Колхозонь эряф/1938/07-8/В. Г. Короленко
| В. Г. Короленко |
| (Шачема шистонза сявомок 85 кизонь топодемати) 27/VII—1853 к.—27/VII—1938 к. |
Владимир Галактионович Короленко шачсь 1853-це кизоня, Житомирса уезднай судьянь семьяса. Од цьоракс сон арьсекшнесь оцю образованиянь колга, научнай работань колга. Но сембе сонь одксшиц йотась нуждать каршес тюреманди, ссылкава якамаса. Высшай школаса образования тейнза таки изь сав получамс. Комсь колмува кизоса Короленконь — Московскяй сельскохозяйственнай Академиянь студентокс — паньцесазь Вологодскяй губернияв. Тянди туфталкс ульсь академияса йотафневи полицейскяй режимть каршес студенческяй группать энергичнай протестоц. Ссылкаста самда меле Короленко тяряфни ушедомс тонафнема, но сонь учендсы од арестсь. Сонь подозревали подпольнай типографиять, мархта, сотксса. Эряма васта тейнза макссихть «аф настоящай», Короленконь эсь валонц коряс, Вятскяй губернияса, Глазов глухой ошкяти. Курок «ссылкаста ворьгодемань колга» тевть коряс, коцац тиф клеветническяй кулянь коряс, Короленконь паньцесазь нинге сяда ичкози — Якутскяй области. Правда, ки лангста сонь мрдафнесазь Перьмав, но тясонга сонь учендсы од испытания: Александр III-ти присягать эзда мужественнайста атказаманкса Короленконь прважсесазь ссылкас «эйнь тюрьмав», ичкози Якутскяйть омбокс.
Писательть литературнай деятельностенцты сибирскяй эряфсь кадсь исключительнай последствият. Якутскяй ссылкаста сон ускозе «Сон Макара» рассказонц, конац эстакиге Короленконь путозе русскяй литературань крупнейшай художникнень мархта ряцок.
Короленко мольсь эряма Нижняй Новгороду и оцю мяльса кярьмодсь литературнай работати. Фкя-фкянь мельге лисендсть сонь популярнейшай произведениянза: «В дурном обществе», «Слепой музыкант», «Лес шумит», «Сказание о Флоре», «Тени», «Река играет», «Парадокс», «Без языка». 1890-це кизоня сон печатлазень эсь замечательнай «Павловскяй очерконзон», конатнень лангс няфнесь В. И. Ленин «Развитие капитализма в России» эсь работасонза. «Очерконза» няфнесазь рабочайхнень-кустарьхнень трудснон и бытснон яркай картинанц, лангозост люпштай капиталть каршес аф равнай тюремаса синь юмамаснон подлиннай драманц. «Конкуренциясь — пресс... Кустарсь — материал, конац ащи прессть ала, скупщиксь — винт, конанц вельде прессь люпшневи». Тяфта Короленкось няфнесы тя драмать сущностенц. Ломанти непобедимай верондамась, высокай гуманизмась — вагот мяльхне, конатнень пропагандировал Короленко, конац апак лотксек кепсезе эсь вайгяленц произволть и бесправиять каршес. «Сон кода бта няезе и варчсезе справедливостть», — сьормадсь Короленконь колга А. М. Горький.
Короленконь кельгома геройнза — правдань поборникне: Менахем, конац серьгятькшнезень угнетеннай еврейхнень древняй Римть каршес тюрема («Сказание о [ 7 ]Флоре»); Сократ, конац аралакшнезе истинати эсь мяленц («Тени» рассказоц); испанскяй повстанецсь Диац, конац ворьготсь тюрьмаста, конац аноколь юмамс волнатнень потмос, но хоть афламняс марямс свободань радостть («Мгновение»).
Короленконь гуманизмац аф ащи слепой покорностекс. Сон страстьса и убежденияса йотафнесы «революционнай насилиять» араламанц. «Кевть тапасазь кевса, стальть отражают стальса, а вийть — вийса» («Сказание о Флоре»).
Короленконь огромнай талантонь произведениянза-рассказонза пяк красочнайхть. Звучнай, мелодичнай кяльсь роднит синь подлинна музыкальнай произведениятнень мархта. Сянди примеркс ащихть «Огоньки», «Лес шумит», «Старый звонарь» расскасне.
Короленконь художественнай творчестванцты итогокс ащи сонь автобиографияц — «История моего современника».
Короленко ульсь аф аньцек оцю художникокс, но и крупнай общественнай деятелькс. Сонь деятельностец, А. М. Горькайнь свидетельстванц коряс, «сргозьфтезе лама русскяй ломаттнень нувай правосознанияснон».
Народти служамась тейнза ульсь бесправиять и самодержавиянь гнетть каршес основной мужественнай тюремакс. Вача кизотнень (1891—1892) сон васенцесь организовандай общественнай лезкс вачеда куломати обреченнайхненди. Оцю пси седиса ломанць, сон выступандакшни удмурттненди защитникокс (мултановскяй тевсь), мзярда синь каршезост церковникне, провокаторхне лихнихть ломанень шавоманкса гнуснай изуверскяй обвиненият. Короленко выступает оцязоронь правительствать зверинай национализманц каршес (Бейлисонь тевоц), Сорочкинцы велень крестьяттнень лангса самодержавиянь сатрапнень жестокай расправаснон каршс («Сорочинская трагедия»). Пяк вию отклик тись сонь «Бытовое явление» публицистскяй произведенияц — гневнай протест «жестокостень эпидемиять» каршес, реакциянь кизотнень пингста революционерхнень массовайста казьнендамаснон каршес.
Известнай фактсь, мзярда Короленко атказась почетнай академиконь званияда. 1902-це кизоня сон решительна выступал оцязорть афзаконнай действиянц каршес, мзярда сон ашезе кочкафта А. М. Горькайнь почетнай академикокс. Чеховть мархта марса Короленко тусь Наукань Академияста.
В. И. Ленин шнакшнезе Короленконь, кода «прогрессивнай писателень», сяс мес сембе сонь художественнай публицистическяй и общественнай деятельностец ульсь направленай Россияса крепостничествать каршес, самодержавиянь бесправиять, деспотизмать каршес тюремати.
В. Г. Короленко кулось 1921-це кизонь декабрть 25-це шистонза.