзай пинетне.
Шабась кинне тя,
Курок шарьхкодезь,
И Анна стирнять
Уськса ашкодозь.
Пачфтезь сотнефста
Кевонь острогу,
Вай, кшнинь вальмяня
Тяйняня куду.
Ламос ащесь сон
Кевонь острогса,
Тоса пичеди
Ломаттнень ёткса.
Тоса эрямста
Шарьхкодезе сон,
Эряфсь мес ётни,
Кода стака он.
Лисемда меле
Эрясь заводса,
Эчке пеконди
Покайхнень ёткса.
Аннась лама няйсь,
Вай, лама шарьхкодсь,
Аньцек пингонь самс
Сетьмоста ащесь.
Тяни меки сась
Шачем вастонцты,
Коса ингольцекс
Тёждя эрямась
Сонь аф васьфнесы.
|
