Геройлӧн гортӧ воӧм
Помасис медбӧръя бой.
Гымалӧ победа.
Славнӧй воин, том герой,
Полкысь гортӧ мӧдӧ.
Тышъяс дырйи сійӧ пыр
Вӧлі повтӧм мортӧн.
Морӧс вылас, дзирдӧн тыр,
Кык медаль да орден.
Со и паськыд Коми му
Син водзас нин сылӧн.
Лӧня шывгӧ Эжва ю,
Вӧрлӧн шыыс кылӧ.
Со и рӧднӧй сиктыс, со!
Том геройлы долыд.
Аслас гортӧ куим во
Сійӧ ӧд эз волы.
Кутлӧ сійӧс пӧрысь бать.
Мам да дедӧ Петыр.
Кутлӧ, радлӧ сынисадь
Даша — муса гӧтыр.
Шуис батьыс: «Венід ті
Лютӧй супостатӧс.
Чолӧмалам тэнӧ ми —
Сӧветскӧй салдатӧс!
Тані ми, колхознӧй мир,
Вермӧмӧн жӧ петім.
Краснӧй Армиялы пыр
Ыджыд отсӧг сетім!»
Воча шуис том герой:
«Та йылысь ме тӧда.
Став народкӧд лун и вой
Дорим ми победа.
Ӧні бара мирнӧй труд
Сӧвет муын пуӧ.
Ӧні бара миян шуд
Тувсов ва моз туӧ!»
Том геройлы долыд зэв,
Рӧднӧй гортын гажа.
Сійӧс окалӧ сё пӧв
Муса гӧтыр Даша.
1946 во.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1951, so this work is also in the public domain in other countries and areas where the copyright term is the author's life plus 72 years or less (if applicable), or the copyright term is 77 years or less since publication (if applicable). |
|