Житїѧ̑ ст҃ы́хъ ѿ ст҃а́гѡ дими́трїа росто́вскагѡ/І҆ꙋ́лїй/а҃і

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←І҆ꙋ́лїа і҃

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а і҆ꙋ́лїа въ а҃і де́нь

І҆ꙋ́лїа в҃і→

[…] […] […]

Въ то́йже де́нь житїѐ и҆ Ꙋ҆спе́нїе
ст҃ы́ѧ првⷣныѧ вели́кїѧ кн҃ги́ни рѡссі́йскїѧ ѻ҆́льги, нарече́нныѧ во ст҃о́мъ кр҃ще́нїи є҆ле́ны,
ба́бы вели́кагѡ кн҃зѧ влади́мїра. ѿ рꙋкопи́сныхъ дре́внихъ че́тьихъ, и҆ лѣтопи́сцєвъ разли́чныхъ, со́бранное сокраще́ннѡ.

Ѻ҆́ льга бл҃же́ннаѧ а҆́ки денни́ца въ землѝ рѡссі́йстѣй, те́мною і҆дѡлобѣ́сїѧ но́щїю пормаче́нной бы́вшей, возсїѧ̀ пред̾ наста́тїемъ пресвѣ́тлагѡ вѣ́ры ст҃ы́ѧ днѐ, со́лнцемъ хрⷭ҇то́мъ просвѣща́емагѡ. Бѧ́ше же та̀ ѿ ро́да наро́чита, пра́внꙋка госто́мысла и҆мени́та мꙋ́жа, и҆́же пре́жде кнѧзе́й рѡссі́йскихъ въ вели́комъ новѣ́градѣ нача́лствоваше, є҆гѡ́же совѣ́томъ при́званъ бы́сть ѿ варѧ́гъ на вели́кое рѡссі́йское кнѧже́нїе рꙋ́рикъ съ бра́тїею. Роди́сѧ же ѻ҆́льга въ ве́си, нарица́емой вы́бꙋтской, ꙗ҆́же и҆ ны́нѣ є҆́сть близ̾ гра́да пско́ва, гра́да же тогѡ̀ во ѻ҆́ное вре́мѧ є҆щѐ не бѣ̀. и҆ воспита́сѧ ѻ҆трокови́ца а҆́ще и҆ во і҆дѡлопокло́нническомъ нече́стїи, ѻ҆ба́че въ до́бромъ ѿ честны́хъ роди́телей наказа́нїи: бѧ́ше бо ѕѣлѡ̀ цѣломꙋ́дренна и҆ премꙋ́дра, ꙗ҆́коже а҆́бїе предлежа́щее ꙗ҆ви́тъ сло́во. Вели́кїй кнѧ́зь рѡссі́йскїй рꙋ́рикъ ѹ҆мира́ѧ, ѡ҆ста́ви по себѣ̀ сы́на и҆́горѧ, во ѻ҆́троческихъ лѣ́тѣхъ бы́вшаго, є҆го́же ꙗ҆́кѡ ѕѣлѡ̀ мла́да, врꙋчѝ съ кнѧже́нїемъ сро́дникꙋ своемꙋ̀ ѻ҆́легꙋ до во́зраста. Ѻ҆́легъ же собра́въ во́євъ мно́гихъ, по́йде къ кі́евꙋ, и҆мы́й съ собо́ю наслѣ́дника кнѧже́нїѧ, и҆́горѧ ма́лаго. И҆ ѹ҆би́въ та́мѡ ѻ҆ско́лда и҆ ди́ра, прїѧ̀ кі́евъ въ свою̀ ѻ҆́бласть, и҆ бы́сть є҆диновласти́тель всѣ́хъ рѡссі́йскихъ стра́нъ, хранѧ́ то вели́кое кнѧже́нїе и҆́горю рꙋ́риковичꙋ племѧ́нникꙋ своемꙋ̀. и҆ бѧ́ше и҆з̾ нача́ла ѻ҆́во въ кі́евѣ, ѻ҆́во же въ вели́комъ новѣ́градѣ ѹ҆правлѧ́ѧ держа́вꙋ. а҆ кнѧ́зь и҆́горь ю҆́ношескагѡ доше́дъ во́зраста, въ ло́вѣхъ ѹ҆пражнѧ́шесѧ. слꙋчи́сѧ же є҆мꙋ̀ ѡ҆кре́стныѧ гра́ды и҆ вє́си ѻ҆́бласти своеѧ̀ проходѧ́щꙋ, и҆ ло́вами ѹ҆тѣша́ющꙋсѧ, бы́ти въ то́й странѣ̀, и҆дѣ́же ны́нѣ сꙋ́ть предѣ́лы пско́ва гра́да. та́мѡ близ̾ предрече́нныѧ ве́си вы́бꙋтскїѧ лови́твꙋ дѣ́ѧ, ѹ҆зрѣ̀ ѻ҆б̾онꙋ̀ странꙋ̀ рѣкѝ жела́нный себѣ̀ ло́въ, но не можа́ше рѣкѝ прейтѝ: поне́же не бѧ́ше ладїѝ. и҆ пома́лѣ ви́дѣ нѣ́коего ю҆́на по рѣкѣ̀ въ ладі́йцѣ пловꙋ́ща, того̀ къ бре́гꙋ призва́въ, повелѣ̀ себѐ за рѣкꙋ̀ привезтѝ. Пловꙋ́щымъ же и҆̀мъ, воⷥзрѣ̀ и҆́горь на лицѐ гребца̀ ѻ҆́нагѡ, и҆ позна̀, ꙗ҆́кѡ не ю҆́ноша, но дѣви́ца є҆́сть: бѧ́ше бо та̀, ѡ҆ не́йже на́мъ предлежи́тъ сло́во, блаже́ннаѧ ѻ҆́льга, лице́мъ ѕѣлѡ̀ прекра́сна. и҆ а҆́бїе ѿ видѣ́нїѧ є҆ѧ̀ ѹ҆ѧзви́сѧ се́рдцемъ, и҆ разгорѣ́сѧ къ не́й по́хотїю, и҆ нача̀ глаго́лати словеса̀ любодѣ́йнаѧ, къ скве́рномꙋ смѣше́нїю прелща̑ющаѧ. ѻ҆на́ же разꙋмѣ́вши смꙋще́нїе по́мысла є҆гѡ̀, и҆ по́хотное разжже́нїе, нача̀ къ немꙋ̀ не ю҆́ношескимъ но ста́рческимъ ѹ҆мо́мъ, пресѣца́ѧ бесѣ́дꙋ є҆гѡ̀, глаго́лати: вскꙋ́ю смꙋща́ешисѧ ѽ кнѧ́же, тще́тнаѧ помышлѧ́ѧ: ѿ слове́съ бо твои́хъ ꙗ҆́вѣ є҆́сть неподо́бное жела́нїе твоѐ, ꙗ҆́кѡ прꙋга́тисѧ мнѣ̀ хо́щеши, є҆́же не бꙋ́ди: а҆́зъ бо сегѡ̀ ни слы́шати хощꙋ̀. Но молю́ тѧ господи́не, послꙋ́шай мѧ̀, и҆ ѿложѝ ѿ себѐ сїѧ̑ нелѣ́паѧ и҆ стꙋ́днаѧ помышлє́нїѧ, за нѧ́же срамлѧ́тисѧ потре́бно: воспомѧни́ же и҆ размы́сли въ тебѣ̀, ꙗ҆́кѡ кнѧ́зь є҆сѝ, а҆ кнѧ́зю подоба́етъ бы́ти а҆́ки свѣти́лꙋ, всѣ̑мъ во ѻ҆́бразъ дѣ́лъ до́брыхъ, ꙗ҆́кѡ прави́телю и҆ сꙋдїѝ зако́нѡвъ человѣ́ческихъ, ты́ же въ каково̀ ны́нѣ впа́сти хо́щеши беⷥзако́нїе; и҆ а҆́ще са́мъ бꙋ́деши творѧ́й ѕла̑ѧ по́хотїю нечи́стою побѣжде́нный: то̀ ка́кѡ возмо́жеши и҆ны̑мъ возбранѧ́ти ѕлотворє́нїѧ, и҆ сꙋди́ти пра́вѡ держа́вѣ твое́й; ѡ҆ста́ви ѹ҆́бѡ таково́е твоѐ стꙋ́дное вожделѣ́нїе, и҆́мже честні́и человѣ́цы гнꙋша́ютсѧ, и҆ тебѐ, а҆́ще и҆ кнѧ́зь є҆сѝ, мо́гꙋтъ возненави́дѣти, и҆ посмѣва́тисѧ стꙋдодѣѧ́нїю твоемꙋ̀. Вѣ́ждь же и҆ сїѐ, ꙗ҆́кѡ а҆́ще и҆ є҆ди́нꙋ мѧ̀ здѣ̀ ви́диши, и҆ проти́вꙋ твоеѧ̀ си́лы не́мощнꙋ, ѻ҆ба́че не ѡ҆долѣ́еши мѧ̀. а҆́ще же бы и҆мѣ́ла ѿ твоегѡ̀ наси́лованїѧ ѡ҆долѣ́ема бы́ти, то̀ а҆́бїе глꙋбина̀ рѣкѝ сеѧ̀ защище́нїе мнѣ̀ бꙋ́детъ: лꙋ́чше бо мѝ є҆́сть въ чистотѣ̀ ѹ҆мре́ти, и҆ во́дꙋ сїю̀ и҆мѣ́ти вмѣ́стѡ гро́ба, не́жели дѣ́вствꙋ моемꙋ̀ бы́ти порꙋ́ганꙋ. Такѡва́ѧ и҆ и҆́на мнѡ́жайшаѧ ѡ҆ цѣломꙋ́дрїи словеса̀ ко и҆́горю и҆зречѐ бл҃же́ннаѧ ѻ҆́льга, ѻ҆́нъ же сїѧ̑ слы́шавъ, прїи́де въ чꙋ́вство, и҆ ѹ҆стыдѣ́сѧ своегѡ̀ безꙋ́мїѧ, и҆ ничто́же проти́вꙋ ѿвѣща́ти могі́й, молча́ше срамлѧ́ѧсѧ, и҆ та́кѡ рѣкꙋ̀ преплы́вше, разлꙋчи́шасѧ, и҆ ѹ҆дивлѧ́шесѧ кнѧ́зь таково́мꙋ бл҃горазꙋ́мїю и҆ цѣломꙋ́дрїю ю҆́ныѧ дѣви́цы. Сѐ нача́токъ до́бръ, и҆ ѹ҆дивле́нїѧ досто́инъ бл҃же́нныѧ ѻ҆́льги, ꙗ҆́кѡ є҆щѐ не вѣ́дꙋщи бг҃а, нижѐ за́пѡвѣди є҆гѡ̀ слы́шавши, тако́въ ѡ҆ цѣломꙋ́дрїи показа̀ по́двигъ, дѣ́вственнꙋю свою̀ чистотꙋ̀ ѻ҆па́снѡ хранѧ́щи: и҆ премꙋ́дрыми словесы̀ ѿ мꙋжеꙋ́мнагѡ смы́сла и҆зноси́мыми по́хотное свирѣ́пство ю҆́нагѡ кнѧ́зѧ ѹ҆кротѝ, и҆ приведѐ того̀ въ чꙋ́вство.

По се́мъ не въ до́лгомъ вре́мени кнѧ́зь и҆́горь съ сро́дникомъ свои́мъ ѻ҆́легомъ и҆́де па́ки въ кі́евъ, та́мѡ хотѧ́ще ѹ҆стро́ити престо́лъ вели́кагѡ кнѧже́нїѧ всерѡссі́йскагѡ, и҆ содѣ́лаша та́кѡ. сѣдо́ша бо кнѧ́жествовати въ кі́евѣ, а҆ въ вели́комъ новѣ́градѣ, ꙗ҆́коже и҆ в про́чїихъ вели́кихъ рѡссі́йскихъ градѣ́хъ намѣ́стникѡвъ свои́хъ посажда́хꙋ. Бы́сть же вре́мѧ вели́комꙋ кнѧ́зю и҆́горю, да сочета́етсѧ бра́кꙋ, и҆ мнѡ́гимъ дѣви́цамъ кра́снымъ и҆збира́емымъ бы́вшымъ, ка́ѧ бы ѿ ни́хъ досто́йна была̀ ца́рскагѡ черто́га: не возлюби́сѧ кнѧ́зю ни є҆ди́на, но воспомѧнꙋ́въ цѣломꙋ́дреннꙋю и҆ прекра́снꙋю ѻ҆́льгꙋ, а҆́бїе по неѧ̀ сро́дника своего̀ ѻ҆́лега посла̀, и҆ съ вели́кою че́стїю приведѐ ѻ҆́нꙋю въ кі́евъ, и҆ сочета́сѧ є҆́й зако́ннымъ бра́комъ. По се́мъ сро́дникъ и҆ пѣ́стꙋнъ кнѧ́зевъ ѻ҆́легъ ѹ҆́мре, и҆ нача̀ са́мъ и҆́горь є҆диновласти́тель бы́ти во все́й землѝ рѡссі́йской, и҆ и҆мѣ́ѧше и҆з̾ нача́ла крѣ́пкїѧ бра̑ни съ ѻ҆кре́стными наро́ды. Ходи́лъ же и҆ на ца́рьградъ, и҆ мнѡ́гїѧ гре́ческїѧ страны̑ плѣни́въ, и҆ да̑ни на гре́кѡвъ наложи́въ, возврати́сѧ съ коры́стїю и҆ сла́вою, и҆ живѧ́ше про́чее въ тишинѣ̀, ми́ръ и҆мѣ́ѧ со всѣ́ми спредѣ́лными страна́ми. Роди́сѧ же є҆мꙋ̀ ѿ ѻ҆́льги сы́нъ свѧтосла́въ, и҆́же по то́мъ бы́сть ѻ҆те́цъ вели́кагѡ кнѧ́зѧ влади́мїра, и҆ самодержа́вствовавше и҆́горь на вели́комъ кнѧже́нїи бл҃гополꙋ́чнѡ, престо́лъ и҆мѣ́ѧ въ кі́евѣ. Бога́тство же є҆мꙋ̀ ѿвсю́дꙋ теча́ше преизоби́лнѡ: и҆́бо и҆ да́лнїѧ страны̑ да̑ни и҆ да́ры мнѡ́ги є҆мꙋ̀ даѧ́хꙋ. Та́же пости́же є҆го̀ кончи́на сицевы́мъ ѻ҆́бразомъ: поне́же ѹ҆жѐ ѹ҆праздни́лсѧ ѿ мно́гихъ бра́неі, и҆ ми́рное и҆мѣ́ѧше пребыва́нїе, восхотѣ̀ ѹ҆́бѡ ви́дѣти ѻ҆́бласть свою̀, и҆ нача̀ проходи́ти гра́ды и҆ страны̀ рѡссі́йскїѧ землѝ, и҆ ѻ҆бы́чныѧ ѿ ни́хъ да̑ни взима́ти. прїи́де же и҆ къ древлѧ́нѡмъ, и҆ воспомѧнꙋ̀ пре́жднюю ѕло́бꙋ и҆́хъ, ꙗ҆́кѡ въ нача́лѣ кнѧже́нїѧ є҆гѡ̀ ѿстꙋпи́ли ѿ негѡ̀ древлѧ́не, и҆ є҆два̀ бра́нїю па́ки є҆мꙋ̀ бы́ша покоре́ни: тогѡ̀ ра́ди ѹ҆сꙋгꙋ́би на ни́хъ да́нь, и҆ ѡ҆тѧготѝ и҆̀хъ. ѻ҆ни́ же ѡ҆печа́лившесѧ, совѣ́товаша съ кнѧ́земъ свои́мъ малди́томъ, и҆́же и҆ низки́нѧ нарица́шесѧ, и҆ глаго́лаша: а҆́ще во́лкъ пова́дитсѧ ко ѻ҆вца́мъ, то̀ по є҆ди́ноі ѿносѧ̀, всѐ ста́до поѧ́стъ, доне́лѣже не ѹ҆бїю́тъ є҆го̀: си́це и҆ мы̀ а҆́ще не ѹ҆бїе́мъ и҆́горѧ, то̀ ѻ҆́нъ всѣ́хъ на́съ погꙋби́тъ. Та́кѡ совѣща́вшесѧ, и҆ска́хꙋ подо́бна вре́мене. И҆ є҆гда̀ кнѧ́зь и҆́горь прїѧ́тꙋю ѿ древлѧ́нъ да́нь ѿсла̀ въ кі́евъ, а҆ са́мъ є҆щѐ ѹ҆ ни́хъ ѡ҆ста́сѧ съ ма́лою дрꙋжи́ною, тогда̀ ѻ҆нѝ вре́мѧ себѣ̀ ѹ҆го́дное полꙋчи́вше, неча́ѧннѡ на него̀ нападо́ша, и҆ посѣко́ша дрꙋжи́нꙋ є҆гѡ̀, и҆ самого̀ ѹ҆бы́ша под̾ гра́домъ свои́мъ коросте́немъ, и҆ погребо́ша є҆го̀ та́мѡ. Таково̀ бы́сть сконча́нїе вели́кагѡ кнѧ́зѧ и҆́горѧ рꙋ́риковича, до́брагѡ землѝ рѡссі́йскїѧ владѣ́телѧ, ѻ҆кре́стнымъ же наро́дѡмъ стра́шнагѡ. Поживѐ на кнѧже́нїи по сме́рти пѣ́стꙋна своегѡ̀ ѻ҆́лега самодержа́вствꙋѧ три́десѧть два̀ лѣ́та.

Ѹ҆слы́шавши же вели́каѧ кнѧги́нѧ ѻ҆́льга въ кі́евѣ ѡ҆ ѹ҆бїе́нїю мꙋ́жа своегѡ̀, пла́касѧ по не́мъ ѕѣлѡ̀ съ сы́номъ свѧтосла́вомъ. Та́кожде и҆ всѝ лю́ди кі́евстїи пла́кахꙋ. А҆ древлѧ́не по ѹ҆бїе́нїи вели́кагѡ кн҃зѧ ве́лїе прїе́мше дерзнове́нїе, ѹ҆совѣ́товаша поѧ́ти кнѧги́ню ѻ҆́льгꙋ своемꙋ̀ кнѧ́зю малди́тꙋ низки́нѣ въ женꙋ̀, а҆ свѧтосла́ва наслѣ́дника и҆́горева ма́ла сꙋ́ща ѻ҆́трока та́йнѡ нѣ́какѡ ѹ҆мертви́ти, да та́кѡ кнѧ́зь и҆́хъ всеѧ̀ рѡссі́и бꙋ́детъ ѡ҆блада́тель. И҆ посла́ша неме́дленнѡ въ кі́евъ ладїѧ́ми мꙋже́й наро́читыхъ два́десѧть къ ѻ҆́льгѣ, ѻ҆́во молѧ́ще ѻ҆́нꙋю, да и҆зво́литъ кнѧ́зю и҆́хъ сопрѧщи́сѧ, ѻ҆́во же [а҆́ще бы не и҆зволѧ́ла] претѧ́ще, да и҆ по нꙋ́ждѣ бꙋ́детъ жена̀ владѣ́телю и҆́хъ. и҆ ше́дше пꙋте́мъ водны́мъ по́сланнїи мꙋ́жи, достиго́ша кі́ева, и҆ приста́ша къ бре́гꙋ. Слы́шавши же кнѧги́нѧ ѻ҆́льга ѡ҆ прише́ствїи и҆́хъ, призва̀ и҆̀хъ къ себѣ̀, и҆ речѐ къ ни́мъ: до́брѣ ли прїидо́сте го́сти честні́и; ѻ҆ни́ же реко́ша: до́брѣ прїидо́хомъ. речѐ кнѧги́нѧ: глаго́лите ѹ҆́бѡ, чесѡ̀ ра́ди къ на́мъ прїидо́сте; и҆ реко́ша мꙋ́жи: посла̀ на́съ древлѧ́нскаѧ землѧ̀ къ тебѣ̀, рекꙋ́щи си́це: да не гнѣ́ваешисѧ, ꙗ҆́кѡ мꙋ́жа твоего̀ ѹ҆би́хомъ: бѧ́ше бо мꙋ́жъ тво́й а҆́ки во́лкъ расхища́ѧ и҆ гра́бѧ, а҆ на́ши кнѧ́зи добрѝ сꙋ́ть, ꙗ҆́кѡ распространи́ша древлѧ́нскꙋю зе́млю, и҆ ны́нѣшнїй на́шъ кнѧ́зь лꙋ́чшїй є҆́сть па́че и҆́горѧ, кро́токъ, любо́венъ и҆ ми́лостивъ ко всѣ́мъ, мла́дъ лѣ́ты, и҆ лице́мъ красе́нъ, пойдѝ ѹ҆̀бо ты̀ за на́шего кнѧ́зѧ, да бꙋ́деши на́мъ госпожа̀, и҆ не то́кмѡ землѝ рѡссі́йскїѧ но и҆ на́шеѧ древлѧ́нскїѧ ѡ҆блада́телница. Ѻ҆́льга же ѹ҆таева́ѧ желѣ́нїе своѐ и҆ болѣ́знь серде́чнꙋю по мꙋ́жѣ, притво́рнѡ же лицѐ свѣ́тло ꙗ҆влѧ́ѧ и҆̀мъ, речѐ: любе́зна сꙋ́ть мнѣ̀ словеса̀ ва́ша: и҆́бо мнѣ̀ мꙋ́жа моего̀ ѹ҆жѐ не воскреси́ти, во вдовствѣ́ же пребыва́ти не безбѣ́дно є҆́сть, ни могꙋ̀, ꙗ҆́коже подоба́етъ ѹ҆правлѧ́ти толи́кое кнѧже́нїе жена̀ сꙋ́щи, а҆ сы́нъ мо́й є҆щѐ ма́лъ ѻ҆́трокъ є҆́сть, пойдꙋ̀ ѹ҆̀бо доброхо́тнѡ за кнѧ́зѧ ва́шего мла́да сꙋ́ща: и҆́бо и҆ а҆́зъ є҆щѐ не стара̀ є҆́смь. но и҆ди́те ны́нѣ почі́йте въ ладїѧ́хъ ва́шихъ, ѹ҆́тро же призовꙋ̀ ва́съ на пи́ръ че́стенъ, є҆го́же сотворю̀ ва́мъ, да всѝ ѹ҆вѣ́дѧтъ винꙋ̀ прише́ствїѧ ва́шегѡ, и҆ моѐ соизволе́нїе, и҆ по то́мъ и҆дꙋ̀ къ кнѧ́зю ва́шемꙋ. вы́ же, є҆гда̀ ѹ҆́тро прїи́дꙋтъ ѿ на́съ по́сланнїи зва́ти ва́съ къ на́мъ на пи́ръ, вѣ́ждьте, ка́кѡ и҆́мате соблюстѝ че́сть посла́вшагѡ ва́съ кнѧ́зѧ и҆ ва́шꙋ, да и҆́мже ѻ҆́бразомъ прїидо́сте къ кі́евꙋ, си́це и҆ къ пала́тѣ пи́рноі прїи́дете, въ ладїѧ́хъ носи́мїи ѿ кі́евлѧнъ на глава́хъ, ꙗ҆́кѡ да всѝ ви́дѧтъ ва́шꙋ че́стность, и҆ позна́ютъ мою̀ къ ва́шемꙋ кнѧ́зю любо́вь, є҆ѧ́же ра́ди ве́лїею че́стїю пред̾ людмѝ мои́ми почита́ю ва́съ. ѻ҆ни́ же ра́ди бы́ша, и҆ и҆до́ша въ ладїѝ своѧ̀. Кнѧги́нѧ же ѻ҆́льга мы́слѧше, каково́ю сме́ртїю погꙋби́ти и҆̀хъ, мстѧ́щи за ѹ҆бїе́нїе мꙋ́жа своегѡ̀. и҆ повелѣ̀ въ тꙋ̀ но́щь и҆скопа́ти ꙗ҆́мꙋ глꙋбо́кꙋ во дворѣ̀ кнѧ́жемъ, и҆́же бѣ̀ внѣ̀ гра́да, и҆дѣ́же и҆ пала́та бѧ́ше прекра́сна: та́мѡ бо сла́вномꙋ пи́рꙋ гото́вѧшесѧ мѣ́сто. и҆ бы́вшꙋ ѹ҆́трꙋ, посла̀ кнѧги́нѧ честны́ѧ мꙋ́жы зва́ти сва́тѡвъ на пи́ръ. ѻ҆ни́ же ꙗ҆́кѡ безꙋ́мнїи сѣдѧ́ще въ ладїѧ́хъ, глаго́лаша: мы̀ не по́йдемъ пѣ́ши, ни на ко́нѣхъ, ни на колесни́цахъ, но ꙗ҆́коже при́слани є҆смы̀ ѿ вели́кагѡ кнѧ́зѧ на́шегѡ въ ладїѧ́хъ, та́кѡ на́съ и҆ неси́те на глава́хъ ва́шихъ къ кнѧги́нѣ ва́шей. Кі́евлѧне же посмѣѧ́вшесѧ безꙋ́мїю и҆́хъ, реко́ша: кнѧ́зь на́шъ ѹ҆бїе́нъ є҆́сть, а҆ кнѧги́нѧ на́ша за ва́шего и҆́детъ кнѧ́зѧ, и҆ є҆смы̀ ны́нѣ ꙗ҆́кѡ нево́лны, твори́мъ ѹ҆̀бо повелѣ́нное на́мъ, и҆ посади́вше и҆̀хъ въ ма́лыѧ ладе́йцы по є҆ди́номꙋ, несо́ша дмѧ́щихсѧ и҆ гордѧ́щихсѧ. и҆ є҆гда̀ принесе́ни бы́ша на предрече́нный дво́ръ кнѧ́жїй, смотрѧ́щи на то̀ кнѧги́нѧ ѻ҆́льга и҆з̾ пала́ты, повелѣ̀ и҆̀хъ воврещѝ въ ꙗ҆́мꙋ глꙋбо́кꙋ, и҆́хъ ра́ди ѹ҆гото́ваннꙋю. и҆ прише́дши сама̀ къ ꙗ҆́мѣ, и҆ прини́кнꙋвши въ ню̀, воⷥзва̀, глаго́лѧ: ѹ҆го́дна ли ва́мъ є҆́сть че́сть сїѧ̀; ѻ҆ни́ же вопїѧ́хꙋ: ѽ го́ре на́мъ, и҆́горѧ ѹ҆би́хомъ, и҆ добра̀ не ѡ҆брѣто́хомъ, но па́че полꙋчи́хомъ ѕла̑ѧ. и҆ повелѣ̀ ѻ҆́льга засы́пати и҆̀хъ живы́хъ земле́ю въ то́й ꙗ҆́мѣ.

Сїѐ сотвори́вши вели́каѧ кнѧги́нѧ ѻ҆́льга, посла̀ ско́рѡ гонца̀ своего̀ къ древлѧ́нѡмъ, глаго́лѧ: а҆́ще пои́стиннѣ хо́щете за ва́шего кнѧ́зѧ поѧ́ти мѧ̀, то̀ посли́те ко мнѣ̀ люде́й мно́жайшихъ и҆ наро́читѣйшихъ па́че пе́рвыхъ, да съ че́стїю ведꙋ́тъ мѧ̀ къ кнѧ́зю ва́шемꙋ. пришли́те же и҆̀хъ неме́дленнѡ, пре́жде да́же не ѹ҆держа́тъ мѧ̀ кі́евстїи лю́дїе. Древлѧ́не же съ ве́лїею ра́достїю и҆ тща́нїемъ посла́ша къ не́й и҆зрѧ́днѣйшихъ мꙋже́й пѧтдесѧ́тъ, и҆̀же бѧ́хꙋ по кнѧ́зѣ нача́лнѣйшїи старѣ́йшины землѝ древлѧ́нскїѧ. и҆ є҆гда̀ ті́и къ кі́евꙋ прїидо́ша, повелѣ̀ кнѧги́нѧ ѻ҆́льга ѹ҆гото́вати и҆́хъ ра́ди ба́ню ве́лїю, и҆ посла̀ къ ни́мъ, молѧ̀ и҆̀хъ, да пе́рвѣе по трꙋдѣ̀ пꙋ́тьнемъ и҆змы́ютсѧ въ ба́нѣ и҆ почі́ютъ, по то́мъ къ не́й да прїи́дꙋтъ. ѻ҆ни́ же ра́дꙋющесѧ внидо́ша въ ба́ню. и҆ є҆гда̀ нача́ша мы́тисѧ, а҆́бїе приста́вленнїи на то̀ слꙋгѝ и҆звнѣ̀ ѹ҆тверди́ша крѣ́пкѡ двє́ри затворе́нныѧ, и҆ ѡ҆бложи́вше ба́ню соло́мою и҆ хвра́стїемъ, по повелѣ́нїю кнѧги́ни зажго́ша. и҆ сгорѣ́ша съ ба́нею всѝ велмо́жи древлѧ́нскїѧ и҆ слꙋгѝ и҆́хъ. и҆ па́ки посла̀ ѻ҆́льга гонца̀ своего̀ къ древлѧ́нѡмъ, возвѣща́ѧ ско́рое своѐ прише́ствїе къ кнѧ́зю и҆́хъ въ сꙋпрꙋ́жество, и҆ велѧ̀, да приꙋгото́вѧтъ медѡ́въ и҆ всѧ́кагѡ питїѧ̀ и҆ пи́щи на то́мъ мѣ́стѣ, и҆дѣ́же ѹ҆би́ша мꙋ́жа є҆ѧ̀, ꙗ҆́кѡ да прише́дши къ ни́мъ, пе́рвѣе мꙋ́жꙋ своемꙋ̀ пе́рвомꙋ [пре́жде втора́гѡ бра́ка] сотвори́тъ три́знꙋ [сі́есть, помина́нїе и пи́ръ по ѻ҆бы́чаю пога́нскомꙋ]: и҆ по то́мъ да бꙋ́детъ бра́къ. Древлѧ́не же семꙋ̀ ра́ди бы́ша, и҆ а҆́бїе всѧ̑ ѹ҆гото́ваша и҆з̾ѻби́лнѡ. Вели́каѧ же кн҃ги́нѧ ѻ҆́льга по ѡ҆бѣща́нїю своемꙋ̀ со мно́гими людмѝ не та́кѡ на бра́къ ꙗ҆́коже на бра́нь ѹ҆гото́ванными, по́йде къ древлѧ́нѡмъ. и҆ є҆гда̀ къ сто́лномꙋ и҆́хъ гра́дꙋ коросте́ню приближа́шесѧ, и҆зыдо́ша в̾ срѣ́тенїе є҆ѧ̀ древлѧ́не, ѹ҆краше́ни свѣ́тлыми ѻ҆де́ждами, ѻ҆́вїи на ко́нѣхъ, и҆ні́и же пѣ́ши, и҆ прїѧ́ша ѻ҆́нꙋю съ вели́кою ра́достїю и҆ съ весе́лїемъ. ѻ҆на́ же и҆́де пе́рвѣе на гро́бъ мꙋ́жа своегѡ̀, и҆ пла́касѧ над̾ ни́мъ пла́чемъ вели́кимъ. и҆ соверши́вши по дре́внемꙋ пога́нскомꙋ ѡ҆быкнове́нїю три́знꙋ и҆лѝ помина́нїе, повелѣ̀ над̾ гро́бомъ ѻ҆сы́пати моги́лꙋ вели́кꙋ, и҆ реко́ша къ не́й древлѧ́не: госпожѐ кнѧги́нѧ, мꙋ́жа твоего̀ ѹ҆би́хомъ, ꙗ҆́кѡ неми́лостивъ къ на́мъ бѧ́ше а҆́ки во́лкъ хи́щный, ты́ же ми́лостива є҆сѝ, ꙗ҆́коже и҆ на́шъ кнѧ́зь, и҆ поживе́мъ ны́нѣ во всѧ́комъ добрѣ̀. Ѿвѣща̀ къ ни́мъ ѻ҆́льга: нѣ́сть мнѣ̀ ѹ҆жѐ печа́ли ѡ҆ пе́рвомъ мꙋ́жѣ: соверши́хъ бо над̾ ни́мъ, ꙗ҆̀же подоба́ше соверши́ти, вре́мѧ же, да и҆дꙋ̀ на вторы́й бра́къ веселѧ́щисѧ ко кнѧ́зю ва́шемꙋ. та́же вопроша́хꙋ древлѧ́не ѡ҆ посла́хъ свои́хъ пе́рвыхъ и҆ вторы́хъ. ѿвѣща̀ и҆̀мъ кнѧги́нѧ: и҆́дꙋтъ по на́съ и҆ны́мъ пꙋте́мъ со всѣ́мъ мои́мъ бога́тствомъ. По се́мъ ѻ҆́льга ѿложи́вши плачє́вныѧ ѻ҆де́жды, ѡ҆блече́сѧ въ бра́чныѧ свѣ́тлыѧ, ꙗ҆́коже подоба́етъ кнѧ́жеской че́сти, и҆ показа́сѧ бы́ти ра́достна и҆ ве́села, и҆ повелѣ̀ древлѧ́нѡмъ ꙗ҆́сти и҆ пи́ти и҆ весели́тисѧ, свои́мъ же лю́демъ повелѣ̀, да слꙋ́жатъ древлѧ́нѡмъ, и҆ ꙗ҆дѧ́тъ съ ни́ми, но да не ѹ҆пива́ютсѧ. и҆ є҆гда̀ древлѧ́не всѝ ѹ҆пи́шасѧ, внеза́пꙋ повелѣ̀ кнѧги́нѧ лю́демъ свои́мъ, ѻ҆рꙋ́жїи на то̀ ѹ҆гото́ванными, мечы̀, ножы̀, и҆ ко́пїѧми и҆збива́ти древлѧ́нъ. и҆ падѐ и҆збїе́нныхъ, ꙗ҆́кѡ до пѧтѝ ты́сѧщъ и҆ вѧ́щше. Та́кѡ вели́каѧ кнѧги́нѧ ѻ҆́льга весе́лїе древлѧ́нъ раствори́вши кро́вїю, и҆ ѹ҆бїе́нїе ѿ ни́хъ мꙋ́жа своегѡ̀ ѿмсти́вши и҆̀мъ, возврати́сѧ въ кі́евъ.

Во второ́е же лѣ́то собра́вши ѻ҆́льга во́инственнꙋю си́лꙋ, по́йде на древлѧ́ны съ сы́номъ свои́мъ свѧтосла́вомъ и҆́горевичемъ, наставлѧ́ѧ є҆го̀ ко ѿмще́нїю ѻ҆ч҃ескїѧ сме́рти. И҆зыдо́ша же и҆ древлѧ́не проти́вꙋ и҆̀мъ съ нема́лою си́лою. и҆ сне́мшесѧ, би́шасѧ крѣ́пкѡ ѻ҆́бѣ страны̀, и҆ ѡ҆долѣ́ша кі́евлѧне древлѧ́нъ, и҆ гна́ша и҆̀хъ сѣкꙋ́ще да́же до сто́лнагѡ гра́да коросте́нѧ: и҆ затвори́шасѧ древлѧ́не во гра́дѣ свое́мъ, а҆ ѻ҆́льга ра́товаше на ни́хъ цѣ́лый го́дъ, стоѧ̀ под̾ гра́домъ неѿстꙋ́пнѡ. ви́дѧщи же ꙗ҆́кѡ не ѹ҆до́бно є҆́сть взѧ́ти гра́да ра́тными пристꙋ́пами, вдаде́сѧ премꙋ́драѧ кн҃ги́нѧ къ хи́тростномꙋ про́мыслꙋ, и҆ посла̀ къ затвори́вшымсѧ во гра́дѣ, глаго́лѧ: почто̀ безꙋ́мнїи хо́щете гла́домъ и҆змре́ти, не и҆зволѧ́юще мнѣ̀ покори́тисѧ, а҆ и҆ні́и ѹ҆жѐ всѝ гра́ды ва́ши мнѣ̀ покори́шасѧ, и҆ да́нь да́ша, и҆ пребыва́ютъ про́чее без̾ стра́ха во градѣ́хъ и҆ ве́сехъ, дѣ́лающе ни́вы своѧ̀. ѻ҆ни́ же реко́ша: хотѣ́ли бы и҆ мы̀ покори́тисѧ тебѣ̀, но бои́мсѧ да не мсти́ши на на́съ за кнѧ́зѧ своего̀. Ѻ҆́льга же па́ки посла̀ къ ни́мъ, глаго́лѧ: ѹ҆жѐ мсти́ла мно́гажды на старѣ́йшинахъ ва́шихъ и҆ на про́чїихъ, а҆ ны́нѣ не ме́сти, но покоре́нїѧ ва́шегѡ, и҆ да́ни тре́бꙋю. и҆ и҆зво́лиша древлѧ́не да́ти є҆́й да́нь, каковꙋ́ю сама̀ восхо́щетъ. Ѻ҆́льга же речѐ къ ни́мъ: вѣ́мъ, ꙗ҆́кѡ ны́нѣ ѡ҆бнища́сте ѿ бра́ней, и҆ не мо́жете мнѣ̀ да́ти да́ни ме́домъ, ни во́скомъ, ни ко́жами, нижѐ и҆ны́ми кі́ими и҆зрѧ́дными вещмѝ, не хощꙋ̀ ѹ҆̀бо и҆ а҆́зъ ѡ҆тѧготи́ти ва́съ бо́лшими да́нми, но ма́лꙋ нѣ́кꙋю да́нь дади́те мнѣ̀ въ зна́менїе ва́шегѡ покоре́нїѧ: дади́те по три го́лꙋбѧ, и҆ по три вра́бїѧ кі́йждо ѿ до́мꙋ своегѡ̀, и҆ довлѣ́етъ мнѣ̀ ви́дѧщей ва́ше покоре́нїе. Древлѧ́не же да́нь сїю̀ ни во что̀ вмѣни́ша, па́че же и҆ порꙋга́шасѧ ра́зꙋмꙋ же́нскомꙋ, и҆ а҆́бїе съ ве́лїимъ тща́нїемъ собра́вше ѿ коегѡ́ждо до́мꙋ по три го́лꙋбѧ и҆ вра́бїѧ, посла́ша къ не́й съ поклоне́нїемъ. И҆ речѐ ѻ҆́льга ко прише́дшымъ к не́й и҆з̾ гра́да мꙋжє́мъ: сѐ ѹ҆жѐ покори́стесѧ мнѣ̀ и҆ сы́нꙋ моемꙋ̀, живи́те ѹ҆̀бо въ ми́рѣ, а҆́зъ же заꙋ́тра ѿстꙋплю̀ ѿ гра́да ва́шегѡ, и҆ ѿидꙋ̀ во своѧ́ си: та́кѡ ѿпꙋстѝ мꙋже́й ѻ҆́ныхъ. и҆ возра́довашасѧ всѝ, и҆̀же во гра́дѣ, слышавше такѡва́ѧ словеса̀ кнѧги́ни. Ѻ҆́льга же раздадѐ пти̑цы во́ѧмъ свои́мъ, повелѣ́вши, да въ ве́черъ по́зденъ, къ коемꙋ́ждо го́лꙋбю и҆ вра́бїю, ѻ҆́гнь съ сѣ́рою въ ма́лыхъ пла́тахъ ѹ҆стро́енный привѧ́жꙋтъ, и҆ всѣ́хъ кꙋ́пнѡ на воздꙋ́хъ пꙋ́стѧтъ. Семꙋ́ же бы́вшꙋ, летѣ́ша пти̑цы ко гра́дꙋ, ѿонꙋ́дꙋже взѧ́ты бы́ша, и҆ влетѣ̀ кі́йждо го́лꙋбъ, въ гнѣздо̀ своѐ, и҆ кі́йждо вра́бїй въ мѣ́сто своѐ, и҆ а҆́бїе на мно́гихъ мѣ́стѣхъ возжже́сѧ гра́дъ. а҆ ѻ҆́льга въ то̀ вре́мѧ повелѣ̀ во́иннстѣй свое́й си́лѣ, ѿ всѣ́хъ стра́нъ пристꙋпи́ти ко гра́дꙋ и҆ ра́товати. лю́ди же гра́дстїи не могꙋ́ще стерпѣ́ти ѻ҆гнѧ̀, и҆з̾ гра́да бѣжа́ша, и҆ впа́дахꙋ въ рꙋ́цѣ сꙋпоста̑тъ свои́хъ, и҆ та́кѡ взѧ́тъ бы́сть гра́дъ, и҆ и҆збїе́но безчи́сленное мно́жество наро́да древлѧ́нскагѡ, и҆ні́и же съ жена́ми и҆ дѣтмѝ въ о҆гнѝ сгорѣ́ша, и҆ні́и въ рѣцѣ̀, ꙗ҆́же под̾ гра́домъ, и҆стопо́ша. въ то̀ вре́мѧ и҆ кнѧ́зь и҆́хъ древлѧ́нскїй поги́бе. а҆ и҆̀же ѡ҆ста́шасѧ жи́вы, ѿ тѣ́хъ множайшїи въ плѣ́нъ ѿведо́шасѧ: а҆ про́чїихъ послѣ́днѣйшихъ ѡ҆ста́ви кн҃ги́нѧ жи́ти на мѣ́стѣхъ и҆́хъ, да́нь тѧ́жкꙋю на ни́хъ наложи́вши. Си́це вели́каѧ ѻ҆́льга пресла́внѡ ѿмсти́ла древлѧ́нѡмъ сме́рть мꙋ́жа своегѡ̀, и҆ всю̀ древлѧ́нскꙋю зе́млю себѣ̀ покорѝ, и҆ къ кі́евꙋ съ торжество́мъ возврати́сѧ, и҆ ѹ҆правлѧ́ше всѣ́ми страна́ми рѡссі́йскїѧ держа́вы, не ꙗ҆́кѡ жена̀, но ꙗ҆́кѡ мꙋ́жъ си́ленъ и҆ разꙋ́менъ, мона́ршески владѣ́ющи, и҆ проти́вꙋ сꙋпоста́тѡвъ крѣ́пкѡ ра́тꙋющи. и҆ бы́сть врагѡ́мъ страышна, свои́мъ же лю́демъ люби́ма, ꙗ҆́кѡ добронра́вна, и҆ ми́лостива, никого́же ѡ҆би́дѧщаѧ, сꙋды̀ пра́ведны творѧ́щаѧ, наказа̑нїѧ съ милосе́рдїемъ налага́ющаѧ, дѡ́брымъ воздаю́щаѧ по́честь, ѕлы̑мъ стра́хъ, комꙋ́ждо по дѣлѡ́мъ и҆ досто́инствꙋ возмѣрѧ́ющаѧ, и҆ во всѣ́хъ дѣ́лѣхъ и҆ ѹ҆правле́нїѧхъ бл҃госмотрели́ва и҆ премꙋ́дра, є҆ще́ же и҆ ни́щыѧ и҆ ѹ҆бѡ́гїѧ и҆ скꙋ́дныѧ ѹ҆щедрѧ́ющаѧ, къ и҆́щꙋщымъ ми́лости бл҃гоприкло́нна, моле́нїй ско́рѡ слꙋ́шающаѧ, и҆ прошє́нїѧ пра́вєднаѧ и҆сполнѧ́ющаѧ. и҆ всѧ̀ дѣла̀ є҆ѧ̀, а҆́ще и҆ въ безвѣ́рїи пога́нскомъ твори́маѧ, бѧ́хꙋ ѹ҆гѡ́дна бг҃ꙋ, и҆ хрⷭ҇тїа́нскїѧ бл҃года́ти достѡ́йна. є҆ще́ бо по всѣ́мъ си́мъ и҆ житїѐ возде́жно и҆ цѣломꙋ́дренно и҆мѣ́ѧше: и҆́бо не восхотѣ̀ посѧгнꙋ́ти за ю҆на́го мꙋ́жа, но пребыва́ше во вдовствѣ̀ чи́стомъ, соблюда́ѧ ски́петръ мона́рхїи рѡссі́йской сы́нꙋ своемꙋ̀ цѣ́лъ да́же до во́зраста є҆гѡ̀. Возра́стшꙋ же и҆ возмꙋжа́вшꙋ сы́нꙋ є҆ѧ̀, врꙋчѝ є҆мꙋ̀ всѐ вели́кагѡ кнѧже́нїѧ ѹ҆правле́нїе, а҆ сама̀ ѿ всѣ́хъ попече́нїй и҆ мо́лвъ ѹ҆праздни́вшисѧ, живѧ́ше про́чи безпеча́лнѡ, ѿ бл҃готворе́нїй не престаю́щи.

Є҆гда́ же прибли́жисѧ вре́мѧ бл҃гопрїѧ́тно, въ не́же пребл҃гі́й бг҃ъ, рѡссі́анъ невѣ́рїемъ ѡ҆слѣпле́нныхъ хотѧ́ше просвѣти́ти свѣ́томъ ст҃ы́а вѣ́ры, и҆ въ позна́нїе и҆́стины привестѝ, и҆ на пꙋ́ть спасе́нїѧ наста́вити: бл҃гоизво́лилъ тогѡ̀ просвѣще́нїѧ нача́тки сотвори́ти немощны́мъ сосꙋ́домъ же́нскимъ, се́ю бл҃же́нною ѻ҆́льгою, на посрамле́нїе мꙋже́й жестосе́рдныхъ. ꙗ҆́коже бо пре́жде жена́ми мѷроно́сицами воскр҃се́нїе своѐ проповѣ́да, и҆ жено́ю є҆ле́ною цари́цею чⷭ҇тны́й, на не́мже распѧ́сѧ, крⷭ҇тъ ѿ нѣдръ земны́хъ всемꙋ̀ мі́рꙋ ꙗ҆̀вѝ, си́це и҆ по то́мъ въ землѝ рѡссі́йской ди́вною жено́ю, но́вою є҆ле́ною, кнѧги́нею ѻ҆́льгою, вѣ́рꙋ ст҃ꙋю насади́ти и҆зво́ли: ѡ҆брѣ́те бо ѻ҆́нꙋю сосꙋ́дъ и҆збра́́нъ прест҃о́мꙋ и҆́мени своемꙋ̀, ꙗ҆́кѡ да пронесе́тъ є҆̀ въ рѡссі́йскихъ страна́хъ. Возсїѧ̀ ѹ҆́бѡ въ сердцѣ̀ є҆ѧ̀ зарю̀ неви́димыѧ бл҃года́ти своеѧ̀, ѿверза́ѧ ѹ҆́мнаѧ є҆ѧ̀ ѻ҆чеса̀ къ позна́нїю и҆́стиннагѡ бг҃а, є҆го́же не зна́ѧше: ѹ҆же́ бо ѹ҆разꙋмѣ́ла пре́лесть и҆ заблꙋжде́нїе пога́нскагѡ нече́стїѧ, и҆ ꙗ҆́вственнѡ вѣ́дѧше то̀, ꙗ҆́кѡ і҆́дѡлы, и҆̀хже безꙋ́мнїи человѣ́цы почита́хꙋ, не сꙋ́ть бо́зи, но дѣ́ло рꙋ́къ человѣ́ческихъ бездꙋ́шное, чесѡ̀ ра́ди не то́кмѡ не почита́ше и҆̀хъ, но и҆ гнꙋша́шесѧ и҆́ми, пра́вагѡ же бг҃опочита́нїѧ, а҆́ки до́брый кꙋпе́цъ многоцѣ́ннагѡ би́сера, вседꙋ́шнѡ и҆ска́ше, є҆го́же и҆ ѡ҆брѣ́те си́це: смотре́нїемъ бж҃їимъ наставлѧ́ема, слы́ша ѿ нѣ́кїихъ, ꙗ҆́кѡ є҆ди́нъ є҆́сть бг҃ъ и҆́стинный, творе́цъ нб҃ꙋ и҆ землѝ и҆ всеѧ̀ тва́ри, въ него́же вѣ́рꙋютъ Гре́цы: и҆ кромѣ̀ тогѡ̀ нѣ́сть и҆на́гѡ бг҃а. ѻ҆на́ же и҆́стиннагѡ бг҃озна́нїѧ жела́нїемъ возбꙋжда́ема ꙗ҆́кѡ нелѣни́ва, восхотѣ̀ сама̀ и҆тѝ къ гре́кѡмъ, и҆ свои́ми ѻ҆чесы̀ ви́дѣти чи́нъ слꙋ́жбы хрⷭ҇тїа́нскїѧ, и҆ соверше́ннѡ ѹ҆вѣ́дати, ꙗ҆̀же ѡ҆ и҆́стинномъ бз҃ѣ. Пое́мши ѹ҆̀бо съ собо́ю нѣ́кїѧ ѿ рѡссі́йскихъ наро́читыхъ болѧ́ръ и҆ дворѧ́нъ по́йде со мно́гимъ и҆мѣ́нїемъ въ кораблѧ́хъ къ царю́градꙋ, и҆ прїѧ́та бы́сть та́мѡ съ вели́кою че́стїю ѿ царѧ̀ и҆ ѿ патрїа́рха, и҆̀мже и҆ да́ры мнѡ́ги, таковы́хъ ли́цъ достѡ́йныѧ, принесѐ, и҆ поꙋча́шесѧ та́мѡ вѣ́рѣ хрⷭ҇тїа́нской, по всѧ̀ днѝ послꙋ́шающи со ѹ҆се́рдїемъ слове́съ бж҃їихъ, и҆ присма́тривающисѧ красота́мъ цр҃ко́внымъ, пѣ́нїю же, и҆ всемꙋ̀ чи́нꙋ хрⷭ҇тїа́нскагѡ бл҃гоче́стїѧ: и҆ распалѧ́шесѧ сердцемъ въ любо́вь бж҃їю, вѣ́ровавши въ него̀ несꙋмнѣ́ннѡ, и҆ жела́ше прїѧ́ти ст҃о́е кр҃ще́нїе. Гре́ческїй же ца́рь въ то̀ вре́мѧ вдо́въ бы́вый, хотѧ́ше ѻ҆́нꙋю поѧ́ти себѣ̀ въ сꙋпрꙋ́гꙋ: ѻ҆́во бо красото́ю лица̀ є҆ѧ̀ побѣжда́шесѧ, ѻ҆́во же бл҃горазꙋ́мїемъ тоѧ̀, и҆ сла́вою, и҆ хра́бростїю, и҆ широто́ю держа́вы рѡссі́йскихъ стра́нъ возбꙋжда́шесѧ, и҆ речѐ къ не́й: досто́йна є҆сѝ ты̀ ѽ кнѧги́нѧ ѻ҆́льга хрⷭ҇тїа́нскою цари́цею бы́ти, и҆ съ на́ми кꙋ́пнѡ въ се́мъ сто́льномъ ца́рства на́шегѡ гра́дѣ ѡ҆бита́ти. и҆ глаго́лаше є҆́й ѡ҆ сꙋпрꙋ́жествѣ. ѻ҆на́ же ꙗ҆́влѧ́шесѧ бы́ти а҆́ки не ѿрица́ющаѧсѧ сꙋпрꙋ́жества царе́ва, ѻ҆ба́че пе́рвѣе кр҃ще́нїѧ просѧ́ше, гл҃ѧ: кр҃ще́нїѧ ра́ди ст҃а́гѡ прїидо́хъ сѣ́мѡ а҆ не бра́ка ра́ди: є҆гда́ же крⷭ҇ти́те мѧ̀, тогда̀ ѡ҆ сꙋпрꙋ́жествѣ возглаго́лете: нѣ́сть бо лѣ́по нечести́вой и҆ не кр҃щенной женѣ̀ и҆тѝ за хрⷭ҇тїа́нскаго мꙋ́жа. и҆ тща́шесѧ ца́рь вско́рѣ крⷭ҇ти́ти ѻ҆́нꙋю. патрїа́рхъ же поꙋчи́въ ѻ҆́нꙋю дово́лнѡ, ꙗ҆́же ѡ҆ ст҃ѣ́й вѣ́рѣ, ѡ҆гласѝ ко кр҃ще́нїю. И҆ є҆гда̀ ѹ҆гото́вана бы́сть ст҃а́гѡ кр҃ще́нїѧ кꙋпѣ́ль, молѝ ѻ҆́льга, да са́мъ ца́рь бꙋ́детъ воспрїе́мникъ є҆ѧ̀ ѿ кꙋпѣ́ли ст҃ы́ѧ: и҆ка́кѡ бо не хощꙋ̀, речѐ, крⷭ҇ти́тисѧ, а҆́ще не са́мъ ца́рь крⷭ҇тный ѻ҆те́цъ мнѣ̀ бꙋ́детъ, и҆ ѿидꙋ̀ ѿсю́дꙋ без̾ кр҃ще́нїѧ, вы́ же ѿвѣ́тъ бг҃ꙋ возда́сте ѡ҆ дꙋшѝ мое́й. соизво́ли ѹ҆̀бо ца́рь жела́нїю є҆ѧ̀, и҆ кр҃ще́на бы́сть бл҃же́ннаѧ ѻ҆́льга ѿ ст҃ѣ́йшагѡ патрїа́рха, а҆ са́мъ ца́рь сотвори́сѧ ѻ҆те́цъ є҆́й въ кр҃ще́нїи, воспрїе́мь ѻ҆́нꙋю ѿ ст҃ы́ѧ кꙋпѣ́ли, и҆ нареко́ша є҆́й и҆́мѧ є҆ле́на, ꙗ҆́коже и҆ пе́рваѧ въ хрⷭ҇тїа́нѣхъ цр҃и́ца, ма́терь кѡнстанті́на вели́кагѡ, є҆ле́на бы́сть и҆менова́нна. По кр҃ще́нїи же, ст҃ѣ́йшїй патрїа́рхъ лїтꙋргиса́въ, причастѝ тꙋ́ю бж҃е́ственныхъ та́инъ пречⷭ҇тагѡ тѣ́ла и҆ кро́ве хрⷭ҇то́вы, и҆ бл҃гословѝ ѻ҆́нꙋю, гл҃ѧ: бл҃гослове́на ты̀ въ жена́хъ рѡссі́йскихъ, ꙗ҆́кѡ ѡ҆ста́вила є҆сѝ тмꙋ̀, и҆ взыска́ла є҆сѝ свѣ́тъ и҆́стинный: многобо́жїе і҆́дѡлское возненави́дѣла є҆сѝ, є҆ди́наго же и҆́стиннаго бг҃а возлюби́ла є҆сѝ: сме́рти вѣ́чныѧ и҆збѣжа́ла є҆сѝ, живо́тъ же безсме́ртный тебѣ̀ ѡ҆брꙋчи́ла є҆сѝ: ѿсе́лѣ бл҃жи́ти тѧ̀ начнꙋ́тъ всѝ рѡссі́йстїи сы́ны. си́це ю҆̀ патрїа́рхъ бл҃гословѝ. Крⷭ҇ти́шасѧ же при не́й и҆ ѿ прише́дшихъ съ не́ю мно́зи ѻ҆боегѡ̀ по́ла, и҆ бы́сть ра́дость в царѣ́градѣ ѡ҆ кр҃ще́нїи вели́кїѧ кнѧги́ни рѡссі́йскїѧ, и҆ сотворѝ ца́рь пи́ръ ве́лїй въ то́й де́нь, и҆ веселѧ́хꙋсѧ сла́вѧще хрⷭ҇та бг҃а. По се́мъ па́ки бы́сть бесѣ́да царе́ва къ ѻ҆́льгѣ, нарече́нной во ст҃о́мъ кр҃ще́нїи є҆ле́нѣ, ѡ҆ бра́цѣ, и҆ ѿвѣща̀ є҆мꙋ̀ бл҃же́ннаѧ є҆ле́на: ка́кѡ мо́жеши мѧ̀ дще́рь твою̀ крⷭ҇тнꙋю поѧ́ти тебѣ̀ въ женꙋ̀; и҆́бо сїѐ не то́чїю въ зако́нѣ хрⷭ҇тїа́нстѣмъ, но и҆ въ пога́нстѣмъ скве́рно є҆́сть и҆ ѿме́тно ѻ҆ц҃ꙋ̀ дще́рь свою̀ въ женꙋ̀ себѣ̀ и҆мѣ́ти. и҆ речѐ къ не́й ца́рь: прехи́трила мѧ̀ є҆сѝ ѽ ѻ҆́льго. и҆ па́ки бл҃же́ннаѧ ѻ҆́льга къ царю̀ гл҃а: реко́хъ тебѣ̀ и҆ пре́жде, ꙗ҆́кѡ не тогѡ̀ ра́ди прїидо́хъ сѣ́мѡ, да ца́рствꙋю съ тобо́ю: довлѣ́етъ бо мнѣ̀ и҆ рѡссі́йскаѧ мона́рхїа съ сы́номъ мои́мъ: но да ѹ҆невѣ́щꙋсѧ безсме́ртномꙋ цр҃ю нбⷭ҇номꙋ хрⷭ҇тꙋ бг҃ꙋ, є҆го́же все́ю дꙋше́ю мое́ю возлюби́хъ, ꙗ҆́кѡ да и҆ црⷭ҇твїѧ є҆гѡ̀ вѣ́чнагѡ сподо́блюсѧ. Тогда̀ ца́рь ѡ҆ста́вивъ тще́тное жела́нїе своѐ и҆ плотскꙋ́ю любо́вь, возлюбѝ ю҆̀ дх҃о́вною любо́вїю ꙗ҆́кѡ дще́рь свою̀, и҆ да́въ є҆́й да́ры вели́ки, ѿпꙋстѝ ю҆̀ съ ми́ромъ. ѻ҆на́ же ѿходѧ́щи и҆з̾ царѧграда, по́йде къ ст҃ѣ́йшемꙋ патрїа́рхꙋ прїѧ́ти въ пꙋ́ть бл҃гослове́нїе, и҆ речѐ къ немꙋ̀: помоли́сѧ къ бг҃ꙋ ст҃ѣ́йшїй ѻ҆́ч҃е за мѧ̀ возвраща́ющꙋюсѧ въ свою̀ странꙋ̀, и҆дѣ́же сы́нъ мо́й въ пога́нскомъ заблꙋжде́нїи пребыва́етъ и҆ всѝ лю́дїе въ дре́внѣмъ нече́стїи ѹ҆твержде́ннїи ѡ҆камене́нни сꙋ́ть: да и҆зба́витъ ѹ҆́бѡ мѧ та́мѡ гдⷭ҇ь ѿ всѧ́кагѡ ѕла̀ твои́ми ст҃ы́ми мл҃твами. Патрїа́рхъ же речѐ къ не́й: дщѝ моѧ̀ ѡ҆ ст҃о́мъ дс҃ѣ вѣ́рнаѧ и҆ бл҃гослове́ннаѧ, хрⷭ҇то́съ, въ него́же кр҃ще́нїемъ ст҃ы́мъ ѡ҆блекла́сѧ є҆сѝ, то́й са́м да соблюде́тъ тѧ̀ ѿ всѧ́кагѡ ѕла̀, ꙗ҆́коже соблюдѐ нѡ́а ѿ пото́па, лѡ́та ѿ содо́ма, мѡѷсе́а съ і҆и҃лемъ ѿ фараѡ́на, дв҃да ѿ саꙋ́ла, данїи́ла ѿ ѹ҆́стъ льво́выхъ, трїе́хъ ѻ҆трокѡ́въ ѿ пе́щи: та́кѡ и҆ тебѐ да и҆зба́витъ ѿ всѧ́кїѧ напа́сти: бл҃гослове́нна бо є҆сѝ ты̀ въ ро́дѣ твое́мъ, и҆ бл҃жи́ти тѧ̀ бꙋ́дꙋтъ внꙋ́ки и҆ пра́внꙋки твоѝ въ послѣ́днѧѧ лѣ́та. сицево̀ бл҃гослове́нїе ѿ ст҃ѣ́йшагѡ патрїа́рха бл҃же́ннаѧ є҆ле́на прїѧ̀ па́че всѣ́хъ дража́йшихъ дарѡ́въ, кꙋ́пнѡ же прїѧ̀ и҆ поꙋче́нїе ѡ҆ чистотѣ̀ и҆ моли́твѣ, ѡ҆ постѣ̀ и҆ воздержа́нїи, и҆ ѡ҆ всѣ́хъ до́брыхъ дѣ́лѣхъ бг҃оꙋго́дномꙋ хрⷭ҇тїа́нскомꙋ житїю̀ подоба́ющихъ. Є҆ще́ же прїѧ̀ ѿ негѡ̀ и҆ честны́й крⷭ҇тъ, и҆ ст҃ы́ѧ і҆кѡ́ны, и҆ пресвѵ́теры, и҆ кли́рїки, и҆ кни̑ги, и҆ прѡ́чыѧ сщ҃е́нныѧ вє́щы, и҆ ѿи́де ра́дꙋѧсѧ во своѧ́ си. Повѣствꙋ́етсѧ же и҆ сїѐ, ꙗ҆́кѡ крⷭ҇тъ честны́й, є҆го́же ѻ҆на̀ ѿ рꙋ́къ ст҃ѣ́йшагѡ патрїа́рха прїѧ̀, и҆мѣ́ѧше написа́нїе сицево́е: ѡ҆бнови́сѧ рѡссі́йскаѧ землѧ̀ къ бг҃ꙋ ст҃ы́мъ кр҃ще́нїемъ, є҆́же прїѧ̀ бл҃же́ннаѧ ѻ҆́льга. то́й крⷭ҇тъ, по бл҃же́нной кончи́нѣ ст҃ы́ѧ ѻ҆́льги, храни́мый бы́сть вѣ́рными, по не́й ѡ҆ста́вшимисѧ, до лѣ́тъ вели́кагѡ кнѧ́зѧ кі́евскагѡ ꙗ҆росла́ва влади́мїровича, и҆́же созда́въ вели́кꙋю и҆ прекра́снꙋю цр҃ковь ст҃ы́ѧ софі́и, поста́вилъ въ не́й крⷭ҇тъ ѻ҆́ный во ѻ҆лтарѣ̀ на десно́й странѣ̀, ны́нѣ же ѹ҆жѐ не ѡ҆брѣта́етсѧ: и҆́бо многокра́тными разоре́нїи кі́евъ, со ст҃ы́ми, ꙗ҆̀же въ не́мъ, цр҃квами, ѡ҆пꙋстоша́емый быва́ше. но па́ки на повѣствова́нїе ѡ҆ ст҃ѣ́й ѻ҆́льгѣ ѡ҆брати́мсѧ.

Прише́дши въ кі́евъ но́ваѧ є҆ле́на, вели́каѧ кн҃ги́нѧ ѻ҆́льга, нача̀ ꙗ҆́кѡ со́лнце свѣ́томъ вѣ́ры тмꙋ̀ і҆́дѡлскагѡ нече́стїѧ прогонѧ́ти, и҆ ѡ҆мрачє́нныѧ просвѣща́ти, и҆ созда̀ пе́рвꙋю ѿ себѐ цр҃ковь во и҆́мѧ ст҃а́гѡ нїкола́а на ѻ҆ско́лдовой моги́лѣ, и҆ мнѡ́гїѧ ѿ кі́евлѧнъ ко хрⷭ҇тꙋ̀ ѡ҆братѝ. Но сы́на своего̀ свѧтосла́ва ника́коже можа́ше привестѝ въ ра́зꙋмъ и҆́стинный и҆ въ позна́нїе бг҃а: не внима́ше бо то́й словесє́мъ є҆ѧ̀: поне́же всѐ ѹ҆пражне́нїе є҆гѡ̀ бы́сть въ во́инскихъ дѣ́лѣхъ: бѧ́ше бо мꙋ́жъ хра́бръ и҆ любѧ́й бра̑ни, и҆ всѐ житїѐ своѐ бо́лѣе въ полцѣ́хъ и҆ ра́техъ не́же въ до́мѣ провожда́ше. къ ма́тери же, поꙋча́ющей и҆ ѹ҆вѣщава́ющей є҆го̀, глаго́лаше: а҆́ще прїимꙋ̀ хрⷭ҇тїа́нскꙋю вѣ́рꙋ и҆ кр҃ще́нїе, то̀ ѿстꙋ́пѧтъ ѿ менѐ болѧ́ре моѝ, и҆ воевѡ́ды, и҆ всѝ лю́ди, и҆ не бꙋ́детъ мнѣ съ кѣ́мъ проти́вꙋ сꙋпоста̑тъ ра́товати, и҆ ѻ҆ч҃ество на́ше защища́ти. Та́кѡ кнѧ́зь свѧтосла́въ ѿвѣщава́ше. Хотѧ́щымъ же крести́тисѧ не возбранѧ́ше. но не мно́зи бѧ́хꙋ ѿ велмо́жъ прїе́млющїи ст҃о́е кр҃ще́нїе, па́че же и҆ крⷭ҇ти́вшымсѧ рꙋга́хꙋсѧ: невѣ́рнымъ бо вѣ́ра хрⷭ҇тїа́нскаѧ ю҆ро́дство є҆́сть: а҆ ѿ проста́гѡ наро́да мно́жество прилага́шесѧ ко ст҃ѣ́й цр҃кви. По́йде же ст҃а́ѧ ѻ҆́льга и҆ въ вели́кїй но́вградъ, и҆ въ про́чыѧ гра́ды держа́вы своеѧ̀, и҆ всю́дꙋ, є҆ли́кѡ можа́ше, привожда́ше люде́й ко хрⷭ҇то́вой вѣ́рѣ, и҆ сокрꙋша́ше і҆́дѡлы, на мѣ́стѣхъ же и҆́хъ поставлѧ́ше честны́ѧ крⷭ҇ты̀, ѿ ни́хже по то́мъ мнѡ́га зна́менїѧ и҆ чꙋдеса̀ содѣ́ловахꙋсѧ во ѹ҆вѣре́нїе невѣ́рныхъ. Прїи́де же и҆ въ то̀ ѻ҆ч҃ество своѐ, въ не́мже роди́сѧ, въ ве́сь вы́бꙋтскꙋю, и҆ поꙋчѝ та́мѡ сро́дныѧ себѣ̀ лю́ди позна́нїю бг҃а. Є҆гда́ же во странѣ̀ то́й прїи́де къ бре́гꙋ рѣкѝ, глаго́лемой вели́кой, ѿ ю҆́га къ сѣ́верꙋ текꙋ́щей, и҆ бы́сть проти́вꙋ тогѡ̀ мѣ́ста, и҆дѣ́же въ рѣкꙋ̀ вели́кꙋю, и҆на́ѧ рѣка̀ ѿ восто́ка текꙋ́щаѧ, пско́ва нарица́емаѧ впа́даетъ, [бѧ́ше же тогда̀ на мѣ́стѣхъ ѻ҆́ныхъ лѣ́съ вели́къ, и҆ дꙋбра́вы мнѡ́ги] ви́дѣ ѻ҆б̾онъ по́лъ рѣкѝ, ѿ восто́ка трѝ пресвѣ́тлыѧ лꙋчѝ съ нб҃сѐ на та̀ мѣста̀ сходѧ́щыѧ, и҆ ѡ҆сїѧва́ющыѧ. не то́чїю же сама̀ ст҃а́ѧ то́й чꙋ́дный свѣ́тъ ви́дѣ, но и҆ всѝ съ не́ю бы́вшїи, и҆ возра́довасѧ бл҃же́ннаѧ велмѝ, и҆ бл҃годарѝ бг҃а ѡ҆ пресла́вномъ то́мъ видѣ́нїи, є҆́же предзна́меноваше є҆́й просвѣще́нїе бл҃года́тїю бж҃їею тоѧ̀ страны̀. и҆ ѡ҆брати́вшисѧ къ своемꙋ̀ сѷгклі́тꙋ, проро́чествова, глаго́лѧ: разꙋ́мно ва́мъ да бꙋ́детъ, ꙗ҆́кѡ и҆зволе́нїемъ бж҃їимъ на се́мъ мѣ́стѣ, трисїѧ́телными лꙋча́ми ѡ҆сїѧва́емомъ, и҆́мать бы́ти цр҃ковь прест҃ы́ѧ живонача́лныѧ трⷪ҇цы, и҆ гра́дъ вели́къ и҆ сла́венъ и҆ во все́мъ и҆з̾оби́ленъ и҆́мать созда́тисѧ. то̀ ре́кши, помоли́сѧ дово́лнѡ къ бг҃ꙋ, и҆ крⷭ҇тъ та́мѡ поста́ви. є҆́сть же и҆ до ны́нѣ хра́мъ моли́твенный на то́мъ мѣ́стѣ, на не́мже водрꙋзи́ла крⷭ҇тъ ѻ҆́льга ст҃а́ѧ. Ѡ҆бше́дши же мнѡ́гїѧ рѡссі́йскїѧ гра́ды проповѣ́дница хрⷭ҇то́ва, возврати́сѧ въ кі́евъ, и҆ мнѡ́гаѧ въ не́мъ бл҃га́ѧ ѡ҆ бз҃ѣ содѣ́ловаше. а҆́ще бо въ невѣ́рїи бы́вши и҆спо́лнена бѧ́ше дѣ́лъ до́брыхъ: кольмѝ па́че вѣ́рою ст҃о́ю просвѣти́вшисѧ, ѹ҆краша́шесѧ всѧ́кими добродѣ́тельми, тща́щисѧ до́брѣ ѹ҆годи́ти новопозна́нномꙋ бг҃ꙋ, созда́телю и҆ просвѣти́телю своемꙋ̀. Воспомѧнꙋ́ же ѡ҆ видѣ́нїи ѻ҆́номъ, є҆́же ви́дѣ при рѣцѣ̀ Пско́вѣ, посла̀ та́мѡ зла́та и҆ сребра̀ мно́гѡ, на созда́нїе цр҃кви трⷪ҇цѣ ст҃ѣ́й, и҆ повелѣ̀ при не́й лю́демъ населѧ́тисѧ, и҆ не въ до́лгомъ вре́мени бы́сть гра́дъ вели́къ пско́въ, ѿ рѣкѝ пско́вы нарица́емый, и҆ прославлѧ́шесѧ въ не́мъ и҆́мѧ прест҃ы́ѧ трⷪ҇цы.

Въ то̀ вре́мѧ вели́кїй кнѧ́зь свѧтосла́въ ѡ҆ста́вивши ма́терь свою̀ ѻ҆́льгꙋ ст҃ꙋ́ю въ Кі́евѣ, а҆ съ не́ю и҆ дѣ́ти своѧ̀: ꙗ҆ропо́лка, ѻ҆́̀льга, и҆ влади́мїра, и҆́де на бо́лгары. и҆ воева́въ зе́млю и҆́хъ, взѧ̀ градѡ́въ ѻ҆́смдесѧтъ, и҆ въ сто́лномъ и҆́хъ гра́дѣ Переѧ́славцѣ возлюбѝ жи́ти. а҆ бл҃же́ннаѧ ѻ҆́льга въ кі́евѣ пребыва́ющи, внꙋ́ки своѧ̀, дѣ́ти Свѧтосла́вли ѹ҆ча́ше хрⷭ҇тїа́нской вѣ́рѣ, є҆ли́кѡ мо́щно бѧ́ше дѣ́темъ разꙋмѣ́ти. ѻ҆ба́че крⷭ҇ти́ти и҆̀хъ не дерзнꙋ̀, да не нѣ́что ѕло̀ сотвори́тъ сы́нъ є҆ѧ̀ непокори́вый. и҆ ѡ҆ста́ви на во́ли гдⷭ҇ней бы́ти и҆̀мъ. Ме́длѧщꙋ же свѧтосла́вꙋ въ бо́лгарѣхъ, прїидо́ша печенѣ́ги неча́ѧннѡ на кі́евскїѧ предѣ́лы, и҆ ѡ҆бстꙋпи́вше гра́дъ кі́евъ, ра́товахꙋ на него̀, въ не́мже ст҃а́ѧ ѻ҆́льга съ внꙋ́ками свои́ми затвори́ласѧ. но не можа́хꙋ взѧ́ти гра́да: гдⷭ҇ь бо рабꙋ̀ свою̀ вѣ́рнꙋю хранѧ́й, защитѝ гра́дъ ѿ сꙋпоста́тѡвъ моли́твами є҆ѧ̀. Ѹ҆вѣ́давъ же и҆ свѧтосла́въ в̾ бо́лгарѣхъ наше́ствїе печенѣ́гѡвъ на кі́евъ, потща́сѧ ско́рѡ прїитѝ съ си́лою свое́ю, и҆ неча́ѧннѡ нападѐ на печенѣ́жскїѧ полкѝ, и҆ поразѝ и҆̀хъ, и҆ прогна̀ дале́че. и҆ вше́дъ въ кі́евъ, цѣлова̀ ма́терь свою̀ ѹ҆жѐ бо́льнꙋ сꙋ́щꙋю, и҆ па́ки хотѧ́ше ѡ҆ста́вити ю҆̀, и҆ и҆ти въ бо́лгары. и҆ гл҃а къ немꙋ̀ пла́чꙋщи бл҃же́ннаѧ ѻ҆́льга: почто̀ ѡ҆ставлѧ́еши мѧ̀ сы́не мо́й, и҆ ка́мѡ грѧде́ши; чꙋжи́хъ и҆ща̀, своѐ комꙋ̀ врꙋча́еши; ча̑да бо твоѧ̀ є҆щѐ ма́лы сꙋ́ть, а҆́зъ же стара̀ и҆ болна̀, и҆ ѹ҆жѐ ча́ю ско́рыѧ кончи́ны моеѧ̀, и҆ ѿше́ствїѧ моегѡ̀ къ жела́емомꙋ мнѣ̀ хрⷭ҇тꙋ̀, въ него́же вѣ́рꙋю. и҆ ѹ҆жѐ ны́нѣ ни ѡ҆ чесо́мже и҆но́мъ пекꙋ́сѧ, то́кмѡ ѡ҆ тебѣ̀ печа́лꙋю, ꙗ҆́кѡ мно́гѡ тѧ̀ ѹ҆чи́хъ и҆ моли́хъ ѡ҆ста́вити нече́стїе і҆́дѡлское, и҆ позна́ти пра́ваго бг҃а, є҆го́же а҆́зъ позна́хъ: ты́ же не бре́глъ є҆сѝ ѡ҆ се́мъ. и҆ вѣ́мъ, ꙗ҆́кѡ за твоѐ, є҆́же ко мнѣ̀ непослꙋша́нїе, жде́тъ тебѐ на землѝ недо́брый коне́цъ, а҆ по сме́рти неконча́емаѧ мꙋ́ка, ѹ҆гото́ваннаѧ невѣ̑рнымъ. ны́нѣ же понѐ сїѐ послѣ́днее и҆спо́лни проше́нїе моѐ: не ѿходѝ ника́може, до́ндеже а҆́зъ ѿ житїѧ̀ сегѡ̀ ѿидꙋ̀, и҆ погребена̀ бꙋ́дꙋ: тогда̀ и҆́деши, а҆́може восхо́щеши. По преставле́нїи же мое́мъ да ничто́же твори́ти надомно́ю по ва́шемꙋ пога́нскомꙋ ѻ҆бы́чаю, но пресвѵ́теры моѝ съ кли́рїки да погребꙋ́тъ грѣ́шное моѐ тѣ́ло, ꙗ҆́коже ѻ҆бы́чай є҆́сть хрⷭ҇тїа́нѡмъ. Моги́лы же надомно́ю да не де́рзнете ѡ҆сыпа́ти, ни три́зны твори́ти, но послѝ зла́то въ ца́рьградъ къ ст҃ѣ́йшемꙋ патрїа́рхꙋ, да то́й моли́твꙋ и҆ приноше́нїе къ бг҃ꙋ соверши́тъ ѡ҆ дꙋшѝ мое́й, и҆ да ѹ҆чреди́тъ ми́лостынею ни́щихъ. То̀ слы́шавъ свѧтосла́въ, пла́касѧ вельмѝ, и҆ всѧ̀ повелѣ̑ннаѧ ѿ неѧ̀ сотвори́ти ѡ҆бѣща́сѧ, то́кмѡ вѣ́ры ст҃ы́ѧ ѿрица́шесѧ. и҆ по трїе́хъ дне́хъ послѣ́днѣе и҆знемога́ше бл҃же́ннаѧ, и҆ причасти́сѧ бж҃е́ственныхъ та̑инъ пречⷭ҇тагѡ тѣ́ла, и҆ животворѧ́щїѧ кро́ве хрⷭ҇та̀ бг҃а на́шегѡ, и҆ всѧ̀ въ прилѣ́жномъ бы́сть моле́нїи къ бг҃ꙋ, и҆ къ пречи́стѣй бцⷣѣ, ю҆́же всегда̀ по бз҃ѣ помо́щницꙋ себѣ̀ и҆мѣ́ѧше: та́кожде призыва́ше и҆ всѧ̀ сты́ѧ. а҆ наипа́че ѡ҆ просвѣще́нїи по не́й землѝ рѡссі́йскїѧ моли́твꙋ дѣ́ѧше: прозрѧ́ше бо бꙋ̑дꙋщаѧ, и҆ мно́жицею во днѝ житїѧ̀ своегѡ̀ прⷪ҇ро́чески предглаго́лаше, ꙗ҆́кѡ просвѣти́тъ бг҃ъ лю́ди рѡссі́йскїѧ, и҆ мно́зи ѿ ни́хъ бꙋ́дꙋтъ вели́цыи ст҃і́и, чесомꙋ̀ вско́рѣ сбы́тисѧ просѧ́ше ѿ Бг҃а при кончи́нѣ свое́й. и҆ є҆щѐ моли́твѣ сꙋ́щей во ѹ҆стѣ́хъ є҆ѧ̀, честна́ѧ є҆ѧ̀ дꙋша̀ ѿ сою́зѡвъ плотски́хъ разрѣши́сѧ, и҆ въ рꙋ́цѣ бж҃їи ꙗ҆́кѡ првⷣнаѧ вни́де, и҆ та́кѡ пресели́сѧ ѿ земны́хъ въ нбⷭ҇наѧ, и҆ сподо́бисѧ черто́га безсме́ртнагѡ цр҃ѧ̀ хрⷭ҇та̀ бг҃а, и҆ пе́рваѧ ѿ землѝ рѡссі́йскїѧ ст҃а́ѧ ли́кꙋ ст҃ы́хъ причте́сѧ. Преста́висѧ же бл҃же́ннаѧ ѻ҆́льга, во ст҃о́мъ креще́нїи нарече́ннаѧ є҆ле́на, мѣ́сѧца і҆ꙋ́лїа въ пе́рвыйнадесѧть де́нь. Поживѐ въ сꙋпрꙋ́жествѣ ѿ дѣ́вства своегѡ̀ четы́редесѧть два̀ лѣ́та, а҆ пре́жде сꙋпрꙋ́жества бѧ́ше дѣви́ца соверше́ннагѡ во́зраста и҆ си́лы, ꙗ҆́кѡ близ̾ два́десѧти лѣ́тъ и҆мꙋ́щаѧ. По сме́рти мꙋ́жа своегѡ̀ въ десѧ́тое лѣ́то сподо́бисѧ ст҃а́гѡ креще́нїѧ. По креще́нїи же бг҃оꙋго́днѡ поживѐ пѧтьна́десѧть лѣ́тъ: всѣ́хъ же лѣ́тъ житїѧ̀ є҆ѧ̀ близ̾ девѧти́десѧти бѧ́ше. и҆ пла́касѧ по не́й вели́кїй кнѧ́зь свѧтосла́въ сы́нъ є҆ѧ̀, и҆ внꙋ́ки є҆ѧ̀, и҆ болѧ́ре, и҆ сано́вницы, и҆ всѝ лю́дїе пла́чемъ ве́лїимъ. и҆ погребена̀ бы́сть че́стнѡ по ѻ҆бы́чаю хрⷭ҇тїа́нскомꙋ. По преставле́нїи же ст҃ы́ѧ ѻ҆́льги сбы́шасѧ тоѧ̀ проречє́нїѧ, ꙗ҆̀же ѡ҆ ѕло́й кончи́нѣ сыно́внѣй, и҆ ѡ҆ до́бромъ просвѣще́нїи землѝ рѡссі́йскїѧ. Сы́нъ бо є҆ѧ̀ свѧтосла́въ, не по мно́гихъ лѣ́тѣхъ, [ꙗ҆́коже ѡ҆ то́мъ прпⷣбный Не́сторъ Пече́рскїй пи́шетъ] ѿ кнѧ́зѧ печенѣ́жскагѡ, кꙋрѧ̀ нарица́емагѡ въ бра́ни ѹ҆бїе́нъ бы́сть. и҆ ѿсѣ́къ то́й печенѣ́жскїй кнѧ́зь главꙋ̀ свѧтосла́влю, сотворѝ ко́сть главнꙋ́ю ча́шею себѣ̀, ѡ҆кова́въ ѻ҆́нꙋю зла́томъ, и҆ написа́въ на не́й словеса̀ сїѧ̑: И҆ща́й чꙋжда́гѡ своѐ погꙋблѧ́етъ. и҆ пїѧ́ше и҆з̾ тоѧ̀ ча́ши съ велмо́жи свои́ми, є҆гда̀ пирова́ша. Та́кѡ вели́каго кнѧ́зѧ кі́евскаго свѧтосла́ва и҆́горевича хра́бра и҆ непобѣди́ма въ бра́нѣхъ бы́вшаго, ѕла́ѧ пости́же кончи́на, по предрече́нїю ма́тере є҆гѡ̀, ꙗ҆́кѡ непослꙋшли́въ є҆́й бѧ́ше. И҆спо́лнисѧ же тоѧ̀ проро́чествїе и҆ ѡ҆ землѝ рѡссі́йской: преше́дшымъ бо по преставле́нїи є҆ѧ̀ два́десѧти лѣ́тамъ, внꙋ́къ є҆ѧ̀ влади́мїръ кр҃ще́нїе ст҃о́е прїѧ̀, и҆ всѧ̑ рѡссі́йскїѧ страны̀ вѣ́рою ст҃о́ю просвѣти́лъ. Созда́въ же цр҃ковь ка́меннꙋю во и҆́мѧ прест҃ы́ѧ бцⷣы [нарица́емꙋю десѧти́ннꙋю, ꙗ҆́кѡ дадѐ въ ню̀ влади́мїръ десѧ́тꙋю ча́сть ѿ и҆мѣ́нїй свои́хъ] и҆ совѣ́товавъ со ст҃ѣ́йшимъ лео́нтїемъ митрополі́томъ кі́евскимъ, и҆́же бы́сть по мїхаи́лѣ, из̾ѧ́тъ ѿ землѝ честны́ѧ мо́щы ст҃ы́ѧ ѻ҆́льги ба́бы своеѧ̀ цѣ́лы и҆ нетлѣ́нны, и҆ благоꙋха́нїѧ и҆спо́лнены, и҆ пренесѐ и҆̀хъ съ вели́кою че́стїю въ тꙋ̀ прест҃ы́ѧ бцⷣы цр҃ковь, и҆ не под̾ спꙋ́домъ, но ꙗ҆́вѣ положѝ и҆̀хъ, притека́ющихъ ра́ди къ не́й съ вѣ́рою, и҆ моле́нїємъ свои́мъ и҆сполне́нїе полꙋча́ющихъ: мнѡ́гаѧ бо и҆сцѣле́нїѧ всѧ́кимъ недꙋ́гѡмъ ѿ честны́хъ тѣ́хъ моще́й подава́хꙋсѧ.

Не подоба́етъ же прейтѝ молча́нїемъ и҆ сїѐ: бѧ́ше над̾ гро́бомъ є҆ѧ̀ въ стѣнѣ̀ цр҃ко́вной ѻ҆ко́нце. и҆ є҆гда̀ кто̀ съ вѣ́рою несꙋмнѣ́нною прихожда́ше къ ст҃ы́мъ є҆ѧ̀ моща́мъ, ѻ҆ко́нце то̀ са́мо собо́ю ѿверза́шесѧ, и҆ ꙗ҆́вѣ бѧ́ше таково́мꙋ и҆з̾ внѣ̀ стоѧ́щемꙋ, ви́дѣти ѻ҆ко́нцемъ внꙋ́трь лежа́щыѧ честны́ѧ чꙋдотво́рныѧ мо́щы, ѿ ни́хже и҆ сїѧ́нїю нѣ́коемꙋ чꙋ́дномꙋ и҆сходи́ти зри́мо быва́ше досто́йнымъ такова́гѡ зрѣ́нїѧ. и҆ ꙗ҆цѣ́мже кто̀ ѿ и҆мѣ́ющихъ вѣ́рꙋ недꙋ́гомъ ѡ҆держи́мый быва́ше, здра́вїе полꙋча́ше а҆́бїе. а҆ и҆́же прихожда́ше съ маловѣ́рїемъ, не ѿверза́шесѧ є҆мꙋ̀ ѻ҆ко́нце, нижѐ моще́й ст҃ы́хъ ви́дѣти можа́ше, а҆́ще бы и҆ въ са́мꙋю вше́лъ цр҃ковь, то́чїю гро́бъ зрѧ́ше, таковы́й нижѐ и҆сцѣле́нїѧ можа́ше полꙋчи́ти. а҆ вѣ́рꙋющїи всѧ̑, ꙗ҆̀же на по́льзꙋ дꙋша́мъ и҆ тѣлесє́мъ и҆́хъ, полꙋча́хꙋ мл҃твами ст҃ы́ѧ првⷣныѧ ѻ҆́льги, нарече́нныѧ въ просвѣще́нїи є҆ле́ны, блгⷣтїю же гдⷭ҇а на́шегѡ і҆и҃са хрⷭ҇та̀, є҆мꙋ́же сла́ва со ѻ҆ц҃е́мъ, и҆ ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.

І҆кѡ́на ст҃ы́ѧ кн҃ги́ни ѻ҆́льги.

Тропа́рь, гла́съ а҃:

Крила́ми бг҃оразꙋ́мїѧ впери́вши тво́й ѹ҆́мъ, возлетѣ́ла є҆сѝ превы́ше ви́димыѧ тва́ри, взыска́вши бг҃а и҆ творца̀ всѧ́ческихъ: и҆ того̀ ѡ҆брѣ́тши, па́ки рожде́нїе креще́нїемъ прїѧ́ла є҆сѝ: дре́ва живо́тнагѡ наслажда́ющисѧ, нетлѣ́нна во вѣ́ки пребыва́еши, ѻ҆́льго присносла́внаѧ.

Конда́къ, гла́съ д҃:

Воспое́мъ дне́сь бл҃годѣ́телѧ всѣ́хъ бг҃а, просла́вльшаго въ рѡссі́и ѻ҆́льгꙋ бг҃омꙋ́дрꙋю, да моли́твами є҆ѧ̀ пода́стъ дꙋша́мъ на́шымъ грѣхѡ́въ ѡ҆ставле́нїе.

---

Въ кото́рое лѣ́то, при кото́ромъ царѣ̀ гре́ческомъ, и҆ ѿ ко́егѡ патрїа́рха ѻ҆́льга бл҃же́ннаѧ прїѧ̀ ст҃о́е креще́нїе, ѡ҆ то́мъ нѣ́сть соверше́ннагѡ и҆звѣ́стїѧ: поне́же въ і҆сто́рїахъ и҆ лѣтописа́нїѧхъ мно́гое разногла́сїе ѡ҆брѣта́етсѧ.

Въ про́логѣ пи́шетсѧ, ꙗ҆́кѡ крести́сѧ ѻ҆́льга при царѣ̀ і҆ѡа́ннѣ цимисхі́и, ѿ патрїа́рха фѡ́тїа, въ лѣ́то бытїѧ̀ мі́ра ҂ѕуѯ҃г. си́це и҆ въ рꙋкопи́сныхъ че́тїѧхъ ѡ҆брѣта́етсѧ.

Въ кни́гѣ пра́вилъ ст҃ы́хъ ѻ҆ц҃ъ нарече́нной ко́рмчїѧ, въ ца́рство бл҃говѣ́рнагѡ царѧ̀ а҆леѯі́а мїха́йловича, въ патрїа́ршество же ст҃ѣ́йшагѡ ні́кѡна въ москвѣ̀ печа́таной, на листѣ̀ ѻ҆смо́мъ, ѡ҆ креще́нїи ст҃ы́ѧ ѻ҆́льги пи́шетсѧ, ꙗ҆́кѡ бѣ̀ въ ца́рство і҆ѡа́нна цимисхі́а, въ патрїа́ршество же васі́лїа скамадре́на.

Прпⷣбный не́сторъ лѣтопи́сецъ пече́рскїй кі́евскїй сказꙋ́етъ, ꙗ҆́кѡ вели́каѧ кнѧги́нѧ рѡссі́йскаѧ ѻ҆́льга крести́сѧ, въ ца́рство кѡнстанті́на, и҆́же бѣ̀ ѻ҆смы́й тогѡ̀ и҆́мене, прозыва́емый багрѧноро́дный, сы́нъ царѧ̀ льва̀ премꙋ́драгѡ, въ патрїа́ршество же полѷе́ѵктово.

Геѡ́ргїй ке́дринъ і҆сторїогра́фъ гре́ческїй, въ свое́мъ сѷно́ѱїсѣ, кр҃ще́нїю ѻ҆́льги ст҃ы́ѧ сказꙋ́етъ бы́ти въ ца́рство кѡнстанті́на багрѧноро́днагѡ, сы́на льво́ва, въ патрїа́ршество же ѳеофѷла́ктово.

Та́кожде и҆ дрꙋгі́й гре́ческїй і҆сторїогра́фъ і҆ѡа́ннъ кѷропала́тъ, въ ца́рство Кѡнстанті́ново, въ патрїа́ршество же ѳеофѷла́ктово креще́нїе ѻ҆́льги рѡссі́йскїѧ кнѧги́ни воспомина́етъ.

Є҆ще́ же и҆ тре́тїй гре́къ і҆ѡа́ннъ зѡна́росъ ѳеофѷла́кта патрїа́рха сказꙋ́етъ бы́ти въ то̀ вре́мѧ, є҆гда̀ крести́сѧ ѻ҆́льга.

Такова́гѡ ра́ди разногла́сїѧ, не дерзнꙋ́хомъ въ креще́нїи ст҃ы́ѧ ѻ҆́льги написа́ти и҆́мене царе́ва, ни патрїа́рхова. сꙋди́хомъ же здѣ̀ положи́ти рѧ́дъ царе́й и҆ патрїа́рхѡвъ, въ лѣ́та ѻ҆́наѧ бы́вшихъ, си́це.

Въ лѣ́то ѿ созда́нїѧ мі́ра ҂ѕтѯ҃ѕ, ца́рь мїхаи́лъ сы́нъ ѳео́фїла и҆ ѳеодѡ́ры, и҆згна́въ ст҃ѣ́йшаго патрїа́рха царегра́дскаго і҆гна́тїа, возведѐ на престо́лъ фѡ́тїа.

Въ лѣ́то ҂ѕтѻ҃є ца́рь мїхаи́лъ ѹ҆бїе́нъ, по не́мъ наста̀ на ца́рство васі́лїй македѡ́нъ, то́й и҆згна́въ фѡ́тїа съ престо́ла патрїа́ршагѡ, па́ки і҆гна́тїа ст҃а́го на престо́лъ возвратѝ.

Въ лѣ́то ҂ѕтп҃ѕ і҆гна́тїй ст҃ы́й преста́висѧ, фѡ́тїй па́ки престо́лъ прїѧ̀ и҆зволе́нїемъ царѧ̀ васі́лїа македѡ́на. ѿ сегѡ̀ царѧ̀ васі́лїа и҆ ѿ патрїа́рха фѡ́тїа при́сланъ бѣ̀ а҆рхїере́й въ рѡссі́ю, и҆́же вложи́лъ є҆ѵⷢ҇лїе во ѻ҆́гнь, и҆ не сгорѣ̀, а҆ въ то̀ вре́мѧ кнѧже́нїе и҆мѣ́лъ въ кі́евѣ ѻ҆́легъ, съ млады́мъ и҆́горемъ рꙋ́риковичемъ.

Въ лѣ́то ҂ѕтч҃а ца́рь васі́лїй македѡ́нъ ѹ҆́мре, наста̀ по не́мъ сы́нъ є҆гѡ̀ ле́въ премꙋ́дрый, и҆ па́ки фѡ́тїй ѿ патрїа́ршества и҆згна́сѧ, прїѧ́ же по не́мъ престо́лъ стефа́нъ бра́тъ царе́въ.

Въ лѣ́то ҂ѕтч҃ѕ стефа́нъ патрїа́рхъ ѹ҆́мре, а҆нато́лїй наста̀.

Въ лѣ́то ҂ѕтч҃и а҆нато́лїй ѹ҆́мре, наста̀ нїкола́й мѵ́стїкъ.

Въ лѣ́то ҂ѕу҃ѳ нїкола́й ѿ патрїа́ршества и҆згна́нъ. Є҆ѵѳѵ́мїй же дꙋховни́къ царе́въ на прⷭ҇то́лъ возведе́нъ.

Въ лѣ́то ҂ѕуа҃і ѻ҆́льга сочета́на бы́сть бра́комъ вели́комꙋ кнѧ́зю кі́евскомꙋ и҆́горю рꙋ́риковичꙋ.

Въ лѣ́то ҂ѕуѳ҃і ца́рь ле́въ премꙋ́дрый ѹ҆́мре, наста̀ по не́мъ сы́нъ є҆гѡ̀ кѡнстанті́нъ, ѻ҆смы́й тогѡ̀ и҆́мене, прозыва́емый багрѧноро́дный, патрїа́рхъ же є҆ѵѳѵ́мїй и҆згна́нъ бы́сть ѿ престо́ла, а҆ нїкола́й мѵ́стїкъ па́ки на престо́лъ возвраще́нъ бы́сть. По нїкола́ѣ бѣ̀ патрїа́рхъ стефа́нъ а҆масі́йскїй, по стефа́нѣ трѵ́фѡнъ, по трѵ́фѡнѣ ѳеофѷла́ктъ.

Въ лѣ́то ҂ѕуѯ҃в ѳеофѷла́ктъ патрїа́рхъ ѹ҆́мре, наста̀ полѷе́ѵктъ, ца́рствꙋющꙋ кѡнстанті́нꙋ багрѧноро́дномꙋ.

Въ лѣ́то ҂ѕуѯ҃г вели́каѧ кн҃ги́нѧ кі́евскаѧ ѻ҆́льга прїѧ̀ ст҃о́е кр҃ще́нїе въ царѣ́градѣ.

Въ лѣ́то ҂ѕуѯ҃и кѡнстанті́нъ багрѧноро́дный ѹ҆́мре, по не́мъ сы́нъ є҆гѡ̀ рѡма́нъ ца́рь бы́сть, по рѡма́нѣ нїки́форъ, прозыва́емый Фѡ́ка.

Въ лѣ́то ҂ѕуѻ҃з ст҃а́ѧ ѻ҆́льга преста́висѧ.

Въ то́же лѣ́то ца́рь нїки́форъ фѡ́ка ѹ҆бїе́нъ бы́сть, прїѧ́ же ца́рство і҆ѡа́ннъ цимисхі́й. въ нача́лѣ ца́рствованїѧ є҆гѡ̀ полѷе́ѵктъ патрїа́рхъ ѹ҆́мре, наста̀ по не́мъ васі́лїй скамадре́нъ.

Здѣ̀ всѧ́къ и҆зволѧ́ѧй да разсмо́тритъ, и҆ ви́дитъ кто̀ бѧ́ше ца́рь, и҆ кто̀ патрїа́рхъ во вре́мѧ креще́нїѧ ѻ҆́льги ст҃ы́ѧ.