Гӧрысь-кӧдзысь да заводса
Ӧти рытӧ Майбыров тӧдса уджалыськӧд самӧвар сайын сёрнитісны революция йылысь.
— Куим во меным лои воюйтны сар дырйиыд на. Ёна дӧзмылі гуясад пукалӧмысь. Йӧзыд лыд ни тшӧт уси, доймаліс. Гортысь некутшӧм юӧр оз волывлы. Волас кӧ вӧлі, нӧшта ёнджыка сьӧлӧмыд дзугыльтчас. Гижӧд сертиыд гортса олӧмыд ӧтарӧ гӧльмӧ, киссьӧ, семьяыд тшыгъялӧ. Видзӧдан да, озыръясыд мый вермӧны война помсьыд озырмӧны, зепнысӧ тыртӧны, йӧзтӧ гӧльмӧдӧны. Сӧмын революцияыд мездіс, личӧдіс миянӧс. Регыд тай вежсис гӧль йӧзыдлӧн олӧмыс, мыйӧн сартӧ-помещикъястӧ вӧтлісны. Ӧні со мортногса олӧм нин кутіс миян кыптыны.
Тадзи висьтавліс Майбыров.
— Миян олӧмыд, уджалысьясыдлӧн, чайтан, бур вӧлі капиталистъяс дырйиыд? — шуӧ уджалысь: — тіян дорысь омӧль вӧлі. Водз асывсянь войӧдз мырсян, уджалан, адын моз. Со ачыд аддзылін уджсӧ миянлысь. Капиталистыд, пабрик кӧзяиныд сэки жӧ ветлӧдлӧ, гуляйтӧ, кытчӧ гажыс петӧ. Сёйӧ-юӧ, оз тӧд, кытчӧ озырлунсӧ воштыныс. Пабрик-заводса уджалысьяс нэм чӧжныс озырмӧдісны капиталистъясӧс. Мыйла нӧ сідз? Пабрик-заводыд ӧд сылӧн аслас. Кутан кӧ сыкӧд вензьыны, регыд тэнӧ и вӧтлас: «Мӧдӧс пӧ медала». Поводнӧй чераньясӧн вӧліны озыръясыд. Став виртӧ, вемтӧ уджалысьясыдлысь нёнялісны. Пабрик-заводса уджалысь некор оз вунӧд ассьыс ловзян-мезман лунсӧ — Октябрса революцияӧс.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 97 years or less since publication. |
|