Газетӧ гижысьяслы (I)
Стенӧ ӧшӧдан газет йылысь
Миян обласьтын уна сиктъясын коммунист да комсомол ячейкаяс лэдзӧны стенӧ ӧшӧдан газетъяс. Сэсся «Газетлы отсасян» кружокъяслӧн ыджыд мог — босьтчыны стенӧ ӧшӧдан газет лэдзӧм уджӧ (дерт, кутшӧм сиктын ӧнӧдз сэтшӧм газетыс эз на петлывлы). Сӧмын уналаын на стенӧ ӧшӧдан газет уджыс сувтӧдӧма омӧля, абу сувтӧдӧма кыдзи эськӧ колӧ вӧлі ортсысяньыс дай пытшкӧссяньыс (со стороны внешности, а также содержания).
Ми тані дженьыдика висьталам стенӧ ӧшӧдан газет йылысь. Медвойдӧр:
Мый сетӧ стенӧ ӧшӧдан газет сиктын.
Стенӧ ӧшӧдан газет — медматысса газет крестьяналы. Сэні гижӧны быд сиктын асногса олӧм йывсьыс, быд сиктса торъя омӧль сямсӧ дай бурлунсӧ. Сы вӧсна стенӧ ӧшӧдан газетӧс крестьянин медъёна лыддяс. Татшӧм газет лыддьӧмӧн крестьянин кутас кыссьыны гырысь газетъяс лыддьӧмӧ, паськыдджыкинса олӧм тӧдмалӧмӧ.
Сэсся татшӧм газет пыр сиктын унджык содӧны гижысьяс гырысь газетъясӧ, татшӧм газет пыр гижысьяс велӧдчӧны гижны гырысь газетъясӧ, тӧдмалӧныджык, мый йылысь кутшӧм ногӧн колӧ гижны.
Мый йылысь гижны стенӧ ӧшӧдан газетӧ.
Стенӧ ӧшӧдан газет петкӧдлӧ олан сямсӧ сиктлысь, петкӧдлӧ, кутшӧм думӧн олӧ крестьянин, мыйӧн сиктыс лолалӧ, мый воӧ сьӧлӧм вылас, мый оз кажитчы крестьянинлы. Газетлы оз ков зільны «выліті лыйлыны», оз ков став газетсӧ тыртны гырысь «политика» статьяясӧн, унджык колӧ сюйны сиктса олӧм йылысь.
Оз ков газетлы кольччыны олӧмысь.
Колӧ олӧм бӧрсяыс вӧтчыны, мунны олӧмыскӧд ӧтпырйӧ, веськӧдлыны олӧмнас. Сёрмӧдчыны гижӧдъясӧн ньӧти оз позь. Сӧмын сэки газетыд лоӧ бур, сӧмын сэки сійӧс медъёна кутасны лыддьыны. Шуам, кутшӧмкӧ сиктса удж нуӧданінын мыйкӧ нелючки вӧчисны. Крестьяна сёрнитӧны сы йылысь. Газетын та йылысь колӧ нин лоны, колӧ сылы висьтавны крестьяналы: мый вӧсна, код боксянь лои нелючкиыс, кыдзи колӧ веськӧдны сійӧ нелючкисӧ, сідз водзӧ. Шуам, крестьянаӧс лёк йӧз велӧдӧны нуӧдны кутшӧмкӧ омӧль удж, шуасьӧны власьт вылӧ. Газетлы колӧ гӧгӧрбок та йылысь гижны, вермавны лёк уджсӧ, шуасьӧмъяссӧ. Либӧ сиктын колӧ нуӧдны кутшӧмкӧ удж (восьтыны тӧвариществояс, кооператив, ёнмӧдны найӧс, лӧсьӧдны ОДВФ, МОПР ячейкаяс). Стенӧ ӧшӧдан газетлы колӧ водзвыв нин та йылысь гижны крестьяналы, висьтавны налысь коланлунсӧ.
Нарошнӧ тӧдчана удж нуӧдігӧн (кампании), революция праздникъяс дырйи газетлы оз жӧ ков кольны гижтӧг сиктса олӧм йылысь.
Кутшӧм кывйӧн газет гижны.
Миян уна стенӧ ӧшӧдан газетъяс радейтӧны на гижны крестьяналы гӧгӧрвотӧм кывъясӧн, радейтӧны «чегъявны» иностраннӧй кывъясӧн. Ӧні гырысь газетъяс татшӧм гӧгӧрвотӧм кывъяссӧ зільӧны шыбитны. Дерт нин, стенӧ ӧшӧдан газетлы колӧ эновтчыны медвойдӧр. Дерт, коми сиктын медбур, медлӧсьыд гижны газетъяс коми кывйӧн.
Коммунист ячейка стенӧ ӧшӧдан газетын.
Коммунист ячейкалы (кӧні абу сійӧ — комсомол ячейкалы) колӧ веськӧдлыны, колӧ чуйдӧдны, индыны сямсӧ стенӧ ӧшӧдан газетын. Сы вӧсна «Газетлы отсасян» кружокӧн газет лэдзан редакционнӧй коллегияас колӧ пуктыны ячейкасянь тшӧтш партийнӧй мортӧс. Сӧмын ячейкалы колӧ сетны сэтшӧмӧс, мед сійӧ мортыс кужӧ вӧлі уджавны стенӧ ӧшӧдан газетын.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1971 году, соответственно эта работа выйдет в России в общественное достояние в 2042 году.
The author died in 1971, so this work is also in the public domain in countries and areas (outside Russia) where the copyright term is the author's life plus 50 years or less. |