Валда ян/1929/04/Газець лезць Гаразти
| ←Од ломанень сиде моротне | Валда ян (1929), № 4 (8), Апрель ков edited by Шотин И. В. Газець лезць Гаразти |
Подпискась→ |
| Валда ян. Эрьковонь общественно-политикань и веле-хозяйствань журнал. „Светлый путь“, ежемесячное приложение к газете „Од веле“. — № 4 (8), Апрель ков 1929 киз. — с. 18—19 |
Газець лезць Гаразти
Стакаль Лубырень Гаразень эряфоц. Дядяц кулось, мзярда Гаразть аньцек 7 кизонзоль, а аляц тусь мельганза колма кизода меля. И ляць Гаразсь ськамнянза йомбла наксада кудняс, кона неньгя эста, сяконь, пельхть, сявари лангозот. Сойнь ашель фкявок радняц: аф акац, аф алякац.
Алянц куломда меля Гаразти савсь эсь прянц щамс, карьсемс и трямс. Кизонда сивоть кшнесь учань ванынякс, а тялонда трясь пря ломань ланга работазь. Ломань ряца кудняцка ашель: кода дядяц нужань потмос шачфтозя, станяк, ульма, куломска арай, ломанькс апак эряк. Лама вача щит няйсь сон урос шабакси аф кржапяярць сельмя ветта.
Мезя аньцек ашезь тиеньдя и коса изь работа Гаразсь ашу шинц колга: и Москуву якась, сембе вастнень шаразнь, кивок ашезя лезда.
Мекпяли Гаразсь сась эсь велезонза и сивоць Иван Сидороченьди работнекоксь. Но эсь потмованза сон кемоста думандакшнесь: кодавок куроконя путомс эстиенза кудня и лоткамс ломань ланкс покодькшнема
Васенце ламоксть лездома комитетцка якась вирень анама и сембя надиясь: мзярда комитець лацкас няйсы сойнь стака эряфонц, лезды тейнза куд рясанянь путомста.
Но комитець теенза изь лезда. Аньцек раксесь сембя, а мзярда Гаразсь сяда смелняста ушоць вирень вешема, комитетонь председательсь кяжиста мярьксь: — Местемя тонь шейтатне каннетядязь? - Аньцек шьорьсемя.
Гаразсь Нилкань Васять эзда марьсезя, што мзярс газец аф сьормацайть велень кальдяфнень, сембя тяфта эрят. Д‘ Гаразть тясонга пичефксоц, аф содай сьормас. Фкя кизоня якась ликпункц тонафнема, д‘ курок лоткась: каренза калацть и кудазорсь, конань пяля сон эрясь работнекокс кирьдезя.
Йорась Гаразсь велень советтигя молемс, но эсь пачканза думандась, што мезевок теенза кивок аф тии, валса тапарясазь. Чайкин Григорийсь, мезе сон? — Сими, ярхцай, а ломантти кяльдявда башка мезевок аф тии, корхтась эсь потмованза Гаразсь и в совету ашезь моля.
Кода-бди Гаразсь марязя, што кредиткаса попть цьорац “Пегай Ванькась“ служай (тяфтама лем тейнза пуць! Гаразсь сонць, коста ащесь пялост работнекокс).
Мяляфцы, сон назепт ускси перезонза, а „Пегай“ налхксемаса налхкси. Аф кржаксть и аварць эздонза. Лияста Гаразсь кяждонза цюткяня оркацы Ванькать пря-бока ланга, а сон сельмя ведензон нолдасыйнь и туй алянцты азондома. Ну, о. Михаил, содаф, кундасы пря понада Гаразть: ускси, ускси топодьмос калдазть кунчкаса, а тоса пейнь пачк таргасы: — эх, пря куйнь цьора! Трятядезь, антядязь а тон, ульма, сянкса штоли цьоранязень шавонцак. Вандыкигя паньття пяльдон! Гаразсь аньцек стакаста куфксты и эсь потмованза пшкяди:
— Стака, стака, Гаразь тейть... Монцькя содаса, д‘ мезевок аф тият...
Шавашиста ашкорезень пильгозонза сязентьф пракстанзон, путозя лафтувонц ланкс наксада сумманянц и тусь кредиткав. Пачкоць тоза и сувась видеста канцелярияв.
Нежедезя кержи лафтунц касяк ужети и пяля вайгельса кармась ряц—лац азондома Пегай Ванькати, кода советчекне сельмосостка афолезь няй. Комитетть коволгавок азонць цьок мзярс. Кувать торась Гаразсь и лоткась. Неньгя азондоль, д ваны, Пегаись прянц нолдазя и каршозонза мезевок ашезь пшкядя.
Шарфтозень. Пегайсь полда сельмонзон лангозонза и пшкяць: — Тонь мяльця сторожкс яцемс? — Ванды сак, а течи тевозя.
Аньцек тяни шарьхкоць Гаразсь, што сембя сойнь васькафнесазь и аш лезды ялга тейнза.
Эрясь кота кофт Иван Сидорочень пяля, а сисемця ковста изь кирьдя седиец и видеста мярксь: — Визьксценьгя юмафтыть, визьксфтома шама! Голь васькафнемайть монь. Улезан сюдоф, кармандерянь верондама тейнтть! Тинь сембя ашу ломанень верда потятад!... Сембя эряфозень тифтень сускомнень сязеньдесть!... Мон сяда ламоксть тейть аф работнекан.
Келептезя кели кургонц Иван Сидороч, таяскоць фкя васц и станяк иляць паньжадонь, куркт. Аф вал азовсь, аф ваймоц таргавсь, б‘та тумонь манца ашкорезь пря юр ланга.
Тят кяжия лангозон, Иван Сидороч, мон туян - пшкяц мекпяли Гаразсь и тусь ваксстонза, ков няихть сельмонза.
Моли Гаразсь велеть кувалмос, а сонцень седиац ризнай. Кивок сойнь ужельдиецка аш, кивок сойнь ломанькска аф лувонцы.
Мезе тиян тяни?.. ков молян?.. сельмя ведь пачк думандась Гаразсь.
Мекпяли кати-кода бди ляць мялезонза Васясь, сойнь мокшонь кяльса газетть колга корхнеманза, и валдомсь шамац, кенярьць седиец: сембя надияма вастоц прась газетть лангс.
Нилкань Васять шири суван!.. Да... аньцек ширезонза... Ломаньць беднай... марса, кафта йоньца, кода-кода тийхтяма.
Кенярьць Гаразень седиец и тусь цють аф ласькозь Васяць пяли.
Сувась кудозонза, озась Васять ваксс и ваймонь тарксезь. уставась азондома:
— Люпштазь, Вася, ашу ломантнень веронь потей равжа пря куйхне... велесонок сембя власць кяцост... крмоштаф. Аш кода эрямска... Эсь радняснон учрежденияс ичсесазь, а монь... сторожкска ашемазь прьма. Козе аляньди ярмакт явондыхть, а тейнь мезевок аш... Азомс видеста, хоть петляс яцек...
Уторозонза Вася мезевок изь пшкядь. Таргазя доду алда сязентьф гагодонц, крандашенц и моркшть ваксса ушець сьормадома.
[ 19 ]— Тон, Вася, сембонь газец сьормадынть, изь лоткся Гаразсь, — тяк юкста врьгас лефксть коволга тяштемс. Сонь коволганза пилькфтемовок лядонь, а эсь потмованза пшкяць: — кодама аляц, стама и цьорацка, кафцкя васькафнемазь монь; тяни лац шарьхкодень, кода синь васькафнихть шобда ломатнень эса.
Мзярда Васькась аделазя сьормадоманц, Гаразсь пелезь кизефтезя: — А кда газецкя аф лезды, эста коза?...
— Лезды, Гаразь ялгай, лезды. Вов няйсак, недляшкада меля тоза ули вачкотьфт сембя велень кулятне, — пшкяць уторозонза Вася, — Сон минцень, сокай газетанеськ, сон ингсонок ащи...
И верондаль Гаразсь газетати, д‘ мзярда лятфтасыень ингольцень..., пчкяль и афоль веронда.
Кафта недляда меля Гаразсь марязя, што кие-бди ошста велезост сашенць, кредиткавга сувсесь. Газетт начальствать колга няфнесь и кизефнесь
А мзярда кулезя, што валхтозь сембя начальстввать, ламонц синь пизостост максозь суц, Гаразсь кенярць и эстиенза оцю вайгельса мярьксь:
— Куломозон, газетаня-ялганяй, карман лятфнемот и кельгомот тонь.
Аньцек тяда меля Гаразнь и лия ашу ломатненьгя эряфсна ушець петневема, и валдошкоткшнема. Ашу ломатне газета вельдя кеподезь пряснон, паньжезь сельмоснон и властть сявозь эсь кядезост.
Гаразнь кочказь кооперацияв приказчикокс и фкя вийса, фкя—фкяньди лездозь, ашу ломатнень мархта ушець петема од — валда велень эряф, таргама ашу ломатнень веронь потяйхнень кядь алда.
Гаразсь васенце сембя вийнц путозя сьормас тонафнема тевти. И трудац стак изь юма: арась сьормас содайкс.
Тяни Гаразсь арась велень кулянь лачфтикс, и кие тиеньди шобда тевнят, али кармай молема беднайхнень каршос, Гаразсь сонць, зсь сокайнь пуворксу кяца, сьормачни “Од веле“ газец.
|
| Окрлит № 189 | Тип. „Красный Октябрь“ Морд. Окр ОМХ | Тираж 3500 |