Вумурт но бун пунӥсь

Вумурт но бун пунӥсь Калык выжыкыл

Источник: Гаврилов Б. Г. Произведения народной словесности, обряды и поверья вотяков Казанской и Вятской губерний. — Казань, 1880. — С. 65—67• Текстэз туала орфографие берыктэмын но абзацъёслы люкемын

Одӥг муртлэн куинь пиез вылэм. Одӥг пиез бунэн ты доры пунӥськыны мынэм. Мыныса вуэм бере пунӥськыны кутскем. Пунӥськон дыръяз ты пери потэм но пунӥськисьлэсь юам: «Тон тае малы пунӥськод?» — шуэм.

Пунӥськись верам: «Ты пушкын мар вань, сое поттӥсько», — шуэм.

Та ты пери пырем но анаезлы верам: «Асьме коркаез быдтыны лыктэм мурт вань», — шуэм.

Собере верам анаез пиезлы: «Мын, валче нюръяськы, тонэ вормиз ке — поттоз», — шуэм.

Ты пери потэм но «ойдо валче нюръяськом» шуэм.

«Эй, тон, монэным нюръяськын?! Мын, тӥни отын мынам сю арес пиньтэм бабае вань, мын, соин нюръяськы», — шуэм.

Та мынэм но «давай подвод!» шуыса вазем. Гондыр «ӧ-ӧ» шуыса вазем но та курдам. Курдаса бертэм анаез доры но верам анаезлы: «Уй, анай! — шуэм, — сю арес бабаез вань вылэм, огпол „ӧ-ӧ“ шуыса вазиз но куараезлэсь курдай», — шуэм.

Собере нош косэм анаез бызьыны. Ты пери потэм но пунӥськисьлы верам: «Ойдо бызём, кин ортчоз», — шуэм.

Пунӥськись верам солы: «Тӥни мынам пал арес выны вань, „уать, уать!“ шуыса мын, али потоз», — шуэм.

Ты пери «уать, уать!» шуыса, вераса мынэ вылэм; кеч кыз улысь потэм но ворттыса кошкем; кеч сьӧры та но бызьыса мынэм вылэм, сутымтэ, сокуен кечлэсь быжзэ но адӟымтэ. Собере анаез доры бертэм но верам: «Пал арес выныз вань вылэм, со сьӧры но вуыны ӧйло, монэ витьыса, ялкарыса, ялкарыса бызе, озьы но ӧй суты», — шуэм.

Собере анаез верам: «Мын, та чокмордэ потты но лэзе, кудды вылэ вуттоды», — шуэм.

Та ты кузё потэм но, пунӥськись доры мыныса, верам: «Я, та чокморез ыргыты», — шуэм.

Пунӥськись верам: «Я, ачид азьло ыргыты», — шуэм.

Ты пери чокморзэ ыргытэм но усьыса музъеме выем, чокморзэ басьтыса сётэм но, та пунӥськись чокморзэ кутэм но, ты пери «я, ыргыты» шуэм.

Та верам: «Дугды али, тӥни со пилем мед вуоз», — шуэм.

Ты пери верам: «Чу, чу, эн ыргыты», — шуэм.

Собере ты пери, чокморзэ басьтыса, пырем. Собере нош сизьым сул эрвал поттэм но «я, тае ныпъяса нулды» шуэм. Пунӥськись верам: «Я, ачид нулды азьло», — шуэм, ачиз ныпъяса нулдэм. Та пунӥськись пуксем но ворттылыны кутскем.

Ты пери верам: «Чу, чу! Виёд, виёд!» — шуэм. Собере, эрвалзэ пыртыса, кошкем.

Анаезлы верам: «Анай, валэз виись ке вал», — шуэм.

Собере ты пери потэм но «уксё сёто, уд йӧты-а?» шуэм.

Пунӥськись верам: «Та шляпаез тырос карид ке, уг йӧты», — шуэм.

Ты пери анаез доры пырем но верам: «Уксё сётӥд ке одӥг шляпа, уг йӧты, шуэ», — шуэм. Анаез косэм. Пунӥськись шляпазэ усьто карем, уксёзэ тырыны косэм; тырыса, тырыса мырдэм тырмытэм. Собере корказ перизэ нуытэм. Нуыкузы адӟиллям вуко кӧ, сое пери басьтэм но нуэм. Собере адӟиллям усыез, пунӥськись сое но перилы нуыны косэм. Пери басьтыса, ӝутыса нуэм. Собере корказ вуиллям но та кузёез азьло пырем но кышноезлы верам: «Мон шыд пӧзьтыны косо, тон „маид вань?“ шу», — шуэм.

Та периез ӧтьыса пыртэм но кышноезлы шыд пӧзьтыны косэм.

Та кышноез «маид вань?» но «маид вань?» шуэм.

Картэз верам: «Одӥг перилэн йырыз вань», — шуэм но, пери коркаезлэсь пал сэрегзэ ӝутэм но потыса кошкем. Сокуен пери бертэм.