Дзоридз (Тимушев Анисим Петрович)

by Тимушев Анисим Петрович

Туй бокын быдмис зэв мича дзоридз,
Ветлысьлысь, мунысьлысь петкӧдліс веж.
Мичаа копрасис улӧ да улӧдз,
Окаліс унаысь мулысь кын эж.
Эз повлы кӧдзыдысь, пургаысь, тӧлысь,
Эз кельдыв войясӧ, кор усьӧ пуж.
Паськавны, пушкыртны морт эз вӧв олысь —
Лунысь-лун пыдӧджык сюйис пыр вуж.
Челядьяс, гырысьяс радлӧны быдӧн:
— Аддзанныд, дзоридзным лунысь-лун ён...
Эштӧдіс дзоридзлысь олӧмсӧ рытын
Нем уджтӧм, шлёндайтысь ӧти том зон.
Нетшыштіс, новлӧдліс час-мӧд ас киас,
Нямраліс, пыдзраліс — чукыртчис сырк...
Корисны кевмӧмӧн зонмыдлысь нывъяс —
Лӧг-лёкӧн ва вылӧ дзоридзӧс — шурк!
Шемӧсӧсь лоины видзӧдысь нывъяс,
Сӧмын тай недыр мысьт шуисны: „ок!“...
Дзоридзӧс босьтісны Эжвалӧн гыяс —
Койисны, резісны дзоридзлысь бок.
Эз тай дыр дзоридзыд ва вылын бовъяв;
Эз тай дыр ва вылад долыдмӧд син;
Эз тай дыр дзодзӧгӧн, уткаӧн уяв:
Дзирсмуні — корсис пыр ва пыдӧс ин.
Зырӧдіс корсьысьны пыжаяс сюся,
Пелысӧн шердйӧны Эжвалысь гы,
Сӧмын тай Эжвалӧн, мый босьтас гуся,
Оз лэдз ни, оз сет ни пытшкӧссянь шы.
Синваяс дольсъясьӧ челядьлӧн, нывлӧн:
— Мыйла нӧ дзоридзсӧ шыбитін, зон?
Мыйла нӧ зумыштчин, он шыась — кылан?
Он тай куж мичлунлы пуктыны дон...
Сьӧлӧмъяс типкӧны, гымгӧны шога.
Дзоридзлысь вӧйӧмсӧ видзӧдӧ йӧз.
Ва дорӧ чукӧртчис, код вӧлі кока,
Синъясныс дульсмӧма быдӧнлӧн — лӧз.
— Мыйла нӧ ызгӧны тан? — Горӧдіс кодкӧ. —
Туйдорса дзоридзӧс пӧдтісны со.
Ланьтісны сёрнияс. Эжва гы жботкӧ:
„Татшӧмыд тіянлы мӧдысь оз ло“.
Бӧръяысь сявкнитіс югӧрсӧ шонді,
Исковтіс вӧр сайӧ — сайӧдіс бан.
Му эжсӧ, вӧр-васӧ дугдіс — оз шонты,
Войтырлысь сьӧлӧм ни, синсӧ оз ян.
Сьӧлӧмъяс регыд тай кӧдзалі йӧзлӧн —
Гортъясӧ кыссявны пондісны — рув.
Том йӧз, ми шуам йӧзыслы кывмӧн:
— Мед эськӧ дзоридзыд дыр на эз кув...