Небыт тӧл вешаське,
Каньылля вераське
Вож шудӥсь, кисьтаськись
Удалтэм ю-нянен.
Ӵуж шунды утчаське,
Ӵыдонтэм синмаське
Вож буртчин кадь дӥсен
Дӥсяськем музъемлы.
Кин уг гажа меда
Та шулдыр вакытэз?
Кин уг бича меда
Чебересь сяськаез?
Кин уг кылзы меда
Турагай кырӟамез?
Кинлэн-о уг поты
Нюлэскын ветлэмез?
Нош кӧня шулдырез
Жыль бызись шур вулэн.
Шумпотон — пыласькон —
Юлтошез мугорлэн.
Тӥнь соин отрядэн
Кырӟаса ӵош горнэн,
Вордӥське ке нунал,
Потӥськом ми кыре.
Табере нюлэскы,
Возь вылэ, шур дуре,
Шулдыресь гуръёсмы
Шуккисько омыре.
Бубыли-кибыос,
Турын-куар, сяськаос,
Кин мае учыртэ,
Бичаськом школалы.
Гужем куазь нуналъёс,
Кырӟанъёс, шудонъёс,
Узыос, борыос,
Эмезьёс — милемлы.
Шунды, ву но луо
Ми понна юлтошъёс:
Уяськом ву вылын,
Зымиськом ву пыдсы.
Чорыгъёс, эбекъёс
Милесьтым кышкало.
Ву гыа, пальккаське,
Шундыя кисьтаське.
Потӥськом шур дуре,
Выдӥськом луое,
Ӵуж шунды мугормес
Нуныя, ӟгыръя.
Ӵыдонтэм яратском
Тӥнь соин гужемез.
Шудӥськом, кырӟаськом,
Юнматском кужыммес.
Небыт тӧл вешаське,
Каньылля вераське
Вож шудӥсь, кисьтаськись
Удалтэм ю-нянен.
Ӵуж шунды утчаське,
Ӵыдонтэм синмаське
Вож буртчин кадь дӥсен
Дӥсяськем музъемлы.
