Гӧрдармеечьяслӧн юӧр
Воас татчӧ гортсянь юӧр да сьӧлӧмыд быдсӧн гудыртчас. Изьвасянь гижӧны, Краснобор вӧлӧсьтын пӧ исполком омӧля уджалӧ. Татысянь ми ыстылім гижӧд налог чинтӧм йылысь Гӧрд армия семьялы. Сійӧ гижӧд вылад абу и видзӧдлӧмаӧсь. Ӧні эськӧ миян исполкомъясын уджалӧны нин гӧль йӧз, да буракӧ важ полӧмыс абу на вошӧма. Мӧд-кӧ, сар дырйиыд велалӧмаӧсь вина юны да ӧнӧдз оз вермыны эновтчыны — пуӧны самӧкур. Рытъяснас пӧ исполкомын уджалысьяс котӧртӧны — оз-ӧ кодкӧ юктав курыд ванад. Гӧль мортыд, дерт, оз вермы самӧкуртӧ пуны, сы понда сы вылӧ немтор и видзӧдлыны, нинӧмла сы дінӧ и мунны. Озыр мортыд кужӧ йӧзтӧ пӧрйӧдлыны: самӧкурнад юкталас да сы ног и вӧчасны. Колӧ нин садьмыны исполкомса уджалысьяслы — думыштӧй налог чинтӧм йылысь!
Тані ми газетысь лыддям, дай военком висьталӧ, позьӧ пӧ чинтыны, а гортын гижӧд вылад оз и видзӧдлыны. Неуна бурджыка колӧ уджавны. Кыдзи тӧварищ Ленин висьталіс, сы ногӧн колӧ уджавны, рабочӧй-крестьяна понда старайтчыны; оз кӧ вунӧдны тӧварищ Ленинлысь висьталӧм кывъяссӧ кежавлытӧг т. Ленин туй кузя колӧ мунны, озыр морт вылӧ видзӧдлытӧг.
Миян исполкомад уджалысь йӧзыд сэтшӧма на уджалӧны: гӧрдармеечлӧн батьыс мунас юавны налог йылысь, немтор оз висьтавны, висьталӧм пыдди кутасны ваксьыны.
Учеб. воен. хоз. команды красноармеец
Канев Павел.
Терентьев Харлампий.
РЕДАКЦИЯСЯНЬ. Збыль-ӧ тайӧ тадзи? Ӧнӧдз на ӧмӧй вӧлӧсьтъясын оз тӧдны, кыдзи колӧ видзӧдны гӧрдармеечьяс семья вылӧ? Тайӧ гижӧдыс — абу нин первой, уна гӧрдармеечьяс норасьӧны асланыс волисполкомъяс вылӧ та йылысь жӧ. Колӧ бурджыка уджавны.
Сэсся ещӧ колӧ пасйыштны: тайӧ письмӧсӧ ыстӧмаӧсь комиӧн, ми весиг ньӧти эгӧ шыльӧдӧ — кыдзи гижӧма, сідзи и лэдзам. Позьӧ аддзыны: изьваса кужӧны зэв бура комиӧн гижны.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 98 years or less since publication. |
|